Talemaot Nambawan Mesej Long Revelesen
1 Buk ya Revelation Climax i bin halpem yumi blong kasem save long nambawan mesej long buk blong Revelesen. Long Maj, bambae yumi seremaot buk ya blong givhan long ol narafala blong luksave olsem wanem mesej ya i gat paoa long olgeta tu. Bambae yu faenem se ol poen we oli kam biaen oli save givhan long yu blong rere long storeyan blong yu.
2 Afta we yu talem halo, maet yu save talem wan samting olsem se:
◼ “?Yu yu harem finis store blong fo man blong ron long hos we Revelesen i tokbaot? [Wet long ansa.] Plante man oli talem ol defren mining blong ol fo man blong ron long hos ya. ?Be, yu save se fasin blong olgeta blong ron we i saen blong wan samting, i haf blong wan profet tok blong Baebol we i tokbaot ol samting we oli stap hapen long taem blong yumi, mo se yumi evriwan i joen long hem long defren fasin? [Wet long ansa.] ?Yu yu laekem blong kasem save long profet tok ya mo mining blong hem long yumi tede?” Yu save soem ol pija long japta 16 blong Revelation Climax buk mo joenem wetem sam vas we oli raetem long leta we i blak. No yu save mekem smol toktok long sam haf blong vison ya taem yu yusum traket ?Wol Ya Bambae i Lus No i Stap? Yu no fraet blong askem man blong karem buk no mekem plan blong gobak blong tokbaot moa long vison ya mo mining blong hem.
3 No maet yu wantem yusum wan fastok olsem se:
◼ “?Yu yu harem finis tok ya ‘Amageden’? [Wet long ansa.] Plante man oli ting se hem i stap tokbaot wan bigfala nyuklia faet we i stap bitwin ol bigfala wol paoa mo bambae i spolem olgeta ples, be i luk olsem se denja ya i stap godaon stat long en blong Kol Wo. Blong talem stret, Amageden i wan samting we i defren olgeta. Folem wanem Baebol i talem, Amageden bambae i mekem ol bigfala jenis oli kamaot long wol, we bambae i mekem ol samting oli kamgud, i mekem wan wol we i gat pis long hem blong olwe.” Dipen long ansa blong man, yu save poen i go long wan vas olsem Revelesen 16:16 no Ol Sam 37:10, 11 mo afta, pulum tingting i go long japta 39 blong buk ya Revelation Climax. Nao askem man blong karem buk.
4 Maet yu save pulum intres taem yu yusum poen ya:
◼ “Long taem olsem ya long yia, plante man long olgeta ples long wol oli tingbaot ded mo laef bakegen blong Jisas Kraes. ?Yu yu bin tingbaot finis wanem hem i stap mekem, stat taem hem i laef bakegen long ded? Plante gudfala samting we oli stap hapen long taem blong yumi oli joen long wok blong Jisas naoia blong mekem ol stampa tingting blong God oli kamtru. Buk blong Revelesen i tokbaot sam long olgeta. ?Yu yu wantem kasem save moa long stampa tingting we God i gat taem hem i sanem Pikinini blong hem i kam long wol, mo mining blong samting ya long yu mo long olgeta we yu laekem?” Maet yu save pulum tingting i go long paragraf 1 mo 2 blong japta 41 blong Revelation Climax buk.
5 Yu mas sua blong invaetem eni man we i soem intres blong kam long Memoriol. Wetem blesing blong Jeova, bambae yu save givhan long wan man blong ‘harem mo holem tok ya long tingting blong hem.’—Rev. 1:3.