Ol Famle We Oli Fasgud Long God Oli Spidimap Wok Long Sri Lanka

SRI LANKA, we oli kolem Selon kam kasem 1972, i wan nambawan aelan. Ol pamtri oli gru folem sanbij blong hem, i gat ol bigfala hil, mo sam smol draeples. Wan long ol hil ya, hemia Hil blong Adam, we hem i hae olsem 2,243 mita. Hem i wan tabu ples blong fo bigfala jyos.a Wan bigfala klif we i dip olsem 1500 mita i stap kolosap, nem blong hem, En blong Wol. Long olgeta ples long Sri Lanka, hemia i wan nambawan ples blong lukluk i go long ol narafala ples.

Ol 18 milyan man we oli stap long Sri Lanka, oli kamaot long ol defren ples. Stat long ol yia 400 B.K.T., ol man we oli haf Yurop haf India, mo oli stap long not India, oli kam plante long aelan ya. Hemia ol man Sinhales, we naoia oli mekemap 75 pesen blong fulnamba blong ol man long ples ya. Mo tu, long ol yia 1100, plante man Tamil, oli aot long saot India, oli kam. Bighaf blong ol man ya, naoia oli stap long not mo is-saed blong Sri Lanka. Ol Potugis, Daj, mo ol man Engglan, olgeta tu oli livim mak blong olgeta, taem oli stap rul long ples ya. Antap bakegen, ol bisnesman we oli stap long ol poen blong Arebia mo Malaya, oli pas long sip, oli kam stap wetem ol manples. Mo tu i gat sam smol grup blong ol man Yurop, Parsis, Jaena, mo sam narafala ples bakegen.

Antap long ol defren kala we oli stap wanples, ol lanwis mo skul blong Sri Lanka, oli soemaot se ol man oli kam long ol defren kastom. Ol lanwis we ol man oli yusum plante, hemia Sinhales, Tamil, mo Engglis. Plante man Sri Lanka, oli toktok tu no tri lanwis. Ol kastom blong ol defren laen blong man, oli gat bigfala paoa long ol skul. Bighaf blong ol man we oli toktok Sinhales oli Budis, mo bighaf blong ol man we oli toktok Tamil, oli Hindu. Olgeta we oli laen blong ol man Arab mo Malaya, plante oli strong long Islam. Mo olgeta we oli kamaot long Yurop, oli ol memba blong ol skul blong Krisendom, olsem Katolik mo Protestan.

Winim Traem

Olgeta samting ya, oli mekem bigfala traem long ol Wetnes blong Jeova long Sri Lanka. Oli wok strong blong folem oda blong Jisas se: “Mo gud nyus ya blong kingdom, bambae oli talemaot long olgeta ples long wol we i gat man long hem, blong oli wetnes long olgeta nesen.” (Matyu 24:​14, NW) Taem ol man blong talemaot gud nyus oli prij blong sam haoa nomo, oli mitim ol man blong ol defren lanwis. Mo antap long samting ya, oli toktok wetem ol Budis, ol Hindu, ol memba blong skul blong Krisendom, mo tu ol man we oli no bilif long God.

Sipos ol pablisa oli wantem karem frut long wok blong prij, oli mas karem ol Wajtaoa mo Wekap! magasin mo ol narafala buk we oli tokbaot Baebol, long lanwis Tamil, Sinhales, mo Engglis. Ol pablisa we oli gat naf paoa, oli karem ol Baebol tu long ol lanwis ya. I no longtaem i pas, ol pablisa oli glad bitim mak taem ol buklet ya, ?God i Rili Kea Long Yumi? mo Our Problems​—Who Will Help Us Solve Them? mo traket ya ?Wol Bambae i Lus No i Stap? oli kamaot long tri lanwis wantaem. Samting ya i minim se oli kasem moa tul blong yusum long wok blong prij.

Ol Wetnes oli bin wok had stat long 1912, taem Charles Taze Russell, presiden blong Grup Blong Ol Intenasnal Baebol Studen, i mekem sot visit long Selon. Be, long 1947 nomo, taem ol misinari blong Wajtaoa Baebol Skul blong Gilead oli kam, namba blong ol Wetnes i kam bigwan. Stat long taem ya, ol pablisa long Sri Lanka oli haremgud long nambawan frut we i kamaot from wok blong olgeta blong prij. Long 1994, ol 1,866 pablisa blong Kingdom oli mekem 2,551 Baebol stadi long haos blong ol man long evri manis. Mo 6,930 man we oli kam long Memoriol, hemia i kolosap fo taem antap long fulnamba blong ol pablisa long ol kongregesen long ples ya. !Hemia wan nambawan blesing ya!

Taem yumi skelem wetem sam narafala kantri, i luk olsem se namba blong ol man Sri Lanka we oli intres i no gru kwik. Wan stampa risen, hemia strong fasin joen long famle. Be fasin joen long famle i save karem gudfala frut tu. Taem kapten blong ami ya blong Rom, Konilyas i jusum blong folem trutok, famle blong hem tu i folem. (Ol Wok 10:​1, 2, 24, 44) Buk blong Ol Wok i tokbaot sam narafala famle we oli strong blong folem Kristin fasin, olsem famle blong Lidia, Krispas, mo man ya we i mekem gad long Pol mo Saelas long kalabus.​—Ol Wok 16:​14, 15, 32-34; 18:8.

Yes, strong fasin joen long famle i save karem gudfala frut, taem oli gat gudfala plan mo fasin blong gohed strong oltaem. Ray Matthews, wan misinari we i wok longtaem, i stap tingbaot ol tok blong Aesea 60:​22, nao hem i talem se: “I klia se naoia, Jeova i stap spidimap wok long stret taem blong hem, i no long saed blong ol wanwan man nomo, be long saed blong ol famle tu.”

Famle We i Folem Plan i Givim Ona Long God

Tede, i gat ol famle long Sri Lanka we oli gat strongfala bilif. Wan eksampel, hemia famle Sinnappa we oli folem wan gudfala plan. Oli stap long Kotahena, wan eria blong Kolombo, bigfala taon blong Sri Lanka. Nating se hed blong famle, Marian, i jes ded i no longtaem, waef blong hem, Annamma, mo 12 long ol 15 pikinini blong tufala, we yia blong olgeta i stat long 13 kasem 33, oli gohed blong mekem wok blong Jeova olsem wan famle. Naoia, eit long ol pikinini oli baptaes finis, mo tri long olgeta oli joen long fultaem Kristin minista wok, oli stap wok olsem fultaem paenia. Plante taem, tri narafala oli stap joen long wok blong haftaem paenia. Fo blong olgeta long famle we oli yangfala moa, oli pablisa we oli no baptaes yet. Antap bakegen, fo smol bubu, nating se oli pikinini nomo, oli stap stadi Baebol mo go long ol Kristin miting long Kolombo Not Kongregesen blong ol Wetnes blong Jeova.

Long 1978, hem i fastaem we Annamma i harem gud nyus blong Kingdom, taem hem i tekem wan Wajtaoa magasin. Hem i stat blong stadi long Baebol, mo afta we hem i finisim stadi long buk ya, Trutok Blong Soemaot Rod Blong Itenel Laef, hem i givim laef blong hem long Jeova God mo i tekem baptaes. Olsem nao, hem i faswan blong soem rod long plante famle blong hem.

Olsem ami ya Konilyas, Annamma i gat gudfala plan long famle blong hem. Annamma i tingtingbak, nao i talem se: “Mifala i folem wan plan blong go long ol Kristin miting mo ol asembli​—mo long saed blong skul tu. Mifala i fesem hadtaem long saed blong klos, be wetem blesing blong Jeova, mifala i naf blong mekem sam nyufala klos blong evri asembli. Evriwan long famle oli kasem ples blong asembli we oli jenisgud mo kakaegud​—mo oli gat bigfala smael tu.”

Ol pikinini oli tingbaot we oli bin laekem tumas plan blong famle. Blong halpem fulwan famle blong go long ol Kristin miting, ol pikinini we oli bigwan oli mekem sam spesel wok. Olsem nao, wok blong Mangala i blong wasem klos, mo Winnifreda i aeanem ol klos. Winnifreda, we i givhan tu blong putum klos blong ol smol pikinini, i talem se: “Evriwan i luk naes tumas taem mifala i aot long haos.”

Oli folem plan tu long ol samting long saed blong speret. Dota Pushpam, we naoia hem i wan fultaem paenia, i rimemba se: “Evri dei, famle blong mifala i glad blong ridim Baebol mo blong tokbaot vas blong dei tugeta.” Annamma i gohed se: “Evri pikinini wanwan oli gat Baebol, Wajtaoa magasin, mo ol narafala buk. Mi lesingud long ol ansa blong olgeta long ol miting. Taem mi luk se i stret blong mekem, mi leftemap tingting blong olgeta long haos, mo mi givim sam advaes long olgeta. Long naet, mifala i joen blong finisim dei blong mifala wetem famle prea.”

Ol pikinini we oli gat moa yia, oli halpem Annamma blong givim gudfala Kristin tijing long evriwan long famle. Be, plan blong olgeta we i mekem se oli bisi oltaem, i no blokem strong tingting blong olgeta blong joen long wok blong talemaot gud nyus long ol narafala man. Ful famle i mekem 57 Baebol stadi long ol man we oli stap kolosap long olgeta. Palika ya, Rajan i talem se: “Famle i mekem ol Baebol stadi we oli gohedgud. Waef blong mi, Pushpam, i bin gat jans blong luk we wan stadi blong hem i givim laef blong hem long Jeova.”

Ol man blong Kotahena oli sapraes taem wan bigfala famle olsem i aot long Roman Katolik Jyos. Pris hem wan i neva visitim famle ya blong faenemaot from wanem i olsem, be hem i askem ol memba blong jyos blong traem faenemaot. Biaen, oli storeyan wetem ol man ya plante taem bakegen, we bighaf blong ol storeyan ya i long saed blong tijing blong Triniti. Oltaem, Annamma i dipen long Jeova mo Baebol blong sapotem bilif blong hem. Vas we hem i laekem moa long ol storeyan ya, hemia Jon 17:3.

Famle Sinnappa i soemaot klia se, fasin blong gat gudfala plan mo traehad oltaem i karem gudfala frut. From fasin traehad blong olgeta, i gat sam nyufala pablisa blong Kingdom oli stap gruap, evriwan oli givim ona long Jeova.

Fasin Agens i Joenem Famle Long Trufala Wosip

Famle Ratnam i stap sam kilomita longwe long famle Sinnappas, long Nahenpitya, wan narafala eria blong Kolombo. Bifo, olgeta tu oli Katolik. Long 1982, ol Wetnes we oli stap prij long ol haos wanwan oli mitim Balendran, hasban blong fasbon dota, Fatima. Oli statem Baebol stadi wetem fulwan famle. Smoltaem biaen, trifala pikinini blong tufala i stap askem bubu woman, Ignasiamal, long saed blong nem blong God. Taem trifala pikinini oli talem ansa se “Jeova,” oli wekemap intres blong bubu woman ya, mo hem i stat blong stadi Baebol. Biaen, tufala dota blong hem, Jeevakala mo Stella, oli joen long stadi, mo long 1988, trifala evriwan oli baptaes.

Long semtaem, Balendran mo Fatima, tufala i serem trutok wetem wan narafala sista blong Fatima, Mallika, mo hasban blong hem, Yoganathan. Long 1987, tufala i baptaes, mo tufala i tijim tufala pikinini blong tufala blong laekem Jeova mo blong mekem lav ya i gru. Pushpa, wan narafala sista blong Fatima, i nekiswan we i kam long trutok. Hem i givim laef blong hem long Jeova mo i tekem baptaes long 1990. Taem tufala i stap long Tokyo, hasban blong hem, Eka, i wok wetem wan Engglis kongregesen, mo Pushpa i halpem boe blong tufala, Alfred, blong gruap folem ol rod blong Jeova.

I gat fo long ol ten pikinini long Ratnam famle we oli mekem disisen blong olgeta finis blong folem trufala wosip. I gud tumas, se i gat tri moa we oli stap gohedgud long Baebol stadi blong trifala wanwan. Long ol 11 smol bubu, wan gel, Pradeepa, i baptaes finis. Seven narafala smol bubu we oli yang moa, oltaem oli kasem tijing long famle Baebol stadi blong olgeta. Antap bakegen, oli mekem 24 Baebol stadi long haos blong ol man raonabaot, we oli intres.

Olgeta samting ya oli no hapen isi nomo. Fastaem, i gat famle we i agens. Papa ya, Muthupillai, mo ol fasbon brata, oli agensem tumas eni memba blong famle we i go long ol miting long Haos Kingdom no i joen long wok blong prij. Oli agens from we oli wari se i no sef blong wokbaot i go long ol miting. Be tu, Muthupillai i talem se: “Mi mi bilif fulwan long ol ‘tabu man’ mo mi no wantem se famle blong mi i lego Katolik Jyos.” Be naoia, hem i bilif se oli stap wosip long trufala God, from we hem i save luk ol gudfala frut we oli kamaot from bilif blong olgeta.

Eksampel, wan taem, wan Budis, we oli rentem haos blong hem, i yusum majik blong ronemaot olgeta long haos. Wan naet, hem i kam mo i putum “majik” lemon frut raon long haos blong olgeta. Ol man we oli stap raonabaot, oli fraet tumas, mo evriwan oli ting se wan nogud samting bambae i hapen long famle Ratnam. Be, taem Ignasiamal i faenemaot samting ya, hem mo ol pikinini blong hem oli no fraet, oli go tekemaot ol frut ya nomo​—mo i no gat wan samting i hapen long olgeta. Fasin blong olgeta blong no fraet, i givim wan gudfala wetnes long eria ya, mo i mekem se ol man oli gat bigfala respek long olgeta. Stella i statem tu Baebol stadi wetem tu famle we oli stap kolosap. Samting ya i pulum palika woman, Nazeera, ale hem tu i agri blong stadi Baebol.

Blong luklukbak long plante blesing we famle blong hem i kasem, Ignasiamal i talem se: “Mi mi glad tumas blong luk olsem wanem famle blong mi i gru bigwan long saed blong speret. Jeova i blesem mifala from we ol man oli no moa agensem mifala tumas, mo fasin joen long famle blong mifala i kam strong.”

Ol bigfala famle ya oli kam olsem wan bigfala blesing long ol narafala. Oli joen wetem ol famle we oli smol, ol famle we i gat hasban no waef nomo, mo ol Kristin we oli no mared, we oli stap traehad blong spidimap wok blong talemaot gud nyus blong Kingdom long “nambawan kantri ya,” olsem mining blong nem ya Sri Lanka i talem. Wetem ol Kristin brata sista blong olgeta raonabaot long wol, ol Wetnes long Sri Lanka oli stap wet long taem we bambae wol i kam Paradaes bakegen, mo oli luk pija blong hem finis long ol naesfala sanbij mo hil blong Sri Lanka.

[Futnot]

[Tok blong pija long pej 24, 25]

Plante man long Sri Lanka oli lesin taem ol Kristin oli prij mo tij