Ansa Long Wan Kwestin

◼ ?Wanem stret rod blong folem taem oli askem kongregesen blong agri long wan resolusen?

I nidim wan resolusen taem i gat wan disisen blong mekem long ol impoten bisnes olsem pem wan pis graon, wokem bakegen no bildim wan nyufala Haos Kingdom, sanem spesel presen mane i go long Sosaeti, no givim mane long seket elda blong pem ol kaon blong hem. I gud blong talem wan resolusen blong oli agri long hem evri taem kongregesen i mas givimaot sam mane.

Maet i defren taem i gat spesel nid we i joen stret long ol impoten projek no wok. Eksampel, maet kongregesen i agri blong givim wan stret namba blong vatu evri manis i go long Sosaeti blong givhan long wok blong prij long olgeta ples long wol. Mo tu, ol samting we Haos Kingdom i mas pem, olsem lektrik mo wora mo ol samting blong klinim ples, i no nidim wan resolusen.

Taem wan nid i kam klia, bodi blong ol elda i mas storeyangud long bisnes ya. Sipos bighaf blong ol elda oli agri se oli mas mekem wan samting, wan long ol elda, maet wan memba blong Sevis Komiti, i mas mekemrere wan resolusen we hem i raetem blong talem long kongregesen long Miting Blong Kingdom Wok.

Elda we i wok olsem jeaman i mas eksplenem kwiktaem nomo be long klia fasin, nid we i stap mo wanem we bodi blong ol elda i ting se i gud blong lukaot long nid ya. Nao hem i givim jans long kongregesen blong askem sam kwestin we oli joen wetem bisnes ya. Sipos bisnes ya i fasfas lelebet, maet i moa gud blong no vot long hem go kasem nekis Miting Blong Kingdom Wok blong givim jans long evriwan blong tingbaot samting ya. Blong vot, olgeta long kongregesen oli mas leftemap han blong olgeta.

Olgeta we oli baptaes memba blong kongregesen nomo oli save vot long wan resolusen. Maet ol narafala oli save joen long vot taem loa i talem olsem, hemia sipos resolusen ya i joen long wan kampani bisnes no long wan lon blong Haos Kingdom. I no stret blong ol narafala Wetnes we oli stap visitim kongregesen ya nomo blong oli vot.

Afta we oli agri long resolusen ya, oli mas raetem det long hem, saenem, mo putum long fael blong kongregesen.