Tingbaot Ransom Wetem Fasin Tangkiu
1, 2. ?From wanem risen yumi mas tingbaot ransom wetem fasin tangkiu?
1 Blong obei long oda we Jisas i givim, ol Kristin raon long wol bambae oli kam tugeta long Sarede Maj 22, 2008, afta we san i godaon, blong tingbaot bakegen ded blong Jisas. (Luk 22:19; 1 Kor. 11:23-26) Yumi mekem olsem blong soemaot bigfala tangkiu long samting we i bin hapen long laef blong Jisas 1,975 yia bifo finis. Taem Jisas i holemstrong long God long fasin we i stret gud olgeta nating we ol man oli kilim hem i ded mo oli nilim hem long wan pos, Jisas i leftemap nem blong Papa blong hem, mo i givim ansa long rabis tok we Setan i sakem agensem Jeova.—Job 1:11; Prov. 27:11.
2 Blad blong Jisas i mekem se niufala kontrak i save wok, nao God i save jusum sam sinman long wol ya, blong oli kam pikinini blong hem we bambae oli rul wetem Kraes long Kingdom blong heven. (Jer. 31:31-34; Mak 14:24) Mo tu, taem God i givim stret Pikinini blong hem olsem wan sakrefaes, hem i soemaot bigfala lav we hem i gat long ol man, olsem Jisas hem wan i eksplenem long Nikodimas.—Jon 3:16.
3. ?Olsem wanem Memoriol bambae i givhan long olgeta we oli joen long hem?
3 Singaotem Narafala i Kam: Kingdom Wok Blong Yumi blong manis Jenuware i talem se i gud yumi mekem wan lis blong ol man we yumi save olgeta blong bambae yumi save singaotem olgeta wanwan i kam long Memoriol. ?Yu yu stat finis blong mekem wan lis blong olgeta we bambae yu singaot olgeta i kam long Memoriol? ?Yu yu mekem plan finis blong joen fulwan long kampen ya blong singaotem ol man i kam long Memoriol, we bambae i stat long Maj 1? Olgeta we oli kam long taem ya, bambae oli harem ol save blong Baebol we bambae i mekem bilif blong olgeta long ransom i strong moa, nao bilif ya i save mekem se oli kasem laef we i no save finis.—Rom 10:17
4. ?From wanem yumi mas kam eli bifo we Memoriol i stat?
4 Olgeta we oli naf oli save kam eli long miting blong welkamem olgeta we oli bin karem wan pepa blong kam long Memoriol ya. From we fulap man oli kam long Memoriol, i impoten tumas we yumi luksave olgeta we oli niuwan mo olgeta we oli stap kam wanwan taem nomo long miting blong yumi save givhan long olgeta.
5. ?Olsem wanem yu save rerem hat blong yu from spesel dei ya?
5 Rerem Hat Blong Yu: Insaed long Ridimgud Ol Tok Blong Baebol Evri Dei—2008 mo long 2008 Calendar i gat program blong Baebol riding blong Memoriol we i stat long Maj 17. Taem yu tingbaot ol impoten samting ya we oli bin hapen long laswan dei blong laef blong Jisas long wol ya, samting ya bambae i halpem yu blong rerem hat blong yu from Memoriol. (Esra 7:10, NW) Sipos yumi prea mo tingting dip long ol tok blong Baebol, samting ya bambae i givhan long yumi blong mekem lav blong yumi long Jeova mo Jisas i kam strong.—Sam 143:5.
6. ?Fasin tangkiu long ransom i save givhan long yumi olsem wanem?
6 From we Memoriol i stap kam klosap, yumi mas rerem gud yumi, mo givhan long ol narafala tu blong oli rerem olgeta from impoten dei ya. Sipos yumi tingbaot ransom ya wetem fasin tangkiu, bambae fasin fren blong yumi wetem Jeova mo Pikinini blong hem, i kam strong. (2 Kor. 5:14, 15) Samting ya bambae i pusum yumi blong folem eksampol blong tufala, taem yumi lego samting we yumi nomo i wantem blong givhan long narafala.—1 Jon 4:11.