?Yu Yu Wan Paenia We i Skelemgud Laef Blong Hem?
AE BLONG papa i open bigwan, ale hem i stretem han blong hem, i rere blong holem smol gel blong hem we i jes tekem ol faswan step blong hem blong wokbaot. Nao wantaem nomo, smol pikinini ya i foldaon, be papa i leftemap tingting blong hem blong traem bakegen. Hem i save se, i no longtaem, bambae hem i wokbaot gud mo i stanap strong.
Long sem fasin, wan nyufala paenia i nidim taem mo i nidim ol gudfala toktok blong leftemap tingting blong hem, blong hem i save kam naf blong skelemgud ol samting, wan fasin we hem i nidim blong gohedgud long fultaem wok blong talemaot Kingdom. Plante paenia oli gohed blong mekem wok ya wetem glad long plante yia. Samfala oli stop, from i gat sam jenis i kamaot long laef blong olgeta we oli no bin tingbaot. Sam oli lusum glad blong olgeta. Long wan kantri, 20 pesen blong olgeta we oli stat long wok blong fultaem paenia, oli stop bifo we oli finisim namba tu yia blong olgeta. ?Wanem sam samting we oli save mekem se wan paenia i stop long wok ya we i save givim glad bitim ol narafala wok? ?Oli save mekem wan samting blong blokem trabol we i save stopem olgeta long wok ya?
I tru, ol sik, sot long mane, ol wok long famle, oli save mekem se samfala oli livim fultaem wok blong God. Be, samting we i blokem samfala, hemia se, oli no skelemgud ol samting we wan Kristin i mas mekem. Fasin blong skelemgud i minim, “mekem haf blong wan samting i no hevi moa bitim narafala haf, olgeta haf oli stret nomo.”
Jisas Kraes i soem long ol disaepol blong hem olsem wanem blong mekem wok blong prij mo blong pulum ol man blong oli kam disaepol. Taem hem i stap prij, hem i soem olsem wanem blong skelemgud ol samting. Jisas i soem se ol lida blong skul blong ol man Jyu, oli no skelemgud ol samting. Hem i talem long olgeta, i se: “Yufala i stap kaontem ol smosmol lif ya we oli stap putum long kakae, min mo dil mo kamin, blong makem, wan i blong God, naen i blong yufala, wan i blong God, naen i blong yufala. Hemia i folem Loa, be ol strong fasin blong Loa, olsem we man i mekem i stret, mo man i gat sore, mo man i holem promes blong hem, hemia yufala i no tingbaot. Be ol strong fasin ya, hemia yufala i mas mekem, mo yufala i no save fogetem ol narafala fasin ya tu.”—Matyu 23:23.
Rul ya i stret yet tede, mo i tru tumas long saed blong wok blong paenia. Samfala, glad mo gudfala tingting i pusum olgeta blong joen long wok blong paenia, be oli no reregud fastaem mo oli no tingbaot ol samting we oli joen wetem wok ya. (Luk 14:27, 28) Sam narafala oli tingting nomo long wok blong prij, nao oli fogetem ol narafala impoten wok we oli haf blong Kristin laef. ?Olsem wanem oli save skelemgud ol samting long laef blong olgeta oltaem?
!Stap Strong Long Saed blong Speret!
Jisas i neva fogetem ol samting we oli blong mekem hem i strong long saed blong speret. Plante man we oli kam blong lesin long hem mo blong hem i tekemaot sik blong olgeta, oli tekem plante taem blong hem. Nating se i olsem, hem i tekem taem blong tingting dip mo prea. (Mak 1:35; Luk 6:12) Tede, hemia we i wantem kam wan paenia we i skelemgud ol samting, hem i mas yusumgud ol samting we God i givim blong mekem hem i strong long saed blong speret. Pol i talem se: “?Man, yufala i save tijim ol narafala man, be weswe yufala i no tijim yufala?” (Rom 2:21) Yumi mekem mastik sipos yumi spenem olgeta taem blong yumi blong prij long ol narafala, be yumi no tekem inaf taem blong mekem stadi blong yumi wan mo prea oltaem.
Kumiko i wok olsem wan paenia blong 20 yia finis. Hem i gat tri pikinini mo hasban blong hem i no bilif. Nating se i olsem, hem i faenem se nambawan taem blong ridim mo stadi long Baebol, hemia jes bifo we hem i slip long naet. Taem hem i stap stadi, hem i makem ol poen we hem i save yusum long wok blong prij, blong mekem se oltaem, hem i gat nyufala samting blong talem we i pulum intres blong ol man. Sam narafala we oli gohedgud long wok blong paenia, oli wekap long moning bifo long ol narafala memba blong famle. Long eli moning, taem ples i kwaet, oli haremgud blong kasem ol tok blong Baebol we oli givim paoa. Maet yu yu jusum wan narafala taem we i gud long yu blong rerem ol miting mo ridim olgeta Kristin buk we oli jes kamaot. Sipos yu wantem stap glad oltaem long wok blong prij, stadi wanwan i wan samting we yu no mas hareap long hem mo yu no mas fogetem.
Skelemgud Ol Wok Long Famle
Ol papa mama tu we oli paenia, oli mas tingbaot se faswan samting we ‘Jeova i wantem oli mekem,’ hemia blong givim ol samting we famle blong olgeta i nidim long saed blong bodi, filing, mo long saed blong speret. (Efesas 5:17; 6:1-4; 1 Timote 5:8) Nating se hasban mo ol pikinini long famle oli bilif, samtaem oli save fraet se sipos waef no mama i joen long wok blong paenia, bambae hem i no moa leftemap tingting mo sapotem famle. Ol filing olsem oli save mekem se oli no glad taem hem i wantem kam wan paenia. Be, wetem gudfala plan mo fasin blong tingtinggud fastaem, oli save skelemgud ol samting long laef blong olgeta.
Plante paenia oli traem go long wok blong prij taem ol memba blong famle oli aot long haos. Kumiko, we yumi tokbaot long stat, i dring ti wetem famle blong hem long moning. Hem i stap long haos taem hasban mo ol pikinini blong hem oli aot long moning, mo i kambak long haos bifo we oli kamhom. Hem i jusum Mande olsem dei we hem i kukum plante kakae blong wik we i kam. Olsem nao, hem i save sidaon mo haremgud blong kakae wetem famle blong hem, bitim we hem i stap bisi long kijin. Fasin blong mekem plante wok wantaem, olsem mekem sam wok long haos long semtaem we hem i stap rerem kakae, i save givhan tu. Taem Kumiko i mekem olsem, hem i faenem taem blong singaot ol fren blong ol pikinini blong hem oli kam, mo i mekem spesel kakae blong olgeta.
Taem ol pikinini oli kam bigwan, plante taem oli nidim we papa mama blong olgeta, oli givhan moa long olgeta blong fesem ol nyufala filing, ol samting we oli wantem, ol tingting we oli hafhaf, mo fraet we i winim olgeta. Samting ya i minim se papa no mama we i paenia i mas wekapgud mo jenisim program blong hem lelebet. Tingbaot Hisako, wan mama we i gat tri pikinini, mo i stap mekem wok blong paenia. ?Hem i mekem wanem taem fasbon gel blong hem i stat blong soem se hem i lusum glad mo intres long ol Kristin miting mo wok blong prij, from we ol fren blong hem long skul oli stap pulum hem? Samting we gel blong hem i rili nidim, hemia blong pruvum trutok hem wan, mo blong bilif strong se beswan rod we hem i save folem i blong no joen nating long ol fasin blong wol.—Jemes 4:4.
Hisako i talem se: “Mi mekem disisen blong stadi bakegen evri dei wetem hem long buk ya, Yu Save Laef Foreva Long Paradaes Long Wol long saed blong ol stampa bilif. Fastaem, mitufala i stadi sam menet nomo. Plante taem, long taem blong stadi, gel blong mi i talem se bel no hed blong hem i soa. Be mi gohed oltaem blong mekem stadi wetem hem. Sam manis biaen, tingting blong hem i jenis bigwan. Smoltaem biaen, hem i givim laef blong hem long God mo i tekem baptaes.” Naoia, Hisako mo gel blong hem, tufala tugeta i stap gohed long fultaem paenia.
Ol papa we oli paenia, olgeta tu oli mas lukaotgud. I nogud we oli bisi tumas blong prij mo blong kea long olgeta we oli intres, mo blong lukaot long ol wok blong olgeta long kongregesen, nao oli no moa givhan long ol pikinini blong olgeta long saed blong filing, mo soem rod olsem oli nidim. Wan man i no mas givim wok ya long waef blong hem. Wan Kristin elda we i bisi, we i stap mekem wok blong paenia longtaem finis mo i stap lukaot long wan bisnes, i makemaot taem blong stadi wetem ol fo pikinini blong hem wanwan. (Efesas 6:4) Antap long samting ya, hem i mekemrere ol miting evri wik wetem famle blong hem. Ol paenia we oli skelemgud ol samting, oli no save fogetem ol samting we famle blong olgeta i nidim long saed blong bodi mo long saed blong speret.
Skelemgud Mane
Ol paenia oli mas traehad blong skelemgud wan narafala samting. Hemia stret tingting long ol samting we oli nidim evri dei. Long saed ya tu, yumi save lanem plante samting long nambawan eksampel mo advaes blong Jisas. Hem i givim woning long yumi se, yumi no mas tingting tumas long ol samting blong laef. Be, hem i leftemap tingting blong ol disaepol blong hem blong putum Kingdom long fasples. Hem i promes se bambae God i kea long olgeta olsem we i stap kea long ol narafala samting we Hem i wokem. (Matyu 6:25-34) Plante paenia we oli folem nambawan advaes ya, oli bin gohed long wok ya blong plante yia. Mo Jeova i blesem traehad blong olgeta, ‘i givim kakae we i naf long olgeta evri dei.’—Matyu 6:11.
Aposol Pol i givim advaes long ol Kristin brata sista blong hem se oli mas ‘soem long olgeta man we oli gat stret tingting.’ (Filipae 4:5) Yes, stret tingting i minim se yumi mas lukaotgud long helt blong yumi. Ol paenia we oli skelemgud ol samting, oli traehad blong soem stret tingting long ol fasin blong laef mo long ol samting long saed blong bodi. Oli save se ol narafala oli stap lukluk ol fasin blong olgeta.—Skelem wetem 1 Korin 4:9.
Ol yangfala paenia oli no mas dipen tumas long papa mo mama blong olgeta blong givim plante samting long olgeta. Sipos oli stap wetem papa mo mama blong olgeta, oli mas givhan blong mekem sam wok long haos. Mo i gud, oli faenem wan haftaem wok blong givhan blong pem ol samting. Olsem nao, oli soem se oli gat fasin blong skelemgud ol samting mo fasin tangkyu.—2 Tesalonaeka 3:10.
Wan Paenia We i Skelemgud Ol Samting, Hem i Wan Blesing
Maet yu yu wan paenia we yu stap traehad blong skelemgud ol samting. Yu mas gat strong tingting se yu naf blong kasem fasin ya. Olsem wan smol pikinini we i nidim taem mo i nidim blong lanem blong stanap gud mo wokbaot, plante paenia we oli bigman long saed blong speret oli talem se i tekem taem blong gat fasin blong skelemgud olgeta wok blong olgeta.
Stadi wanwan, lukaot long ol memba blong famle, mo kasem ol samting we oli nidim long saed blong bodi, oli sam long ol samting we ol paenia oli mas traehad blong skelemgud. Ol ripot oli soem se plante paenia oli mekem ol wok blong olgeta long nambawan fasin. Oli rili wan blesing long ol narafala man, mo oli givim ona long Jeova mo long ogenaesesen blong hem.