Long Yu We Yu Lavem Jeova:

Jisas i talem se:

“Bambae yufala i save trutok, mo trutok ya bambae i mekem yufala i fri man.” (Jon 8:32) !Ol tok ya oli rili leftemap tingting blong yumi! Yes, i gat rod blong save trutok, nating se yumi laef long ol “las dei” ya, we plante man oli no moa tok tru mo fasin blong giaman i kam antap bigwan. (2 Timoti 3:1, NW) ?Yu yu tingbaot faswan taem ya we yu luksave se yu faenem trutok blong Baebol? !Hemia wan taem we yu bin harem se yu glad we yu glad!

I impoten tumas blong gat stret save long trutok mo blong traehad oltaem blong serem save ya wetem ol narafala man. Be i impoten tu blong gat ol fasin we oli laenap wetem trutok ya. Blong mekem olsem, yumi mas stap long laef ya we God i lavem yumi. ?Olsem wanem blong mekem samting ya? Toktok we Jisas i talem long naet bifo we hem i ded, i ansa long kwestin ya. Hem i talem long ol aposol ya we oli no lego hem, se: “Sipos yufala i stap obei long ol tok blong mi, bambae mi mi lavem yufala olwe, stret olsem we mi mi stap obei long ol tok blong papa blong mi, nao oltaem hem i stap lavem mi.”—Jon 15:10.

Yu luk we vas ya i talem se God i lavem Jisas from we Jisas i obei long ol tok blong God we i Papa blong hem. Yumi save mekem sem mak. Yumi mas mekem ol trutok oli wok long laef blong yumi evri dei, blong bambae God i lavem yumi oltaem. Long naet ya bifo we Jisas i ded, hem i talem se: “Naoia yufala i savegud ol samting ya. Oraet, sipos yufala i stap mekem olsem, bambae yufala i save harem gud.”—Jon 13:17.

Mifala i wantem tumas se buk ya i halpem yu blong mekem trutok i wok oltaem long laef blong yu, from we long rod ya nao bambae ‘God i stap lavem yu’ mo bambae hem i save ‘givim laef long yu we i no save finis.’—Jud 21.