Ol Yangfala, Naoia i Taem Blong Yufala i Tingbaot Bigfala Man We i Wokem Yufala

“God i mekem yumi, mo naoia we yufala i yangfala yet, oltaem yufala i mas tingbaot hem.”—PRI. 12:1.

1. ?Olsem wanem Jeova i soemaot se hem i trastem ol yangfala we oli wosipim hem?

LONG tingting blong Jeova, ol Kristin yangfala oli sas tumas mo oli mekem man i haremgud olsem ol drop blong wota blong naet. Hem i talem se long dei we “ol ami” blong Pikinini blong hem oli rere blong faet, ol yangfala man mo woman bambae “oli kam joen, oli glad blong mekem wok” blong Kraes. (Sam 110:3, NW) Profet tok ya i kamtru fulwan long wan taem we bighaf blong ol man oli no ona long God, oli tingting tumas long saed blong olgeta wan, oli laekem mane tumas mo oli no obei. Be nating se plante man oli olsem, Jeova i save se ol yangfala we oli wosipim hem oli defren. !Jeova i trastem yufala ol yangfala brata mo sista!

2. ?I minim wanem blong tingbaot Jeova?

² Tingbaot glad we Jeova i kasem taem hem i luk we ol yangfala oli tingbaot hem olsem Bigfala Man we i Wokem olgeta. (Prij. 12:1) Be blong tingbaot Jeova i no min se yumi tingting nomo long hem, nogat. Hem i min se yumi tekem wan aksen—yumi mekem samting we hem i glad long hem mo yumi letem ol loa mo rul blong hem oli lidim laef blong yumi evri dei. I minim tu se yumi trastem Jeova from we yumi save se hem i wantem tumas blong givhan long yumi. (Sam 37:3; Aes. 48:17, 18) ?Hemia filing we yu yu gat long saed blong Bigfala Man ya we i Wokem yu?

‘Trastem Jeova Long Olgeta Tingting Blong Yu’

3, 4. ?Olsem wanem Jisas i soemaot se hem i trastem Jeova, mo from wanem i impoten we yumi trastem Jeova tede?

³ Jisas Kraes i beswan eksampol long fasin ya blong trastem God. Jisas i folem ol tok blong Ol Proveb 3:5, 6 long laef blong hem. Vas ya i talem se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.” Smoltaem afta we Jisas i baptaes, Setan i traem pulum Jisas blong kasem paoa mo haenem long wol ya. (Luk 4:3-13) Jisas i no letem Setan i trikim hem. Hem i save se trufala fasin ya blong ‘kam rij, kasem haenem mo laef’ oli ‘ol frut blong tingting daon mo fraet long Jeova.’—Prov. 22:4.

⁴ Wol tede i fulap long ol man we oli griri mo oli tingbaot olgeta wan nomo. From samting ya, yumi waes taem yumi folem eksampol blong Jisas. I gud blong tingbaot oltaem se Setan bambae i mekem eni samting we hem i naf blong mekem blong pulum ol man blong Jeova oli lego smol rod ya we i blong go kasem laef. Setan i wantem we olgeta man oli folem rod ya we i bigwan mo i lidim man i go blong lus. !Yu no mas letem hem i trikim yu! Defren olgeta, yu mas mekem tingting blong yu i strong blong tingbaot Bigfala Man we i Wokem yu. Yu mas trastem Jeova fulwan mo holemtaet “laef ya we i prapa wan,” we i sua blong kamtru i no longtaem.—1 Tim. 6:19.

!Ol Yangfala, Yufala i Mas Waes!

5. ?Wanem tingting blong yu long saed blong fiuja blong wol ya?

⁵ Ol yangfala we oli tingbaot Bigfala Man we i Wokem olgeta oli soem se oli waes nating se oli yang yet. (Ridim Sam 119:99, 100.) From we oli gat tingting blong God, oli save se i no longtaem, ol samting blong wol ya bambae oli lus. Nating se yufala i yangfala yet, i sua we long laef blong yufala, yufala i luk we fraet mo wari i kam antap. Sipos yu stap skul yet, ating yu bin harem tija i tokbaot ol problem olsem, doti we i stap spolem wol, wol i stap kam hot moa, fasin blong katemdaon fulap tri mo plante narafala problem olsem. Ol man oli wari bigwan long saed blong ol samting ya. Be ol Witnes blong Jeova nomo oli kasem save fulwan se ol samting ya oli haf blong saen we i soemaot se en blong wol blong Setan i klosap.—Rev. 11:18.

6. ?Olsem wanem sam yangfala oli foldaon long trap?

⁶ Sore tumas, sam yangfala man blong Jeova oli no moa lukaotgud, nao oli fogetem se wol ya i gat sot taem nomo blong hem i stap yet. (2 Pita 3:3, 4) Samfala oli mekem sam bigfala sin from we oli joen wetem ol rabis fren mo from we oli lukluk ol rabis pija long saed blong seks. (Prov. 13:20) !Sore tumas sipos God i no glad long wan yangfala naoia we en i klosap tumas! I gud yumi lanem wan samting long stori blong ol man Isrel, long yia 1473 B.K.T., taem oli stap long bigfala levelples blong Moab. Long taem ya, ol man Isrel oli klosap nomo blong go insaed long Promes Lan. ?Wanem i hapen long ples ya?

Oli Foldaon Taem Oli Klosap Nomo Long Promes Lan

7, 8. (a) ?Wanem trik we Setan i yusum long bigfala levelples blong Moab? (b) ?Wanem trik we Setan i yusum tede?

⁷ Bifo finis, i klia we Setan i wantem blokem ol man Isrel blong oli no kasem graon ya we Jeova i promes blong givim long olgeta. Setan i traem yusum profet Balam blong mekem trabol i kam long ol man Isrel, be plan blong hem i no wok. Biaen hem i yusum wan trik we i haed. Hem i traem mekem se Jeova i no save glad long ol man Isrel. Hem i yusum ol woman Moab blong pulum olgeta, mo long taem ya, plan blong hem i wokgud long samfala. Sam man Isrel oli stat blong go slip wetem ol woman Moab mo oli wosip long Bal blong Peoro. From samting ya, nating se Promes Lan ya i klosap nomo, samwe 24,000 man Isrel oli ded. !Hemia wan samting we i nogud tumas!—Nam. 25:1-3, 9.

⁸ Tede, yumi stap klosap tumas long wan promes lan we i gud moa, hemia niufala wol. Setan i gohed yet blong trikim ol man. Hem i yusum bakegen rabis fasin long saed blong seks blong spolem ol man blong Jeova. Long wol, rabis fasin long saed blong seks i kam nogud olgeta mekem se ol man oli luk fasin ya blong slip olbaot olsem wan haf blong laef nomo, mo oli luk fasin ya we man i slip wetem man bakegen mo woman wetem woman olsem wan samting we man hem wan i save jusum blong mekem. Wan Kristin sista i talem se: “Long haos mo long Haos Kingdom nomo, ol pikinini blong mi oli lanem se long ae blong God i nogud blong man i slip wetem man bakegen mo woman wetem woman mo boe i slip wetem gel we tufala i no mared.”

9. ?Wanem samting i save hapen long taem blong “yang taem,” mo ol yangfala oli save mekem wanem blong stanap strong long taem ya?

⁹ Ol yangfala we oli tingbaot Bigfala Man we i Wokem olgeta, oli save se fasin ya we man mo woman i slip tugeta, i wan tabu presen we i laenap wetem laef mo fasin blong mekem pikinini. Taswe, oli luksave se man mo woman i save haremgud blong slip tugeta long rod ya nomo we Jeova i stanemap, hemia insaed long mared. (Hib. 13:4) “Yang taem” i wan taem long laef we ol filing blong seks oli strong mo oli save mekem tingting blong yangfala i no moa klia blong skelemgud ol samting, nao hem i save faenem i had blong stap klin. (1 Kor. 7:36, NW) ?Yu save mekem wanem taem yu stat blong tingting long samting we i no stret? Yu mas prea wetem fulhat blong yu long Jeova blong i halpem yu blong yu putum tingting blong yu i stap long ol gudfala samting we oli klin. Oltaem Jeova i lesin long olgeta we, wetem fulhat blong olgeta, oli lukluk i go long hem blong i givhan long olgeta. (Ridim Luk 11:9-13.) Fasin blong storian long ol samting we oli klin mo we oli bildimap bilif blong yu, i save halpem yu blong tingting bakegen long ol gudfala samting.

!Jusumgud Ol Mak Blong Yu!

10. ?Wanem rong tingting we yumi wantem blokem, mo wanem kwestin we yumi mas askem long yumi wan?

¹⁰ Wan risen from wanem plante yangfala long wol oli no save bos long filing blong olgeta mo we bigfala samting long laef blong olgeta i blong haremgud long saed blong bodi, hemia from we oli no letem God i lidim olgeta mo oli no gat wan hop we i sua long saed blong fiuja. (Prov. 29:18) Oli olsem ol man Isrel, long taem blong Aesea, we oli no obei long God. Oli laef nomo blong ‘laf, kakae mit mo dring waen.’ (Aes. 22:13) I nogud yumi wantem gat laef olsem olgeta ya, be i gud yumi putum tingting blong yumi i stap strong long nambawan hop ya we Jeova i givim long ol man we oli stap tru long hem. ?Sipos yu yu wan yangfala blong Jeova, yu yu wantem tumas blong luk niufala wol? ?Yu yu traem bes blong yu blong “mekem ol fasin we i stret . . . taem [yu] stap wet” long gudfala hop ya we Jeova i putum i stap long fored blong yu? (Taet. 2:12, 13) Ansa we yu givim long ol kwestin ya oli gat paoa long ol mak mo ol samting we yu jusum blong putum long fasples long laef blong yu.

11. ?From wanem ol yangfala Kristin we oli stap skul yet oli mas wokhad?

¹¹ Wol ya i wantem se ol yangfala oli traehad blong kasem ol hae mak long wol ya. Mo i tru se yufala we i stap skul yet, yufala i mas wokhad blong kasem wan gudfala edukesen we i naf blong givhan long yufala blong faenem wok blong kasem samting we yufala i nidim. Be i no mak ya nomo we yufala i skul from. Yufala i wantem kam naf blong mekem wok insaed long kongregesen mo blong karem frut long wok blong talemaot Kingdom. Blong kasem mak ya, yufala i nidim blong kam naf blong storian gud, blong tingting gud, mo blong soem kwaet fasin mo respek taem yu pulum narafala blong tingting. Yes, ol yangfala oli kasem beswan edukesen taem oli stadi Baebol mo oli traehad blong mekem ol rul blong Baebol oli wok long laef blong olgeta. Olgeta ya oli putum wan strong fandesen blong fiuja blong olgeta, hemia laef we i no save finis.—Ridim Sam 1:1-3.a

12. ?Wanem eksampol we ol Kristin famle oli mas folem?

¹² Long Isrel, ol papa mo mama oli tinghae long wok ya blong tijim ol pikinini blong olgeta. Ol papa mama ya oli trenem ol pikinini blong olgeta long evri samting long laef, speseli long saed blong wosip. (Dut. 6:6, 7) Ol yangfala blong Isrel we oli lesin long papa mama blong olgeta mo ol narafala man we oli ona gud long God, oli gat save mo tu oli kasem waes, fasin luksave, fasin blong kasem save mo fasin blong tingting gud. Tijing blong Jeova nomo i save givim ol fasin ya long man. (Prov. 1:2-4; 2:1-5, 11-15) Tede tu, ol Kristin famle oli mas tinghae long tijing blong Jeova.

Lesin Long Olgeta We Oli Lavem Yu

13. ?Wanem kaen advaes we sam yangfala oli kasem mo from wanem oli mas lukaotgud taem oli kasem ol advaes ya?

¹³ Ol yangfala oli kasem advaes long enikaen man, maet i long man blong givim advaes long skul. Plante taem advaes blong ol man ya i blong givhan long ol studen blong kasem gudfala wok long wol ya blong oli wingud. I gud we yu yangfala, yu prea long Jeova blong givhan long yu blong skelem ol advaes ya wetem Tok blong Hem mo ol buk we slef we i stret mo waes i givim long yumi. Long stadi we yu mekem long Baebol, yu lanem se ol faswan man we Setan i wantem spolem hemia ol yangfala. Tingbaot Iv taem hem i stap long garen blong Iden, i gat plante samting we hem i no save yet. Iv i lesin long Setan, wan strenja we i neva soemaot lav long Iv bifo. !Traem tingbaot samting we bambae i kamaot sipos Iv i bin lesin long Jeova, man ya we i soemaot long plante defren rod se Hem i lavem Iv!—Jen. 3:1-6.

14. ?From wanem yumi mas lesin long Jeova mo long papa mama blong yumi we oli bilif long hem?

¹⁴ Bigfala Man we i Wokem yu i lavem yu tu, mo tingting we i pusum hem blong mekem olsem i klin gud. !Hem i wantem we yu hapi olwe, i no naoia nomo! Olsem wan papa we i kea long ol pikinini blong hem, Jeova i talem long yu yangfala mo long olgeta evriwan we oli wosip long hem se: “Hemia rod. Yufala i folem.” (Aes. 30:21) Sipos papa mo mama blong yu oli bilif mo oli rili lavem Jeova, hemia wan nambawan blesing we yu yu kasem. Ale, yu mas lesin long ol advaes blong tufala wetem respek taem yu stap putum ol mak we yu wantem kasem long laef. (Prov. 1:8, 9) Papa mo mama blong yu oli wantem we yu kasem laef, hemia wan samting we i sas tumas i bitim ol sas samting mo haenem long wol ya.—Mat. 16:26.

15, 16. (a) ?Yumi save trastem Jeova se bambae hem i no mekem wanem? (b) ?Wanem impoten lesen we yumi lanem long stori blong Baruk?

¹⁵ Olgeta we oli tingbaot Bigfala man we i Wokem olgeta, oli mekem laef blong olgeta i no fasfas tumas, oli trastem se Jeova bambae i “no save” livim olgeta mo i “no save” lego olgeta. (Ridim Hibrus 13:5.) Gudfala tingting ya i defren olgeta long tingting blong ol man long wol. From samting ya, yumi mas lukaotgud blong no letem spirit blong wol i gat paoa long yumi. (Efes. 2:2) Tingbaot eksampol blong sekretari blong Jeremaea, hemia Baruk. Baruk i laef long hadtaem ya we Jerusalem i stap long ol las dei blong hem, hemia klosap long taem we oli spolem Jerusalem long yia 607 B.K.T.

¹⁶ I luk olsem we Baruk i wantem gat wan gudfala laef wetem plante samting. Jeova i luksave samting ya mo wetem kaen fasin, Hem i talem long Baruk se i nogud we hem i gohed blong traem kasem “gudfala laef” we hem i wantem. Baruk i gat tingting daon mo i waes from we hem i lesin long woning blong Jeova mo hem i no ded taem ol ami blong Babilon oli winim Jerusalem. (Jer. 45:2-5) Defren olgeta, ol man we oli laef long taem blong Baruk we oli wantem gat “gudfala laef” mo oli putum wosip blong Jeova long seken ples long laef blong olgeta, oli lusum evri samting blong olgeta taem ol ami blong Babilon oli winim Jerusalem. Plante long olgeta oli lusum laef blong olgeta. (2 Kron. 36:15-18) Stori blong Baruk i halpem yumi blong luksave se gudfala fasin fren wetem God i moa impoten i bitim ol sas samting mo haenem blong wol ya.

Folem Ol Gudfala Eksampol

17. ?From wanem Jisas, Pol mo Timoti oli ol gudfala eksampol we ol man blong God tede oli save folem?

¹⁷ I gat plante gudfala eksampol long Baebol we oli halpem yumi blong wokbaot long rod blong laef. Wan eksampol hemia Jisas. Jisas i nafgud blong mekem plante samting i bitim eni man we i bin laef long wol. Nating se i olsem, hem i yusum laef blong hem blong talemaot “gud nius blong kingdom blong God” we bambae i halpem ol man blong olwe. (Luk 4:43, NW) Aposol Pol i wantem givim bes blong hem long Jeova. From samting ya, hem i lego wan wok we i save givim bigfala mane mo i yusum taem mo paoa blong hem blong talemaot gud nius. Timoti i folem gudfala eksampol blong Pol nao ‘long fasin blong bilif,’ hem i kam olsem ‘pikinini blong [Pol] stret.’ (1 Tim. 1:2) ?Olsem wanem? ?Jisas, Pol mo Timoti oli sore we oli bin jusum rod ya? !Nogat! Defren olgeta, Pol i talem se hem i luk ol samting ya we wol i givim olsem “rabis nomo” taem hem i skelem wetem blesing ya blong mekem wok blong God.—Fil. 3:8-11.

18. ?Wanem bigfala jenis we wan yangfala brata i mekem, mo from wanem hem i no sore from desisen we hem i mekem?

¹⁸ Plante yangfala Kristin tede oli folem fasin blong bilif blong Jisas, Pol mo Timoti. Wan yangfala brata we i kasem gud pei long wok blong hem i raetem se: “Mi kasem gudfala posisen long wok from we mi laef folem ol rul blong Baebol. Be nating se pei blong mi i gud, mi harem olsem we mi stap ronem win nomo. Taem mi go luk komiti we i lukaot long kampani mo talem long olgeta se mi wantem joen long wok blong prij fultaem, oli hareap nomo blong talem se oli save leftemap pei blong mi, blong mekem se mi no finis wok. Be mi mekem desisen blong mi finis. Plante man oli no kasem save from wanem mi lego wok ya we i givim bigfala mane blong joen long fultaem wok blong prij. Ansa blong mi hemia se mi rili wantem holemstrong long promes we mi mekem long God blong givim laef blong mi long hem. From we naoia mi mi bisi long ol wok blong God, mi glad tumas mo mi haremgud tu. Hemia wan samting we mane mo haenem i no save givim long mi.”

19. ?Wanem waes desisen we ol yangfala oli save mekem?

¹⁹ Raon long wol, plante taosen yangfala oli mekem semfala waes desisen. From samting ya, yufala ol yangfala, taem yufala i stap tingbaot fiuja, yufala i mas holem oltaem dei blong Jeova long tingting blong yufala. (2 Pita 3:11, 12) Yufala i no mas jalus long ol man we oli stap haremgud long laef blong wol ya. Defren olgeta, yufala i mas lesin long olgeta we oli rili lavem yufala. Samting we i sua blong givim wan gudfala fiuja long yufala hemia sipos yufala i hivimap “ol gudgudfala samting blong yufala long heven,” mo long rod ya nomo bambae yufala i kasem ol blesing we bambae oli no save finis. (Mat. 6:19, 20; ridim 1 Jon 2:15-17.) Yes yangfala, tingbaot Bigfala Man we i Wokem yu. Taem yu mekem olsem, Jeova bambae i blesem yu.

[Futnot]

?Yu Yu Save Tingbaot?

• ?Olsem wanem yumi soemaot se yumi trastem God?

• ?Wanem nao beswan edukesen?

• ?Wanem lesen we yumi save lanem long stori blong Baruk?

• ?Hu ya sam long ol gudfala eksampol we yumi save folem, mo from wanem oli ol gudfala eksampol?

[Tok blong pija long pej 17]

Jeova i givim beswan edukesen

[Tok blong pija long pej 19]

Baruk i lesin long Jeova mo i no ded taem ami blong Babilon i spolem Jerusalem. ?Yumi save lanem wanem long eksampol ya?