Maj

Niufala wol i no kamtru yet. Be traem tingbaot ol samting we yu save luk olsem ol sta, ol tri, ol animol, mo ol narafala man. I no gat wan man we i save gat tingting ya se ol samting ya oli no stap, nating se longtaem bifo i tru we oli no stap. Be naoia oli stap from we Jehova nao i krietem olgeta. (Jen. 1:​1, 26, 27) God i promes se bambae hem i mekem wan niufala wol, mo bambae hem i mekem promes ya i kamtru. Long niufala wol, ol man bambae oli laef olwe mo oli gat gudfala helt. Long stret taem we Jehova i makemaot bambae hem i mekem niufala wol i kamtru. Mo long taem ya, bambae yu luk niufala wol olsem we yumi save luk ol samting long yunives tede. (Aes. 65:17; Rev. 21:​3, 4) Go kasem taem ya, yusum gud evri janis we yu yu gat blong mekem bilif blong yu i kam strong. Wokem fasin ya blong tinghae long ransom. Tingbaot paoa blong Jehova, mo mekem ol samting we i pulum yu blong kam klosap long Jehova. Sipos yu mekem olsem, bambae yu stap wetem olgeta ya “we oli kasem ol samting we God i promes blong givim, from we oli bilif mo oli gat longfala tingting.”—Hib. 6:​11, 12. w23.04 31 ¶18-19

Jisas i lukluk i go antap mo i prea. Hem i wantem se ol man oli givim ona i go long Jehova from nekiswan samting we bambae i hapen. Nao Jisas i singaot se: “!Lasaros, yu kamaot!” (Jon 11:43) !Lasaros i wokbaot i kamaot long tomb blong hem! Yes, Jisas i mekem wan samting we plante man oli ting se i no posibol. Stori ya i mekem bilif blong yumi i strong long hop blong laef bakegen. ?From wanem yumi talem olsem? Tingbaot promes we Jisas i talem long Mata se: “Brata blong yu bambae i laef bakegen.” (Jon 11:23) Olsem Jehova, Jisas i wantem tumas mo i gat paoa blong mekem promes ya i kamtru. Taem Jisas i krae hemia i soemaot se hem i wantem tumas blong mekem ol dedman oli laef bakegen, mo karemaot fulwan harem nogud we man i gat, taem wan i ded. Taem Lasaros i wokbaot i kamaot long tomb, Jisas i pruvum bakegen se hem i gat paoa blong mekem man i laef bakegen. Mo tu, tingbaot tok we Jisas i talem long Mata long vas blong tede. Yumi gat plante gudfala risen blong bilivim se God bambae i mekem promes ya blong laef bakegen i kamtru. w23.04 11-12 ¶15-16

Maet samtaem yumi nidim blong jenisim samting we yumi prea from, taem yumi kasemsave moa long wil blong Jehova. Yumi mas tingbaot se Jehova i gat wan plan, mo bambae hem i mekem ol samting we hem i wantem oli kamtru long stret taem. Plan ya, hemia blong finisim fulwan ol samting we oli mekem ol man oli safa tede, olsem ol disasta, sik, mo ded. Jehova bambae i yusum Kingdom blong hem blong mekem plan blong hem i kamtru. (Dan. 2:44; Rev. 21:​3, 4) Be go kasem taem ya, Jehova i letem Setan i rulum wol. (Jon 12:31; Rev. 12:9) Sipos Jehova i kwik blong stretem ol problem we ol man oli fesem tede, hemia bambae i mekem ol man oli ting se rul blong Setan nao i beswan. Taem yumi stap wet blong Jehova i mekem ol promes blong hem oli kamtru, hemia i no min se hem i lego yumi stap we hem i no givhan long yumi. Jehova bambae i halpem yumi. w23.05 8 ¶4; 9-10 ¶7-8

?Olsem wanem yumi save halpem ol narafala blong oli kasem ol gudfala samting from Memoriol? Faswan step hemia blong invaetem olgeta. Antap long hemia, yumi save mekem wan lis blong ol man we yumi save olgeta mo invaetem olgeta blong joen long Memoriol. Hemia ol famle, ol fren long wok, skul, mo ol narafala. Nating sipos yumi no gat naf invetesen, yumi save yusum elektronik divaes blong yumi blong serem link blong invetesen long ol narafala. Maet yumi sapraes long namba blong ol man we bambae oli kam. (Pri. 11:6) Tingbaot se olgeta we yumi invaetem olgeta, maet oli gat ol kwestin speseli sipos oli neva kam long ol miting blong yumi. Taswe, yumi save tingbaot ol kwestin we maet oli save askem mo rere blong ansa long olgeta. From afta we ol niuwan oli kam long Memoriol, maet oli save gat plante moa kwestin. Bifo long Memoriol, long taem blong Memoriol, mo afta long Memoriol, yumi wantem mekem bes blong yumi blong halpem olgeta we “oli soemaot se oli stret,” blong oli kasem ol gudfala samting from Memoriol.—Wok 13:48. w24.01 12 ¶13, 15; 13 ¶16

Baebol i tokbaot eit man we oli laef bakegen long wol ya. I gud yu stadi long ol stori ya wanwan. Taem yu mekem olsem, traem faenem ol lesen we yu save lanem. Tingbaot olsem wanem ol stori ya oli soemaot se Jehova i wantem tumas, mo i gat paoa blong mekem man i laef bakegen. Antap long hemia, tingting gud long laef bakegen blong Jisas. Tingbaot se i gat plante handred man we oli luk Jisas taem hem i laef bakegen, mo hemia wan samting we i mekem bilif blong yumi i strong. (1 Kor. 15:​3-6, 20-22) !Yumi talem bigfala tangkiu long Jehova from promes ya blong laef bakegen! Yumi sua se promes ya bambae i kamtru, from we Jehova i wantem tumas mo i gat paoa blong mekem i kamtru. I gud yumi gat strong tingting blong gohed blong mekem bilif blong yumi i kam strong moa long nambawan hop ya. Taem yumi mekem olsem, yumi kam klosap moa long God ya we i mekem promes long yumi wanwan se, ‘!Olgeta we yu lavem olgeta tumas bambae oli laef bakegen!’—Jon 11:23. w23.04 8 ¶2; 12 ¶17; 13 ¶20

Yumi soemaot se yumi gat tingting daon, taem yumi gat stret tingting long yumi wan, yumi luksave se i gat sam samting we yumi no naf blong mekem, yumi respektem ol narafala, mo luk olgeta se oli moa impoten i bitim yumi. (Fil. 2:3) Gideon i wan man we i gat tingting daon. Taem enjel blong Jehova i talem long Gideon se Jehova i jusumaot hem blong i sevem ol man Isrel long han blong ol strong man Midian, Gideon i talem se: “Long laen blong Manase, famle blong mi i smol moa long evriwan, mo long famle blong papa blong mi, mi mi no impoten nating.” (Jaj. 6:15) Gideon i harem se hem i no naf blong mekem wok ya, be Jehova i luk se hem i naf. Mo wetem help blong Jehova, Gideon i finisim gud wok ya. Ol elda oli traehad blong gat tingting daon long olgeta samting we oli mekem. (Wok 20:​18, 19) Oli no praod from ol samting we oli save mekem, o oli mekem finis. Mo oli no ting se oli nogud from oli bin mekem sam mastik. w23.06 3 ¶4-5

Profet tok ya we i talem se pikinini blong woman i smasem hed blong Setan, bambae i kamtru bitim 1,000 yia long fiuja. (Rev. 20:​7-10) Be Baebol i tokbaot plante bigbigfala samting we bambae oli hapen bifo long taem ya. Fastaem, ol nesen bambae oli talemaot se i gat “!pis mo seftaem!” (1 Tes. 5:​2, 3) “Wantaem nomo,” bigfala trabol bambae i stat taem ol nesen oli atakem ol giaman skul. (Rev. 17:16) Afta long taem ya, Jisas bambae i jajem ol man mo seraotem ol sipsip long ol nani. (Mat. 25:​31-33, 46) Be Setan bambae i gohed blong agensem Jehova. Bambae hem i pulum wan grup blong ol nesen we Baebol i singaot olgeta se Gog Blong Kantri Ya Magog, blong oli kam atakem ol man blong Jehova. (Esik. 38:​2, 10, 11) Mo long stret taem, Jehova bambae i hivimap ol laswan tabu man we oli stap yet long wol ya, blong go long heven mo joen wetem Kraes mo bigfala ami blong hem blong faet long Amagedon, hemia las haf blong bigfala trabol. (Mat. 24:31; Rev. 16:​14, 16) Biaen, Wan Taosen Yia we Kraes i rulum wol ya bambae i stat.—Rev. 20:6. w23.10 20-21 ¶9-10

Tede plante man blong Jehova oli laef long ol kantri we oli putum tabu long wok blong yumi. Be oli gohed nomo blong soem bigfala respek long ol haeman blong gavman. Mo olsem Obadaea, ol gudfala brata mo sista ya oli no stop blong wosipim Jehova. (Mat. 22:21) Oli soemaot se oli fraet long God, taem oli obei long hem i bitim we oli obei long man. (Wok 5:29) Oli mekem olsem taem oli gohed blong talemaot gud nius mo joen long ol miting long fasin haed. (Mat. 10:​16, 28) Oli meksua se ol brata mo sista oli gat evri samting we oli nidim blong oli gohed blong fren gud wetem Jehova. Traem tingbaot eksampol blong Henri, we i laef long wan ples long Afrika we oli putum tabu long wok blong yumi. Long taem ya, Henri i glad nomo blong mekem wok ya blong karem ol buk i go long ol narafala Witnes. Hem i talem se: “Mi mi wan man blong sem. . . Jehova nao i mekem se mi gat strong tingting blong mekem wok ya.” ?Olsem wanem? ?Yu yu gat strong tingting olsem Henri? Yu save gat strong tingting olsem sipos yu wokem fasin ya blong fraet long God. w23.06 16 ¶9, 11

Taem Adam mo Iv i rebel, maet i luk olsem se i no posibol blong ol gudfala man we oli obei long Jehova, oli fulumap wol ya. Maet Setan i gat tingting se Jehova i no moa save holem promes blong hem. Maet hem i ting se God bambae i kilim Adam mo Iv i ded, mo i wokem wan narafala kapol blong mekem stamba tingting blong hem i kamtru. Be sipos God i mekem olsem, bambae Devel i talem se God i wan man blong giaman. ?From wanem? From we long Jenesis 1:​28, Jehova i bin talem long Adam mo Iv se olgeta pikinini blong tufala bambae oli fulumap wol ya. Maet Setan i ting se Jehova bambae i letem Adam mo Iv i gat pikinini, be bambae oli neva kam stretgud olgeta. (Pri. 7:20; Rom 3:23) Sipos ol pikinini blong Adam mo Iv oli neva kam stretgud, bambae Devel i talem se Jehova i no naf blong mekem stamba tingting blong hem i kamtru, hemia blong wol ya i fulap long ol man we oli stretgud. w23.11 6 ¶15-16

Jehova i yusum Baebol mo oganaesesen blong hem blong talem klia wanem we yumi mas mekem. Mo yumi no gat risen blong ademap sam moa samting antap long ol tok ya we hem i talem. (Prov. 3:​5-7) Taswe, yumi no mas go bitim mak blong ol tok ya we oli raetem finis long Baebol, o mekem ol rul blong ol brata mo sista oli folem long saed blong ol samting we Baebol i no tokbaot. Setan i yusum “ol giaman tok we i blong nating nomo” mo “ol tingting blong wol” blong lidim ol man oli go krangke mo mekem oli seraot. (Kol. 2:8) Long faswan handred yia, hem i yusum waes blong wol we i kamaot long tingting blong man nomo, ol tijing blong ol man Jiu we i no stanap long Baebol, mo tijing ya se ol Kristin oli mas folem Loa blong Moses. Ol giaman tok ya oli pulum tingting blong ol man i gowe long Jehova we hem nao i Stamba blong waestok. Tede, Setan i yusum ol lida blong politik blong spredem ol giaman stori we oli no gat pruf mo ol giaman ripot tru long media mo sosol netwok. w23.07 16-17 ¶11-12

Jehova i stretem problem we Setan mo tufala faswan man i mekem, long wan rod we Setan i no tingbaot. Jehova i no wan man blong giaman, be hem i pruvum se hem i tok tru oltaem, taem hem i letem Adam mo Iv blong oli gat ol pikinini. Mo tu, Jehova i pruvum se taem hem i talem se bambae hem i mekem wan samting, i no gat wan samting i save stopem hem. Jehova i gohed blong mekem stamba tingting blong hem i kamtru, taem i givim wan “pikinini” we bambae i sevem ol pikinini blong Adam mo Iv we oli obei long hem. (Jen. 3:15; 22:18) !Setan i neva tingbaot se Jehova bambae i yusum pikinini ya blong givim laef blong hem olsem wan ransom blong sevem ol man! ?From wanem? From we ransom ya i stanap long lav. (Mat. 20:28; Jon 3:16) Mo hemia i wan fasin we Setan i no gat. ?Wanem bambae i kamaot from ransom ya? Long en blong Wan Taosen Yia Rul Blong Kraes, ol pikinini blong Adam mo Iv we oli obei mo we oli stretgud, bambae oli stap long paradaes long wol ya, stret olsem we Jehova i bin wantem long stat. w23.11 6-7 ¶17

Yumi obei long loa ya blong Jehova se laef mo blad i tabu. ?From wanem? From we Jehova i talem se laef i stap long blad, mo hemia i wan sas presen we hem i givim long yumi. (Lev. 17:14) Faswan taem we Jehova i letem ol man blong oli kakae ol animol, hem i talem long olgeta se oli no mas kakae blad. (Jen. 9:4) Mo hem i talem samting ya bakegen taem hem i givim Loa blong Moses long ol man Isrel. (Lev. 17:10) Mo tu, long faswan handred yia hem i pulum hed kampani blong talem long olgeta Kristin se oli “no mas kakae blad.” (Wok 15:​28, 29) Tede, yumi gohed blong obei long loa ya, taem yumi wantem mekem desisen long saed blong ol tritmen we dokta i givim. Mo tu, yumi gat strong tingting blong obei long loa blong stap longwe long enikaen doti fasin blong seks. Aposol Pol i talem klia se yumi mas “kilimaot” ol haf blong bodi blong yumi, hemia i min se yumi mas tekem strong aksen blong sakemaot eni rong tingting. Yumi mas lukaot gud blong no lukluk o mekem eni samting we i save pulum yumi blong mekem enikaen doti fasin blong seks.—Kol. 3:5; Job 31:1. w23.07 15 ¶5-6

Maet Samson i lavem Delila tumas, taswe i no luksave se Delila i stap trikim hem. Nating se i olsem, Delila i gohed nomo blong askem long Samson blong i talemaot from wanem hem i strong, gogo Samson i talemaot. Sore tumas, mastik blong Samson i mekem se hem i lusum paoa, mo long taem ya Jehova i no glad long hem. (Jaj. 16:​16-20) Samson i kasem bigfala trabol from we hem i trastem Delila i bitim Jehova. Ol man Filistia oli holemtaet Samson mo oli stikimaot tufala ae blong hem. Oli putum hem long prisen long Gasa, mo oli mekem hem i kam wan slef we i stap granem sid. Biaen oli mekem wan bigfala lafet mo oli tekem Samson i kam stanap long medel blong olgeta. Oli mekem wan bigfala sakrefaes long giaman god blong olgeta Dagon, from we oli bilif se hem nao i putum Samson long han blong olgeta. Oli tekemaot Samson long kalabus i kam long lafet ya, “blong laf long hem” mo jikim hem.—Jaj. 16:​21-25. w23.09 5-6 ¶13-14

Maet wan we yumi wok o skul wetem, i wantem save from wanem yumi folem ol rul blong Baebol. Yumi mekem bes blong yumi blong eksplenem, mo long semtaem yumi respektem tingting blong hem. (1 Pita 3:15) I gud yumi tingbaot kwestin ya olsem wan rod blong faenemaot tingting blong hem, i bitim we yumi tingbaot se hem i agensem yumi. Nomata wanem risen i pusum man blong askem kwestin, be i gud yumi ansa long kaen fasin. Olsem nao maet hem i tingting gud long samting we yu talem blong ansa long kwestin blong hem. Sipos wan man we yu wok wetem hem i askem from wanem yu no mekem lafet blong betde, i gud yu tingbaot se: Maet hem i ting se yu yu no gat raet blong gat gudtaem. Blong mekem se man ya i no wari tumas, yu save talem ol gudfala toktok long hem from we hem i kea long ol narafala. Maet hemia i openem rod blong storian wetem hem long samting we Baebol i talem long saed blong betde. w23.09 17 ¶10-11

I gud tumas we yumi save yusum taem ya we i stap yet blong prij long ol man long olgeta ples long wol. Aposol Pita i talem se, ‘yumi mas tingbaot dei blong Jehova’ oltaem. (2 Pita 3:​11, 12) ?Olsem wanem yumi mekem samting ya? I gud yumi traehad blong tingting dip evri dei long ol blesing blong niufala wol. Traem pijarem se yu stap pulum win we i klin, kakae ol naesfala kakae, welkamem bak ol famle mo ol fren we oli ded, mo tijim ol man we oli laef plante handred yia bifo long saed blong ol profet tok blong Baebol we oli kamtru. Fasin ya blong tingting dip bambae i givhan long yu blong gohed blong wet mo sua se yumi stap laef long ol las dei. “From we yumi save finis olgeta samting ya” long saed blong fiuja, bambae ol giaman tija ‘oli no pulum yumi i go krangke.’ w23.09 27 ¶5-6

Ol yangfala oli laef long medel blong ol narafala yangfala we oli “no obei long papa mo mama blong olgeta.” (2 Tim. 3:​1, 2) ?From wanem plante long olgeta oli no obei? Samfala oli harem se perens blong olgeta i gat tu fes. Oli talem long ol yangfala blong mekem sam samting, be olgeta wan oli no stap mekem. Samfala oli gat tingting ya se ol advaes blong perens blong olgeta i olfala, i no save givhan, mo se oli strik tumas. ?Sipos yu yu wan yangfala, yu tu yu harem olsem? Plante oli faenem i had blong folem komanmen ya blong Jehova long vas blong tede. ?Wanem i save halpem yumi? Yumi save lanem fasin blong obei tru long wan nambawan eksampol, hemia Jisas. (1 Pita 2:​21-24) Hem i stret gud olgeta mo i laef wetem perens we i no stret gud. Be Jisas i ona long perens blong hem nating se samtaem tufala i mestem o no kasemsave long hem.—Eks. 20:12. w23.10 7 ¶4-5

Aposol Pol i eksplenem se ol sakrefaes we Loa i talem se oli mas mekem, oli no save tekemaot sin blong olgeta fulwan. Hemia nao from wanem God i “tekemaot” Loa ya. Biaen, Pol i stat blong tijim olgeta long ol dip trutok. Hem i rimaenem ol Kristin ya se i gat wan hop we i gud moa we i stanap long sakrefaes blong Jisas mo i save halpem olgeta blong kam “klosap long God.” (Hib. 7:19) Pol i eksplenem long ol Hibru Kristin ya se wosip we oli stap mekem naoia long Jehova olsem ol Kristin, i gud moa i bitim wosip we oli stap mekem taem oli stap long skul blong ol man Jiu. Wosip we ol man Jiu oli mekem folem Loa, i olsem “sado nomo blong ol samting we oli stap kam, be Kraes nao hem i samting we i tru.” (Kol. 2:17) Wan sado hem i no wan trufala samting, be i jes givim nomo sep blong wan trufala samting we i stap. Sem mak long fasin blong ol man Jiu blong wosipim God bifo, hem i wan sado nomo blong trufala wosip we i gud moa we i stap kam. Yumi mas kasemsave long rod we Jehova i mekem blong fogivim ol sin blong yumi, olsem nao bambae yumi naf blong wosipim hem long rod we hem i wantem. w23.10 25 ¶4-5

Daniel japta 11 i tokbaot tu king o politik paoa we tufala i stap agensem tufala. Taem yumi skelem profet tok ya wetem ol narafala profet tok long Baebol, yumi luksave se “king blong not” hemia Rasia wetem ol kantri we oli sapotem hem, mo “king blong saot” hemia wol paoa ya Inglan mo Amerika. Ol man blong God we oli laef aninit long rul blong “king blong not,” oli stap fesem fasin agens we i kamaot long king ya. Oli wipim nogud sam Witnes mo putum olgeta long kalabus from bilif blong olgeta. Oli traem mekem ol brata oli fraet, be hemia i mekem se bilif blong olgeta i kam strong moa. ?From wanem? From we ol brata oli save se fasin agens we ol man blong God oli kasem, i stap mekem profet tok blong Daniel i kamtru. (Dan. 11:41) Taem yumi save samting ya, hemia i mekem hop blong yumi long fiuja i kam strong moa, mo yumi gohed blong holemstrong long Jehova. w23.08 11-12 ¶15-16

Jehova i lavem yumi tumas, taswe hem i kwik blong kasemsave long ol filing blong yumi mo i wantem protektem yumi. Hem i harem nogud taem i luk we yumi safa. From samting ya, taem yumi prea se: “Yu blokem gud mi, olsem we yu stap blokem pi blong ae blong yu,” Jehova i save ansarem prea blong yumi. (Sam 17:8) Ae i wan haf blong bodi we i impoten tumas. Taswe, taem Jehova i talem se yumi olsem pi blong ae blong hem, hemia i olsem we hem i stap talem se: ‘Eni man we i spolem yufala, ol man blong mi, i olsem we hem i spolem wan samting we i impoten tumas long mi.’ Jehova i wantem we yu trastem se hem i lavem yu. Be hem i save se ol nogud samting we i hapen long yumi bifo, oli save mekem yumi ting se hem i neva save lavem yumi. O maet yumi stap fesem wan samting naoia we i traem fasin blong yumi blong trastem se Jehova i lavem yumi. ?Wanem i save mekem yumi trastem moa se Jehova i lavem yumi? I gud yumi kasem save olsem wanem Jehova i stap soemaot lav long Jisas, long ol tabu Kristin, mo long yumi evriwan. w24.01 27-28 ¶6-7

Esra i bin luk olsem wanem Jehova i sapotem ol man blong hem, taem oli kasem trabol. Sam yia bifo, hemia long yia 484 B.K.T., Esra i bin stap long Babilon nao King Ahasuerus i givim oda blong oli kilim i ded olgeta man Jiu we oli stap long ol ples we Pesia i rulum. (Esta 3:​7, 13-15) !Long taem ya, laef blong Esra i stap long denja! Taem ol man Jiu “long olgeta provins” oli harem nius blong samting ya, oli harem nogud tumas, oli prea long Jehova mo oli krae long hem blong i halpem olgeta. (Esta 4:3) !Traem tingbaot filing blong Esra mo ol man Jiu taem ol samting i jenis nao oli harem se ol man we oli mekem rabis plan ya, olgeta nao oli ded! (Esta 9:​1, 2) I sua se ol samting ya i rerem Esra from ol narafala hadtaem we oli hapen long fiuja, mo i mekem hem i trastem moa se Jehova i naf blong protektem ol man blong hem. w23.11 17 ¶12-13

Aposol Pol i stap tokbaot “ol wok we loa i talem,” hemia loa we Moses i kasem long Hil ya Sinae. (Rom 3:​21, 28) I luk olsem se long taem blong Pol, sam Kristin we oli man Jiu oli faenem i had blong akseptem se oli no moa stap aninit long Loa blong Moses, mo oli no moa nid blong mekem ol samting we Loa ya i talem. Taswe, Pol i tokbaot Ebraham blong pruvum se blong kam wan stret man, i no nid blong folem “ol wok we loa i talem.” Be oli nidim blong gat bilif. Tok ya i leftemap tingting blong yumi, from i mekem yumi luksave se sipos yumi bilif long God mo Kraes, yumi save mekem God i glad. “Ol wok” we Jemes japta 2 i tokbaot, oli defren long “ol wok we loa i talem” we Pol i tokbaot. Jemes i stap tokbaot ol wok, o ol samting we ol Kristin oli mekem evri dei long laef blong olgeta. (Jem. 2:24) Ol wok ya oli soemaot se wan Kristin i bilif long God o nogat. w23.12 3 ¶8; 4-5 ¶10-11

Ol sista we oli stap tingbaot blong mared, oli mas jus gud. Tingbaot se bambae yu mas putum yu yu stap aninit long man we bambae yu maredem. (Rom 7:2; Efes. 5:33) Taswe, i gud yu tingbaot se: ‘?Brata ya i bigman long spirit? ?Hem i putum ol samting long saed blong spirit fasples long laef blong hem? ?Hem i mekem ol waes desisen? ?Hem i naf blong talemaot ol mastik blong hem? ?Hem i respektem ol woman? ?Hem i naf blong sapotem mi long saed blong spirit, bodi, mo filing?’ I tru, sipos yu wantem faenem wan gudfala hasban, fastaem yu mas rere blong kam wan gudfala waef. Gudfala waef i “wan fren” blong hasban blong hem, mo “i givhan” long hem. (Jen. 2:18) From we hem i lavem Jehova, hem i mekem bes blong hem blong pulum ol narafala blong oli luk ol gudfala fasin blong hasban blong hem. (Prov. 31:​11, 12; 1 Tim. 3:11) Sipos yu lavem Jehova mo yu halpem ol narafala long haos mo long kongregesen, yu stap rerem yu blong kam wan gudfala waef. w23.12 23 ¶18-19

Jehova i promes blong givim waes long yumi blong mekem ol gudfala desisen. Yumi nidim waes blong Jehova blong mekem ol gudfala desisen we bambae oli afektem laef blong yumi. Mo tu, hem i givim paoa long yumi blong stanap strong. Jehova bambae i givim paoa we yumi nidim blong stanap strong long ol trabol, olsem we hem i mekem long aposol Pol. (Fil. 4:13) Wan rod we hem i yusum hemia ol Kristin brata mo sista. Long naet bifo we Jisas i ded, hem i prea strong long Jehova. Hem i plis long Jehova blong i no letem ol narafala oli ting se hem i stap tok nogud long God. Be Jehova i no mekem olsem, hem i halpem Jisas taem i sanem wan enjel i kam blong mekem hem i strong bakegen. (Luk 22:​42, 43) Jehova i save halpem yumi tu, taem hem i yusum wan brata o sista blong ring o visitim yumi blong leftemap tingting blong yumi. Yumi evriwan i save tekem janis blong talem ol gudfala toktok long ol brata mo sista blong yumi.—Prov. 12:25. w23.05 10-11 ¶9-11

Olgeta we oli no moa joen long ol miting mo wok blong prij be oli kam long Memoriol, maet oli fraet se bambae yumi no welkamem gud olgeta. Taswe, yu no mas askem ol kwestin we i save mekem oli sem, o talem wan samting we i save mekem oli harem nogud. Olgeta ya oli ol brata mo sista blong yumi. !Mo yumi glad tumas blong joen wetem olgeta bakegen blong wosipim Jehova! (Sam 119:176; Wok 20:35) Yumi glad tumas we Jisas i talem long yumi blong tingbaot ded blong hem evri yia, mo yumi kasemsave from wanem i impoten blong mekem olsem. Taem yumi joen long Memoriol, hemia i givhan long yumi wan mo ol narafala long plante rod. (Aes. 48:​17, 18) Yumi mekem lav we yumi gat long Jehova mo Jisas i kam strong moa. Yumi soemaot se yumi glad tumas long samting we tufala i mekem blong yumi. Yumi kam klosap moa long ol brata mo sista. Mo tu, maet yumi save halpem ol narafala blong lanem samting we oli save mekem, blong olgeta tu oli save harem gud long ol blesing we i kamaot from ransom. !I gud yumi mekem bes blong yumi naoia blong rere from Memoriol blong yia ya, dei we i moa impoten i bitim ol narafala dei blong yia! w24.01 14 ¶18-19

?Olsem wanem Jehova i stap lidim yumi? Faswan samting we hem i yusum, hemia tok blong hem Baebol. Be hem i yusum ol man tu blong lidim yumi. Hem i yusum “gudfala slef we i waes” blong givim ol kakae long saed blong spirit blong halpem yumi blong mekem ol waes desisen. (Mat. 24:45) Mo tu, Jehova i yusum ol man we oli naf gud blong oli lidim yumi. Hem i yusum ol eria elda mo ol elda long kongregesen blong leftemap tingting blong yumi mo givim ol gudfala advaes we i save halpem yumi blong gotru long ol hadtaem. Yumi glad tumas long ol gudfala advaes ya we i lidim yumi long ol las dei ya we i had tumas. Ol advaes ya oli halpem yumi blong gohed blong mekem Jehova i glad mo stap long rod blong laef. Taem Jehova i yusum ol sinman blong talemaot tok blong hem long yumi, maet i had blong yumi folem. Long taem olsem, yumi nidim blong trastem Jehova se hem nao i stap lidim ol man blong hem, mo tingbaot se taem yumi folem ol tok blong hem, yumi save kasem blesing. w24.02 20 ¶2-3

Lav we yumi gat long Jehova i save kam bigwan moa, taem yumi stadi gud long Tok blong hem. Taem yu ridim Baebol, traem faenemaot se ol vas wanwan oli soemaot wanem long saed blong Jehova. Biaen askem se: ‘?Olsem wanem vas ya i soemaot se Jehova i lavem mi? ?Wanem samting long vas ya we i pulum mi blong lavem Jehova?’ Wan narafala rod blong lavem Jehova moa, hemia taem yumi prea evri dei mo talemaot ol filing blong yumi long hem. (Sam 25:​4, 5) Jehova bambae i ansa long ol prea blong yumi. (1 Jon 3:​21, 22) Tingbaot aposol Pol. Hem i mitim wan gudfala yangfala man nem blong hem Timoti. Timoti i lavem Jehova mo i lavem ol man. Pol i talem long olgeta long Filipae se: “I no gat narafala man long ples ya we i gat sem tingting we [Timoti] i gat, we hem i stap tingbaot yufala tumas.” (Fil. 2:20) Pol i makem se Timoti i lavem ol brata mo sista tumas. I sua se ol kongregesen we Timoti i visitim, oli glad tumas long visit blong hem.—1 Kor. 4:17. w23.07 9-10 ¶7-10

Bifo we ol man Isrel oli go insaed long Promes Lan, Moses i ded. ?Nao wanem i hapen long ol man blong God? ?God i stop blong halpem olgeta? Nogat. Taem oli gohed blong holemstrong long Jehova, hem i givim samting we oli nidim. Bifo we Moses i ded, Jehova i talem long hem blong i putumap Josua blong i lidim ol man blong hem. Moses i bin trenem Josua blong plante yia. (Eks. 33:11; Dut. 34:9) Antap long hemia, i gat ol narafala man we oli naf blong kam ol lida blong taosen man, lida blong handred man, lida blong fifti man, mo lida blong ten man. (Dut. 1:15) God i lukaot gud long ol man blong hem. Wan narafala eksampol hemia blong Elaejah. Hem i bin wok had blong plante yia blong halpem ol man Isrel blong oli wosipim Jehova. Be biaen, Jehova i sanem hem i go daon long saot blong Juda. (2 King 2:1; 2 Kron. 21:12) ?Olsem wanem? ?Jehova i letem ol gudfala man long ol ten traeb blong Isrel blong oli stap olgeta nomo? Nogat. Elaejah i trenem Elisa blong plante yia. Jehova i gohed blong mekem stamba tingting blong hem i kamtru, mo i gohed blong lukaot gud long ol man we oli wosipim hem. w24.02 5 ¶12

Ol Kristin long Efesas oli mekem laef blong olgeta i laenap wetem ol Tok blong Jehova we i olsem laet blong lidim olgeta. (Sam 119:105) Oli lego ol giaman bilif mo ol doti fasin we oli stap mekem. Oli “folem fasin blong God” mo oli mekem bes blong olgeta blong wosipim Jehova mo mekem hem i glad. (Efes. 5:1) Yumi tu bifo we yumi lanem trutok, yumi bin stap long ol giaman skul mo yumi mekem ol doti fasin. Sam long yumi oli mekem ol giaman lafet mo sam narafala oli stap mekem ol doti fasin. Be taem yumi kasemsave long ol loa blong Jehova long saed blong samting we i stret mo samting we i no stret, yumi mekem plante jenis. Yumi mekem laef blong yumi i laenap wetem ol samting we Jehova i wantem. From samting ya, yumi stap harem gud long plante blesing. (Aes. 48:17) Be naoia, yumi stap gohed blong fesem ol traem. Taswe yumi no mas gobak long tudak we yumi bin kamaot long hem finis, be yumi “mas gohed blong wokbaot olsem ol pikinini blong laet.” w24.03 21 ¶6-7

Maet yu harem se yu no rere yet blong givim laef blong yu long Jehova mo baptaes. Maet yu nidim blong mekem sam jenis long laef blong yu, blong yu save obei long ol loa blong Jehova, o maet yu nidim moa taem blong mekem bilif blong yu i kam strong. (Kol. 2:​6, 7) Lav we ol Baebol studen wanwan oli gat long Jehova i no sem mak, mo i no evri yangfala we oli rere blong givim laef blong olgeta long Jehova mo baptaes. Traem luksave ol samting we yu mas kam gud moa long olgeta mo gohed blong mekem, be yu no mas komperem yu wetem ol narafala. (Gal. 6:​4, 5) Sipos yu luksave se yu no rere yet blong givim laef blong yu long Jehova, i gud yu gohed blong tingbaot mak ya. Askem long Jehova blong i blesem yu taem yu traehad blong mekem ol jenis we yu mas mekem. (Fil. 2:13) Yu save sua se bambae hem i harem prea blong yu mo i ansa.—1 Jon 5:14. w24.03 5 ¶9-10

Wan taem, Sera i harem nogud tumas, mo hem i talemaot filing blong hem long Ebraham, antap long hemia, hem i blemem Ebraham from problem ya. Ebraham i save se Sera i tingbaot hem olsem hed blong famle, mo se i respektem ol desisen blong hem. Ebraham i lesin gud long ol tingting blong Sera mo i traem blong stretem problem ya. (Jen. 16:​5, 6) ?Yumi lanem wanem? Ol hasban, yufala i gat raet blong mekem ol desisen long famle. (1 Kor. 11:3) Be i gud we yufala i lesin gud mo askem tingting blong ol waef blong yufala, bifo we yufala i mekem ol desisen, speseli sipos desisen ya bambae i afektem hem. (1 Kor. 13:​4, 5) Long wan narafala taem, Ebraham i wantem invaetem sam visita we oli no ekspektem olgeta. Ale hem i askem long Sera blong i stop blong mekem samting we hem i stap mekem mo i go miksim sam bred mo kukum. (Jen. 18:6) Kwiktaem nomo Sera i lego wok blong hem mo i mekem samting we Ebraham i askem. Ol waef, yufala i save folem eksampol blong Sera taem yufala i sapotem ol desisen blong ol hasban blong yufala. Taem yufala i mekem olsem, yufala i stap mekem mared blong yufala i stap strong.—1 Pita 3:​5, 6. w23.05 24-25 ¶16-17

Afta we Gideon i kasem wok ya blong lidim ol man Isrel, hem i nidim blong obei mo gat strong tingting. Jehova i askem long hem blong i spolem ol olta blong Bal we i blong papa blong hem. (Jaj. 6:​25, 26) Samtaem biaen, afta we Gideon i hivimap ami blong hem, Jehova i askem long hem tu taem blong i katemdaon namba blong ami blong hem. (Jaj. 7:​2-7) Mo biaen, Jehova i talem long hem blong i atakem kamp blong ol enemi blong hem long medel naet. (Jaj. 7:​9-11) Ol elda oli mas “rere blong obei.” Wan elda we i obei, i rere blong folem ol samting we Baebol i talem mo ol tok we i kam long oganaesesen blong God. Mo tu, hem i soem wan gudfala eksampol long ol narafala. Be maet samtaem i had blong hem i obei. Maet hem i kasem plante instraksen, mo i had blong hem i folem olgeta. Mo samtaem, maet hem i save gat tingting ya se sam long ol daereksen ya oli no rili stret o waes. O maet oli askem long hem blong i mekem wan wok we oli save arestem hem from. ?Olsem wanem ol elda oli save folem fasin blong Gideon blong obei, long ol situesen olsem? Lesin gud long daereksen mo folem. w23.06 4-5 ¶9-11