Olgeta We Oli Skul Long Gilead Oli Wantem Tumas Blong Talemaot Gud Nyus

“HEMIA nambawan samting we yumi save tingbaot bitim ol narafala samting.” Hemia nao filing we Anders mo Amalia Groth, tufala i gat long saed blong trening blong tufala blong kam misinari. Tufala i talemaot filing blong ol 48 nyufala misinari long klas namba 97 blong Wajtaoa Baebol Skul blong Gilead, taem tufala i gohed, se: “Trening blong Gilead i pusum mo i mekemrere mifala, taswe mifala i wantem tumas blong go long ol nyufala ples we bambae mifala i prij long olgeta.”

Yumi save luk glad ya long ol tok we ol studen oli talem long saed blong program blong givim stefeket long olgeta; long Septemba 4, 1994, 6,420 man oli hivap from spesel taem ya.

David Abel mo waef blong hem Kelli, tufala i talem se: “Theodore Jaracz blong Hed Kampani i openem program taem hem i givim wan tok we stampa blong hem se, ‘Jeova i stap tijim yumi.’ Bambae mifala i neva fogetem poen we Brata Jar­acz i talem, se: ‘Yumi mas luksave we yumi smol tumas taem yumi skelem yumi wetem Jeova,’ mo blong eksplenem poen ya, hem i yusum lesen ya we i gat bigfala paoa we yumi faenem long Job japta 38 mo 39. Brata Jaracz i talemaot klia se, nating we Gilead Skul i mekem save blong mifala long Baebol i kam bigwan moa, i gat plante kwestin yet we mifala i no save ansa blong olgeta. Mifala i mas gohed oltaem blong stadi long Tok blong God.”

Biaen, Christian mo Angele Coffy, tufala i talem se: “Mifala i glad tumas long tok we Max Larson i givim, we stampa blong hem se, ‘?Olsem Wanem Wan Gudfala Faondesen i Impoten?’ Mifala i laekem taem hem i talem se mifala i olsem wan haos we i nidim wan dip faondesen long strong graon blong i save stanap strong nating sipos i gat wan etkwek. Sipos mifala i stadi oltaem, mifala i save wokem wan gudfala fasin fren wetem Jeova mo bildim bilif blong mifala long dip save, nao mifala i save stanap strong long ol hadtaem.”

Gary mo Lynn Elfers, tufala i talem se: “Bambae mifala i no save fogetem tok we Milton Henschel, jeaman blong skul, i givim, stampa blong tok ya se, ‘Kakae Long Garen i Rere Finis Blong Tekem.’ Stampa vas, Jon 4:​35-38, i makem jans we mifala i gat blong joen long wok blong tekem kakae we ol man blong wok bifo oli bin planem. Samting ya bambae i pusum mifala blong wok wetem tingting blong wok strong.” Jan mo Sirpa Vaahtola, tufala i agri long tok ya mo tufala i talem se: “Brata Henschel i mekem se mifala i wantem tumas blong joen blong tekem ol kakae we oli stap yet, taem hem i givim laswan ripot long saed blong Baltik Stet. Namba long Estonia i go antap long 51 %, 106 % long Latvia, mo 51 % long Lituania. !Samting ya i mekem mifala i haremgud tumas! Ol brata sista oli stap askem strong long Masta blong sanem sam moa man blong wok i go. !Mifala i glad tumas blong harem samting ya, from Estonia i ples ya we bambae mifala i go prij long hem!”

Kevin mo Evelyn Cortina oli talem se: “Joel Adams i givim nekis tok we stampa blong hem, ‘Trastem Jeova.’ Hem i givim advaes long mifala se mifala i neva mas ting se samtaem mifala i save trastem Jeova mo samtaem mifala i save dipen long prapa waes blong mifala. Long ples we mifala i go prij long hem, bambae mifala i fesem plante traem​—long saed blong helt, kakae, lanwis, ol kastom, mo sam samting bakegen. Blong winim ol traem ya, mifala i mas trastem Jeova.”

Biaen, Gerrit Losch, wan memba blong Hed Kampani, i tokbaot stampa tok ya, “Gohed Blong Soemaot Fasin Sore Blong Jeova.” Alen mo Ann Maria Gokavi, oli talem se: “Hem i poenemaot se fasin blong soem sore long ol misinari we oli wok wetem yumi mo ol man we yumi serem gud nyus wetem olgeta, i wan mak blong wan Kristin we i bigman long saed blong speret. Blong prij long narafala kantri, i nidim fasin blong lego sam samting we mifala i gat, be sipos mifala i no gat fasin sore, fasin blong mifala blong lego sam samting bambae i no impoten tumas.” (Matyu 9:13) Peter mo Fleur Hupston, oli gohed se: “Brata Lösch i talem se mifala i mas gat fasin sore long ol brata mo sista blong mifala tu, olsem we mifala i lukluk olgeta long narasaed en blong spae glas, blong mekem mastik blong olgeta i kam smol bitim we mifala i mekem ol mastik ya oli kam bigwan.”

Mickey mo Sherry Minsky, tufala i rimemba se: “Jack Redford, wan long ol tija blong Gilead Skul, i givim nekis tok we stampa blong hem, ‘?Yufala i Save Holem Fasin Stretem?’ Hem i poenemaot se fasin flas i mekem se i had blong akseptem fasin stretem mo se sipos yumi no wantem lesin long advaes, yumi save lusum ol gudfala samting we ol advaes ya oli save givim. Biaen, hem i givim sam gudfala advaes we oli save wokgud long saed blong fasin blong akseptem fasin stretem, advaes ya i stanap long Lamentesin 3:​27-31.” Charles mo Joan Held, tufala i gohed se: “Plante taem, yumi no luk ol prapa slak fasin blong yumi; from samting ya, yumi mas tingbaot fasin stretem olsem wan rod blong openem ae blong yumi blong luk ol samting we yumi no luk. Fasin stretem no advaes we i kam long Jeova i wan pruf we i soem se hem i laekem yumi tumas.”

Kenneth mo Lisbeth Ardkäll, tufala i talem se: “Ulysses Glass, wan narafala tija blong Gilead, i tokbaot stampa tok ya, ‘Kasem Waes Ya We i Save Wok We i Soem Rod Blong Laef.’ Hem i askem se: ‘?Bambae yu mekem wanem long samting we yu bin lanem?’ Biaen hem i talem wan pija tok we i stanap long Proveb 30:​24-26, long saed blong smol anamol ya baja we i mekem ples blong haed blong hem long ston mo olsem wanem Jeova i givim evri samting long hem blong laef. Be yumi, yumi no bon wetem waes fasin, taswe yumi mas traehad blong kasem waes. Jeova i givim evri samting we yumi nidim blong mekem samting ya. Sipos yumi kam kolosap long Jeova mo long narafala wetem fasin lav, bambae yumi save mekem plante samting.”

Bigfala Toktok

Jay mo Gwen Abraczinskas, tufala i talem se: “Brata Karl F. Klein, wan memba blong Hed Kampani, i glad tumas blong tokbaot Ol Sam 19 wetem mifala, long tok ya blong hem, ‘Wan Naesfala Ston Long Medel Blong Ol Naes Ston.’ Hem i makem dip fasin tangkyu we Deved, man blong raetem Ol Sam, i gat long Jeova mo lav blong hem long Tok blong God.” Keith mo Donna Hornback, tufala i makemgud se: “Brata Klein i seraotem Sam ya long tri haf. Haf 1 (vas 1 kasem vas 6) i soem fasin tangkyu blong Deved long ol samting we God i wokem, haf 2 (vas 7 kasem 10) i makem fasin tangkyu blong hem long ol loa blong God, mo haf 3 (vas 11 kasem 14) i mekem mifala i tingbaot se mifala i mas wantem tumas blong gat wan gudfala fasin fren wetem Jeova, olsem Deved.”

David mo Raylene Long, tufala i talem se: “Mifala i laekem tumas poen ya se fasin blong fraetgud long Jeova i impoten sipos yumi wantem blokem ol samting we oli nogud. Fraet ya i lidim yumi blong mekem samting we i klin long ae blong Jeova.” Frank mo Vibeke Madsen, tufala i agri fulwan long samting ya. Tufala i talem se: “Tok blong Brata Klein long saed ya se ol advaes, ol loa, mo ol komanmen blong Jeova oli gud tumas long yumi, i makemgud ol bigfala poen we mifala i lanem long Gilead. Samting ya i mekem tingting blong mifala i kam strong moa blong fasgud long Tok blong God long fyuja mo blong tingbaot Baebol olsem wan bokis blong ol naesfala ston we oli sas tumas.”

Biaen long bigfala toktok ya, ol studen oli kasem ol stefeket blong olgeta, mo oli talemaot ol kantri we bambae oli go prij long olgeta. Afta long wan smol spel blong dring ti, evriwan oli kam wanples bakegen from program blong aftenun. Ol nyufala misinari oli joen blong ansa long ol kwestin long Wajtaoa Stadi we oli sotem.

Bob mo Shannon Lakatos, tufala i tingbaot se: “Biaen, i gat program blong ol studen se, ‘Trening Blong Kam Ol Man Blong Talemaot Kingdom Long Olgeta Ples Long Wol.’ Fashaf blong program ya i soem ol ekspiryens long wok blong prij we mifala i kasem long ol faef manis trening blong mifala. Program ya i makem fasin blong gat gudhan blong yusum kwestin long wok blong mifala blong prij. Wan haf we oli askem kwestin long mifala i soem ol gudfala rod blong winim ol traem mo ol samting we oli stap jenis long laef blong wan misinari. Trifala sinema we oli soem, long saed blong Kosta Riko, India, mo Malawi, i givim sam smol pija long tingting blong mifala long saed blong ogenaesesen blong Jeova raonabaot long wol.”

Jesse mo Michelle Duncan, tufala i makemgud se: “Drama ya we i kam biaen, Yumi Mas Gat Tingting Blong Tiokratik, i No Blong Wol i soem se sam famle we oli no bilif mo oli laekem blong folem tingting blong olgeta, oli save mekem trabol long yumi.” Wenzel mo Kelly Koula, tufala i gohed se: “Drama ya i soem se ol Kristin oli mas tingbaot Tiokratik oda mo rod blong lidim olgeta olsem wan gudfala samting we oli nidim tumas.”

Nambawan program ya i finis wetem laswan singsing mo prea. Taem ol nyufala misinari ya oli aot wetem strong tingting blong go long 18 kantri we bambae oli go prij long olgeta, Tommi mo Jael Kauko, tufala i talemaotgud tingting blong olgeta long laswan tok ya blong tufala se: “Mifala i wantem tumas blong go long ples we bambae mifala i go prij long hem mo folem ol samting we mifala i bin lanem. Mifala i kasem plante samting tumas​—naoia, i taem blong mifala blong givim.”

[Tok blong pija long pej 26]

Olgeta We Oli Kamaot Long Klas Namba 97 Blong Wajtaoa Baebol Skul Blong Gilead

Long ol nem aninit, yumi kaontem ol laen stat long fored i gobak biaen, mo ol nem oli stat long lef i go long raet long wanwan laen.

(1) Hong, J.; Hong, D.; Groth, A.; Cortina, E.; Lakatos, S.; Hornback, D.; Acevedo, L.; Coffy, A. (2) Elfers, L.; Gokavi, A.; Ardkäll, L.; Abraczinskas, G.; Knott, K.; Lizer, T.; Abel, K.; Abel, D. (3) Duncan, M.; Gokavi, A.; Held, J.; Hupston, F.; Lakatos, B.; Long, R.; Minsky, S.; Acevedo, E. (4) Ardkäll, K.; Kauko, J.; Vaahtola, S.; Cortina, K.; Carson, N.; Minsky, M.; Lizer, G.; Koula, K. (5) Duncan, J.; Abraczinskas, J.; Vaahtola, J.; Madsen, F.; Madsen, V.; Long, D.; Carson, C.; Elfers, G. (6) Kauko, T.; Hupston, P.; Held, C.; Groth, A.; Hornback, K.; Koula, W.; Knott, D.; Coffy, C.