Ol Wetnes Blong Jeova Long Olgeta Ples Long Wol—Naejeria
NAEJERIA i stap daon long wes saed long map blong Afrika. I stap long Bei blong Kini, long not blong ekweta mo i gat bitim 88 milyan man long hem.a
Long tu yia we i pas, branj ofis blong Watch Tower Society long Naejeria i tingting moa long ol yangfala. Long 1992 oli faenemaot se long ol kongregesen blong ol Wetnes blong Jeova long Naejeria, 80 pesen blong olgeta we oli stat talemaot gud nyus, oli ol yangfala we oli gat bitwin 10 mo 20 yia. Long sem yia, 63 pesen blong olgeta we oli baptaes oli gat bitwin 10 mo 20 yia tu.
Ol Yangfala Oli Stat Paenia
Plante yangfala oli stat mekem fultaem wok blong prij olsem ol paenia. Hannah we i wan paenia i talem se: “Kolosap taem mi finis long skul, mi visitim olgeta we oli go long Skul blong Paenia, long ples ya mi mitim tu olfala sista. Mi tingbaot se, ‘Sipos tufala ya i save mekem paenia, ?from wanem mi mi no save mekem?’
“Taswe afta we mi finis skul, mi kam wan paenia. Tri manis biaen mi mitim Josephine we i gat 26 yia, hem i stap mekem wosip we i joen wetem majik. Hem i talem se: ‘Yufala ol Wetnes blong Jeova yufala i rabis man. Yufala i no mekem Krismas mo yufala i no yusum ol ston blong givim laki.’ Mi ansa long hem se sipos hem i letem mi blong stadi Baebol wetem hem, bambae hem i lanem from wanem mifala i no mekem ol samting ya. Hem i askem mi blong gobak. I no longtaem hem i stat kam long ol miting mo i jenisim plante samting long laef blong hem. Hem i baptaes long Desemba 1990. Stat long Ogis 1991, Josephine i kam wan paenia. !Taem hem i go long Skul blong Paenia long las yia, hem i tokbaot mi olsem mama blong hem long saed blong speret long ol fren blong hem long skul ya!”
Video Mo Haos Kingdom
Wan video blong Sosaeti i halpem wan smol kongregesen blong kasem graon blong bildim wan Haos Kingdom. Taem oli stap lukaot graon blong pem, fo brata oli go luk Onoji, kastom jif blong ples ya. Hem i givim wan pis graon blong 20,000 naira [119,000 vatu]. Kongregesen ya i no save pem, long taem ya i gat 17 pablisa nomo oli givim mane from. Onoji i talem se bambae hem i tingbaot narafala ples.
Sam manis biaen, wan long ol elda long kongregesen i visitim haos blong Onoji. Onoji i stap wajem video blong taem ya we oli bin putumap hem long wok blong hem. Elda ya i talem se: “Mi gat wan video we mi laekem yu blong luk. Nem blong hem Jehovah’s Witnesses—The Organization Behind the Name.”
Biaen, elda ya i askem wanem tingting blong Onoji long video ya. Onoji i talem se, “Mi wajem video ya faef taem.” Elda ya i talem bakegen long Onoji long saed blong ol Haos Kingdom ya we hem i bin luk long video mo i eksplenem se kongregesen i wantem blong bildim wan Haos Kingdom we i sem mak. Elda ya i askem sipos kongregesen i save pem sam graon we i joen long smol pis graon we oli gat finis. Onoji i ansa se: “Las naet afta we mi wajem video, mi tingbaot sem samting ya.” Kwiktaem afta, Onoji i makemaot 6 mita blong graon we i joenem graon blong kongregesen. Hem i talem se, “Yufala i save tekem hemia. Long saed blong longfala blong hem, yufala i save tekem hamas we yufala i nidim. Mekemrere ol pepa blong ol samting ya, mo bambae mi saen long olgeta.”
[Futnot]
a Blong kasem moa save, lukluk 1994 Calendar of Jehovah’s Witnesses.
[Bokis blong pija long pej 9]
LUKLUK LONG NAMBA BLONG KANTRI YA
1993 Sevis Yia
BIGFALA NAMBA BLONG OLGETA WE OLI STAP PRIJ: 174,582
SKELEM: 1 Wetnes blong 507
NAMBA BLONG OL MAN WE OLI KAM LONG MEMORIOL: 473,245
MEDEL NAMBA BLONG OL PAENIA: 19,777
MEDEL NAMBA BLONG OL BAEBOL STADI: 242,028
NAMBA BLONG OL MAN WE OLI TEKEM BAPTAES: 8,888
NAMBA BLONG OL KONGREGESEN: 3,289
BRANJ OFIS: BENIN SITI, EDO STET