Talemaot ‘Ol Profet Tok’
1 Yumi stap laef long stret taem we ol profet tok long buk blong Revelesen oli stap kamtru. Plante man oli stap traehad blong faenemaot mining blong ol nogud samting we oli stap hapen. Sipos oli ‘harem ol profet tok’ blong Revelesen, samting ya i save givhan long olgeta. (Rev. 1:3) Long manis Maj, yumi gat jans blong halpem olgeta taem yumi seremaot buk ya Revelation Climax. Taem yumi seremaot, yumi mas tingbaot se buk blong Revelesen i bin talemaot ol problem we oli stap kasem ol man tede. ?Ale, yumi save talem wanem?
2 Maet rod ya blong storeyan i wokgud:
◼ “Long wan handred yia we i jes pas, wol i fulap long faet, hanggri, mo sik. Long tingting blong yu, ?from wanem samting ya i kamaot, nating se man i kam antap bigwan long ol save mo teknik blong hem? [Letem man i ansa.] Plante man oli sapraes taem oli faenemaot se Baebol i bin talemaot ol samting ya finis. Ating yu save finis tok ya ‘fo man blong ron long hos long Apokalips.’ Ol samting we Baebol i talem long saed blong ol fo man ya, hem i rili wan profet tok we i stap kamtru long wol tede. [Openem Revelation Climax buk i go long japta 16, mo soem ol pija long pej 91 kasem 97.] Profet tok ya i talemaot wan taem blong bigfala trabol, be hem i givim hop tu. [Ridim Revelesen 6:2 long paragraf 3.] Man we i ron long waet hos hem i Jisas Kraes. Tru long Kingdom we hem i tijim yumi blong prea from, hem i promes blong finisim ol rabis fasin mo mekem se wol i gat pis mo i hapi.” Askem man blong karem buk.
3 Maet kwestin ya i pulum man blong storeyan gud:
◼ “?Yu ting se yumi nidim wanem blong finisim ol rabis samting we oli stap hapen long wol? [Letem man i ansa.] Bighaf blong ol man oli agri se wol i mas jenis bigwan, sipos no bambae hem i lus. Baebol i soem se God i save olsem wanem blong winim ol problem mo hem i promes blong halpem yumi.” Openem Revelation Climax buk long pej 171, mo ridim Revelesen 11:15 long paragraf 1. Soem ol pija long pej 302 mo 308, mo tokbaot ol blesing we bambae oli kamaot aninit long rul blong Kraes long Kingdom. Nao eksplenem long man blong haos olsem wanem hem i save kasem blesing from.
4 Maet yu harem se i isi long yu blong talem samting olsem:
◼ “Plante man we oli ridim buk blong Revelesen long Baebol oli faenem se i had blong kasem save long hem. Revelesen i tokbaot plante impoten samting we oli narakaen long tingting blong yumi. Buk ya, Revelation—Its Grand Climax At Hand!, i eksplenem evri vas long ful buk blong Revelesen mo i soem olsem wanem yumi wanwan i joen wetem ol profet tok ya we oli stap kamtru.” Openem buk long pej 15, paragraf 2, mo soem Revelesen 1:1, we i stap long blak raeting. Talem se ol tok olsem oli stap blong eksplenem mining blong olgeta vas wanwan long buk blong Revelesen, mo se ol save ya bambae i givhan long man blong haos blong kasem mining blong ol nambawan profet tok ya. Askem man blong karem buk blong 350 VT.
5 Sipos man blong haos i bisi, maet yu save givim wan magasin no traket long hem. Taem yu gobak mo hem i soem intres, yu save askem hem blong karem buk.
6 Mesej blong Revelesen i blong olgeta man. Evriwan i nidim blong harem ol profet tok ya. Yumi mas traehad fulwan blong talemaot impoten mesej ya.