Revelesen—Tok Haed Oli Kam Klia
1 Longtaem finis i kam buk blong Revelesen i stap olsem wan tok haed. Long plante handred yia finis ol man we oli stadi Baebol oli traem blong mekem ol tok haed blong hem oli kam klia, be oli no save mekem olsem. Be Tok blong God we i stap long Revelesen i no blong stap olsem wan tok haed blong olwe. Hem i Tok blong God we yumi mas kasem save long hem. (2 Tim. 3:16, 17) I gud tumas we, God i mekem ol tok haed blong Revelesen oli kam klia taem ol nambawan profet tok insaed long hem oli stap kamtru long taem blong yumi. Olsem we Jeova i bin yusum Jon blong talemaot vison ya long ol Kristin fren blong hem bifo, tede Jeova i yusum ‘slef we i stret mo waes’ blong mekem mining blong ol profet tok ya oli kam long klia ples.—Mat. 24:45-47, NW; Rev. 1:1-3.
2 Buk Blong Givimaot Long Maj: Buk ya Revelation—Its Grand Climax At Hand! hem i rili givhan mo leftemap tingting blong ol man blong God. ?Be from wanem ol man long teritori blong yu oli mas intres long hem? From we buk ya i tokbaot ol bigfala samting we oli stap kamtru long ol las dei olsem Revelesen i tokbaot. ?Yu ting se ol man oli intres long fyuja we God i soemaot? Revelesen i soemaot stret fasin blong God blong jajem man, mo tu i givim ol gudfala promes long fyuja. (Rev. 21:1-5) Taem yumi kasem save long mesej blong Revelesen, samting ya i givhan long yumi blong luksave taem naoia we yumi stap long hem mo yumi luksave se i impoten blong mekem wil blong God.
3 ?Yu ting se i had tumas blong ol man oli kasem save long buk ya Revelation Climax? I luk olsem, plante man oli no faenem i had tumas blong kasem save long hem. Hemia sam long ol toktok blong ol man we oli ridim buk ya. Wan man i talem se: “Buk ya i gat bigfala paoa. Hem i mekem man i intres. Mi mi laekem.” Wan pasta i talem se: “!Mi mi neva save wan samting no ridim wan samting we i gud mo i tru moa bitim buk ya!” Wan narafala man we hem i tekem i no bitim wan wik blong ridim buk ya fulwan i se: “Naoia ae blong mi i open long trutok. Mi mi wantem jenisim ful laef blong mi.” I klia se, plante man oli glad from we hem i fastaem blong olgeta we oli ridim mo save long Revelesen mo oli stat blong tingtinggud long ol tok blong hem.
4 Tokbaot Buk ya Revelation Climax Long Ol Narafala Man: Taem yu tokbaot Baebol wetem ol narafala man long manis Maj, soemaot buk ya Revelation Climax long olgeta we oli intres. Talem long olgeta se oli save makem ol haf we oli no kasem save long hem, mo taem yu kambak, bambae yu tokbaot ol poen ya wetem olgeta. Olsemia nao yu save faenemaot intres blong olgeta mo stanemap rod blong mekem visit.
5 Narafala samting, plante oli bin givimaot buk ya Revelation Climax long ol famle, ol fren blong olgeta, mo ol man we oli wok wetem. Soemaot olsem wanem ol gudfala pija mo ol smol tok we i stap insaed, mo ol narafala samting insaed long buk ya oli givhan long yu. Samting ya i save pulum ol narafala man blong lukluk insaed long buk blong Revelesen, nating se maet oli ting se i hadwok tumas blong kasem save long hem.
6 !Yumi glad blong kasem save long ol samting we bambae oli kamaot long fyuja we Revelesen i tokbaot mo rod ya we God i yusum tede blong eksplenem! Taem yumi kasem ol save ya, yumi no olsem ol tija blong Loa long taem blong Jisas no ol pasta long taem blong yumi, yumi neva mas slak blong tijim ol man no talemaot klia ol mining blong Tok blong God long olgeta we oli lesin. (Lukluk Luk 11:52.) Taem yumi mekem olsem, yumi sua se plante moa man bambae oli kasem hop blong laef foreva long nyufala wol blong God mo joen wetem yumi blong mekem wil blong God.—Rev. 4:11.