Wan Nyufala Laef Blong Ol Bubu Blong Yumi

?TOK blong God, Baebol, i tijim se evri man i gohed blong laef long wan speret wol afta ded? No, hem i no talem olsem. Baebol i tokbaot wan nambawan hop blong laef afta ded, be i no long sem fasin we plante oli tingting long hem.

Tingbaot wanem Baebol i talem long saed blong faswan bubu blong yumi, Adam. Jeova i ‘tekem sam graon, i mekem Adam long hem.’ (Jenesis 2:7) Adam i gat jans blong haremgud olwe long laef long wol. (Jenesis 2:16, 17) Be, hem i no wantem obei long Man ya we i Wokem hem mo we i gat lav long hem, mo risal blong samting ya, hemia nao ded.

?Adam i go wea afta ded? God i talem long hem se: “Bambae yu yu gobak long graon we yu yu bin kamaot long hem fastaem. From we yu yu graon nomo, mo bambae yu yu gobak long graon.”​—Jenesis 3:19, NW.

?Adam i stap wea bifo we Jeova i wokem hem long graon? Hem i no stap samples. Hem i no laef nating. Taswe taem Jeova i talem se Adam bambae i “gobak long graon,” hem i minim wan samting nomo, se Adam bambae i no moa gat laef. Bambae hem i stap sem mak olsem hem i stap fastaem, olsem graon. Adam i no ‘go long wan narafala laef,’ blong kam olsem faswan man blong go long wol blong speret blong ol bubu. Hem i no go laef long wan paradaes long heven, no long wan ples blong panis we hem i safa blong olwe. Wan jenis nomo we hem i mekem, hemia: fastaem hem i laef, be afta, hem i no moa gat laef. Fastaem hem i stap, be afta ded, hem i no moa stap samples.

?Olsem wanem long ol narafala man long wol? ?Ol pikinini blong Adam tu, oli no moa stap samples afta we oli ded? Baebol i ansa se: “Olgeta evriwan [ol man mo ol anamol] oli go long sem ples nomo. Olgeta evriwan oli kamaot long graon fastaem, mo olgeta evriwan oli gobak long graon bakegen.”​—Eklesiastis 3:​19, 20.

?Ol Dedman Oli Stap Olsem Wanem?

Yes, ol dedman oli no laef samples. Oli no save harem wan samting, lukluk, toktok, no tingting. Wan eksampel, Baebol i talem se: “Ol man we oli laef oli save se bambae oli mas ded. Be ol dedman oli no save wan samting nating. . . . Fasin blong olgeta blong laekem wan samting no blong no laekem nating wan samting, mo fasin jelas blong olgeta, oli finis finis.” Baebol i talem tu, se: “I no gat wok no plan no save no waes long Sheol [beregraon], ples ya we bambae yu yu go long hem.”​—Eklesiastis 9:​5, 6, 10.

Taswe, folem Tok blong God, taem ol man oli laef i stap, oli save se bambae oli mas ded. Be, taem oli ded, oli no moa save wan samting. Oli no stap stanap kolosap long ded bodi blong olgeta, mo lukluk wanem samting ol man oli stap mekem wetem bodi ya. Taem man i no moa gat laef, hem i no moa save haremgud no harem i soa, hem i no save glad no sore. Ol dedman oli no save se taem i stap pas. Olgeta ya oli no save wan samting. Fasin ya i dip moa bitim fasin blong slip.

Job, wan man blong God long taem bifo, i save se man i no gohed blong laef afta ded. Hem i kasem save tu, se sipos God i no mekem wan samting, bambae man i no gat hop blong laef bakegen. Job i talem se: “Wan strong man i ded mo i ledaon we ded i winim hem olgeta. Mo wan man we i laef i lus, mo ?hem i stap wea? [Hem] i mas slip mo i no save girap.” (Job 14:​10, 12) Job i no bilif se taem hem i ded, bambae hem i go joen wetem ol bubu blong hem long wan wol blong ol speret.

Hop Blong Laef Bakegen Long Ded

From we ol man we oli laef oli no moa stap samples afta ded, i gat wan bigfala kwestin i stap, we Job i stanemap taem hem i askem se: “?Sipos wan man we i strong gud i ded, hem i save laef bakegen?” Job i ansa bakegen, se, “Evri dei long wok kalabus ya we mi mas mekem [taem we i stap long beregraon], bambae mi mi wet gogo kasem taem we bambae mi mi fri bakegen. Yu [Jeova] bambae yu singaot long mi, nao mi bambae mi ansa long yu. Bambae yu yu wantem tumas we wok blong ol han blong yu i kambak.”​—Job 14:​14, 15.

Blong eksplenem long narafala rod, nating se Job i no moa stap samples taem hem i ded, be God i no save fogetem hem. Job i bilif se taem i stap kam, we Jeova God bambae i “singaot” long hem blong kambak long laef, tru long laef bakegen long ded.

Jisas Kraes, Pikinini blong God, i soemaot se hop blong Job long saed blong laef bakegen long ded, hem i wan tru samting. Jisas i pruvum se ol dedman oli save laef bakegen long ded. ?Olsem wanem? !Hem i mekem man i laef bakegen! Jisas i no stap long wol long taem blong Job blong mekem hem i laef bakegen. Be taem hem i stap long wol, hem i mekem pikinini blong wido woman blong taon ya Naen, i laef bakegen long ded. Mo tu, Jisas i mekem smol gel we i gat 12 yia, blong man ya Jaeras, i laef bakegen. Mo hem i mekem fren blong hem Lasros i laef bakegen long ded, afta we i ded blong fo dei.​—Luk 7:​11-15; 8:​41, 42, 49-56; Jon 11:​38-44.

Antap long ol merikel ya, Jisas i tokbaot wan taem long fyuja we bambae plante man oli laef bakegen long ded. Hem i talem se: “I gat taem i stap kam we ol dedman we oli stap long beregraon, bambae oli harem voes blong mi, nao bambae oli aot long beregraon.” (Jon 5:​28, 29) Biaen, aposol Pol tu, we Jeova i yusum hem blong mekem wan yangfala man i laef bakegen long ded, i soemaot bilif blong hem se bambae plante man oli laef bakegen long ded long fyuja. Hem i talem se: “Mi putum tingting blong mi long God, . . . God bambae i mekem olgeta man oli laef bakegen long ded, ol man we oli stret, wetem ol man we oli no stret.”​—Ol Wok 20:​7-12; 24:15.

Olgeta vas ya blong Baebol long saed blong laef bakegen long ded long fyuja, oli no tokbaot we laef i gohed long wan ples blong ol speret. Oli poen i go long wan taem we plante milyan dedman, bambae oli laef bakegen wetem bodi olsem ol man long wol ya nomo. Olgeta ya we oli laef bakegen long ded, i no se oli no moa save tingbaot laef we oli bin gat bifo long wol. Bambae oli no bon bakegen olsem ol pikinini. Be, bambae oli sem mak olsem bifo we oli ded, wetem semfala tingting mo fasin. Bambae oli save luksave olgeta wanwan. Mo ol narafala tu bambae oli save luksave olgeta. !Bambae i gat bigfala glad, taem ol man ya oli joen bakegen wetem ol fren mo famle blong olgeta! !Mo bambae yumi save glad tu blong mitim ol bubu blong yumi!

Laef Bakegen Long Wan Laef Long Heven

?Be Jisas i no talem se i gat sam man we bambae oli go long heven? Si, hem i talem olsem. Long naet bifo we ol man oli kilim hem i ded, hem i talem se: “Long haos blong Papa blong mi, i gat plante rum i stap. . . . Bambae mi go mekem ples i stap rere blong yufala. Mo from we mi go blong mekem ples i rere blong yufala, bambae mi save kambak blong tekem yufala i kam stap wetem mi, blong bambae yufala i save stap long ples ya we mi bambae mi stap long hem.” (Jon 14:​2, 3) Jisas i stap toktok long ol aposol blong hem we oli strong long bilif. Be ol tok ya oli no minim se olgeta gudfala man bambae oli go long heven.

Jisas i soem se olgeta we oli laef bakegen long heven, oli mas kasem sam narafala mak, antap long fasin blong gat wan laef we i stret. Wan samting se, oli mas gat stret save long saed blong Jeova mo ol stampa tingting blong hem. (Jon 17:3) Narafala samting se, oli mas soemaot bilif long ransom sakrifaes blong Jisas Kraes, mo oli mas obei long God. (Jon 3:16; 1 Jon 5:3) Wan narafala samting bakegen se, oli mas “bon bakegen” olsem ol Kristin we oli baptaes mo we tabu speret blong God i makemaot. (Jon 1:​12, 13; 3:​3-6) Wan moa mak we oli mas kasem blong oli save laef long heven, hemia blong stanap strong longtaem olsem Jisas i mekem, we oli stap tru long God gogo kasem ded.​—Luk 22:29; Revelesen 2:10.

I gat risen from wanem oli nidim blong kasem ol hae mak ya. Olgeta we oli laef bakegen long heven, oli gat wan impoten wok blong mekem. Jeova i save se ol gavman blong man, oli no naf blong lukaot long ol man long wol. Taswe hem i mekem plan blong putumap wan gavman long heven, no wan Kingdom, we i save rul antap long olgeta man. (Matyu 6:​9, 10) Jisas nao i King long Kingdom ya. (Daniel 7:​13, 14) God i jusumaot sam man long wol, blong oli laef bakegen long heven blong rul wetem hem. Baebol i talemaot se, afta we olgeta ya oli laef bakegen, oli kam “king, oli rul long olgeta man long wol.”​—Revelesen 5:10.

?I gat plante man we oli kasem ol mak we i mekem se oli naf blong laef bakegen long heven? No gat. Bighaf blong olgeta we oli stap slip long ded oli no naf, be i no fol blong olgeta. Plante oli bin gat smol jans no oli no gat jans nating, blong save ol trutok long saed blong Jeova mo ol stampa tingting blong hem. Oli laef mo biaen oli ded, we oli no kasem save nating long Jisas Kraes mo Kingdom blong God.

Jisas i singaotem olgeta we oli go long heven se ‘smol kampani blong ol sipsip.’ (Luk 12:32) Biaen, i kam klia se namba blong olgeta ya “we God i pemaot olgeta oli fri long wol,” blong rul wetem Kraes long heven, oli 144,000. (Revelesen 14:​1-3; 20:6) I tru se namba ya 144,000, i bigwan inaf blong fulumap “plante rum” we Jisas i tokbaot. Be hem i smol nomo, taem yumi skelem wetem olgeta bilyan man we oli kamaot long Adam.​—Jon 14:2.

Ol Samting We Oli Mas Hapen Bifo Laef Bakegen Long Wol

Yumi traem tingtingbak long olgeta samting we yumi tokbaot kam kasem naoia. Folem tok blong Baebol, olgeta we oli ded oli stap olsem we oli no gat laef nating, gogo kasem taem we Jeova God i mekem olgeta oli laef bakegen long ded. Samfala oli laef bakegen long heven. Long ples ya, bambae oli rul wetem Jisas Kraes long Kingdom gavman. Bighaf blong ol man bambae oli laef bakegen long wol ya, blong stap laef aninit long rul blong Kingdom ya.

Laef bakegen long wol, i wan long ol rod we Jeova i yusum blong mekem stampa tingting blong hem long saed blong wol ya i kamtru. Jeova i wokem wol ya blong “ol man oli save stap long hem.” (Aesea 45:18) Hem i wantem se wol ya i stap olsem prapa ples blong man blong olwe. Taswe, man blong raetem Ol Sam i singsing se: “Heven i ples blong Hae God nomo, be hem i givim wol ya long man.”​—Ol Sam 115:16.

Bifo we laef bakegen long wol ya i stat, sam bigfala jenis i mas kamaot. Ating yu agri se, God i no wantem we wol ya i kam fulap long ol faet, doti, fasin blong brekem loa, mo fasin blong kilim man. Ol problem ya oli kamaot from ol man we oli no gat respek long God mo ol stret loa blong hem. Taswe, Kingdom blong God bambae i mekem wan bigfala samting blong mekem wil blong God i kamaot long wol ya. Bambae hem i “spolem ol man ya we oli stap spolem wol.” (Revelesen 11:18) Kingdom ya bambae i spolem ol rabis man, mo bambae samting ya i livim ol stret man nomo blong laef long wol ya blong olwe.​—Ol Sam 37:​9, 29.

Paradaes Long Wol

Olgeta we bambae oli laef bakegen long wol we i klin, oli kwaet man, we oli gat fasin blong tingbaot narafala, mo oli mekem ol samting we oli stret. (Skelem Matyu 5:5.) Aninit long Kingdom blong God we i rul wetem fasin lav, bambae oli gat wan laef we i hapi mo i sef. Baebol i givim wan nambawan pija long saed long ol samting we bambae oli hapen long taem ya se: “[God] bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.”​—Revelesen 21:4.

Yes, wol ya bambae i kam wan paradaes. (Luk 23:43) !Tingbaot mining blong samting ya! Bambae ol man oli no moa nidim ol hospital mo spesel ples blong lukaot long ol olfala. Long Paradaes, olgeta we naoia oli stap harem nogud from oli kam olfala, oli save kam strong mo haremgud bakegen. (Job 33:25; Aesea 35:​5, 6) Bambae i no moa gat ples blong kipim ol ded man bifo we oli berem olgeta. Bambae i no moa gat ol beregraon, mo gref. Jeova bambae i yusum Kingdom blong hem, blong “finisim ded blong olwe.” (Aesea 25:8) Ol blesing olsem, bambae oli rili minim wan nyufala laef long yumi mo long ol bubu blong yumi.

[Tok blong pija long pej 7]

Olgeta we oli laef bakegen long wol, bambae oli stap aninit long rul blong Kingdom