Wan Spesel Manis Long Wok Blong Prij
1 ?Desemba i save kam wan spesel manis blong yu long wok blong prij? Maet i nidim blong mekem sam jenis long samting we yu stap mekem oltaem, ?be olsem wanem, yu no ting se blesing we bambae yu kasem i gud moa?
2 Sam long ol yangfala pablisa we oli baptaes finis bambae oli spel long skul mo bambae oli laekem blong mekem haftaem paenia long manis ya. !Bambae i leftemap tingting blong olgeta bigwan sipos oli gat sam long ol elda, man blong givhan, mo ol nara pablisa oli save wok wetem olgeta long wok blong prij! Sipos sam samting long laef oli blokem yu blong no mekem paenia long manis ya, ?yu yu naf blong jes spenem sam haoa moa long wok blong prij wetem olgeta we bambae oli mekem paenia? Samting ya bambae i leftemap tingting blong yufala bigwan blong wok tugeta.
3 Sipos olgeta pablisa oli mekem moa long wok blong prij, ol elda oli save mekem plan blong gat miting blong prij evri dei long taem blong spel blong mekem se olgeta we oli save mekem paenia oli save gat oltaem wan man blong wok wetem hem long wok blong prij.
4 I taem naoia, we wanwan man mo ol famle mo kongregesen tu, oli plan blong mekem Desemba wan spesel manis long wok blong prij long kongregesen blong yufala.