!Bambae i Gat Gudfala Nyus!

YUMI evriwan, yumi harem nogud taem yumi kasem bad nyus long laef blong yumi wanwan. Be, yumi glad tumas taem yumi kasem wan gudfala nyus​—wan nyus we i karem glad long yumi no ol fren blong yumi. Be taem bad nyus i mekem ol narafala oli harem nogud, plante taem yumi wantem save long trabol ya. Samfala oli laekem blong harem nyus blong trabol we i kasem narafala. !Maet hemia wan risen from wanem oli salem moa buk we oli tokbaot bad nyus!

Long stat blong Namba Tu Bigfala Faet Blong Wol, i gat wan eksampel we i soem klia se sam man oli laekem blong harem nyus long saed blong trabol blong narafala. Long 1939, i gat wan sip blong faet we nem blong hem Graf Spee. Sip ya we i save spid mo hevi blong hem i kasem 10,000-tan, i nambawan sip blong faet blong ami blong Jemani long 1939. Sam wik finis, sip ya i stap spolem ol sip blong ol bisnesman blong ol enemi kantri, long Solwora blong Saot Atlantik mo India. Ale, trifala sip blong Briten, oli faenem Graf Spee mo oli faetem hem. Sam man blong hem oli ded mo sam haf blong sip ya oli nogud. Taswe, hem i mas go long haba blong Montevideo, long Urugwae, blong oli wokemgud ol haf blong hem we oli nogud. Gavman blong Urugwae i givim oda se sip ya i mas aot kwiktaem, sipos no, bambae oli tekem sip ya mo holem hem i stap. Taswe, i luk olsem se wan faet bambae i kamaot we Briten i mas winim.

Wan grup blong bisnesman long Yunaeted Stet we oli rij tumas, oli harem nyus ya. Nao wanwan long olgeta oli pem 2,500 dola long wan kampani blong plen, blong i karem olgeta oli go long Urugwae blong luk faet ya. Be, oli harem nogud from we faet i no bin kamaot. Adolf Hitler i givim oda long ol man blong Graf Spee blong mekem wan hol long sip mo mekem hem i draon. Plante taosen man oli kam kolosap long solwora blong luk wan bigfala faet bitwin long ol sip. Be, i no gat. Oli harem nomo wan bigfala noes i faerap, mo oli luk Graf Spee i draon. Ol man blong sip ya nomo oli mekem samting ya. Kapten blong sip ya i kilim hem wan i ded, i sutum hed blong hem wetem masket.

Nating se samfala oli laekem blong harem bad nyus, bighaf blong ol man bambae oli talem se oli laekem moa blong harem gudfala nyus. ?Yu yu gat filing olsem? ?Oraet, from wanem ol yia we oli pas oli fulap long bad nyus be gudfala nyus i smol nomo? ?Samting ya i save jenis samtaem?

Stampa Blong Olgeta Bad Nyus

Baebol i tokbaot wan taem we i gat gudfala nyus nomo. Long taem ya, man i no save se bad nyus i olsem wanem, from i neva harem bad nyus. Taem Jeova God i wokem evri samting finis, Wol ya i rere blong ol man mo ol anamol oli stap long hem. Jenesis i talem se: “Nao hem i luk olgeta wok ya we i mekem, mo i glad tumas long olgeta.”​—Jenesis 1:​31.

Afta we God i wokem man, smol taem nomo i pas we i no gat bad nyus. Adam mo Iv, tufala i no gat pikinini yet taem bad nyus i kamaot long saed blong fasin rebel agens long God mo ol wok blong hem long skae mo long wol. Wan speret pikinini i lego haeples mo impoten wok blong hem, nao i pulum faswan man mo woman blong joen wetem hem blong mekem stronghed mo gyaman fasin.​—Jenesis 3:​1-6.

Hemia nao stat blong plante bad nyus we ol man oli bin harem. Yumi no sapraes se ol rabis plan we oli haed, fasin blong trik, fasin blong gyaman, gyaman tok, mo ol tok we oli no tru fulwan, oli fulap long ol bad nyus we oli bin kavremap wol kam kasem naoia. Jisas Kraes i talem se Setan nao i stampa blong bad nyus. Jisas i talem long ol lida blong skul long taem blong Hem se: “Yufala i gat sem fasin nomo we papa blong yufala Setan, hem i gat. Mo oltaem yufala i wantem mekem ol samting ya we hem i wantem. Fasin blong hem we i stat fastaem, bifo olgeta, hem i man blong kilim man. Neva hem i laenap wetem olgeta we oli tok tru, from we i no gat trutok nating long hem. Taem we hem i stap gyaman, hem i stap mekem fasin blong hem nomo, from we hem i man blong gyaman, we i stampa blong ol gyaman toktok.”​—Jon 8:​44.

Taem namba blong ol man i stap go antap, bad nyus tu i go antap. I tru, samting ya i no minim se i no gat glad taem mo hapi taem long laef. I gat plante samting we oli givim glad. Nating se i olsem, plante trabol mo fasin blong harem nogud oli bin kamaot long olgeta yia blong laef blong ol man kam kasem tede.

I gat wan narafala samting we i mekem trabol ya i kamaot. Hemia fasin we yumi bon wetem, se yumi wantem mekem samting we i no stret mo mekem trabol. Jeova hem wan i soemaot stampa ya blong bad nyus we yumi no save ronwe long hem. Hem i talem se: “Taem we olgeta [man] oli pikinini nomo, be tingting blong olgeta i stap finis long ol samting nogud.”​—Jenesis 8:​21.

?From Wanem Bad Nyus i Kam Plante?

I gat wan risen from wanem bad nyus i kam plante long ol yia 1900. Baebol i eksplenem risen ya long klia fasin. Hem i talem se ol man long ol yia 1900, bambae oli luk wan spesel taem, hemia ‘ol las dei’ no “taem blong en.” (2 Timote 3:1; Daniel 12:4) Ol profet tok blong Baebol mo ol yia we Baebol i makem, oli soem se ‘taem ya blong en’ i stat long 1914. Blong kasem moa pruf we Baebol i givim long saed ya, plis lukluk japta 11 blong buk ya Save Blong Lidim Yu Long Laef We i No Save Finis, we ‘Watchtower Bible and Tract Society of New York, Inc.,’ i wokem.

Blong makem stat blong ol las dei, wan samting i kamaot we i mekem se wantaem nomo, bad nyus i kam antap. ?Wanem samting ya? Olgeta long heven oli sakemaot Setan wetem ol rabis enjel blong hem oli kamdaon long wol. Yu save ridim klia store blong samting ya, mo bad nyus we i kamaot from. Revelesen 12:​9, 12 i talem se: “Bigfala algita ya, hem i snek ya blong bifo we nem blong hem ‘Setan’ no ‘Man we i agensem man.’ Hem i gyaman long olgeta man long wol finis, i lidim olgeta oli go krangke. Nao olgeta long heven oli sakemaot hem wetem olgeta enjel blong hem oli aot long heven, oli kamdaon long wol. . . . ‘Sore tumas long yu, graon, mo long yu, solwora. From we Setan i kamdaon finis long yufala, mo hem i kros tumas, from we i save, i gat smoltaem nomo blong hem i stap yet.’”

Olsem nao, bambae bad nyus i stap, maet i kam antap moa mo i kam plante moa, go kasem taem we ol las dei oli finis.

Bambae Bad Nyus i Finis

Ol man long wol oli glad blong save se, ol trabol soa we oli stampa blong bad nyus tede, bambae oli no stap blong olwe. Mo tu, yumi save talem wetem strong bilif se taem ya we bambae i no moa gat bad nyus i kolosap nomo. Nating se bad nyus i stap gohed yet, be bambae i gat gud nyus. En blong bad nyus i kolosap nomo, mo bambae God i sua blong mekem samting ya long stret taem blong hem.

Yumi save samting ya from we profet tok i talem se, bambae ol las dei oli finis taem God i spolem mo i tekemaot olgeta stampa blong bad nyus. Bambae hem i spolem ol rabis man we oli stampa blong ol faet, we oli no wantem jenisim tingting blong olgeta mo tanem baksaed long ol nogud rod blong olgeta. Bambae samting ya i hapen long faet we i kamaot long bigfala dei blong God ya we i gat Olgeta Paoa, we Baebol i kolem Amageden. (Revelesen 16:16) Stret afta long dei ya, Setan mo olgeta rabis enjel blong hem bambae oli go long kalabus. Revelesen 20:​1-3 i tokbaot olsem wanem oli fasem Setan, stampa blong olgeta bad nyus, i se: “Nao mi luk wan enjel we i aot long heven i kamdaon. Long han blong hem, hem i stap holem ki blong lokem bigfala hol ya we i godaon we i godaon olgeta, mo i stap holem wan bigfala jen. Nao hem i holem bigfala algita ya, we i snek ya blong bifo, we nem blong hem ‘Setan’ no ‘Man we i stap agensem man.’ Nao i fasem hem long jen ya blong i stap wan taosen yia, nao i sakem hem i go long bigfala hol ya, mo i lokem doa blong hol. Mo i putum mak long doa ya blong bambae man i no openem, blong bambae algita ya i no moa gyaman long ol man, blong pulum olgeta oli go krangke, gogo wan taosen yia i pas.”

Afta we ol bigfala samting ya oli kamaot, bambae i gat gud nyus long wol ya bitim samting we ol man oli bin harem bifo. Ol man ya, hemia ol milyan man we oli pastru long laswan faet ya Amageden, mo ol bilyan man we bambae oli laef bakegen long ded. Laswan buk blong Baebol i tokbaot nambawan gud nyus ya se: “Naoia God i mekem ples blong hem wetem ol man. Hem bambae i stap oltaem wetem olgeta, nao olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.”​—Revelesen 21:​3, 4.

?Yu save mekem wan pija blong hapi taem ya long tingting blong yu? Tru ya, hemia wan nambawan fyuja we i no moa gat bad nyus. Yes, bambae bad nyus i finis olgeta mo man i no moa save harem bakegen. Long taem ya, bambae gud nyus i kam antap mo i kam plante gogo i no save finis.