From Wanem Samfala Oli Jenisim Skul Blong Olgeta
Long plante man, jyos blong olgeta i olsem wan nem we oli holem nomo. Maet nem blong skul ya i soemaot weples wan man i go long hem long Sande, weples hem i mared, mo weples bambae oli berem hem. Be nem long skul ya i no talem wanem fasin blong man ya, wanem hem i save mo wanem hem i bilivim. Wan ripot nomo i soemaot se 50 pesen blong olgeta we oli talem se oli Kristin, oli no save hu ya i bin givim Bigfala Toktok Antap Long Hil. !Be lida blong India we ol man oli bin save long hem, Mohandas Gandhi, i save ansarem kwestin ya, nating se hem i wan Hindu!
?YU YU sapraes we plante man oli lego skul blong olgeta taem oli no kasem plante save long skul blong olgeta? Ating no gat. Be samting ya i no hapen oltaem olsem. Olgeta we oli akseptem help blong kasem save long Baebol, plante taem oli sapraes blong luk se hem i givhan bigwan long olgeta. Baebol i talem se: “Mi, Jeova, mi mi God blong yufala, God ya we i stap tijim yufala blong karem gudfala frut long laef blong yufala. Mi mi stap mekem yufala i wokbaot long rod we i stret.”—Aesea 48:17.
?Olgeta we oli hanggri long saed long speret oli mas mekem wanem? !Oli no mas lego wosip blong God! I moa gud we oli lukluk i go long Baebol mo oli kasem save long wanem we God hem wan i rerem finis blong olgeta.
Ol Ansa Long Ol Kwestin We Oli Dip
Taem Bernd i gat seven yia, hem i luk mama blong hem i ded.a Long ol yia biaen, taem hem i pikinini yet, hem i stap tingbaot se, ‘?Mama blong mi i stap wea? ?From wanem hem i no stap wetem mi long ol yia ya we mi stap gruap? Bifo we Bernd i gat 20 yia, hem i go long skul blong hem. From we hem i wari long ol trabol we ol man oli fesem, hem i wantem kam wan man blong givhan long ol pua man long wan narafala kantri. Be jyos blong hem i no save ansarem stret ol kwestin blong hem, mo from samting ya hem i stap wari.
Wan dei, Bernd i toktok wetem wan fren blong hem long hae skul, we hem i wan Wetnes blong Jeova. Yangfala Wetnes ya i soem tok blong Baebol long Bernd, se mama blong hem i no moa save tingting, hem i stap slip nomo long ded. Bernd i faenemaot plante vas long Baebol we oli eksplenem samting ya. Olsem Eklesiastis 9:5 we i talem se: “Ol dedman oli no save wan samting nating.” Hemia from wanem Bernd i no nid blong wari se mama blong hem i stap harem nogud long pegatri no wan ples we i moa nogud. Nating se kolosap olgeta jyos oli tijim se sol i no save ded samtaem, Bernd i luk wanem we Baebol i talem, hemia se sol i man nomo. Taem man i ded, sol i ded tu. “Sol we i stap mekem sin—hem nao bambae i ded.”—Esikel 18:4.
Bernd i kasem save tu se i gat wan nambawan fyuja blong ol dedman. Hem wan i ridim long Baebol long buk blong Ol Wok se: “Olgeta man [bambae] oli laef bakegen long ded, ol man we oli stret, wetem ol man we oli no stret.” (Ol Wok 24:15) !Hem i haremgud tumas taem hem i kasem save se ol man bambae oli laef bakegen long wol, taem God bambae i mekem se wol i kam wan paradaes bakegen!—Ol Sam 37:29; Revelesen 21:3, 4.
I no longtaem, trufala save blong Baebol i givim wanem we Bernd i nidim long saed long speret. Bernd i no lego bilif. Be hem i lego jyos ya we i no save mekem hem i haremgud taem hem i hanggri long saed long speret, mo hem i jusum wan fasin blong wosip we i laenap stret wetem Baebol. Hem i talem se: “Samting ya i hapen 14 yia bifo, mo mi neva sore we mi lego jyos blong mi. Naoia, mi save se Man we i Wokem Yumi i no mekem se yumi stap kasem trabol. Setan nao i god blong wol ya, mo i fol blong hem we i gat ol trabol raonabaot long yumi. I no longtaem, God bambae i stretem ol trabol we wol blong Setan i mekem. Mama blong mi tu bambae hem i laef bakegen long ded. !Bambae hem i wan taem blong bigfala glad!”
Bernd i kasem mak blong hem blong wok long wan narafala kantri blong givhan long ol man. Naoia hem i stap long wan kantri blong givhan long ol man blong oli kasem save long saed blong Kingdom blong God, we hem wan nomo i save finisim ol trabol blong olgeta. Olsem Bernd, plante milyan man oli kasem save finis se God bambae i finisim ol trabol blong ol man. Oli glad tumas blong luk se i gat wan skul we i save mekem olgeta oli haremgud long saed long speret.—Matyu 5:3.
?Wanem Mining Blong Laef?
From we plante moa man long ol kantri blong Wes oli lego ol samting long saed blong jyos, plante man oli tingbaot kwestin ya se, ‘?Wanem mining blong laef?’ Ansa long kwestin ya i stap long Baebol, olsem Maekel i faenemaot. Raonabaot long yia 1975, Maekel i gat tingting blong joen long wan grup blong teroris. Hem i gat wan mak nomo long laef blong hem. Hem i wantem mekem trabol long olgeta man we long tingting blong hem oli stampa blong fasin ya we i no stret, hemia se sam man oli rij mo ol narafala oli pua tumas. Maekel i talem se: “Long taem ya mi no save aot long haos blong mi we mi no karem wan masket i go wetem mi. Plan blong mi i blong kilim ol bigman blong politik mo olgeta we oli mekem we i defren long rij man mo pua man. Mi rere blong lusum laef blong mi from samting ya.”
Maekel i stap go long jyos, be i no gat wan man long jyos blong hem we i save talem trufala mining blong laef. Taswe taem ol Wetnes blong Jeova oli visitim Maekel long haos blong hem mo oli soem se Baebol i save ansarem ol kwestin blong hem, hem i lesingud. Ale, hem i stat blong joen long ol miting blong wosip long Haos Kingdom blong ol Wetnes blong Jeova.
Ol fren blong Maekel oli wantem save moa long saed blong nyufala intres we hem i gat long Baebol. Maekel i talem long olgeta se: “Kam long miting long Sande ya, stap blong smoltaem, nao sipos yu no laekem wanem we yu stap harem, yu save gobak long haos.” Ol samting oli kamaot olsem hem i talem, from we afta long pablik tok we i gohed blong 45 menet, kolosap olgeta fren blong hem oli aot long Haos Kingdom. Be i gat wan woman we nem blong hem Susan i stap. Yangfala woman ya i sapraes long wanem we hem i harem. Afta we sam taem i pas, Maekel mo Susan, tufala i mared mo tufala i tekem baptaes blong kam Wetnes Blong Jeova. Maekel i talem se: “Naoia mi save from wanem yumi stap long wol. Jeova i wokem yumi. Stampa mining blong laef blong yumi i blong save gud hem mo blong mekem wanem we hem i wantem. !Hemia nomo i save mekem yumi haremgud tumas!”
Plante milyan man oli gat sem tingting we Maekel i gat. Oli bilif long tok blong Baebol we i talem se: “En blong ol samting ya, hemia se yu mas fraet gud long trufala God mo yu mas folem ol loa blong hem. From we hemia nao olgeta wok we man i mas mekem.”—Eklesiastis 12:13.
Winim Ol Problem Blong Laef
Yumi evriwan i luk olsem wanem profet tok blong 2 Timote 3:1 i stap kamtru se: ‘Long taem blong lasdei blong wol, laef long wol ya bambae i kam strong tumas.’ I no gat wan man i save ronwe long ol problem “blong lasdei.” Be Baebol i givhan long yumi blong winim ol problem ya.
Tingbaot Steven mo Olive, we tufala i mared. Taem tufala i stat stadi Baebol wetem ol Wetnes blong Jeova, tufala i gat sam problem long mared blong tufala, olsem plante narafala hasban mo waef. Steven i talem se: “Sloslou mitufala i stap seraot. Mitufala i no stap wantem ol semfala samting long laef, mo mitufala i no intres long sem samting.” ?Wanem i givhan long tufala blong stap tugeta? Steven i gohed blong talem se: “Ol Wetnes blong Jeova oli soem long mitufala, olsem wanem blong folem ol rul blong Baebol long laef blong mitufala. Hemia fastaem we mitufala i kasem save long mining blong fasin blong no tingbaot mitufala nomo, mo blong soem lav long ol narafala. Taem mitufala i folem ol advaes blong Baebol, samting ya i mekem se mitufala i joengud tugeta. Nao mitufala i haremgud long mared blong mitufala we i tanap strong.”
Wan Fasin Fren Wetem God We Yumi Fasgud Long Hem
Wan ripot we i jes kamaot i talem se, 96 pesen blong ol man long Amerika oli bilif long God, mo bighaf blong olgeta oli stap prea long hem. Be wan narafala ripot i soem se, namba blong ol man we oli go wosip long ol jyos mo ol haos prea blong ol man Jyu, i daon moa i bitim ol 50 yia we oli pas. Kolosap 58 pesen blong ol man Amerika oli talem se oli go long jyos wan taem nomo long wan manis no maet i no kasem wan taem long wan manis. Tru ya, ol skul oli no lidim ol man oli kam kolosap moa long God. Mo problem ya i no stap long Yunaeted stet nomo.
Linda i gruap long Baveria. Hem i stap go long Katolik jyos mo hem i prea oltaem. Be hem i fraet long fyuja tu. Hem i no save wan samting nating long stampa tingting we god i gat long saed long ol man. Taem Linda i gat 14 yia, hem i mitim ol Wetnes blong Jeova. Hem i talem se: “Mi bin intres long wanem we oli stap talem, mo mi tekem tu buk blong olgeta we oli givhan long mi blong stadi Baebol, ale mi ridim tufala buk ya wantaem nomo. Tu yia biaen, Linda i stat stadi Baebol wetem ol Wetnes blong Jeova. Hem i eksplenem se: “Long tingting blong mi, ol samting we mi lanem long Baebol long saed blong God, oli stret.” Linda i lego jyos blong hem, mo taem hem i gat 18 yia, hem i tekem baptaes blong kam wan Wetnes blong Jeova.
?Wanem i pusum Linda blong jenisim skul blong hem? Hem i talem se: “Jyos blong mi i givhan long mi blong kasem save se i gat wan God, mo mi lanem blong bilif long hem. Be God ya, mi no save ol asin blong hem mo i olsem we hem i stap longwe long mi. Stadi blong Baebol we mi mekem, i pruvum long mi se i gat wan God, mo tu, stadi ya i givhan long mi blong save God mo laekem hem. Naoia, mi gat wan nambawan fasin fren wetem hem, mo samting ya i gud moa i bitim ol narafala samting.”
!Trufala Skul i Givim Gudfala Samting!
?Skul blong yu i stap lidim yu long saed long speret mo hem i soem long yu olsem wanem Baebol i save givhan long yu blong winim ol problem long laef blong yu? ?Skul ya i tijim yu long hop we Baebol i tokbaot long fyuja? ?Skul ya i givhan long yu blong kasem stret save blong Baebol, we i save lidim yu blong frengud wetem Man we i wokem yumi? Sipos no, bilif blong yu i no mas foldaon. Bifo we yu lego bilif blong yu i moa gud we yu traehad blong faenem fasin blong wosip we i laenap wetem Baebol. Long rod ya bambae yu save soem se yu yu olsem olgeta man we buk long Baebol, Aesea i tokbaot i se: “Hemia tok we Masta blong Heven mo Wol i talem se: ‘!Yu luk! Ol man blong wok blong mi bambae oli kakae. . . . Ol man blong wok blong mi bambae oli dring . . . Ol man blong wok blong mi bambae oli glad . . . Ol man blong wok blong mi bambae oli singaot bigwan from we oli haremgud long hat blong olgeta.’”—Aesea 65:13, 14.
[Futnot]
a Nem blong sam man long store ya oli no trufala nem blong olgeta.
[Tok Blong Pija Long Pej 4]
Baebol i givhan long yumi blong save God mo laekem hem