Mekem Olgeta Oli Haremgud Taem Oli Kam Long Memoriol
1 Long ol yia we oli jes pas, long evri tri man we oli kam long Memoriol, i gat wan nomo we i pablisa blong gud nyus. Maet samting ya bambae i tru tu long yia ya. Maet samfala oli kam from ol famle no wan fren we i stap long narafala ples, oli leftemap tingting blong olgeta blong kam, be sam narafala, maet oli kam from ol lokol pablisa nao oli invaetem olgeta. Sam narafala bakegen we oli kam, nating se oli baptaes finis, be oli no moa prij. Wetem ful hat blong yumi, yumi mekem gudfala welkam long olgeta we oli soem respek long oda blong Jisas se: “Yufala i mas stap mekem samting ya blong tingbaot mi bakegen.”—1 Kor. 11:24; Rom 15:7.
2 Olgeta we oli gat wok blong mekem welkam oli mas rere oltaem blong mekem welkam long evriwan, antap moa ol nyuwan, taem oli kam long Haos Kingdom. Be, yumi evriwan i save joen blong folem rod ya blong mekem man i haremgud taem hem i stap long Memoriol. (Rom 12:13) ?Olsem wanem yumi save mekem samting ya?
3 Long sapa blong Memoriol ya sam pablisa bambae oli bisi blong givhan long saed blong transpot, long ol man we oli intres. Sam narafala oli save kam eli mo stap blong mekem welkam long ol visita we oli kam olgeta nomo. Taem wan strenja i kam insaed long Haos Kingdom, talem halo long hem long kaen fasin mo stat storeyan wetem hem. Askem hem sipos hem i save wan long ol lokol brata. Sipos hem i save, lukaot long hem gogo kasem taem brata ya i kam. (Skelem wetem Luk 10:35.) Sipos hem i no save wan brata, i gud blong askem hem blong sidaon wetem yu long taem blong miting. Eksplenem long hem olsem wanem bambae oli yusum waen mo bred long miting ya. Maet bambae hem i nidim help blong yu blong faenem ol vas blong Baebol we man blong givim tok i talem.
4 Long en blong lafet blong Memoriol, talem long hem se yu glad we hem i kam. Maet hem i gat sam kwestin long saed blong wok blong yumi we yu save givim ansa long hem. Intres we yu wan yu gat long hem i save lid i go long storeyan blong wan poen long Baebol, maet long Haos Kingdom no long wan narafala ples. Sam brata we oli rere mo tekem ol jans ya blong statem ol storeyan olsem oli bin statem sam gudfala Baebol stadi long rod ya. Bifo we man ya i lego Haos Kingdom, tekem hem blong mitim sam narafala, mo wetem kaen fasin invaetem hem blong kambak.
5 !I wan glad long yumi blong mekem welkam long ol brata mo sista blong yumi we yumi laekem olgeta tumas we oli no moa kam oltaem long ol miting mo oli no moa prij sam taem i pas! I no gud blong askem kwestin long olgeta from wanem oli no moa kam long ol miting, jes soem nomo se yu glad we oli stap long miting ya. Maet wan samting we oli harem long tok blong Memoriol bambae i pusum olgeta blong tingting dip bakegen long promes ya we oli mekem finis, blong givim laef blong olgeta i go long Jeova. Gudfala welkam we yumi givim mo trufala intres we yumi soem i save tajem hat blong olgeta. Mekem olgeta oli save se bambae yu glad blong luk olgeta bakegen nekis taem.—Rom 1:11, 12.
6 Bambae oli givim wan spesel pablik tok long bighaf blong ol kongregesen long Epril 10 we stampa blong hem se: “Trufala Skul i Fulumap Nid Blong Ol Man.” Mekem sua blong invaetem olgeta we oli bin kam long lafet blong Memoriol mo givhan long ol blong stap long miting ya. Hop blong yumi se olgeta we oli kam long ol spesel miting ya bambae oli harem se oli welkam taem oli kam mo haremsave kaen fasin fren we i stap long medel blong ol man blong Jeova.—Sam 133:1.