Halpem Olgeta Blong Wok Folem Mesej
1 Wok blong prij blong yumi i givim jans long ol man blong ‘harem ol tok we God i givim long Revelesen.’ (Rev. 1:3) Be sipos oli mas laef tru long “bigfala trabol,” oli mas wok folem olgeta tok ya tu. (Rev. 7:14) !Laef i dipen long samting ya! Ale yu mas sua blong gobak long olgeta we oli bin soem intres long wan long ol storeyan we yu yusum long manis ya.
2 Sipos yu bin livim “Revelation Climax” buk, maet yu save talem se:
◼ “I gud blong luk yu bakegen. Lastaem we yumi storeyan, yumi tokbaot wan profet tok long buk blong Revelesen, mo mi bin livim wan buk long yu we i eksplenem poen ya. Maet yu luksave se nating se buk blong Revelesen i dip, yumi save kasem save long hem long saed blong ol samting we oli stap hapen tede, taem yumi yusum sam stampa trutok blong Baebol. Mi wantem tekem sam menet blong soem ol bigfala poen we Baebol i talem long yumi long saed blong taem blong yumi.” Nao pulum tingting i go long wan stret buk we yu save yusum blong statem Baebol stadi.
3 Sipos yu bin livim traket ya “?Wol Ya Bambae i Lus No i Stap?” long fastaem we yu storeyan wetem man, yu save talem wan samting olsem se:
◼ “Mi mi glad blong faenem yu long haos tede. Taem mi visitim yu i no longtaem, yumi bin tokbaot ol samting we oli mekem wan saen we bambae i kamaot jes bifo en blong wol. [Luk bakegen sam stret haf blong saen long Matyu 24: 3-14] ?Yu yu bin makem eni samting we i hapen i no longtaem long wol no long komuniti blong yumi, we maet yu ting se i stret long wan haf blong saen ya?” Yusum ol pija long japta 16 blong Revelation Climax buk, blong tokbaot sam long ol profet tok ya blong Baebol we oli stap kamtru. Long en blong visit ya, talem stampa tok blong pablik tok blong wik ya, mo invaetem hem blong joen wetem yu long Haos Kingdom.
4 Sipos yu bin invaetem man blong haos long Memoriol, yu save talem se:
◼ “Taem mi visitim yu lastaem, yumi tokbaot olsem wanem ded blong Jisas i impoten long ol man. Mi bin invaetem yu tu blong kam long Memoriol blong ded blong Jisas, we ol Kristin long olgeta ples long wol bambae oli mekem long Maj 26. Mi kam tede blong mekem yu yu tingbaot se mi bin invaetem yu blong kam long impoten lafet ya. [Talem stret taem mo ples blong mekem lafet ya.] Sipos yumi luk bakegen sam long ol blesing we yumi stap haremgud long hem naoia, olsem frut blong samting we Jisas i bin mekem blong ol man, mo tu ol blesing we bambae oli kam yet, bambae samting ya i givhan long yu blong kasem save long mining blong lafet ya.” Afta, traem tokbaot sam poen we oli stret long storeyan ya long japta 41 blong Revelation Climax buk. Maet yu save tokbaot tu ol pija we oli stap long pej 294, 299, mo 308. Sipos i oraet, mekem plan blong halpem man ya we i soem intres blong kam long Memoriol.
5 Sipos man ya i jes wan man we i laekem blong lesin nomo, maet samting ya i save wok:
◼ “Mi mi laekem tumas las storeyan blong yumi long saed blong Baebol. Mi kambak from mi wantem blong luk we yu tu yu haremgud long wanem God i bin promes long olgeta we oli wantem kasem save moa long hem.” Ridim Jon 17:3, afta lukluk long traket ya Laef Long Pis Blong Nyufala Wol.
6 I gud we fasin blong yu blong laekem laef mo fasin tangkyu blong yu long ransom i pusum yu blong mekem visit bakegen long ol man we oli intres. Halpem olgeta blong wok folem nambawan mesej blong Revelesen. !Tingbaot, “taem blong ol samting ya i kam kolosap”! —Rev. 1:3.