Naoia i Gat Plante Moa Bad Nyus

?SAMTAEM yu yu makem se ol bad nyus long faswan pej blong nyuspepa oli pulum intres blong ol man, i bitim ol gudfala nyus? Maet hem i wan stampa tok long nyuspepa long saed blong wan bigfala hariken, no wan store long fas pej blong wan naes buk, we i tokbaot wan nogud samting we wan impoten man i bin mekem. Nating se i olsem wanem, be i luk olsem se ol man oli laekem moa blong pem ol buk we oli tokbaot bad nyus, i bitim we oli pem ol buk we oli tokbaot gudfala nyus.

Tede, i gat plante tumas bad nyus. Be samtaem, yumi save ting se, maet ol man blong givim ripot mo blong wokem nyuspepa oli kasem trening blong faenem mo talemaot ol bad nyus nomo​—mo livim ol gudfala nyus.

I Gat Plante Bad Nyus Long Ol Yia We Oli Pas

Yes, i gat plante bad nyus i kamaot long ol handred yia we oli pas, i bitim gud nyus we i bin kamaot. Ol buk we oli storeyan long saed blong ol yia bifo, oli tokbaot moa ol trabol we ol man oli bin kasem, ol nogud samting we i mekem olgeta oli harem nogud, mo i mekem tingting blong olgeta i foldaon.

I gud yumi luk sam eksampel. Buk ya Chronicle of the World, we Jacques Legrand i wokem, i gat ol defren store long hem. Oli raetem wanwan long ol store ya, olsem we hem i stret dei we samting ya i hapen. Be oli mekem olsem we wan man blong wokem nyuspepa tede i stap talem ripot ya. From ol ripot ya we oli reremgud, yumi luklukgud ol bad nyus we ol man oli bin harem, long olgeta yia blong trabol long Wol ya.

Fastaem, tingbaot wan ripot we i kamaot long Gris long 429 B.K.T.a Ripot ya i tokbaot wan faet we i stap gohed long taem ya bitwin Atens mo Sparta: “Ol man Atens oli raonemgud bigfala taon ya Potidaea. Ol man blong taon ya oli mas letem olgeta oli go nomo long han blong ol man Atens, from we oli no moa gat kakae, nao oli hanggri gogo oli kakae ol dedbodi blong ol man blong olgeta.” !Wan bad nyus stret!

Long faswan handred yia bifo long Kristin Taem, i gat wan ripot we i tokbaot ded blong Julius Caesar long klia fasin. Oli raetem ripot ya long Rom, long Maj 15, 44 B.K.T. “Tede, Maj 15, oli kilim i ded Julius Caesar. Wan grup blong man, we sam long olgeta oli ol gudfala fren blong hem, oli mekem rabis plan, nao oli stikim hem i ded, taem hem i sidaon long jea blong hem long Palemen.”

Long ol handred yia we oli kam biaen, plante bad nyus i gohed blong kamaot. Wan eksampel, rabis nyus we i kamaot long Meksiko long 1487 i olsem: “Long bigfala taon blong ol Astek, Tenoktitlan, oli mekem wan sakrifaes we i bigfala moa i bitim samting we ol man ya oli bin luk bifo. Oli katemaot hat blong 20,000 man blong mekem sakrifaes long Witsilopojli, god blong faet.”

Bad nyus i stap kamaot from raf fasin blong ol man, be i kamaot tu, taem man i no lukaotgud. Bigfala faea blong London i wan nogud samting we i kamaot from we man i no lukaotgud. Wan ripot blong London, Engglan, long Septemba 5, 1666, i talem se: “Afta we faea blong London i gohed blong fo dei mo fo naet, wan haeman blong Yok i stopem. Hem i singaot ol soldia long ol sip blong faet oli kam wetem ol bom, nao oli spolem ol haos we oli stap long rod blong faea. Faea i spolem 160 hekta wetem 87 jyos haos mo bitim 13,000 haos. Wan merikel se, naen man nomo oli ded.”

Antap long ol eksampel ya blong bad nyus, yumi mas ademap ol sik we oli kasem plante kantri​—eksampel, sik ya kolera we i kasem plante man jes biaen long yia 1830. Nem blong store long nyuspepa we i tokbaot trabol ya, i olsem: “Bigfala fraet long saed blong kolera i kavremap Yurop.” Trufala ripot we i kam biaen i soem bad nyus we i bitim mak: “Sik ya kolera, we i jes kasem Yurop long 1817, i stat long Esia mo i stap go long ol kantri long wes. Plante man finis oli ded from sik ya long ol taon blong Rasia, olsem Mosko mo Sen Pitasbeg. Bighaf blong ol man ya we oli ded, oli ol puaman we oli stap long ol taon.”

Bad Nyus i Kam Antap Bigwan Long Ol Yia We Oli Jes Pas

I tru, ol ripot blong ol yia bifo oli soem se bad nyus i bin stap oltaem long laef blong ol man. Be ol yia we oli jes pas long taem blong yumi, oli soem se bad nyus i stap kamaot moa naoia. Yes, bad nyus i stap kam antap kwiktaem nomo.

I klia se nyus long saed blong faet i wan nyus we i moa nogud bitim ol narafala bad nyus we yumi bin harem long laswan handred yia. Long tufala faet we oli bigwan moa long ol narafala faet​—Faswan Bigfala Faet Blong Wol mo Namba Tu Bigfala Faet Blong Wol​—i gat ol bad nyus i kamaot we oli mekem man i fraet bitim mak. Be hemia i jes wan smol haf nomo blong ol bad nyus we oli kamaot long laswan handred yia ya, ol yia we oli no gat glad nating long olgeta.

Tingbaot sam nyus we oli jusum olbaot nomo:

Septemba 1, 1923: Graon i seksek bigwan mo i flatem Tokyo​—300,000 man oli ded; Septemba 20, 1931: Bigfala trabol long Briten​—mane i lusum paoa blong hem; Jun 25, 1950: Ami blong Not Koria i krosem boda, i go insaed long Saot Koria; Oktoba 26, 1956: Ol man Hangari oli girap agensem rul blong Ol Soviet; Novemba 22, 1963: Wan man i sutum John Kennedy i ded long Dalas; Ogis 21, 1968: Ol trak blong faet blong Rasia we oli karem ol bigbigfala masket oli kam blong stretem ol stronghed fasin long Prag; Septemba 12, 1970: Ol man we oli stilim ol jet plen, oli sakem bom insaed long olgeta long drae ples; Desemba 25, 1974: Hariken Tracy i spolemgud Dawin​—66 man oli ded; Epril 17, 1975: Kambodia i go long han blong ol Komunis; Novemba 18, 1978: Wan bigfala grup blong man long Guyana oli kilim i ded olgeta bakegen; Oktoba 31, 1984: Wan man i sutum Mrs. Gandhi i ded; Janewari 28, 1986: Wan roket i bosta taem i jes livim graon; Epril 26, 1986: Faea i kakae wan nyuklia faktri long Soviet Yunion; Oktoba 19, 1987: Ekonomi blong wol i foldaon; Maj 25, 1989: Oel we i ron, i kam spolem Alaska; Jun 4, 1989: Ol ami oli kilim i ded ol man we oli maj long rod long Tiananmen Skwea.

Yes, oltaem long ol yia we oli pas, i gat plante bad nyus mo smol gudfala nyus. From we bad nyus i stap kam antap moa long ol yia we oli jes pas, gudfala nyus i stap godaon moa.

?From wanem i olsem? ?Bambae i hapen oltaem olsem?

[Futnot]

Nekis haf bambae i ansa long tufala kwestin ya.

[Foto Credit Line Blong Pija Long Pej 3]

WHO/League of Red Cross