Februari

Taem King Hesekia i kasem wan bigfala sik, hem i askem strong long Jehova blong i mekem hem i kam gud. Ale, Jehova i hilim hem. (2 King 20:​1-6) Be taem aposol Pol i krae i go long Jehova blong i tekemaot “ropnil we i stap stikim” hem, Jehova i no tekemaot problem ya. (2 Kor. 12:​7-9) King Herod i wantem kilim i ded aposol Jemes mo Pita. Ale, Jemes i ded, be wan enjel i sevem Pita. (Wok 12:​1-11) Maet yumi stap tingbaot se: ‘?From wanem Jehova i sevem Pita be i no sevem Jemes?’ Baebol i no talem. Be yumi save sua se Jehova i ‘neva mekem samting we i no stret.’ (Dut. 32:4) Samtaem, Jehova i ansarem ol prea blong yumi long rod we yumi neva tingbaot. Be from we yumi trastem hem, yumi no save komplen from rod we hem i yusum blong ansa long yumi.—Job 33:13. w23.11 21 ¶6

Aposol Jemes i talem se ol man we oli waes oli “rere blong obei.” Hemia i min se yumi mas wantem mo rere blong obei long olgeta we Jehova i trastem olgeta blong oli lidim yumi. I tru, Jehova i no wantem yumi blong obei long ol man we oli askem long yumi blong brekem ol komanmen blong hem. (Wok 4:​18-20) Maet yumi harem se i isi blong obei long Jehova i bitim we yumi obei long man, from we oltaem ol advaes we Jehova i givim oli stret gud. (Sam 19:7) Be ol man we oli lidim yumi oli no stret gud. Nating se i olsem, Papa blong yumi long heven i givim wok ya long ol perens, ol haeman blong gavman, mo ol elda, blong oli lidim yumi. (Prov. 6:20; 1 Tes. 5:12; 1 Pita 2:​13, 14) Taem yumi obei long olgeta, yumi stap obei long Jehova. w23.10 6 ¶2-3

Wan rod blong mekem bilif blong yumi i strong, hemia blong tingbaot paoa blong Jehova. Hem i gat paoa blong mekem evri promes blong hem oli kamtru. Hem i God Ya We i Gat Olgeta Paoa. (Job 42:2; Mak 10:27; Efes. 3:20) Hem i talem long Ebraham mo Sera se bambae tufala i gat wan boe taem tufala i olfala. (Jen. 17:​15-17) Mo tu, hem i talem long Ebraham se bambae hem i givim kantri ya Kenan, long ol pikinini we bambae oli kamaot biaen long hem. Long olgeta yia ya we ol pikinini blong Ebraham, hemia ol man Isrel, oli slef long Ijip, i luk olsem se promes ya blong Jehova bambae i neva kamtru. Be i no olsem. Mo tu hem i talem long Meri, wan yang gel we i no save man yet, se bambae hem i bonem wan boe. Hemia bambae i mekem promes ya we Jehova i talemaot plante taosen yia bifo long garen blong Iden, i kamtru. (Jen. 3:15) Taem yumi tingbaot ol promes we Jehova i mekem, mo olsem wanem hem i mekem oli kamtru, yumi bilif strong se hem i gat paoa blong mekem promes ya blong niufala wol i kamtru.—Jos. 23:14; Aes. 55:​10, 11. w23.04 28 ¶10-12

Jehova i ansarem prea blong Deved blong tekemaot hem long ol enemi blong hem. (1 Saml. 19:​10, 18-20; 2 Saml. 5:​17-25) Yumi tu yumi save sua long samting ya. (Sam 145:18) Maet Jehova i no ansarem ol prea blong yumi olsem we yumi ekspektem. Pol i askem God blong i tekemaot ‘wan samting we i olsem wan ropnil we i stap stikim hem.’ Long tri defren taem, Pol i prea mo i talemaot stret problem we hem i stap fesem. ?Olsem wanem, Jehova i ansarem ol prea ya? Yes, be i no olsem we Pol i wantem. Jehova i no tekemaot problem ya, be hem i givim paoa we hem i nidim blong gohed long wok blong Hem. (2 Kor. 12:​7-10) Yumi tu, maet samtaem yumi kasem ansa blong ol prea blong yumi long wan rod we yumi no tingbaot. Be yumi sua se Jehova i save beswan rod blong halpem yumi. Antap moa, hem “i save mekem plante moa samting i bitim olgeta samting we yumi askem no tingbaot.” (Efes. 3:20) From samting ya, hem i save ansarem ol prea blong yumi long taem o long rod we yumi no tingbaot. w23.05 8-9 ¶4-6

Sam samtaem, i gud yumi lukluk bakegen long promes blong Baebol long saed blong laef bakegen. ?From wanem? From we yumi neva save, maet yumi kasem wan rabis sik o wan we yumi lavem hem tumas i ded. (Pri. 9:11; Jem. 4:​13, 14) Hop blong yumi long laef bakegen i save halpem yumi blong stanap strong long ol trabol olsem. (1 Tes. 4:13) Baebol i mekem yumi sua se Papa blong yumi long heven i save gud yumi mo i lavem yumi tumas. (Luk 12:7) Traem tingbaot, Jehova i mas save gud yumi blong mekem yumi laef bakegen wetem ol semfala fasin mo ol memori we yumi bin gat bifo. Jehova i lavem yumi tumas, taswe hem i mekem se yumi save laef olwe, nating sipos hem i mas mekem yumi laef bakegen. ?From wanem yumi bilif long promes blong laef bakegen? From we yumi trastem Man we i mekem promes ya, se hem i wantem tumas mo i gat paoa blong mekem promes ya i kamtru. w23.04 8-9 ¶2-4

Josef mo Meri i wok had tugeta blong mekem frensip blong tufala wetem Jehova i kam strong. Tufala i kasemsave se i impoten blong wosipim Jehova tugeta olsem wan famle. (Luk 2:​22-24; 4:16) !Hemia i wan gudfala eksampol long ol kapol tede! Olsem Josef mo Meri, sipos yu gat ol pikinini, maet i had blong go long ol miting o makemaot taem blong famle wosip. Mo tu, maet i had moa blong yutufala i faenem taem blong stadi mo prea tugeta. Be tingbaot se taem yutufala i wosipim Jehova tugeta, yutufala i kam klosap moa long hem mo long yutufala. Taswe i gud blong putum wosip blong Jehova long fasples. Sipos yutufala i gat problem long mared, maet i had blong yutufala i mekem famle wosip tugeta. Maet i gud yutufala i tokbaot wan sot topik we yutufala i laekem. Hemia i save givhan long yutufala blong lavlavem yutufala, mo pulum yutufala blong wantem wosipim Jehova tugeta. w23.05 22 ¶7-8

?Olsem wanem fasin blong fraet long Jehova i halpem Obadaea? Fasin ya i mekem se hem i tok tru mo ol narafala oli save trastem hem. Taswe king i putumap hem blong i lukaot long ol samting long haos blong hem. (Skelem wetem Nehemaea 7:2.) Mo tu fasin ya i givhan long hem blong gat strong tingting, mo hemia wan fasin we hem i rili nidim. Hem i laef long taem ya we rabis King Ehab i rul. (1 King 16:30) Mo tu, waef blong hem, Jesebel we i stap wosipim Bal, i no laekem Jehova nating, taswe hem i wantem finisim tru wosip long kingdom blong Isrel long not. Antap long hemia, hem i kilim plante profet blong God i ded. (1 King 18:4)Taem Jesebel i stap ronem ol man blong God blong kilim olgeta i ded, Obadaea i tekem 100 long olgeta mo i haedem olgeta ‘we 50 long wan hol blong ston mo 50 long narawan, mo i stap givim bred mo wota long olgeta.’ (1 King 18:​13, 14) Sipos Jesebel i faenemaot samting ya, bambae hem i kilim Obadaea i ded. I sua se Obadaea i fraet mo hem i no wantem ded. Be from we Obadaea i lavem tumas Jehova mo olgeta we oli mekem wok blong hem, hem i rere nomo blong lusum laef blong hem. w23.06 16 ¶9-10

Jehova i gohed blong lidim ol man blong hem tede, olsem we hem i stap mekem bifo. Hem i yusum Tok blong hem Baebol mo Boe blong hem we i hed blong kongregesen. ?I gat ol klia pruf we i soemaot se Jehova i gohed blong yusum ol man tede? Yes. Traem tingbaot samting we i hapen afta long yia 1870. Charles Taze Russell mo ol fren blong hem oli stat blong kasemsave se 1914 i wan impoten yia blong Kingdom blong God. (Dan. 4:​25, 26) Oli kasemsave samting ya taem oli mekem risej long Baebol mo trastem se bambae oli save luk profet tok ya i kamtru. ?Olsem wanem? ?Jehova i lidim olgeta long risej ya? I klia se yes. Ol samting we oli hapen long 1914 oli pruvum klia se Kingdom blong God i stat blong rul. Taem Wol Wo I i stat, long sem taem ya i gat ol strong sik, graon i seksek bigwan, mo kakae i sot. (Luk 21:​10, 11) Yes, i klia se Jehova i stap yusum ol Kristin man ya blong halpem ol man blong hem. w24.02 22 ¶11

Yumi ol man blong Jehova, yumi save se hem i lavem yumi mo hem i wantem we yumi gat wan gudfala laef. (Rom 8:​35-39) Mo tu, yumi sua se oltaem ol rul blong Baebol oli givhan long yumi sipos yumi folem olgeta. (Aes. 48:​17, 18) ?Be bambae yumi mekem wanem sipos yumi fesem wan problem we yumi no tingbaot? Maet wan memba blong famle i mekem wan samting we yumi harem nogud from. Maet yumi kasem wan bigfala sik we i mekem se yumi save mekem smol nomo long wok blong Jehova, yumi fesem trabol from wan disasta, o maet oli mekem nogud long yumi from bilif blong yumi. Taem yumi fesem ol problem olsem, maet yumi stap tingting se: ‘?From wanem samting ya i hapen long mi? ?Mi mi mekem wan samting we i rong? ?Hemia i min se Jehova i no moa blesem mi?’ ?Yu yu harem olsem samtaem? Sipos yes, yu no mas harem nogud. Plante gudfala man blong Jehova tu oli bin gat ol semfala filing.—Sam 22:​1, 2; Hab. 1:​2, 3. w23.04 14 ¶1-2

Taem wan samting i pulum yumi blong mekem i no stret, yumi mas kwik blong sakemaot eni tingting o aksen we i save spolem frensip blong yumi wetem God. Jehova i wantem se yumi ‘obei long hem long fulhat blong yumi.’ (Rom 6:17) Oltaem ol samting we hem i askem long yumi blong mekem, oli blong givhan long yumi mo yumi no save jenisim ol loa blong hem. (Aes. 48:​17, 18; 1 Kor. 6:​9, 10) Setan i yusum ol man blong mekem i nogud long yumi mo spolem filing blong yumi, blong mekem se yumi no moa holemstrong. Mak blong hem i blong “kakae” yumi, mo spolem frensip blong yumi wetem Jehova. (1 Pita 5:8) Long taem blong ol faswan Kristin, ol man oli tok strong long olgeta, oli wipim olgeta, mo oli kilim olgeta from we oli gat strong tingting blong stanap strong. (Wok 5:​27, 28, 40; 7:​54-60) Tede, Setan i gohed yet blong yusum fasin agens. Yumi luk samting ya i stap hapen long Rasia mo long ol narafala kantri, we ol man blong agens oli stap mekem i nogud o atakem ol brata mo sista long plante defren rod. Setan i no yusum fasin agens nomo, be hem i yusum “ol giaman trik” tu.—Efes. 6:11. w23.07 15-16 ¶6-9

Taem yu stadi moa long tok blong God, bambae lav we yu gat long Jehova i kam bigwan moa. Lav ya bambae i pusum yu blong folem wanem we yu lanem. Yu mekem ol gudfala desisen folem ol rul blong Baebol. Yu jenisim fasin mo ol aksen blong yu from yu wantem mekem God i glad. Olsem we wan pikinini i folem fasin blong perens blong hem, yu tu yu folem fasin blong Papa blong yu long heven. (Efes. 5:​1, 2) Maet yumi save askem se: ‘?Lav we mi gat long Jehova naoia i strong moa i bitim faswan taem we mi kam wan Kristin? ?Stat taem mi baptaes, mi mi traehad moa blong gat sem tingting mo fasin olsem Jehova, speseli blong soemaot lav long ol brata mo sista?’ Sipos yu luksave se “lav ya we yu gat fastaem” i no moa strong olsem bifo, yu no mas harem nogud. Sem samting olsem i bin hapen long ol fas Kristin. Be Jisas i no lego olgeta mo bambae hem i no lego yumi tu. (Rev. 2:​4, 7) Hem i save se yumi naf blong gat sem lav ya bakegen olsem we yumi gat, taem yumi jes lanem trutok. w23.07 8 ¶2-3

Aposol Pita i mekem plante mastik. Fastaem, hem i trastem hem wan bitim mak, mo i tok flas se bambae hem i gohed blong folem Jisas nating se ol narafala aposol oli lego hem. (Mak 14:​27-29) Biaen, Pita i no gohed blong stap wekap be hem i slip. (Mak 14:​32, 37-41) Mo afta, hem i lego Jisas. (Mak 14:50) Biaen bakegen, Pita i giaman tri taem se hem i no save Jisas, mo hem i mekem tok blong hem i strong taem i talem se God bambae i panisim hem sipos hem i giaman. (Mak 14:​66-71) ?Pita i mekem wanem taem hem i luksave se hem i mekem wan bigfala sin? Hem i harem nogud tumas mo i krae. (Mak 14:72) Jisas i no tok strong long Pita from nogud samting we hem i mekem, be hem i talem long Pita se bambae hem i givim plante moa wok long hem. (Jon 21:​15-17) Pita i save se hem i bin mekem wan bigfala sin, be hem i gohed blong traehad. ?From wanem? From hem i sua se Masta blong hem, Jisas, i lavem hem yet. ?Yumi lanem wanem long eksampol blong Pita? Jehova i wantem we yumi sua se hem i lavem yumi, mo i rere blong fogivim yumi.—Rom 8:​38, 39. w24.03 18-19 ¶13-15

Ol doti fasin blong seks oli save mekem man i sem, i harem se hem i nating nomo, i mekem woman i gat pikinini we hem i no wantem, mo i mekem famle i seraot. Taswe i waes blong stap longwe long “haos” blong woman we i stupid mo no kakae wetem hem. Mo tu, plante man we oli lusum frensip blong olgeta wetem Jehova oli kasem ol rabis sik we oli save ded from. (Prov. 7:23) Ol Proveb 9:18 i talem se: “Ol gest blong hem, oli stap dip insaed long Gref.” ?From wanem plante man oli akseptem invetesen blong woman ya we i lidim olgeta i go blong ded nomo? (Prov. 9:​13-18) Wan trap we yumi mas lukaot gud moa long hem, hemia ponografi. Sam man oli ting se fasin blong lukluk ponografi i no save spolem olgeta. Be ponografi i save spolem ol man, i mekem oli no moa respektem olgeta wan mo ol narafala, mo i mekem i had blong oli lego fasin ya. Sipos wan man i stap lukluk ol rabis pija, bambae i had blong hem i fogetem. Antap moa, ponografi i no givhan long man blong i sakemaot filing blong seks, be i mekem ol filing ya oli kam strong moa. (Kol. 3:5; Jem. 1:​14, 15) Taswe ol man we oli lukluk ponografi, oli stap mekem enikaen doti fasin blong seks. w23.06 23 ¶10-11

Nating se ol narafala nesen oli traem blong faet agensem wol paoa blong Inglan mo Amerika, be bambae oli no winim. Yumi save samting ya from we “ston” ya we i representem Kingdom blong God bambae i bangem leg blong statiu ya we i minim Inglan mo Amerika. (Dan. 2:​34, 35, 44, 45) ?Yu yu sua se profet tok ya long saed blong tufala leg ya daon i tru? Sipos yes, hemia i sud gat paoa long laef blong yu. Bambae yu no traehad tumas blong kasem plante mane o sas samting long wol ya we i no longtaem bambae i lus. (Luk 12:​16-21; 1 Jon 2:​15-17) Taem yu kasemsave long profet tok ya, bambae yu luksave from wanem wok blong prij mo tijim ol man i impoten. (Mat. 6:33; 28:​18-20) Afta we yu stadi long ol profet tok ya, i gud yu askem se: ‘?Ol desisen blong mi oli soemaot se mi sua fulwan se i no longtaem Kingdom blong God bambae i finisim olgeta gavman blong man?’ w23.08 11 ¶13-14

Sipos yu gat tingting daon, bambae yu luksave se yu no moa naf blong mekem sam samting from yia blong yu, helt blong yu, o situesen i jenis. Olsem Basilae, yu mas rere blong talem no taem yu luksave se yu no moa naf blong mekem wan wok. (2 Saml. 19:​35, 36) Olsem Moses, akseptem help mo givimaot wok long ol narafala taem yu luk se i stret. (Eks. 18:​21, 22) Taem yu gat tingting daon, bambae yu no traem mekem samting we yu no naf blong mekem, nao yu kam taet. Mo tu, yu no mas blemem yu wan from nogud desisen blong narafala. Yumi no save mekem desisen long bihaf blong ol narafala o blokem ol rabis frut we i save kamaot from ol nogud desisen we oli mekem. Maet wan yangfala i mekem desisen blong stop blong mekem wok blong Jehova. Desisen ya i save mekem ol perens blong hem oli harem nogud bitim mak. Be sipos perens i blemem olgeta from nogud desisen we pikinini i tekem, i olsem we oli karem wan hevi samting. Jehova i no wantem se oli karem hevi samting ya. w23.08 29-30 ¶11-12

Samson i wan sinman olsem yumi, taswe samtaem hem i mekem nogud desisen. Wan desisen we hem i mekem i lidim hem blong kasem bigfala trabol. Afta we Samson i stat blong mekem wok blong jaj, “hem i luk wan woman long Krik Blong Sorek, mo i laekem hem tumas. Nem blong hem Delila.” Be hem i promes finis blong mared long wan woman Filistia, mo hemia i folem “tingting blong Jehova,” we i “stap lukaot rod blong agensem ol man Filistia.” Afta long hemia, Samson i stap long haos blong wan prostitut long taon ya Gasa long Filistia. Long taem ya, Jehova i givim paoa long Samson blong tekemaot get blong taon ya. Hemia i mekem se taon ya i no moa strong. (Jaj. 14:​1-4; 16:​1-3) Be from we Delila i wan woman Isrel, frensip blong Samson wetem hem i no givim janis blong faet agensem ol man Filistia. Delila i kasem bigfala mane blong putum Samson i go long han blong ol man Filistia. w23.09 5 ¶12-13

Fasin luksave i save givhan long yumi blong stap kwaet. Man we i gat fasin luksave, i stap kwaet taem narafala i agensem bilif blong hem. Plante taem man i no talemaot from wanem hem i askem kwestin long saed blong bilif blong yumi. Taswe bifo we yumi ansa, i gud yumi tingbaot se maet yumi no save risen from wanem man ya i askem kwestin ya. (Prov. 16:23) Tingbaot samting we Gideon i mekem, taem ol man Efrem oli kros long hem from we hem i no singaotem olgeta blong joen long faet agensem ol enemi blong Isrel. ?Wanem nao i mekem se oli kros olsem? Maet oli gat flas tingting. Nating se i olsem wanem, Gideon i gat fasin luksave nao i ansa long kwaet fasin. ?Wanem i kamaot from? Baebol i talem se: “Taem hem i toktok olsem long olgeta, oli no moa kros.”—Jaj. 8:​1-3. w23.09 16 ¶8-9

Jehova mo Jisas i fren gud, sem mak olsem wan papa mo boe blong hem. I sua se Jehova i mas harem nogud bigwan taem i luk we oli mekem nogud long Boe blong hem, oli sakemaot hem, mo oli mekem hem i safa. Eni perens we i lusum wan pikinini long ded, i kasemsave long filing ya blong harem nogud taem wan pikinini i ded. Yumi bilif strong long promes blong laef bakegen. Be taem wan we yumi lavem i ded, yumi harem nogud yet blong longtaem long hat blong yumi. Eksampol ya i halpem yumi blong kasemsave se Jehova i mas harem nogud bigwan, taem i wajem Boe blong hem we i lavem tumas i safa mo i ded long 33 K.T. (Mat. 3:17) Stat naoia go kasem Memoriol, taem yu stadi yu wan o long Famle Wosip, i gud yu stadi moa long ransom. Mo long dei blong Memoriol, no foget blong wajem spesel program blong Moning Wosip. Taem yumi rerem hat blong yumi from Memoriol, bambae yumi naf blong halpem ol narafala tu blong kasem ol gudfala samting from Memoriol.—Esra 7:10. w24.01 11 ¶10-12

Wan rod blong kasem paoa long Jehova hemia taem yumi prea long hem. Taem yumi prea, Jehova i save givim “paoa ya we i bigwan bitim mak.” (2 Kor. 4:7) Mo tu, yumi save kasem paoa taem yumi ridim Baebol mo tingting dip long hem. (Sam 86:11) Ol tok blong Jehova long Baebol oli gat “paoa” mo oli “stap wok.” (Hib. 4:12) Taem yu prea mo yu ridim Baebol, bambae yu kasem paoa ya we yu nidim blong stanap strong, holemtaet glad, mo finisim wan wok we i had. Makem olsem wanem Jehova i givim paoa long profet Jona. Jona i fraet blong go long ples we Jehova i sanem hem long hem, ale hem i jam long wan sip mo i go long wan defren ples. From samting ya, klosap hem i lusum laef blong hem long wan strong win mo i putum laef blong ol man long sip tu long denja. Taem ol boskru oli sakem hem i go long solwota, wan bigfala fis i solemdaon hem. Jona i stap long wan ples we i tudak we i tudak, long bel blong wan bigfala fis.?Hem i mekem wanem blong kasem paoa? Hem i prea long Jehova.—Jona 2:​1, 2, 7. w23.10 13 ¶4-6

Nating se aposol Pita i raetem tufala leta blong hem long ol Kristin long faswan handred yia, be Jehova i meksua se oli stap long Tok blong Hem Baebol. Long rod ya, yumi tu yumi save kasem ol gudfala samting long ol leta ya. (Rom 15:4) Ol man we oli stap raonabaot long yumi oli no bilif long ol profet tok blong Baebol. Samfala oli agensem mo jikim yumi from we plante yia finis yumi stap talem se en bambae i kam. Samfala oli stap talem se en bambae i neva kam. (2 Pita 3:​3, 4) Sipos yumi harem ol tok olsem long wok blong prij, long ples blong wok, o long wan famle, maet yumi save gat tu tingting. Pita i tokbaot samting we i save halpem yumi. Maet samfala oli ting se Jehova i slo tumas blong finisim rabis wol ya. Be ol tok blong Pita i save halpem yumi blong tingbaot se tingting blong Jehova long saed blong taem, i defren olgeta long tingting blong man. (2 Pita 3:​8, 9) Long tingting blong Jehova, wan taosen yia i sem mak long wan dei nomo. Mo Jehova i gat longfala tingting from hem i no wantem se wan man i lus. Be taem dei blong hem i kamtru, bambae hem i finisim rabis wol ya. w23.09 26-27 ¶2-5

?From wanem aposol Pol i raetem leta ya i go long ol Hibru Kristin long Judia? Hem i mekem olsem from tu risen. Faswan, hemia blong leftemap tingting blong olgeta. Bifo, plante long olgeta oli stap folem skul blong ol man Jiu. Mo plante long ol lida blong ol man Jiu oli tok nogud long olgeta taem oli kam Kristin. ?From wanem? From we ol Kristin oli no gat wan prapa tempol blong mekem wosip long hem, oli no gat wan olta blong mekem ol sakrefaes i go long God, mo oli no gat ol pris blong mekem wok blong olgeta. Hemia i save mekem tingting blong ol disaepol blong Kraes i foldaon mo mekem bilif blong olgeta i kam slak. (Hib. 3:​12, 14) Mo tu, maet sam oli stat blong gat tingting ya blong gobak long skul blong ol man Jiu. Nambatu, Pol i soemaot klia long ol Hibru Kristin ya se oli no stap traehad blong kasemsave long ol niufala tijing o ol dip tijing we i stap insaed long Tok blong God, we i olsem “strong kakae.” (Hib. 5:​11-14) I klia se sam long olgeta oli stap folem yet Loa blong Moses. w23.10 24-25 ¶3-4

Sam woman oli jusum blong no mared. (Mat. 19:​10-12) Jehova mo Jisas i no luklukdaon long ol Kristin we oli singel. Raon long wol, ol singel sista oli olsem ol gudfala eksampol long kongregesen. From we oli lavem mo kea long ol narafala, oli kam olsem ol sista mo mama blong plante long kongregesen. (Mak 10:​29, 30) Samfala oli mekem wok blong Jehova fultaem. Ol sista oli olsem wan bigfala ami long fulwol we oli wok strong long wok blong prij. (Sam 68:11) Yu save mekem plan naoia blong mekem wok blong Jehova fultaem. Maet yu save kam wan paenia, wan konstraksen volontia, o wan Betelaet. I gud yu prea from mak we yu wantem kasem. Mo tu, yu toktok long ol narafala we oli kasem wan mak finis, mo faenemaot samting we yu mas mekem blong kasem mak ya. Biaen, yu mekem wan gudfala plan. Sipos yu kasem mak ya blong mekem wok blong Jehova fultaem, hemia i olsem wan doa we i open long yu blong mekem moa long wok blong Jehova. w23.12 22 ¶16-17

Naoia we bigfala trabol i stap kam klosap moa, yumi luksave se i impoten tumas we yumi obei long komanmen ya blong mekem wok blong prij. Be maet yumi faenem i had blong prij, sipos yumi fesem problem long saed blong mane o fasin agens long wok blong prij. ?Wanem i save halpem yumi blong putum Kingdom i stap long fasples? Yumi mas trastem se “Jehova komanda blong ol ami” i stap wetem yumi. Bambae hem i sapotem yumi sipos yumi putum Kingdom i stap long fasples long laef blong yumi. Taswe yumi no nid blong fraet nating. (Hag. 2:4) Jehova i wantem se yumi putum tingting blong yumi i stap nomo long wok ya blong mekem disaepol, blong sevem laef blong ol man. Hagae i leftemap tingting blong ol man blong God blong oli stat bakegen blong mekem tabu wok, olsem wok ya blong bildim bak tempol. Sipos oli mekem samting ya, Jehova i promes se bambae hem i “sanem wan blesing i kam.” (Hag. 2:​18, 19) Yumi tu, yumi save trastem se Jehova bambae i blesem ol traehad blong yumi, sipos yumi putum wok blong hem i stap long fasples. w23.11 16 ¶8; 17 ¶11

Long leta we aposol Pol i raetem i go long ol man Rom, hem i talem se olgeta man oli sinman. Sipos i olsem, ?from wanem God i save glad long yumi mo luk yumi olsem ol stret man? Blong givhan long ol Kristin blong faenem ansa blong kwestin ya, Pol i tokbaot Ebraham. Jehova i talemaot se Ebraham i wan stret man taem hem i stap long kantri ya Kenan. ?From wanem Jehova i talemaot se Ebraham i wan stret man? ?Hemia from we Ebraham i obei gud long Loa blong Moses? Nogat. (Rom 4:13) Loa ya, Jehova i givim long nesen blong Isrel bitim 400 yia afta we hem i talemaot se Ebraham i wan stret man. Taswe, ?wanem nao i mekem se God i luk Ebraham olsem wan stret man? Jehova i kaen tumas long Ebraham, mo i talemaot se hem i wan stret man from bilif blong hem.—Rom 4:​2-4. w23.12 3 ¶4-5

Profet Natan i talem tok we i stap long vas blong tede long King Deved, be long sem naet ya, Jehova i talem long Natan se i no Deved we bambae i bildim tempol. (1 Kron. 17:​3, 4, 11, 12) ?Deved i mekem wanem taem hem i harem mesej ya? Hem i tingbaot moa blong rerem mane, mo ol samting we boe blong hem Solomon bambae i nidim blong projek ya. (1 Kron. 29:​1-5) Stret afta long taem ya we Deved i save se i no hem we bambae i bildim tempol, Jehova i mekem wan kontrak wetem hem. Jehova i promes se wan pikinini we i kamaot biaen long hem bambae i rul blong olwe. (2 Saml. 7:16) Traem tingbaot, long niufala wol long Wan Taosen Yia Rul Blong Kraes, !Deved bambae i haremgud tumas blong save se King Jisas, i wan pikinini we i kamaot biaen long hem! Stori ya i halpem yumi blong luksave se, nating sipos yumi no save mekem evri samting we yumi wantem mekem long wok blong Jehova, be God blong yumi bambae i givim plante narafala blesing we yumi no tingbaot. w23.04 16 ¶8-10

Maet yu luk se i gat sam buk blong Baebol we i save leftemap tingting blong yu taem yu fraet. Eksampol, maet yu luk se buk blong Job, Ol Sam, Ol Proveb, mo ol tok blong Jisas long Matiu japta 6, i save leftemap tingting blong yu. Taem yu prea mo ridim Baebol, bambae yu harem gud. Yumi save sua se oltaem Jehova bambae i lukaot gud long yumi, taem yumi fesem wan hadtaem. Bambae yumi neva stap yumi wan. (Sam 23:4) Jehova i promes blong lukaot gud long yumi, mekem yumi stap strong, sapotem yumi, mo mekem yumi harem gud. Aesea 26:3 i tokbaot Jehova se: “Bambae yu lukaot gud long olgeta we oli dipen long yu fulwan. Bambae yu mekem we oli gohed blong gat pis, from we olgeta oli trastem yu.” Taswe i gud yu trastem Jehova, mo yusum ol samting we Jehova i givim blong halpem yu. Sipos yu mekem olsem, bambae yu gat paoa bakegen, nating se yu stap fesem ol hadtaem. w24.01 25 ¶16-17

Ol tok we i stap long vas ya oli stap kamtru tede. Mo ol tok we i kam biaen tu i stret long yumi tede, i se: “Jehova bambae i tijim ol boe blong yu, mo pis we ol boe blong yu oli gat bambae i bigwan tumas. Bambae yu yu stanap strong long stret fasin . . . Bambae yu no fraet long wan samting mo bambae i no gat wan samting i mekem yu seksek, from we samting olsem bambae i no kam klosap long yu.” (Aes. 54:​13, 14) Antap moa “god blong sistem blong wol ya” hemia Setan, i no gat paoa blong stopem yumi long wok blong tijim trutok long ol man tede. (2 Kor. 4:4) Tru wosip i stanap bakegen mo bambae i neva gat wan samting i save spolem bakegen. Tru wosip bambae i stap blong olwe. !Mo bambae i no gat eni tul blong faet we i save spolem yumi! w24.02 4 ¶10

Yumi ol Kristin, yumi tinghae long promes ya we yumi mekem blong givim laef blong yumi i go long Jehova. Mo hemia i save gat paoa long ol aksen mo ol desisen we yumi mekem taem i gat wan samting i hapen insaed long famle. Yumi wok had blong givim samting we famle i nidim long saed blong spirit, be yumi no mas letem ol samting we famle i wantem tumas i stap fasples long wanem we Jehova i askem long yumi blong mekem. (Mat. 10:​35, 36; 1 Tim. 5:8) Mo hemia i min se samtaem, ol famle bambae oli no glad long ol desisen we yumi tekem blong mekem Jehova i glad. Hem nao i stanemap famle mo hem i wantem we yumi gat wan hapi famle. (Efes. 3:​14,15) Sipos yumi wantem kasem trufala glad, yumi mas mekem samting folem tingting blong Jehova. I gud yu tingbaot se Jehova i tinghae long yu taem yu lego sam samting blong mekem wok blong hem, mo semtaem yu lukaot gud long famle blong yu, taem yu lavem olgeta mo yu respektem olgeta.—Rom 12:10. w24.02 18 ¶11, 13