“Holemtaet Fasin Ya We Yufala i Wan Nomo Long Spirit”
APOSOL Pol i talem long ol Kristin long Efesas se: “Yufala i no mas tingbaot ol rong blong narafala from lav. Yufala i mas traehad blong holemtaet fasin ya we yufala i wan nomo long spirit, we pis i mekem se yufala i joen gud.”—Efes. 4:2, 3.
‘Fasin ya we yumi wan nomo,’ o yumi joen gud, i kamaot “long spirit.” Hemia i minim se paoa blong God nao i mekem se yumi joen gud. Be olsem we Pol i talem, wanwan Kristin i mas mekem sam samting blong yumi save gohed blong “holemtaet fasin ya we [yumi] wan nomo long spirit.”
Traem tingbaot: Sipos wan man i givim wan niufala trak long yu, ?hu bambae i gat wok ya blong lukaot gud long trak ya? Yu nao yu mas lukaot gud long hem, from we sipos trak ya i nogud, yu no save blemem man ya we i givim trak long yu.
Long sem fasin, nating se fasin blong joen gud wetem ol narafala long kongregesen i wan presen we i kam long God, be yumi wanwan i gat wok ya blong lukaot gud long hem. Sipos yumi gat wan problem wetem wan brata o sista, yumi mas askem yumi wan se: ‘?Mi mi stap mekem bes blong mi blong holemtaet fasin ya we yumi joen gud insaed long kongregesen?’
“TRAEHAD” BLONG HOLEMTAET FASIN YA WE YUMI JOEN GUD
Samting we Pol i talem i soemaot se samtaem i no isi blong holemtaet fasin ya we yumi wan nomo long spirit, speseli taem wan brata o sista i mekem yumi harem nogud. Sipos yumi wantem holemtaet fasin ya we yumi joen gud, ?hemia i min se oltaem yumi mas go luk brata o sista ya blong tokbaot problem ya? Maet samtaem i no nid blong mekem olsem. I gud yu askem yu wan se: ‘Sipos mi go tokbaot problem ya long hem, ?bambae i mekem se mitufala i joen gud bakegen o bambae i mekem problem i kam mowas?’ Samtaem i moa gud blong fogivim hem nomo mo no moa tingbaot samting ya.—Prov. 19:11; Mak 11:25.
I gud yu askem yu wan se: ‘Sipos mi go tokbaot problem ya long hem, ?bambae i mekem se mitufala i joen gud bakegen o bambae i mekem problem i kam mowas?’
Olsem we aposol Pol i talem, yumi “no mas tingbaot ol rong blong narafala from lav.” (Efes. 4:2) Wan buk i talem se wan narafala rod blong transletem tok ya, hemia se “laekem olgeta nating se oli gat ol slak fasin.” Hemia i min se yumi luksave se ol brata mo sista oli save mekem mastik, sem mak olsem yumi. I tru, yumi stap traehad blong werem “niufala fasin.” (Efes. 4:23, 24) Be i no gat wan long yumi we i save mekem samting ya long wan fasin we i stret gud. (Rom 3:23) Sipos yumi agri wetem tingting ya, bambae i isi moa blong no tingbaot ol rong blong narafala, fogivim narafala, mo “holemtaet fasin ya we yufala i wan nomo long spirit.”
Sipos yumi fogivim ol narafala mo yumi fogetem ol nogud samting we oli mekem long yumi, bambae yumi gohed blong gat ‘pis ya we i mekem se yumi joen gud.’ Grik tok ya we oli tanem long Efesas 4:3 i kam ‘mekem yumi joen gud,’ long Kolosi 2:19 oli tanem i kam “ol waet string.” Hemia ol bigfala waet string we oli joenem tu bun tugeta. Long sem fasin, pis mo lav we yumi gat long ol brata mo sista i halpem yumi blong joen gud tugeta, nating se samtaem yumi no laekem samting we oli mekem.
Taswe taem wan brata o sista i mekem yu harem nogud, yu kros, o i gat wan fasin we yu no laekem, i gud yu traem blong kasemsave long hem, i bitim we yu tingbaot nomo nogud samting we hem i mekem long yu. (Kol. 3:12) Yumi evriwan i sinman, taswe maet samtaem yu tu yu mekem narafala i harem nogud. Sipos yu tingbaot samting ya, hemia bambae i givhan long yu blong ‘holemtaet fasin ya we yumi wan nomo long spirit.’