?Yu Yu Stap Stanap Strong Longtaem?
1 “Oltaem ol pikinini blong mi oli stap folem ol tok we i tru, hemia i mekem mi mi harem gud moa, i winim we mi harem gud long ol narafala samting.” (3 Jon 4) Fasin blong stanap strong longtaem we ol pikinini blong Jon long saed blong spirit oli holem, i givim bigfala glad long hem. !Papa blong yumi long heven i glad tumas taem hem i luk we plante milian man we oli olsem pikinini blong hem oli “gohed blong wokbaot long trutok!”—Prov. 23:15, 16; 27:11.
2 Taem ol man blong God oli gohed wetem strong tingting long ol Kristin wok, sloslou sam long olgeta oli kam slak long wok ya. Olgeta ya maet oli bin gat strong tingting taem oli jes stat blong lanem trutok. Be taem ol yia oli pas, oli stat blong folem wan fasin blong laef, we oli no moa joen tumas no wanwan taem nomo, long wok blong mekem disaepol.
3 I klia se sam oli no moa mekem moa from we oli sik long bodi, mo tu from we sam oli kam olfala. Be, yumi save talem ol gudfala tok blong leftemap tingting blong olgeta, from fasin we oli gat blong stanap strong longtaem. Oli stap mekem wanem we oli save mekem. Be wanwan long yumi we i givim laef finis long God i save askem long hem wan se: ‘?Mi mi stap tingting oltaem blong mekem olgeta samting we mi wan nomo mi laekem, mekem se mi no moa gat plante taem blong spenem long wok blong Kingdom? ?Mi mi “no hot, mo i . . . no kol tu,” no mi stap “traehad” blong gohed strong yet?’ (Rev. 3:15, 16; Luk 13:24) I gud se wanwan blong yumi i prea blong luksave wanem we yumi stap mekem, mo luk sipos i gat nid blong kam gud moa. Tingbaot oltaem se Jeova i promes blong givim “long olgeta ya we oli stap mekem i gud, . . . haenem, ona mo pis.”—Rom 2:10, NW.
4 Olsem Wanem Blong Stanap Strong: ?Wanem nao i halpem Jisas blong stanap strong? Pol i eksplenem se: “Blong kasem glad we i stap long fored blong hem, hem i stanap strong long pos we hem i ded long hem, mo hem i no tingbaot sem we hem i kasem. Nao hem i go sidaon long raetsaed blong bigfala jea blong God long heven.” (Hibrus 12:1-3, NW) Glad we i stap fored long Jisas i bitim olgeta traem we hem i mas fesem, we i blong smoltaem nomo. Sipos yumi tingting oltaem long glad ya we i stap fored long yumi, samting ya i save halpem yumi blong win tu. (Revelesen 21:4, 7; 22:12) Sipos yumi lukluk i go long Jeova blong i givim paoa long yumi tru long stadi wanwan, go long ol miting oltaem, mo gohed blong prea, bambae yumi naf blong gohed strong oltaem long wok we hem i givim long yumi blong mekem.
5 Jeova i glad taem ol man we oli stap tru long hem oli stanap strong longtaem. Taswe i gud yumi mekem hem i glad moa taem yumi gohed blong “wokbaot long trutok.”