Ol Wetnes Blong Jeova Raonabaot Long Wol—Swiden

SWIDEN i wan kantri we i stap long is saed blong Skandinavia, mo i longfala go kasem antap long Aktik Sekel. Plante man long wol oli save kantri ya from plante bigfala grin bus blong hem, ol bigfala lugun, mo ol bigfala hil blong hem. Namba blong ol man we oli stap long Swiden, i daon moa long ol narafala kantri long Yurop. Nating se i olsem, Ol Wetnes blong Jeova oli lukaotem mo faenem olgeta we oli laekem trutok long ples ya, stat long en blong ol yia 1800. Tingbaot wan eksampel we i kamaot i no longtaem.

Wan woman i stadi Baebol wetem ol Wetnes, be hasban blong hem i no laekem samting ya. Hem i talem long waef blong hem blong stopem stadi, mo woman i mekem olsem. Man ya i wok long wan dok, we i fulap long ol samting we oli yusum blong mekem alkol. Wan dei, wan man blong draevem trak i kam long dok ya, wetem smol bubu blong hem we i gat ten yia. Olfala bubu man i askem man ya blong lukaot long smol boe ya, taem hem i stap putum ol samting i go long trak blong hem. Jes blong statem wan storeyan, man ya i askem smol boe, wanem presen we hem i bin kasem long betde blong hem. Hem i sapraes taem smol boe ya i talem long hem se, hem mo famle blong hem oli no mekem lafet blong betde, from we oli Wetnes blong Jeova. Smol boe ya i talem tu se, hem i stap kasem ol presen eni taem long yia, mo se hem i no harem we i mestem wan samting, from we hem i stap long wan famle we i fulap long kaen fasin mo lav. Hem i ademap se, i no gat wan presen we i gud olsem samting ya.

Biaen, smol boe ya i folem bubu man blong hem plante taem, blong kambak long ples ya. Evritaem, man ya i stap askem plante kwestin long smol boe ya, mo hem i rili sapraes bigwan long ol ansa blong smol boe ya we oli tru, oli stretgud, mo hem i no fraet blong talemaot. I tajem hat blong hem tu, taem i luk se smol boe ya i laekem tumas ol samting we oli impoten. Wan naet, afta we man ya i luk wan program long televisin we i soemaot ol trabol we i stap kamaot long wol, hem i luksave se hem i nidim blong tingting dip moa long ol samting long saed blong speret. Hem i telefon i go long Wetnes we i bin visitim waef blong hem, mo i askem long hem blong kambak. I no longtaem, man ya i stat stadi Baebol wetem wan Wetnes, mo hem i gohed gud. Hem i tekem baptaes long Epril 10, 1994. Mo naoia, woman blong hem tu i baptaes.

Fasin Blong Gru i Nidim Fasin Blong Bildim Tu

Swiden i wan kantri we i fulap long ol refujia blong ol narafala kantri, mo wok blong ol Wetnes blong Swiden blong prij long olgeta, i karem plante frut. Long evri ples long kantri ya, wok blong prij i karem plante frut, mekem se oli nidim plante nyufala Haos Kingdom. Stat long 1986 go kasem 1993, oli bildim 37 Haos Kingdom folem fasin blong bildim haos kwiktaem. Mo long semtaem tu, i gat 8 narafala Haos Kingdom we oli mekem i kam bigwan no mekemgud bakegen. Long 1994 nomo, oli bildim seven nyufala Haos Kingdom, mo oli mekem tri narafala i kamgud bakegen.

Naoia, i gat 65 kongregesen we oli stap wet blong kasem help blong bildim nyufala Haos Kingdom, no blong mekem hemia we oli gat finis i kam bigwan moa, no blong mekem i gud bakegen. Samwe 2,500 man oli wok fri blong givhan long ol wok ya blong bildim ol haos olsem. Mo ol kongregesen oli rili gat tangkyu long olgeta from fasin lav we oli soemaot, taem oli glad blong givhan.

Haf blong Swiden we i stap long not, antap long Aktik Sekel, samtaem oli kolem se ples blong san long medel naet. Oli talem olsem from we, long hot taem, san i neva godaon long ples ya. Be, long olgeta ples blong Swiden, laet blong trutok tu i stap gohed blong saen bigwan. Wetem blesing blong Jeova, laet ya long saed blong speret, bambae i neva godaon, be bambae i gohed blong saen strong moa oltaem.

[Futnot]

[Bokis blong pija long pej 8]

LUKLUK LONG OL NAMBA BLONG KANTRI YA

1994 Sevis Yia

BIGFALA NAMBA BLONG OLGETA WE OLI STAP PRIJ: 24,246

SKELEM: 1 Wetnes long 362 man

NAMBA BLONG OL MAN WE OLI KAM LONG MEMORIOL: 40,372

MEDEL NAMBA BLONG OL PAENIA: 2,509

MEDEL NAMBA BLONG OL BAEBOL STADI: 11,306

NAMBA BLONG OL MAN WE OLI TEKEM BAPTAES: 850

NAMBA BLONG OL KONGREGESEN: 358

BRANJ OFIS: ARBOGA

[Tok blong pija long pej 9]

Branj ofis mo Betel long Arboga

[Tok blong pija long pej 9]

Ol faswan Wetnes long Hjo, oli yusum smol bas ya blong kavremap wan teritori we i bigwan olsem 5,000 skwea kilomita