!“Yu Yu Wan Man We Yu Sas Tumas”!

1-2. ?Yumi save mekem wanem blong trastem se yumi sas long ae blong Jehova?

YUMI ol man blong Jehova, yumi sas tumas long ae blong hem. Be i gat sam long yumi we oli stap ting nating long olgeta wan. Maet hemia from we ol man oli bin tritim nogud olgeta. ?Olsem wanem? ?Yu tu yu gat sem filing olsem? Sipos yes, ?yu save mekem wanem blong trastem se yu yu sas long ae blong Jehova?

² Wan samting we yu save mekem, hemia blong tingbaot ol stori blong Baebol we i soemaot fasin we Jehova i wantem se ol man oli mekem long ol narafala. Jisas i respektem ol man mo i tritim olgeta long fasin we i kaen. Taem hem i mekem olsem, hem i soemaot se hem mo Papa blong hem i tinghae long ol man we oli gat tingting daon mo oli stap ting nating long olgeta wan. (Jon 5:19; Hib. 1:3) Long stadi ya, bambae yumi tokbaot: (1) samting we Jisas i mekem blong halpem ol man blong luksave se oli sas long ae blong Jehova, mo (2) samting we yumi wanwan i save mekem blong trastem se yumi rili sas long ae blong God.—Hag. 2:7.

SAMTING WE JISAS I MEKEM BLONG OL MAN OLI LUKSAVE SE OLI SAS

3. ?Wanem tingting blong Jisas long ol man Galili we oli kam long hem?

³ Long nambatri taem we Jisas i prij long Galili, ol man long ol defdefren ples oli kam blong hem i tijim olgeta mo hilim olgeta. Jisas i luksave se “ol narafala oli stap spolem olgeta mo oli no lukaot long olgeta, oli olsem ol sipsip we i no gat man blong lukaot long olgeta.” (Mat. 9:36) Ol lida blong skul oli stap lukluk daon long olgeta, mo oli talem se “God i jajem olgeta finis.” (Jon 7:​47-49) Be Jisas i tinghae long olgeta, taswe hem i tekem taem blong tijim olgeta mo hilim olgeta. (Mat. 9:35) Mo tu, blong givhan long plante moa man, Jisas i trenem ol aposol blong hem, blong olgeta tu oli save prij mo hilim ol sikman.—Mat. 10:​5-8.

4. Taem Jisas i respektem ol man mo i kaen long olgeta, ?hem i soemaot wanem?

⁴ Taem Jisas i respektem ol man we oli lesin long hem mo i kaen long olgeta, hem i soemaot se hem mo Papa blong hem i luk ol man ya we plante taem ol narafala oli lukluk daon long olgeta, se oli rili sas. Sipos yu stap mekem wok blong Jehova be yu no sua se hem i tinghae long yu o nogat, i gud yu tingbaot olsem wanem Jisas i tritim ol man ya we oli kam long hem blong hem i tijim olgeta. Olsem nao, bambae yu luksave se yu yu rili sas long ae blong Jehova.

5. ?Woman ya we Jisas i mitim hem long Galili i stap fesem wanem problem?

⁵ Jisas i givhan long ol man olsem wan grup, be hem i givhan tu long ol man wanwan. Eksampol, taem hem i stap prij long Galili, hem i mitim wan woman we i harem nogud from hem i stap lusum plante blad blong 12 yia finis. (Mak 5:25) Folem loa, sik ya i mekem se hem i no klin, mo sipos eni man i tajem hem, bambae man ya tu i no klin. I sua se sik ya i blokem hem blong i no joen wetem ol man. Antap moa, hem i no save joen wetem ol narafala long sinagog blong wosipim Jehova, mo long taem blong ol spesel lafet. (Lev. 15:​19, 25) I sua se sik ya i mekem woman ya i harem nogud long bodi, mo i harem se i no gat man i lavem hem.—Mak 5:26.

6. ?Woman ya i mekem wanem blong hem i save kam gud bakegen?

⁶ Woman ya i wantem tumas se Jisas i hilim hem, be hem i no askem stret long Jisas. ?From wanem? Maet hem i sem from sik blong hem o maet hem i fraet se Jisas bambae i tok strong long hem, se hem i no sud kam long medel blong ol man ya from we hem i no klin. Taswe hem i tajem en blong klos blong Jisas nomo, from we hem i sua se hemia i save mekem sik blong hem i kam gud. (Mak 5:​27, 28) Mo from strong bilif blong woman ya, hem i kam gud bakegen. Biaen, taem Jisas i askem se hu i tajem hem, woman ya i talemaot evri samting we hem i mekem. ?Nao Jisas i mekem wanem?

7. ?Jisas i mekem wanem long woman ya we i harem nogud? (Mak 5:34)

⁷ Jisas i toktok kaen long woman ya mo i respektem hem. Hem i luksave se woman ya “i fraet tumas mo i seksek.” (Mak 5:33) Hem i tingbaot filing blong woman ya, taswe hem i talem ol gudfala toktok long hem blong mekem hem i harem gud. Antap long hemia, hem i singaot woman ya se “dota blong mi.” Hemia wan tok we i soemaot se Jisas i kaen long hem mo i lavem hem. (Ridim Mak 5:34.) I gat wan taem nomo long Baebol we Jisas i singaot wan woman se “dota blong mi.” I luk olsem se Jisas i talem toktok ya long woman ya from we hem i luksave se woman ya i fraet tumas. Traem tingbaot filing blong woman ya. !Ating hem i harem gud tumas! Sipos Jisas i no bin talem ol gudfala toktok ya long hem, taem hem i gobak, maet hem i save harem se hem i gilti, nating se sik blong hem i kam gud. Be ol tok ya blong Jisas i givhan long hem blong i luksave se hem i sas tumas long ae blong Papa blong hem long heven, Jehova.

8. ?Wan sista blong Brasil i fesem wanem problem?

⁸ Tede tu, sam man blong Jehova oli fesem sam problem long helt we i mekem se oli ting nating long olgeta wan. Maria,a we i wan fultaem paenia blong Brasil, taem hem i bon, hem i no gat leg mo lef han blong hem. Hem i eksplenem se: “Plante taem long skul, ol pikinini oli stap mekem i nogud long mi from we mi handikap. Mo tu, oli stap singaot mi long sam nem we i spolem filing blong mi. Mo samtaem ol stret famle blong mi tu oli stap tritim nogud mi.”

9. ?Wanem i halpem Maria blong i luksave se hem i sas long ae blong Jehova?

⁹ ?Wanem i givhan long Maria? Taem hem i kam wan Witnes blong Jehova, ol brata mo sista oli mekem hem i harem gud, mo oli givhan long hem blong luk hem wan olsem we Jehova i luk hem. Hem i talem se: “Sipos mi mas raetemdaon nem blong evri man we oli halpem mi, pej blong notbuk blong mi bambae i no naf. Mi talem bigfala tangkiu long Jehova we hem i givim wan nambawan famle olsem long mi.” Ol Kristin brata mo sista oli halpem Maria blong luksave se hem i sas tumas long ae blong Jehova.

10. ?Meri Magdala i fesem wanem problem? (Mo tu, yu luk ol pija.)

¹⁰ Traem tingbaot wan narafala woman we Jisas i givhan long hem, hemia Meri Magdala, we bifo i gat seven dimon i stap long hem. (Luk 8:2) Maet hem i stap mekem sam samting we i narakaen from we ol dimon ya oli stap kontrolem hem, mo from samting ya maet ol narafala oli fraet long hem. Long taem ya, ating hem i harem nogud, hem i fraet, mo i harem se i no gat man i lavem hem o i save givhan long hem. Be i luk olsem se Jisas i ronemaot ol dimon ya long hem, nao hem i kam wan disaepol blong hem. ?Wanem narafala samting we Jisas i mekem blong givhan long Meri Magdala blong i luksave se hem i sas long ae blong God?

11. ?Jisas i mekem wanem blong Meri Magdala i luksave se hem i sas long ae blong Jehova? (Mo tu, yu luk ol pija.)

¹¹ Jisas i askem Meri Magdala blong i folem olgeta taem oli stap go prij long ol vilej.b From samting ya, hem i save gohed blong lesin long Jisas taem hem i stap tijim ol narafala. Mo tu, stret long dei ya we Jisas i laef bakegen, hem i kamtru long Meri Magdala. Hem i wan long ol faswan disaepol we Jisas i toktok long hem long dei ya. Mo Jisas i sanem hem blong i go talemaot long ol aposol se hem i laef bakegen. Evri samting ya we Jisas i mekem, i givhan long hem blong i luksave se hem i sas tumas long ae blong Jehova.—Jon 20:​11-18.

12. ?Wanem i mekem Lidia i ting se bambae i neva gat man i lavem hem?

¹² Plante man tede oli gat sem filing olsem Meri Magdala, we oli harem se i no gat man i lavem olgeta. Lidia, wan sista blong Spen, i talem se bifo we hem i bon, mama blong hem i gat tingting ya blong kilim hem i ded long bel. Lidia i tingbaot se taem hem i smol, mama blong hem i no wantem lukaot long hem mo i stap talem ol rabis tok long hem. Hem i talem se: “Mi wantem tumas se ol narafala oli lavem mi mo oli luk mi olsem fren blong olgeta. Be mi gat tingting ya se bambae i neva gat man i lavem mi, from we oltaem mama blong mi i stap mekem mi harem se mi nogud.”

13. ?Wanem i halpem Lidia blong i kasemsave se hem i sas long ae blong Jehova?

¹³ Taem Lidia i stat blong stadi Baebol, ol samting oli jenis. Taem hem i prea, i ridim Baebol, mo ol brata mo sista oli mekem ol gudfala samting blong givhan long hem, hemia i mekem hem i luksave se hem i sas long ae blong Jehova. Hem i talem se: “Plante taem hasban blong mi i stap talem long mi se hem i lavem mi tumas. Oltaem hem mo ol narafala brata mo sista oli mekem mi tingbaot bakegen ol gudfala fasin we mi gat.” ?Yu yu tingbaot wan long kongregesen we i nidim blong yu givhan long hem, blong i luksave se hem i rili sas long ae blong Jehova?

SAMTING WE YUMI SAVE MEKEM BLONG LUK YUMI WAN OLSEM WE JEHOVA I LUK YUMI

14. Folem 1 Samuel 16:​7, ?Jehova i stap luk wanem long ol man? (Mo tu, yu luk bokis ya “?From Wanem Jehova i Tinghae Long Ol Man Blong Hem?”)

¹⁴ Tingbaot se Jehova i no luk yu olsem we ol man blong wol oli luk yu. (Ridim 1 Samuel 16:7.) Ol man blong wol oli tinghae long man sipos fes mo bodi blong hem i naes, hem i rij, o hem i skul gud. Be Jehova i no tingbaot ol samting ya. (Aes. 55:​8, 9) Taswe i nogud yu gat sem tingting olsem ol man blong wol mo yu daonem yu wan. Be i gud yu traem luk yu wan olsem we Jehova i luk yu. Maet yu save ridim ol stori blong Baebol we i soemaot se Jehova i tinghae long ol man we samtaem oli ting nating long olgeta wan, olsem Elaejah, Naomi, mo Hana. Maet yu save raetemdaon ol samting we i hapen long laef blong yu we i pruvum se Jehova i lavem yu mo i tinghae long yu. Mo tu, yu save stadi bakegen long ol buk blong yumi we i tokbaot fasin ya we man i ting nating long hem wan.c

15. ?From wanem Jehova i luk Daniel olsem ‘wan man we i sas tumas’? (Daniel 9:23)

¹⁵ Tingbaot se fasin blong yu blong holemstrong long Jehova i mekem se yu sas long ae blong hem. Taem profet Daniel i gat 90 yia, i gat wan taem we hem i “taed bitim mak” mo tingting blong hem i foldaon. (Dan. 9:​20, 21) ?Olsem wanem Jehova i leftemap tingting blong hem? Hem i sanem enjel Gabriel i kam blong i mekem hem i tingbaot se hem i ‘wan man we i sas tumas,’ mo se Hem i stap harem ol prea blong hem. (Ridim Daniel 9:23.) ?From wanem Jehova i luk Daniel se hem i sas tumas? Hemia from we hem i laekem stret fasin mo i holemstrong long Jehova. (Esik. 14:14) Jehova i putum stori ya long Baebol blong i leftemap tingting blong yumi. (Rom 15:4) Jehova i stap lesin tu long ol prea blong yu, mo i tinghae long yu from we yu laekem stret fasin mo yu holemstrong long wok blong hem.—Maeka 6:​8, fut.; Hib. 6:10.

16. ?Wanem i save halpem yu blong luk Jehova olsem wan Papa we i lavem yu?

¹⁶ Luk Jehova olsem wan Papa we i lavem yu. Hem i wantem halpem yu, be hem i no traem blong lukluk ol mastik blong yu. (Sam 130:3; Mat. 7:11; Luk 12:​6, 7) Taem ol man we oli ting nating long olgeta wan oli tingting dip long samting ya, hemia i givhan bigwan long olgeta. Eksampol, Michelle we i wan sista blong Spen, i harem se i no gat man i lavem hem mo i ting nating long hem wan, from we blong plante yia hasban blong hem i stap sakem ol rabis tok long hem. Hem i talem se: “Evri taem we mi harem se mi nating nomo, mi pijarem se Jehova i stap karem mi long han blong hem, mo i soemaot se hem i lavem mi mo i protektem mi.” (Sam 28:9) Lauren, wan sista blong Saot Afrika, i stap tingbaot se: “Sipos Jehova i yusum ol rop blong lav blong pulum mi mi kam long hem, i stap klosap long mi long olgeta yia we i pas, mo i stap yusum mi blong tijim ol narafala, hemia i soemaot se hem i tinghae long mi mo i save yusum mi long wok blong hem.”—Hos. 11:4.

17. ?Wanem i save halpem yu blong trastem se Jehova i agri fulwan long yu? (Ol Sam 5:12) (Mo tu, yu luk pija.)

¹⁷ Trastem se Jehova i agri fulwan long yu. (Ridim Ol Sam 5:12.) Deved i talem se taem Jehova i agri long yumi, hemia i olsem we hem i putum wan bigfala “sil” i goraon long yumi blong protektem yumi. Taem yu save se Jehova i glad long yu mo i stap sapotem yu, hemia i olsem wan sil we i save protektem yu sipos yu stat blong ting nating long yu wan. ?Olsem wanem yu save sua se Jehova i agri fulwan long yu? Olsem we yumi bin luk, Jehova i yusum Baebol blong soemaot se hem i tinghae long yumi. Antap long hemia, hem i yusum ol elda, ol gudfala fren, mo ol narafala long kongregesen blong mekem yumi tingbaot se yumi sas long ae blong hem. ?Yu mas mekem wanem taem ol narafala oli talem ol gudfala toktok long yu?

18. ?From wanem yu no mas sakemaot ol gudfala toktok we ol narafala oli talem long saed blong yu?

¹⁸ Taem olgeta we oli save gud yu mo oli lavem yu oli talem ol gudfala toktok long saed blong yu, yu no mas sakemaot. Tingbaot se Jehova i save yusum olgeta blong soemaot long yu se hem i agri fulwan long yu. Michelle, we yumi tokbaot hem finis, i talem se: “Sloslo, long hat blong mi, mi stap lanem blong akseptem ol gudfala toktok we ol narafala oli talem long mi. I tru se i no isi, be mi save se hemia nao samting we Jehova i wantem se mi mekem.” Ol elda tu oli givhan long Michelle blong i luksave se Jehova i lavem hem. Naoia hem i wan fultaem paenia, mo samtaem hem i mekem ol wok blong Betel long haos blong hem.

19. ?From wanem yu sua se yu sas long ae blong Jehova?

¹⁹ Jisas i mekem yumi tingbaot bakegen se Papa blong yumi long heven, Jehova, i tinghae long yumi. (Luk 12:24) Taswe yumi save trastem se Jehova i luk yumi se yumi sas tumas. !Yumi no mas fogetem samting ya! Mo i gud yumi mekem bes blong yumi blong givhan long ol narafala, blong olgeta tu oli luksave se oli rili sas long ae blong Jehova.