?Ol Mak We Yu No Mas Bitim Oli Mekem Tingting Blong Yu i Foldaon?
!OL MAK we yu no mas bitim! I no gat wan man i rili laekem ol mak ya; be yumi evriwan i mas folem olgeta. ?Be, samtaem tingting blong yu i foldaon from we i luk olsem se i gat tumas samting i stap blokem yu long laef blong yu? Maet bambae yu haremgud sipos yu jenisim tingting blong yu. Bitim we yu stap wari long samting we yu no save mekem, i moa gud yu yusum fulwan fasin fri we yu gat.
Eksampel, plante man we oli pua long saed blong mane oli harem nogud from oli wantem blong gat plante mane. Be nating se fasin pua i putum mak long ol samting we yumi save mekem long wol ya, ol impoten samting long laef olgeta man oli save kasem. Ol pua man mo ol rijman tu, oli mekem switat, oli mared, gat pikinini, haremgud long fasin fren wetem ol narafala, mo sam narafala samting bakegen. Samting we i moa impoten, se ol puaman mo ol rijman tu, oli save kasem save long Jeova mo oli stap tingbaot fyuja long nyufala wol we Hem i promes long hem. Ol puaman mo ol rijman tu oli save gru long Kristin waes mo save, we i moa gud bitim ol rij samting. (Proveb 2:1-9; Eklesiastis 7:12) Evriwan—ol rijman mo ol puaman—oli save gat wan nambawan nem long fored blong Jeova. (Eklesiastis 7:1) Long taem blong Pol, bighaf blong olgeta we oli mekemap Kristin kongregesen, oli ol man we oli no gat nem—sam long olgeta oli ol slef—we, wetem waes fasin, oli yusum wanem fasin fri we oli gat go kasem fulmak blong hem.—1 Korin 1:26-29.
Hed Blong Famle We Baebol i Tokbaot
Long wan Kristin mared, waef i stap obei long hasban blong hem—wan plan we God i stanemap blong mekem fulwan famle i haremgud. (Efesas 5:22-24) ?Waef bambae i harem se samting ya i daonem hem? No gat. Hasban mo waef, tufala i olsem wan tim. Taem hed blong famle i folem fasin blong Kraes, hem i no putum tumas tabu long waef blong hem, be i givim plante jans long hem blong mekem ol samting we hem i naf blong mekem. (Efesas 5:25, 31) “Gudfala waef” we Proveb japta 31 i tokbaot, hem i stap bisi long plante gudfala wok we i nidim waes mo strong tingting blong mekem. I klia nomo, fasin blong stap obei long hasban i no mekem hem i kros.—Proveb 31:10-29.
I sem mak, Baebol i no talem nating se wan woman i save lidim ol man we oli nafgud blong lukaot Kristin kongregesen. (1 Korin 14:34; 1 Timote 2:11, 12) ?Ol Kristin woman bambae oli harem nogud from tabu ya? No gat. Bighaf blong olgeta oli haremgud tumas blong luk se ol Kristin wok ya oli stap ron long tiokratik fasin. Oli glad from blesing we oli kasem long wok blong ol elda blong lukaot long ol sipsip mo blong tij, mo oli stap bisi long wok blong prij mo blong mekem disaepol. (Matyu 24:14; 28:19, 20) Ol Kristin woman oli mekem plante long wok blong prij, mo long lukluk blong Jeova God, samting ya i givim ona long olgeta.—Ol Sam 68:11; Proveb 3:35.
Ol Tabu Long Ol Yangfala
Samtaem, ol yangfala tu oli komplen se i gat tumas samting i blokem olgeta, plante taem, i from we oli stap long kea blong papa mama blong olgeta. Be Baebol i agri long samting ya tu. (Efesas 6:1) Ol yangfala Kristin we oli waes, oli no kam kros from ol rul we papa mama blong olgeta i putumap blong oli folem, be oli gohed blong haremgud long fasin fri we oli gat—we i minim tu, plante taem, oli fri long ol hevi responsabiliti. Olsem nao, oli save yusumgud paoa blong yangtaem blong olgeta mo ol samting long laef blong olgeta blong mekemrere blong laef olsem wan bigman.
Wan brata we bifo i seket elda long Brasil i rimembagud wan boe we i gat 12 yia, long wan smol grup long bus, we boe ya i no save mekem plante samting we ol narafala oli save mekem. Brata we i lukaot long ol ripot i bisi long wok blong hem blong kasem mane, mekem se i no gat tumas taem blong kea long grup ya, be hem i mekem plan wetem yangfala ya blong halpem hem. Yangfala ya i faenemaot weples ol pepa oli stap mo oltaem hem i kam blong givhan. Fasin blong hem we hem i glad blong wok i leftemap tingting blong olgeta we oli joen wetem hem, mo hem i wan gudfala fren blong joen wetem, long wok blong prij. Naoia yangfala ya i wan elda.
I gat plante samting we oli save blokem fasin fri blong wan man. Samfala, sik i blokem olgeta. Samfala oli stap long wan famle we i seraot long saed blong bilif mo waef no hasban we i no stap long trutok i blokem fasin fri blong olgeta. Nating se olgeta we oli mas laef wetem ol samting we i blokem olgeta oli wantem se ol samting oli defren, oli save haremgud yet long laef blong olgeta. Magasin ya i givim plante store blong ol wanwan man olsem, we fasin blong olgeta blong dipen long Jeova mo glad long samting we oli gat long laef blong olgeta, i bin leftemap tingting blong ol narafala bigwan.
Aposol Pol i stap tokbaot ol samting we plante man long taem blong hem oli fesem long laef blong olgeta, hem i talem se: “Maet yu yu slef blong wan man taem God i singaot yu, be yu no tingbaot. Be sipos yu gat rod blong kam friman, yu gohed, yu folem rod ya.” (1 Korin 7:21) !Hemia wan stret tingting ya! Sam samting long laef oli stap jenis. Ol yangfala oli gruap. Samtaem, ol hasban no waef we oli agensem trutok, oli akseptem trutok. Ol trabol long saed blong mane i save kam moa gud samtaem. Mo, sam sikman, maet oli kamgud. Ol narafala samting, oli no save jenis kasem we nyufala wol blong Jeova i kamtru. Nating se i olsem, ?yumi save kasem wanem sipos yumi harem nogud from yumi no save mekem samting we sam narafala oli save mekem?
?Yu yu luk finis taem ol pijin oli stap flae i go antap long skae mo yu bin haremgud from fasin fri blong olgeta blong muf mo from we oli naes? Maet yu wantem se yu tu yu save flae olsem pijin. !Be yu no save flae mo bambae yu neva flae olsem! Nating se i olsem, ating yu yu no stap komplen. Long defren fasin, yu yu glad from save mo ol fasin we God i givim long yu. Yu haremgud long laef nating se yu stap daon long graon. I sem mak, nating se laef blong yumi i olsem wanem, sipos yumi mekem ol samting we yumi save mekem bitim we yumi harem nogud long ol samting we yumi no save mekem, bambae yumi haremgud long laef, mo bambae yumi faenem glad long wok blong Jeova.—Ol Sam 126:5, 6.
[Tok blong pija long pej 28]
?Yu harem se papa mama blong yu tufala i blokem yu tumas?