Jeova i Bin Stap Olsem Wan Sefples Blong Mi Mi Haed Long Hem

PENELOPE MAKRIS I TALEM STORE YA

Mama blong mi i talem strong long mi, se: “Yu lego hasban blong yu. Bambae ol brata blong yu oli faenem narawan we i moa gud long yu.” ?From wanem mama blong mi we i laekem mi tumas i wantem mi blong brekem mared blong mi? ?Wanem i mekem se hem i harem nogud tumas olsem?

MI MI bon long 1897 long smol velej ya Ambelos, long Samos, wan aelan blong Gris. Famle blong mifala i strong long Otodoks Jyos blong Gris. Papa i ded smoltaem bifo we mi mi bon. Mi, Mama, mo trifala brata blong mi, mifala i mas wok strong jes blong stap laef long taem ya we ol man oli sot long plante samting.

Faswan Bigfala Faet blong Wol i faerap long 1914. Smoltaem biaen, oli talem long tufala bigfala brata blong mi se tufala i mas joen long ami. Be blong no joen long ami, tufala i aot long kantri, tufala i go stap long Amerika. Ale, mi mo narafala brata blong mi, mitufala i stap long haos wetem Mama. Sam yia nomo biaen, long 1920, mi maredem Dimitris, wan yangfala tija long velej blong mifala.

Wan Impoten Visit

Smoltaem afta we mi mi mared, brata blong mama blong mi i aot long Amerika, i kam blong visitim mifala. Hem i karem wetem hem, wan long ol buk ya Studies in the Scriptures, we Charles Taze Russell i raetem. Hem i wan buk blong ol Baebol Studen, hemia nem blong ol Wetnes blong Jeova long taem ya.

Taem Dimitris i openem buk ya, hem i luk wan poen we hem i bin tingting long hem, stat long taem we hem i pikinini nomo, hemia se “?Wanem i hapen long man taem i ded?” Long haeskul, hem i bin askem kwestin ya long wan man we i gat hae save long saed blong Grik Otodoks Jyos. Hem i no givim wan ansa we i klia. Be Dimitris i glad we i glad long buk ya, from we hem i givim wan klia ansa we i gat mining. From samting ya, hem i girap, i go stret long ples blong dring kofe long velej ya, wan ples we oltaem ol man Gris oli stap go hivap long hem. Long ples ya, hem i tokbaot ol samting we hem i bin lanem long Baebol.

Stanap Strong Long Trutok Blong Baebol

Samwe long taem ya​—long ol yia jes biaen long 1920​—Gris i stap joen long wan narafala faet. Oli fosem Dimitris blong joen long ami mo oli sanem hem i go long Teki, Esia Maena. Hem i kasem kil nao oli sanem hem i kambak long mifala. Afta we hem i kamgud bakegen, mi mi folem hem i go long Smana, Esia Maena (naoia oli kolem Ismir, Teki). Taem faet i finis long 1922, mitufala i mas ronwe. Blong talem stret, kolosap mitufala i no save ronwe. Be, mitufala i tekem wan olfala bot, nao mitufala i ronwe i gobak long smol aelan ya blong Samos. Taem mitufala i kasem haos blong mitufala bakegen, mitufala i nildaon, mo mitufala i talem tangkyu long God​—wan God we mitufala i no gat plante save long hem.

Smoltaem biaen, oli askem Dimitris blong tij long wan skul long Vati, hemia bigfala taon blong aelan ya. Hem i gohed blong ridim ol buk blong ol Baebol Studen. Mo wan naet, taem bigfala ren i stap foldaon, tu Baebol Studen blong aelan ya Kios, oli kam visitim mitufala. Tufala i lego Amerika, tufala i kambak blong wok olsem ol kolpota, hemia olgeta we oli wok fultaem blong talemaot gud nyus long taem ya. Mitufala i givim ples blong slip long tufala blong wan naet, mo tufala i toktok wetem mitufala long saed blong plante samting we oli joen wetem stampa tingting blong God.

Biaen, Dimitris i talem long mi se: “Penelope, mi luksave se hemia trutok ya, mo mi mas folem. Samting ya i minim se mi mas stop blong singsing long Grik Otodoks Jyos, mo mi no save go long jyos wetem ol skul pikinini.” Nating se mitufala i gat smol save nomo long saed blong Jeova, mitufala i wantem tumas blong wosip long hem. Taswe mi mi ansa, se: “Bambae mi mi no blokem yu. Gohed long samting we yu stap lanem.”

Be hem i fraet, nao i talem se: “Yes, be sipos oli kasem save long samting we yumi stap mekem, bambae oli sakemaot mi long wok blong mi.”

Mi talem se: “Yu no wari. I no wok blong tija nomo we ol man oli stap winim mane from. Yumitu yangfala mo yumitu strong, mo God i save givhan long yumitu blong faenem wan narafala wok.”

Samwe long taem ya, mifala i harem se wan narafala Baebol Studen​—wan kolpota tu​—i kam finis long Samos. Taem mitufala i harem se ol polis oli no letem hem blong givim wan pablik tok long Baebol, mitufala i go lukaot hem. Mitufala i faenem hem long wan stoa. Hem i stap storeyan wetem tu haeman blong Grik Otodoks Jyos. Tufala i sem from we tufala i no save pruvum bilif blong tufala long Baebol. Ale smoltaem biaen, tufala i lego hem. Hasban blong mi i sapraes tumas long save blong kolpota ya. Hem i askem se: “?Olsem wanem yu save yusumgud Baebol olsem?”

Hem i ansa, i se: “Mifala i stadi dip long ol wanwan haf blong Baebol.” Hem i openem bag blong hem, nao hem i tekemaot buk ya blong stadi The Harp of God, mo i soem long mifala olsem wanem blong yusum buk ya blong mekem wan stadi olsem. Mifala i wantem tumas blong kasem save, mekem se stret long taem ya, mi mo hasban blong mi, wetem kolpota ya, mo tu narafala man, mifala i folem man blong stoa i go long haos blong hem. Kolpota ya i givim buk ya The Harp of God long wanwan long mifala, mo stret long taem ya mifala i stat stadi. Mifala i stadi gogo i bitim medel naet, mo kolosap we ples i delaet, mifala i stat blong lanem ol singsing we ol Baebol studen oli singim.

Stat long taem ya i go, evri dei mi tekem sam haoa blong stadi Baebol. Ol Baebol Studen blong ol narafala ples, oli gohed blong sanem ol buk i kam blong givhan long mifala blong stadi Baebol. Long Janewari 1926, mi givim laef blong mi i go long God tru long prea. Mi promes wetem fulhat blong mi blong mekem wok blong hem. Biaen, long hot taem ya, mi mo hasban blong mi, mitufala i baptaes long wora blong soem se mitufala i givim laef blong mitufala long God. Mitufala i wantem tumas blong tokbaot ol samting we mitufala i lanem wetem ol narafala. Ale mitufala i stat blong go long ol haos wanwan blong seremaot pepa ya Message of Hope.

Fesem Strongfala Fasin Agens

Wan dei, wan yangfala woman i singaot mi blong joen long prea long wan smol jyos blong Grik Otodoks. Mi eksplenem long hem se: “Mi mi no moa wosip long God long rod ya. Naoia, mi wosipim hem wetem speret mo trutok, olsem Baebol i tijim.” (Jon 4:​23, 24) Woman ya i sapraes tumas mo i talemaot olbaot samting we i hapen. Hem i tokbaot hasban blong mi tu.

Kolosap olgeta man evriwan oli stat blong agensem mitufala. Oli agensem mitufala long evri ples​—long haos blong mitufala mo long ol miting ya tu we mifala i stap mekem wetem smol grup blong man we oli intres long aelan ya. Folem oda blong ol pris blong Otodoks, plante man oli kam hivap afsaed long ples blong miting blong mifala, nao oli sakem ston mo oli stap singaot strong blong talem ol tok agensem mifala.

Taem mifala i seremaot pepa ya Message of Hope, ol pikinini oli hivap raon long mifala mo oli stap singaot se “ol man blong Wan Taosen Yia rul,” mo ol narafala tok blong daonem mifala. Ol man we oli wok wetem hasban blong mi, olgeta tu oli stat blong mekem trabol long hem. Long en blong 1926, oli putum hem long kot, mo oli jajem hem se i no stret blong hem i tij long pablik skul. Nao oli putum hem long kalabus blong 15 dei.

Taem Mama i harem samting ya, hem i talem long mi blong livim hasban blong mi. Mi ansa se: “Gudfala mama blong mi, yu lesin. Yu savegud se mi mi laekem yu tumas mo mi gat respek long yu. Be mi no save letem yu yu blokem mitufala blong wosip long trufala God, Jeova.” Hem i gobak long velej blong hem we i harem nogud tumas.

Long 1927, ol Baebol Studen oli mekem wan asembli long Atens. Mo Jeova i openem rod blong mitufala i joen long asembli ya. Mitufala i haremgud tumas mo mitufala i kam strong long saed blong speret, taem mitufala i joen wetem plante narafala man we oli bilif olsem mitufala. Taem mitufala i gobak long Samos, mitufala i givimaot 5,000 pepa we nem blong hem, A Testimony to the Rulers of the World, long ol taon mo ol velej long aelan blong mitufala.

Samwe long taem ya, oli sakemaot Dimitris long wok blong hem olsem tija. Mo from we oli stap toktok agens long mitufala, kolosap se mitufala i no save faenem wan wok nating. Be from we mi save somap klos mo Dimitris i gat gudhan blong pentem ol samting, mitufala i save winim naf mane blong pem ol samting we mitufala i nidim. Long 1928, oli holem hasban blong mi mo fo narafala Kristin brata long Samos, ale oli putum olgeta long kalabus blong tu manis from wok blong talemaot gud nyus. From we mi nomo mi Baebol Studen we i stap, mi save givim kakae long olgeta long kalabus.

Faet Agensem Ol Strong Sik

Wan taem, mi kasem wan sik long bun blong baksaed blong mi, wan sik we i stap longtaem mo we ol dokta oli no save long hem long taem ya. Mi no moa harem se mi wantem kakae mo mi kasem wan strongfala fiva. Blong traem winim sik ya, oli putum simen long bodi blong mi, stat long nek blong mi kasem antap long leg blong mi. Blong kasem mane, hasban blong mi i salem wan pis graon blong mekem se mi save gohed blong pas long dokta. Mi harem nogud tumas. Evri dei mi prea long God blong i givim paoa long mi.

Taem ol famle oli visitim mi, oli gohed blong agensem mi. Mama i talem se ol trabol ya i kasem mitufala from we mitufala i jenisim skul. From we mi no save muf nating, pilo blong mi i wetwetgud long wora blong ae blong mi, taem mi gohed strong blong askem long Papa blong yumi long heven blong i givim longfala tingting mo paoa long mi blong stanap strong tru long hadtaem ya.

Mi putum Baebol blong mi, wetem sam smol buk mo pepa, oli stap antap long tebel kolosap long bed blong mi, blong soem long ol man we oli visitim mi. Hem i wan gudfala samting se ol miting blong smol kongregesena blong mifala oli stap long haos blong mitufala. From samting ya, oltaem mi save kasem ol tok we i leftemap tingting blong mi long saed blong speret. Mitufala i mas salem wan narafala pis graon blong mi save pas long wan dokta long Atens.

Smoltaem biaen, elda we i stap visitim ol kongregesen i kam luk mifala. Hem i sore tumas blong luk se mi mi sik mo Dimitris i no gat wok. Wetem kaen fasin, hem i halpem mitufala blong mekem plan blong go stap long taon blong Mitilin long aelan ya, Lesbos. Mitufala i muf i go long aelan ya long 1934, nao Dimitris i save faenem wok. Long aelan ya tu, mitufala i faenem ol gudfala Kristin brata mo sista we oli lukaotgud long mi taem mi sik. Sloslou, afta long faef yia we mi stap tekem meresin, mi mi kamgud fulwan.

Be long 1946, smoltaem afta long Namba Tu Bigfala Faet Blong Wol, mi sik bigwan bakegen. Long taem ya, sik ya i stap long gat blong mi. Mi stap faef manis long bed. Mi kasem strongfala fiva mo bel blong mi i soa tumas. Be, olsem fastaem, mi neva stop blong tokbaot Jeova long olgeta we oli kam visitim mi. Biaen, mi mi kamgud bakegen.

Mekem Wok Blong Paenia Nating Se i Gat Fasin Agens

Long Gris, ol man oli agensem tumas ol Wetnes blong Jeova long ol yia biaen long bigfala faet. Plante taem, polis i holem mifala taem mifala i stap prij long ol haos wanwan. Hasban blong mi i stap long kalabus blong kolosap wan yia. Taem mifala i aot long moning blong go prij, oltaem mifala i mekemrere blong spenem naet long polis stesen from we maet oli holem mifala tru long dei. Be Jeova i neva lego mifala. Oltaem, hem i givim strong tingting mo paoa we mifala i nidim blong stanap strong.

Long ol yia biaen long 1940, mi ridim long Informant (naoia Kingdom Wok Blong Yumi) long saed blong wok blong paenia long taem blong spel. Mi mi mekem disisen blong traem joen long wok ya, we i minim se mi mas spenem 75 haoa long wok blong prij long wan manis. Frut we i kamaot se, mi faenem plante moa man we mi mas visitim mo mekem Baebol stadi wetem olgeta. Blong longtaem lelebet, mi gohed blong mekem 17 stadi evri wik. Taem ol nyufala Wajtaoa mo Wekap! oli kamaot, mi karem i go long ol man long ples ya blong bisnes long Mitilin. Oltaem, mi givimaot 300 Wajtaoa mo Wekap! long ol man we oli wok long ol stoa, ol ofis, mo ol bang.

Taem elda we i stap visitim ol kongregesen i kam long kongregesen blong mifala long 1964, hem i talem se: “Sista Penelope, long ripot blong yu, mi luk we yu yu stap kasem nambawan frut long wok blong prij. ?From wanem yu no fulumap wan pepa blong kam wan fultaem paenia?” Oltaem mi gat bigfala tangkyu from tok ya blong hem we i pulum mi blong stat long wok ya. Mi haremgud long fultaem wok blong prij blong bitim 30 yia.

Wan Samting We i Karem Blesing

Long Mitilin, i gat wan eria we i fulapgud long ol man, oli kolem Langada. Hem i ples blong ol man Gris we oli ronwe long prapa ples blong olgeta. Mifala i no prij long ol haos long ples ya, from we ol man oli agensem mifala tumas. Be, taem hasban blong mi i stap long kalabus, mi mas pas long eria ya blong go visitim hem. Wan dei we i gat ren, wan woman i singaot mi i go insaed long haos blong hem. Hem i wantem save from wanem hasban blong mi i stap long kalabus. Mi eksplenem se from wok blong talemaot gud nyus blong Kingdom blong God, mo se hem i stap kasem trabol olsem we Kraes i kasem trabol.

Biaen, wan narafala woman i mekem plan blong mi stop long haos blong hem. Taem mi kamtru, mi faenem se hem i singaot 12 narafala woman oli kam. Mi ting se bambae oli agensem mi, ale mi prea long Jeova blong i givim waes mo strong tingting long mi blong fesem eni samting we i save hapen. Ol woman ya oli askem plante kwestin mo sam long olgeta oli agens, be mi save yusum sam vas blong Baebol blong givim ansa. Taem mi stanap, mi rere blong go, woman blong haos ya i askem mi blong kambak bakegen long nekis dei. Mi talem wetem glad se bambae mi kambak. Taem mi mo wan fren i kambak long nekis dei, mitufala i faenem we ol woman ya oli stap wet finis.

Afta long taem ya, mifala i gohed evri taem blong tokbaot Baebol, mo mifala i statem plante Baebol stadi. Plante long ol woman ya oli gohed blong kasem stret save, mo ol famle blong olgeta tu oli mekem olsem. Biaen, grup ya i kam wan nyufala kongregesen blong ol Wetnes blong Jeova long Mitilin.

Jeova i Bin Mekem i Gud Long Mi

Long ol yia we oli pas, Jeova i bin blesem ol traehad we mi mo hasban blong mi, mitufala i mekem long wok blong hem. Smol grup blong ol Wetnes long Samos long ol yia 1920, naoia hem i kam tu kongregesen, mo wan grup bakegen we i gat samwe long 130 pablisa. Mo long aelan blong Lesbos, i gat fo kongregesen mo faef narafala grup, we i mekem 430 man evriwan blong talemaot Kingdom. Hasban blong mi i wok strong blong talemaot Kingdom blong God kasem we hem i ded long 1977. !I wan bigfala blesing blong luk olgeta we mitufala i bin givhan long olgeta, we oli stap wok strong yet long wok blong prij! !Yes, olgeta wetem ol pikinini blong olgeta, ol smol bubu mo ol smosmol bubu blong olgeta, oli mekemap wan bigfala hif blong man we oli joengud blong wosip long Jeova!

Mi bin gohed long Kristin wok blong bitim 70 yia nao, mo hem i no wan rod we i isi. Be Jeova i bin stap olsem wan strong haos blong mi mi haed long hem, we i strong bitim olgeta narafala samting. From we mi kam olfala nao mo helt blong mi i kam nogud, oltaem mi stap long bed, mo mi save mekem smol nomo long wok blong prij. Be, mi save talem long Jeova olsem man blong raetem Ol Sam i talem, se: “Yu yu stap lukaot long mi, yu yu stap blokem mi. Yu yu God blong mi, mi mi trastem yu.”​—Ol Sam 91:2.

(Sista Makris i ded taem mifala i stap mekemrere store ya blong prentem. Hem i gat hop blong laef bakegen long heven.)

[Futnot]

[Tok blong pija long pej 26]

Hem wetem hasban blong hem long 1955

[Tok blong pija long pej 26]

Sipos Sista Makris i laef i stap yet, bambae hem i gat 100 yia long Janewari 1997