Glad Blong Joengud Wetem Jeova Mo Pikinini
Blong Hem Long Maj 28 i Gat Wan Miting We i Moa Impoten i Bitim Ol Narafala Miting Blong Yia Ya
1 Taem yumi mekem Lodsapa long Maj 28, 2002, afta we san i godaon, bambae yumi soemaot we yumi glad blong joen wetem Jeova God mo Jisas Kraes. Long spesel taem ya, smol grup blong ol tabu Kristin we oli stap yet long wol, oli harem gud long spesel fasin “joen gud” we oli gat wetem Papa, Pikinini blong hem, mo wetem ol narafala Kristin we olgeta tu bambae oli rul long Kingdom. (1Jon 1:3; Efes. 1:11, 12) Plante milian “narafala sipsip” bambae oli tingting dip long nambawan janis we oli gat blong joen gud wetem Jeova mo Pikinini blong hem. !Taem oli mekem wok blong God, oli gat wan tingting nomo olsem tufala!—Jon 10:16.
2 Wok Wanples We Oli Frengud: Jeova mo Jisas tufala i glad oltaem blong stap joen gud. Tufala i bin stap tugeta blong plante milian yia bifo we tufala i wokem man. (Maeka 5:2) Taswe tufala i laeklaekem tufala tumas. Fasbon Pikinini ya we i laef fastaem long heven mo we i olsem fasin waes, i talem se: “Evri dei, mi stap mekem hem [Jeova] i glad, mo oltaem nomo, mi harem gud blong stap wetem hem.” (Prov. 8:30) !Taem Pikinini blong God i spenem plante plante yia wetem Hemia we i Stamba blong lav, samting ya i mas gat bigfala paoa long hem!—1 Jon 4:8.
3 Jeova i tingbaot we ol sinman oli nidim wan man blong pemaot olgeta, nao hem i jusum Pikinini blong hem, wan nomo we hem i gat, mo we i laekem tumas ol man, blong i givim ransom sakrefaes. Mo hemia nomo i givim janis long yumi blong kasem wan gudfala laef long fiuja. (Prov. 8:31) Olsem we Jeova mo Pikinini blong hem tufala i joengud blong mekem wan tingting i kamtru, yumi tu, bigfala lav i joenem yumi wetem tufala mo wetem ol narafala bakegen, mo yumi glad blong mekem samting we God i wantem.
4 Soemaot Bigfala Tangkiu Blong Yumi: Taem yumi stap long Memoriol mo yumi lesin gud wetem respek, yumi save soemaot trufala tangkiu from lav blong Jeova mo sakrefaes we Pikinini blong hem i givim blong sevem yumi. Bambae oli tokbaot eksampol blong Jisas blong soemaot lav, olsem wanem hem i holemtaet bilif gogo kasem ded blong i save pem ransom, mo rul blong hem olsem King blong Kingdom we God i stanemap. Bambae oli tokbaot tu ol blesing we Kingdom ya i save karem i kam long ol man. Bambae oli mekem yumi tingbaot se yumi nidim blong gohed blong soemaot bilif blong yumi, mo gat strong tingting blong mekem samting we Jeova i wantem, taem yumi “talemaot God we i stamba blong trutok.”—3 Jon 8; Jem. 2:17.
5 Halpem Ol Narafala Blong Oli Joen Wetem Yumi: Ol elda oli mas mekem wan spesel traehad blong leftemap tingting blong ol Witnes we oli no moa prij, blong oli kam long Memoriol blong ded blong Kraes. (Mat. 18:12, 13) Mekem wan lis blong olgeta ya we yufala i mas go singaot olgeta oli kam, olsemia nao, bambae yufala i no fogetem wan long olgeta, mo bambae yufala i go tok stret long olgeta wanwan.
6 ?Yu yu save sam narafala we maet oli kam long Memoriol? Yu mas mekem faswan samting blong halpem olgeta blong oli gat tangkiu from miting ya. Singaot olgeta wetem lav, mo mekem olgeta oli harem se oli welkam. Yumi mas mekem bes blong yumi blong singaotem evri Baebol studen blong yumi mo ol narafala man we oli intres, wetem ol famle mo fren blong yumi, blong oli kam long miting ya we i moa impoten i bitim ol narafala miting blong yia ya. Ol blesing blong ransom oli stap yet blong olgeta man oli ‘kasem samting we i moa gud olgeta, we oli save Jisas Kraes, Masta blong yumi.’ (Fil. 3:8) Olgeta we oli soemaot bilif long sakrefaes blong Kraes oli save sua long promes ya blong laef we i no save finis.—Jon 3:16.
7 Yu neva mas ting nating long paoa we Memoriol i save gat long olgeta we hat blong olgeta i stret. Tu yia bifo, long aelan blong Papua Niu Gini, 11 man oli ron 17 aoa long wan smol bot long solwota we i raf, blong kasem ples we oli mekem Memoriol long hem. ?From wanem? Oli talem se: “Mifala i wantem mekem Memoriol blong ded blong Kraes wanples wetem ol narafala man we oli wosip long Jeova; taswe mifala i glad blong mekem trip ya.” !Tingbaot strong tingting we olgeta ya we oli intres oli soemaot, mo tangkiu we oli gat blong joen gud wetem Jeova, Pikinini blong hem, mo ol Kristin brata!
8 Askem long olgeta evriwan we oli soem intres blong oli mekem Baebol stadi. Leftemap tingting blong olgeta blong oli joen oltaem long ol miting blong kongregesen mo blong oli serem trutok we oli lanem wetem ol narafala. Givhan long olgeta blong mekem ol rul blong Baebol oli wok long laef blong olgeta. Olsem nao, bambae oli “wokbaot long delaet” mo oli “folem trutok.” (1Jon 1:6, 7) Givhan long olgeta blong oli fren gud wetem Jeova mo blong oli gat moa tangkiu from nambawan janis we oli gat blong mekem samting we hem i wantem.
9 !Yumi gat wan nambawan janis blong joen gud wetem glad, long “wan tingting nomo, ... nao [yumi] stap wok olsem wan tim nomo, blong traehad blong mekem ol man oli bilif long gud nius”! (Fil. 1:27, 28) !Yumi mas tingting rere blong yumi harem gud tugeta, long Memoriol long Maj 28, mo yumi mas gat tangkiu oltaem long Jeova mo Pikinini blong hem!—Luk 22:19.