Ansa Long Wan Kwestin

◼ ?Wanem klos i stret blong werem taem yumi go blong tekem baptaes?

Nating se fasin blong putum ol klos i no sem mak ol ples blong wol, rul we Baebol i givim se yumi mas ‘putum klos we i stret nomo’, i stap sem mak long olgeta kristin, nating se wanem ples oli stap long hem. (1 Tim. 2:⁠9) Rul ya i laenap tu, taem yumi tingbaot se wanem klos nao i stret blong putum blong tekem baptaes.

Wajtaoa blong Jun 1, 1985, pej 30 (Engglis mo Franis), i givim advaes ya long man we i wantem tekem baptaes: “I tru fasin blong werem ol klos we oli stret i mas sem mak tu long ol klos blong swim we oli yusum. Tede, samting ya i impoten from ol man we oli wokem ol klos ya oli wantem soem fasin blong seks mo go kasem olsem man i neked nomo. I gat wan narafala samting we i gud blong tingbaot tu. Sam klos blong swim oli stret taem oli drae be taem oli wetwet oli no sem mak. Wan man we i wantem tekem baptaes i no wantem pulum ae blong ol narafala no mekem narafala i foldaon long wan taem we i impoten olsem taem blong baptaes.”—⁠Fil. 1:10.

Folem advaes ya, olgeta we oli wantem tekem baptaes bambae oli wantem werem ol klos we i stret. Oli stap tingbaot impoten taem ya. Klos blong swim we i smol tumas no i no stret mo fas long bodi taem i wetwet i nogud blong wan Kristin mo oli no mas werem. I sem mak, bambae i no stret blong wan blong werem klos we i olbaot nomo no i no klin. Mo tu, i no stret blong werem ol singglet we i gat ol tok blong wol long hem no ol pablisiti blong bisnes.

Taem ol elda oli mekem ol kwestin blong baptaes wetem wan we i wantem tekem baptaes, hemia wan gud taem blong tokbaot from wanem i impoten blong werem ol klos we i stret. Long rod ya bambae yumi holemtaet klin fasin long taem ya, mo bambae yumi gohed blong stap defren long wol.—⁠Skelem wetem Jon 15:⁠19.