Olgeta Kaen Man Bambae Oli Kasem Laef
1 Jeova i wantem se ’olgeta kaen man bambae oli kasem laef mo faenem stret save blong trutok.’ (1 Tim. 2:4) I tru se ol fasin we yumi bon wetem, fasin blong laef we yumi gruap long hem, mo ples blong yumi, oli gat paoa long yumi. Be olgeta man oli fri blong jusum samting we oli wantem, mo wanwan blong olgeta oli fri blong jusum olsem wanem bambae oli yusum laef blong olgeta. Oli save mekem ol samting we i gud mo kasem laef, no oli save folem ol rabis fasin mo ded. (Mat. 7:13, 14) ?Olsem wanem save ya i jenisim tingting blong yumi long saed blong ol man we yumi talemaot gud nyus blong Kingdom long olgeta?
2 Yumi no mas ting se intres we wan man i soem long trutok i dipen long ol samting olsem ples mo kastom blong hem, no kaen laef we hem i gruap long hem. Olgeta kaen man oli save laekem trutok, olgeta we oli no skulgud mo olgeta we oli skulgud, olgeta we oli joen long politik, ol bisnesman, olgeta we oli no bilif long God, olgeta we oli no bilif se God i gat paoa long laef blong yumi, mo tu, olgeta we oli bin mekem ol fasin we oli rabis olgeta. Plante man we oli kamaot long ol defren kaen laef mo haeples, oli bin jenisim ol olfala fasin blong olgeta, mo naoia oli gat hop blong kasem laef long nyufala wol blong God. (Prov. 11:19) From samting ya, yumi no mas fraet blong toktok wetem olgeta kaen man long saed blong mesej blong Kingdom.
3 Tingbaot Ol Eksampel Ya: Wan man i mekem plan blong kilim i ded seken hasban blong mama blong hem, be hem i no folem plan ya. Biaen, hem i mekem disisen blong kilim hem wan i ded, be hem i no save mekem samting ya tu. Biaen bakegen, oli putum hem long kalabus from we hem i stil mo i salem drag. Mared blong hem i brokdaon. Be naoia, man ya i stap holem wan gudfala wok, mared blong hem i hapi, mo hem i joengud wetem seken hasban blong mama blong hem. ?Wanem samting i jenisim fasin blong hem? Hem i stadi Baebol wetem ol Wetnes blong Jeova mo i folem ol samting se hem i lanem. Jeova i no ting se hem i nogud tumas we i no save jenis.
4 Wan yangfala woman i kam wan bigfala woman blong mekem sinema long televisin, be samting ya i no givim glad long hem. From we hem i laekem tumas gudfala fasin blong ol Wetnes, ale hem i agri blong stadi Baebol wetem olgeta. I no longtaem biaen, hem i stap givhan long ol narafala blong kasem save long gud nyus blong Kingdom. Taem hem i go prij long olgeta haos wanwan, ol man oli luksave hem. Be, hem i eksplenem wetem glad se hem i wantem ol man blong save se hem i wan Wetnes blong Jeova, bitim we hem i wan bigfala woman blong sinema.
5 Taem wan Wetnes i mekem plan blong stadi Baebol wetem wan narafala we i stap kasem ol Wajtaoa, wan woman we i stap long haos kolosap i harem nyus ya, mo hem tu i joen long stadi ya. !Kwiktaem nomo, woman ya i luksave se hemia trutok we hem i bin traehad blong faenem! Hem wetem hasban blong hem, tufala i no moa gohed blong mekem divos we tufala i stap mekem, mo tufala i frengud bakegen. Woman ya i bilif fulwan long fasin blong talemaot fyuja from ol sta, mo hem i stap joen wetem wan grup we oli mekem wok blong ol rabis speret. Be, kwiktaem nomo, hem i sakemaot ol sas buk mo ol narafala samting we oli joen wetem wok blong ol rabis speret. Smoltaem biaen, hem i stat go long ol miting mo storeyan wetem ol famle mo fren blong hem long saed blong nyufala bilif ya blong hem. Naoia, hem i stap prij wetem bigfala glad long ol narafala.
6 Yumi no mas traem jajem narafala man. I moagud we yumi gohed strong nomo long wok blong talemaot gud nyus long olgeta man long evri ples. Yumi gat gudfala risen blong trastem se Jeova, we “hem i lukluk hat blong man,” bambae ’i sevem olgeta kaen man.’—1 Saml. 16:7; 1 Tim. 4:10.