Jeova i Tij Kam Kasem Naoia
“Jeova hem wan i givim tang long mi, olsem tang blong ol man we hem i tijim.”—AESEA 50:4.
1, 2. (a) ?Jeova i rerem studen we hem i laekem tumas blong mekem wanem, mo wanem frut i kamaot from? (b) ?Olsem wanem Jisas i soem se hem i luksave Stampa blong ol tijing blong hem?
JEOVA GOD i bin stap olsem wan Tija stat long taem we hem i kam wan Papa. Samtaem afta we sam pikinini blong hem oli rebel, hem i rerem studen blong hem we hem i laekem tumas, hemia Fasbon pikinini blong hem, blong mekem minista wok long wol. (Proveb 8:30) Profet tok blong Aesea japta 50 i talemaot tok blong studen ya, i se: “Hae Masta Jeova hem wan i givim tang long mi, olsem tang blong ol man we hem i tijim, blong mi save talem wan tok blong ansa long man we i slak.” (Aesea 50:4) Taem Jisas i stap long wol, hem i folem tijing blong Papa blong hem. From samting ya, hem i mekem ol man we ‘oli stap hadwok tumas, mo oli stap karem ol hevi samting,’ oli haremgud.—Matyu 11:28-30.
2 Long faswan handred yia, Jisas i mekem plante bigbigfala wok. Hem i mekem blaenman i lukluk, i mekem dedman i laef bakegen. Be ol man long taem blong hem oli save hem moa from wok blong hem olsem wan tija. Ol man blong hem, mo tu ol enemi blong hem, oli kolem hem se tija. (Matyu 8:19; 9:11; 12:38; 19:16; Jon 3:2) Jisas i neva leftemap hem wan from ol samting we hem i tijim, be wetem tingting daon, hem i talem se: “Ol tok ya we mi stap tijim ol man long hem, oli no blong mi nomo, oli kamaot long hemia we i sanem mi.” “Mi stap talemaot ol samting ya nomo we Papa blong mi i tijim mi finis long hem.”—Jon 7:16; 8:28; 12:49.
Gudfala Fasin Fren Blong Tija Mo Studen
3. ?Olsem wanem profet tok blong Aesea i soem intres we Jeova i gat long olgeta we hem i tijim?
3 Wan nambawan tija, hem i traehad blong soem intres wetem fasin lav, long ol studen blong hem wanwan. Aesea japta 50 i soem se Jeova God i gat intres olsem long olgeta we hem i stap tijim. Profet tok ya i talem se: “Hem i girap evri moning. Hem i openem sora blong mi, blong mi harem ol samting, olsem ol man we hem i stap tijim.” (Aesea 50:4) Vas ya i tokbaot wan tija we i wekemap ol studen blong hem long eli moning blong i tijim olgeta. Blong tokbaot mining blong profet tok ya, wan man blong stadi dip long Baebol i talem se: “Tingting i stap, se Man we i Sevem yumi bambae . . . i wan man we, i olsem se, i stap long skul blong God; mo we hem i nafgud blong tijim ol narafala. . . . Mesaea i rili nafgud blong tijim ol man, from we God i tijim hem.”
4. ?Jisas i mekem wanem taem Papa blong hem i tijim hem?
4 Ol gudfala studen oli lesin long tijing blong tija blong olgeta. ?Jisas i mekem wanem taem Papa blong hem i stap tijim hem? Fasin blong hem blong lesingud i laenap wetem tok we yumi ridim long Aesea 50:5, se: “Haefala Masta Jeova hem wan i openem sora blong mi, mo mi, mi no mekem stronghed. Mi no tanem baksaed long hem.” Yes, Jisas i wantem tumas blong lanem ol samting. Hem i lesingud. Antap long samting ya, hem i rere blong mekem wanem we Papa blong hem i askem long hem blong mekem. Hem i no mekem stronghed. Long defren fasin, hem i talem se: “Yu no mekem olsem we mi mi wantem, yu mekem olsem we yu nomo yu wantem.”—Luk 22:42.
5. (a) ?Wanem i soem se bifo we Jisas i kam long wol, hem i save finis long ol hadtaem we bambae hem i kasem? (b) ?Olsem wanem profet tok blong Aesea 50:6 i kamtru?
5 Profet tok i soemaot se, God i talemaot long Pikinini blong hem ol trabol we bambae hem i kasem, taem hem i mekem wil blong God. Yumi luk samting ya long ol tok blong man ya we God i tijim hem, taem i talem se: “Baksaed blong mi, mi givim long olgeta we oli wipim, mo saed fes blong mi, mi givim long olgeta we oli stap pulumaot hea blong mi. Mi no haedem fes blong mi long ol samting blong mekem mi mi sem, mo long spet blong man.” (Aesea 50:6) Olsem profet tok ya i soemaot, ol man oli mekem i nogud tumas long Jisas long wol ya. Matyu i talem se: “Olgeta oli spet long fes blong hem. . . . Mo sam oli slavem hem.” (Matyu 26:67) Ol lida blong skul nao oli mekem samting ya long naet blong Pasova long yia 33 K.T. Long nekis dei, Jisas i letem baksaed blong hem long ol man we oli wipim hem, taem ol soldia blong Rom oli wipim hem we oli no gat sore, bifo we oli nilim hem long wan pos blong i ded.—Jon 19:1-3, 16-23.
6. ?Wanem i soem se Jisas i neva lusum tras long Tija blong hem, mo olsem wanem hem i kasem presen from fasin tras blong hem?
6 Pikinini ya blong God, we i bin skulgud, i neva lusum tras long Tija blong hem. Yumi luk samting ya long nekis tok blong hem we profet i talem, se: “Haefala Masta Jeova hem wan bambae i halpem mi. Hemia nao from wanem mi no nid blong harem se mi sem.” (Aesea 50:7) Jisas i kasem bigfala presen from we hem i trastem Tija blong hem blong halpem hem. Papa blong hem i leftemap hem, i blesem hem wetem haeman we i hae moa, i bitim ol narafala nem blong ol man blong wok blong God. (Filipae 2:5-11) Ol bigfala blesing oli stap rere long yumi tu, sipos yumi obei mo folemgud tijing blong Jeova, mo yumi no “tanem baksaed long hem.” I gud yumi luk olsem wanem ol man oli bin kasem tijing ya kam kasem taem blong yumi.
Wan Program Blong Tij We i Bigwan Moa
7. ?Olsem wanem Jeova i bin tij long wol?
7 Olsem yumi luk finis, long faswan handred yia, Jeova i yusum Man ya we i wok long nem blong hem long wol, Jisas Kraes, blong tijim ol man long tijing blong God. (Jon 16:27, 28) Oltaem nomo, Jisas i poen i go long Tok blong God blong givim paoa long tijing blong hem. Long rod ya, hem i soem eksampel long olgeta we hem i stap tijim olgeta. (Matyu 4:4, 7, 10; 21:13; 26:24, 31) Biaen, olgeta we Jeova i tijim olgeta, oli tijim ol man long tijing blong Hem, taem oli mekem Kristin minista wok blong olgeta long wol ya. Tingbaot we Jisas i givim oda long olgeta se: “From samting ya, yufala i mas go long ol man long olgeta ples long wol, blong pulum olgeta oli kam man blong mi. . . . Yufala i mas tijim olgeta blong oli folem olgeta tok ya we mi mi givim finis long yufala.” (Matyu 28:19, 20) Ol man ya we oli pulum olgeta blong kam disaepol, oli kam haf blong ‘famle blong God, . . . kongregesen blong God ya we i laef we i no save ded.’ (1 Timote 3:15) Mo tu, oli joen long ol wanwan kongregesen, mo insaed long ol kongregesen ya, Jeova i tijim olgeta. (Ol Wok 14:23; 15:41; 16:5; 1 Korin 11:16) ?Tijing blong God olsem i bin gohed kam kasem taem blong yumi?
8. ?Jisas i soem se hu bambae i lidim wok blong prij long wol ya bifo we en i kam?
8 !Yes! Tri dei bifo we Jisas i ded, hem i talem se bifo long en blong ol fasin blong wol ya, bambae i gat wan bigfala wok blong prij. Hem i talem se: “Gud nyus ya blong kingdom, bambae oli talemaot long olgeta ples long wol we i gat man long hem, blong oli wetnes long olgeta nesen. Nao biaen, en bambae i kam.” (NW) Jisas i gohed blong tokbaot samting we bambae i lidim program ya blong prij mo tij raonabaot long wol. Hem i talem se ‘slef ya we i stret mo waes’ nao bambae i stap olsem rod, no tul, blong givim kakae long saed blong speret long ol man blong Hem. (Matyu 24:14, 45-47) Jeova God i yusum ‘slef’ ya blong lukaot long ol intres blong Kingdom long olgeta ples blong wol.
9. ?Hu ya slef we i stret mo waes?
9 Tede, smol grup blong man we oli stap long wol, we bambae oli rul long Kingdom, olgeta nao oli olsem slef ya we i stret mo waes. Hemia ol tabu Kristin, haf blong ol 144,000 we oli stap yet long wol, we oli “blong Kraes” mo we oli haf blong “laen ya blong Ebraham.” (Galesia 3:16, 29; Revelesen 14:1-3) ?Olsem wanem yu save luksave slef ya we i stret mo waes? From wok we oli mekem, mo from fasin blong olgeta blong fasgud long Tok blong God, Baebol.
10. ?Grup we i olsem slef ya oli yusum wanem tul blong leftemap ol tijing blong Jeova?
10 Tede, Jeova i yusum “slef” ya olsem rod blong hem blong tijim ol man. Long 1931, grup we i olsem slef ya i tekem nem ya ol Wetnes blong Jeova. Stat long taem ya, plante milyan man oli joen wetem olgeta. Oli tekem nem ya mo oli joen long wok blong talemaot Kingdom blong God. Magasin ya Wajtaoa We i Talemaot Kingdom Blong Jeova, hem i nambawan tul we “slef ya” i stap yusum long wok blong tij. Be, hem i yusum ol narafala tul tu, olsem ol buk, ol buklet, ol traket, mo Wekap! magasin.
11. ?Wanem ol skul we “slef ya” i stanemap, mo wanem plan blong ol skul ya wanwan?
11 Antap long ol samting ya, “slef” ya i stanemap ol defren kaen skul. Olsem nao, i gat Wajtaoa Baebol Skul Blong Gilead, we hem i wan kos blong faef manis, blong rerem ol yangfala Kristin minista blong mekem wok blong misinari long ol narafala kantri. Mo tu, i gat Ministeriol Trening Skul, wan kos blong tu manis, blong trenem ol man blong givhan mo ol elda we oli no mared, blong oli mekem sam spesel tiokratik wok. I gat Kingdom Ministri Skul tu, we oli mekem sam samtaem, blong tijim ol Kristin elda mo ol man blong givhan, blong oli karem ol responsabiliti blong olgeta long kongregesen. Mo Skul Blong Ol Paenia, we i givhan long olgeta we oli prij fultaem, blong oli kam moagud long fasin blong olgeta blong prij.
12. ?Wanem samting we i kamaot evri wik we i haf blong program ya blong tij?
12 Wan narafala haf blong program ya blong tij, hemia ol faef miting evri wik, long bitim 75,500 kongregesen blong ol man blong Jeova raonabaot long wol. ?Yu yu stap kasem olgeta gudfala samting long ol miting ya? ?Yu yu soemaot from fasin blong yu blong lesingud long ol tijing we oli kamaot, se yu rili bilif we yu yu stap long ples we i olsem skul blong God? ?Fasin blong yu blong gru long saed blong speret i soem klia long ol narafala se yu yu gat ‘tang blong ol man we Jeova i tijim olgeta’?—Aesea 50:4; 1 Timote 4:15, 16.
Kasem Tijing Long Ol Miting Blong Kongregesen
13. (a) ?Tede, wanem impoten rod we Jeova i stap yusum blong tijim ol man blong hem? (b) ?Olsem wanem yumi save soem fasin tangkyu from Wajtaoa magasin?
13 Evri wik, Jeova i yusum wan spesel rod blong tijim ol man blong hem, hemia tru long wan Baebol stadi, wetem help blong Wajtaoa magasin we i olsem wan tul blong tij. ?Yu yu tingbaot miting ya olsem ples we Jeova i save tijim yu? Nating se Aesea 50:4 i tokbaot Jisas, hem i save go stret long olgeta tu we oli akseptem ol samting we God i stap givim, blong oli save kasem “tang blong ol man we hem i tijim.” Wan rod blong soem se yu tinghae long Wajtaoa magasin, i blong ridim evri namba kwiktaem afta we yu kasem. Ale, taem kongregesen i mekem Wajtaoa stadi, yu save soem fasin tangkyu long Jeova taem yu kam joen, mo tu, taem yu reregud blong talemaot hop blong yu long fored blong ol narafala.—Hibrus 10:23.
14. (a) ?From wanem fasin blong givim ansa long miting i wan impoten jans we yumi gat? (b) ?Ol yangfala oli save givim wanem kaen ansa we oli leftemap tingting blong ol narafala moa?
14 ?Yu yu luksave se taem yu givim ansa long ol miting, yu stap joen long bigfala program blong Jeova blong tij? I klia nomo, fasin blong givim ansa long ol miting i wan impoten rod we yumi save folem blong pulum narafala “blong laekem ol man, mo blong mekem ol gudfala fasin.” (Hibrus 10:24, 25) ?Olsem wanem long ol pikinini? ?Olgeta tu oli save joen long program ya blong tij? Yes, oli save joen. Plante taem, ol ansa we oli kamaot long hat blong ol yangfala, oli leftemap tingting blong ol olfala. Samtaem, ol ansa blong ol pikinini, oli bin pusum olgeta we oli jes stat blong kam long ol miting blong yumi, blong oli soem dip intres long trutok blong Baebol. Sam pikinini oli ridim ol ansa blong olgeta stret long buk, no oli talem folem tok blong wan bigman we i stap toktok long smol voes long sora blong olgeta. Be, taem oli mekemrere gud ol ansa blong olgeta, samting ya i leftemap tingting blong ol narafala moa. Ol ansa olsem oli rili givim ona long Bigfala Tija blong yumi mo nambawan program blong hem blong tij.—Aesea 30:20, 21.
15. ?Ol papa mo mama oli save mekem wanem blong halpem ol pikinini blong olgeta blong kam moagud long fasin blong givim ansa?
15 Yumi glad tumas blong luk se ol pikinini oli wantem joen blong presem God blong yumi. Jisas i glad long ol tok blong presem God we ol pikinini oli talem. (Matyu 21:15, 16) Wan Kristin elda i talem se: “Taem mi mi pikinini, mi wantem givim ansa long Wajtaoa Stadi. Afta we papa blong mi i halpem mi blong rerem wan ansa, hem i askem mi blong talem ansa ya samwe long seven taem bakegen.” Maet long taem we ol famle oli mekem Baebol stadi tugeta, ol papa mo mama oli save halpem ol pikinini blong olgeta blong rerem sam ansa long prapa tok blong olgeta, long sam haf we oli jusum long Wajtaoa magasin. Halpem olgeta blong gat fasin tangkyu long bigfala jans we oli gat blong joen long program blong Jeova blong tij.
16. ?Wanem gudfala frut we i kamaot from Tiokratik Skul, mo hu i save joen long skul ya?
16 Yumi evriwan, olgeta we oli gat jans blong givim tok mo olgeta we oli lesin long ol tijing we oli kamaot, yumi mas tinghevi long tijing we i kamaot long ol narafala Kristin miting tu. Bitim 50 yia finis we Jeova i stap yusum Tiokratik Skul evri wik, blong trenem plante milyan man mo woman blong kam moagud long wok blong talemaot mesej blong Kingdom. Olgeta we oli joengud wetem kongregesen, oli save joen long skul ya. Maet samfala oli jes stat blong kam long ol miting, be oli save joen sipos laef blong olgeta i laenap wetem ol Kristin rul.
17. (a) ?Wanem bigfala plan blong ol Pablik Tok? (b) ?Brata we i givim Pablik Tok i mas tingbaot wanem samting?
17 Wan narafala haf blong program blong tij we i bin stap longtaem, hemia Pablik Tok. Olsem nem blong hem i soemaot, miting ya i blong givhan moa long olgeta we oli no Wetnes, blong oli savegud ol stampa tijing blong Baebol. Taswe, brata we i givim tok ya i mas mekem long wan fasin we, olgeta we oli jes kam blong fastaem blong harem mesej ya, oli save kasem save long hem. Samting ya i min se hem i mas eksplenem ol tok, olsem “ol narafala sipsip,” “ol brata,” mo “ol tabu Kristin,” ol tok we olgeta we oli no Wetnes, maet oli no save mining blong olgeta. Sam man we oli kam blong lesin long Pablik Tok, maet oli gat ol bilif no fasin blong laef we oli no laenap wetem Baebol, be ol man blong wol tede oli agri long olgeta. From samting ya, oltaem brata we i givim tok i mas tok long waes fasin, mo neva hem i mas jikim ol bilif no ol fasin blong laef olsem.—Skelem wetem 1 Korin 9:19-23.
18. ?Wanem ol narafala miting blong kongregesen evri wik, mo ol miting ya oli blong wanem?
18 Buk Stadi blong kongregesen i wan miting, we yumi stadi long wan buk we slef we i stret mo waes i mekemrere, blong stadi long hem evri wik wetem Baebol. Revelesen—Kolosap I Kasem Nambawan En Blong Hem! hem i buk ya we ol kongregesen long plante kantri oli stap stadi long hem naoia. Mo tu, Miting blong Kingdom Wok i blong reremgud ol man blong Jeova blong oli joen fulwan long wok blong talemaot gud nyus blong Kingdom mo blong mekem disaepol.—Matyu 28:19, 20; Mak 13:10.
Kasem Tijing Long Ol Bigbigfala Miting
19. ?Wanem ol bigbigfala miting we “slef” i mekem plan blong olgeta evri yia?
19 Bitim handred yia finis we ‘slef ya we i stret’ i mekem plan blong holem ol asembli, blong tijim ol tru Kristin, mo blong leftemap tingting blong olgeta long spesel fasin. Naoia, long evri yia, oli holem tri bigbigfala miting olsem. I gat asembli blong wan dei. Ol man we oli kam long hem, oli stap long ol kongregesen we oli mekem wan seket. Bakegen, long evri yia, evri seket i gat wan miting blong tu dei, we oli kolem seket asembli. Antap long ol samting ya, i gat wan miting we oli kolem distrik asembli, we plante seket oli kam joen long hem. Long sam yia, maet i gat ol intenasnal asembli. !Ol bigbigfala miting ya we ol Wetnes blong plante defren kantri oli kam long hem, oli rili mekem bilif blong ol man blong Jeova i kam strong!—Skelem wetem Dutronome 16:16.
20. ?Long ol bigfala miting blong ol Wetnes blong Jeova, wanem impoten poen we oltaem oli bin makem strong?
20 Long 1922, taem samwe long 10,000 man oli hivap long Seda Poen, Ohaio, Yunaeted Stet, ol man we oli kam oli kasem paoa from tok blong wan brata we i leftemap tingting blong olgeta olsem: “Hemia dei we i bitim ol narafala dei. !Yufala i luk! !King i stap rul! Yufala i man blong talemaot hem. From samting ya, yufala i mas talemaot, talemaot, talemaot, King ya mo kingdom blong hem.” Ol bigbigfala asembli olsem, oltaem oli bin makem strong wok blong prij. Eksampel, long intenasnal asembli long Nyu Yok Siti long 1953, oli talemaot wan plan blong statem wan program long ol kongregesen, blong samfala oli save trenem sam narafala long wok blong prij long ol haos wanwan. Program ya i givhan bigwan long wok blong talemaot Kingdom long plante kantri.
God i Tijim Olgeta Blong Oli Tij
21. ?Yumi mas wantem blong akseptem wanem jans, we yumi no fogetem plan blong hem?
21 !Yes, Jeova i gat wan nambawan program blong tijim man long wol tede! Olgeta we oli joen long program ya, God i stap tijim olgeta. Yes, oli save stap long medel blong olgeta we Jeova i bin givim tang long olgeta, olsem “tang blong ol man we hem i tijim.” !Yumi gat wan nambawan jans taem yumi joen long samting ya we i olsem skul blong God! Be, taem yumi akseptem jans ya, yumi no mas fogetem plan blong hem. Jeova i tijim Jisas blong hem i tijim ol narafala. Mo Jisas i tijim ol disaepol blong hem blong oli save mekem sem wok we hem i stap mekem, be long wan fasin we i bigfala moa. I sem mak, Jeova i stap trenem yumi long bigfala program blong hem blong tijim man, blong yumi save tijim ol narafala.—Jon 6:45; 14:12; 2 Korin 5:20, 21; 6:1; 2 Timote 2:2.
22. (a) ?Moses mo Jeremaea, tufala i gat wanem problem, be olsem wanem tufala i winim problem ya? (b) ?Wanem i mekem yumi sua se God bambae i lukaot long wok blong talemaot Kingdom gogo i finis?
22 ?Olsem wanem? ?Yu yu mekem olsem Moses, we i talem, se, “Mi mi no man blong mekem gudfala toktok,” no olsem Jeremaea, we i talem, se, “Mi no rili save olsem wanem blong toktok”? Bambae Jeova i halpem yu olsem we i mekem long tufala. Hem i talem long Moses se: “Bambae mi mi givhan long yu long toktok blong yu.” Mo hem i talem long Jeremaea se: “Yu no fraet . . . Mi mi stap wetem yu.” (Eksodas 4:10-12; Jeremaea 1:6-8) Taem ol lida blong skul oli wantem satem maot blong ol disaepol blong Jisas, Jisas i talem se: “Sipos olgeta ya oli stap kwaet, bambae ol ston ya nomo oli save singaot.” (Luk 19:40) Be ol ston oli no nid blong singaot long taem bifo. Mo naoia tu, oli no nid blong singaot from we Jeova i stap yusum tang blong ol man we hem i tijim olgeta, blong oli talemaot mesej blong Kingdom blong hem.
?Yu Yu Save Ansa?
◻ ?Aesea japta 50 i soem wanem gudfala fasin joen blong Tija mo studen?
◻ ?Olsem wanem Jeova i bin mekem wan bigfala program blong tij?
◻ ?Wanem sam haf blong program blong Jeova blong tij?
◻ ?From wanem i wan nambawan jans blong joen long bigfala program blong Jeova blong tij?
[Tok blong pija long pej 16]
Taem ol pikinini oli givim ansa we i kamaot long hat blong olgeta, plante taem oli leftemap tingting blong ol olfala