?Yu Ting Se i Save Gat Jastis Long Wol?
I luk olsem se long evri ples i no gat jastis. Bae yumi tokbaot tu eksampol blong olgeta we oli sud putum jastis, be oli stap spolem narafala:
Long Jenuware 2018, wan jaj long US i givim oda blong oli rilisim wan man afta we hem i spenem klosap 38 yia long kalabus. ?From wanem? Oli jes faenemaot se man ya i no gilti folem pruf we i stap long DNA.
Long Septemba 1994, long wan kantri long Afrika, tri yangfala Kristin man oli no joen long ami from oli harem se i no stret blong mekem, ale polis i putum trifala long kalabus. Kam kasem Septemba 2020, oli spenem 26 yia finis long prisen. Oli no mekem olgeta i pas long kot blong harem mo jajem kes blong olgeta.
Sipos yu bin safa from oli mekem i no stret long yu, maet filing blong yu i olsem man ya Job long Baebol, we hem i se: “Mi stap krae blong man i halpem mi, be i no gat jastis.” (Job 19:7) Maet i luk olsem se neva bambae i gat trufala jastis. Be Baebol i promes se wan dei olgeta we oli wantem jastis bambae oli kasem. Mo tu, ol waes advaes blong Baebol, oli save halpem yu blong dil wetem ol trabol tede we yu kasem from i nogat jastis.
?Hu i mekem se i no gat jastis?
Ol man we oli no obei long God oli stap mekem se i no gat jastis. Baebol i soem se tru jastis i kam long God. (Aesea 51:4) Long Baebol tufala tok ya “jastis” mo “stret fasin” oli klosap sem mak. (Ol Sam 33:5) Taem man i folem ol tingting blong God, man ya i stap mekem i stret o i mekem gudfala fasin, hemia nao jastis. Be i defren taem i nogat jastis, fasin ya i kamaot from sin we i mekem se man i no obei long ol gudfala rul blong God. Yumi luk ol eksampol ya:
Selfis. Fasin ya blong selfis o tingbaot hem wan nomo i joen moa wetem sin. (Jemes 1:14, 15) Man we i gat fasin ya bambae i tritim nogud ol narafala o yusum narafala blong kasem samting we hem i wantem. Be God i wantem se yumi mas lukaot rod blong givhan long narafala fastaem.—1 Korin 10:24.
No kasemsave. Sam man oli no kasemsave se oli stap tritim nogud narafala, be stil God i luk fasin ya se sin. (Rom 10:3) Ol man we oli kilim Jisas i ded, oli no kasemsave se samting we oli mekem i no soem jastis.—Ol Wok 3:15, 17.
Sistem Blong Man. Plan blong ol man se politik, bisnes mo relijen i save promotem jastis mo tritim gud ol man. Be rili, plante taem ol sistem ya nao oli stamba blong ol mastik, korapsen, fasin blong agensem ol narafala from oli defren, griri fasin, fasin ya we sam man i kam pua bitim mak mo sam i rij bitim mak, mo no save akseptem narafala tingting o fasin. Taswe i no moa gat jastis. Sam man oli promotem ol sistem ya wetem tingting blong mekem i gud long narafala. Be blong talem stret, wok blong ol man we oli no wantem God i lidim olgeta, bambae i no sakses.—Prija 8:9; Jeremaea 10:23.
?Wanem tingting blong God taem i nogat jastis?
God i no laekem nating, taem i no gat jastis. Hem i no laekem ol tingting mo fasin we i mekem se i nogat jastis. (Ol Proveb 6:16-18) Hem i pulum Aesea blong raetem se: “Mi, Jehova,a mi laekem jastis, mi no laekem nating fasin blong stil mo fasin we i no stret.”—Aesea 61:8.
Loa we God i givim long ol man Isrel i blong mekem olgeta oli praktisim jastis oltaem. Hem talem long ol jaj blong oli no akseptem mane o mekem sam fasin we i save blokem jastis o mekem kruked fasin. (Dutronome 16:18-20) Hem i tok strong long ol man Isrel we oli no tingbaot ol puaman wetem olgeta we oli nogat nem. Taswe hem i no moa wantem olgeta, from we oli no stap obei long hem.—Aesea 10:1-3.
?God bambae i mekem wanem?
Bambae hem i yusum Jisas Kraes blong tekemaot sin, we i stamba blong fasin ya blong mekem i no stret long man, mo i mekem ol man oli kam stretgud olgeta. (Jon 1:29; Rom 6:23) Hem i stanemap wan Kingdom, we bambae i mekem wan niufala wol we ol stret man nomo bambae oli stap long hem, mo i mekem se i gat jastis blong evriwan. (Aesea 32:1; 2 Pita 3:13) Blong save moa, plis wajem video ya ?Wanem ya Kingdom Blong God?
?Laef long niufala wol bambae i olsem wanem?
Taem jastis i kasem olgeta ples long wol, bambae evriwan i gat pis mo harem se oli sefgud. (Aesea 32:16-18) God i tinghae long laef blong evri man, taswe bambae hem i tritim evriwan long sem fasin nomo. Nao biaen ol man bambae oli no moa sore, krae mo harem nogud from narafala i mekem i no stret long olgeta. Ol filing ya bambae oli lus mo ol man bambae oli no moa save tingbaot olgeta. (Aesea 65:17; Revelesen 21:3, 4) Blong save moa, luk atikol ya “?Kingdom Blong God Bambae i Mekem Wanem?”
?Yu save trastem promes ya blong God?
Yes. Wei we ol defren haf blong Baebol i laenap gud, mo ol profet tok, histri, mo sayens, oli pruvum se yu save trastem Baebol. Bae yu faenem moa save long ol atikol ya:
?I stret blong traehad blong gat jastis?
Long taem blong Baebol, ol gudfala man oli traehad blong kasem jastis. Eksampol, ol man oli wantem putum aposol Pol long wan kot we i save jajem hem blong i ded. Nao hem i no jes akseptem fasin ya we oli wantem mekem long hem, be hem i yusum ligol raet we hem i gat blong i apil long Sisa.—Ol Wok 25:8-12.
Nating se ol man oli traehad blong mekem se i gat jastis long wol ya, be bambae oli no save mekem. (Prija 1:15) Plante man oli faenem se taem oli gat strong bilif long promes blong God long wan niufala wol, samting ya i halpem olgeta blong gat pis nating se narafala i mekem i no stret long olgeta.
a Jehova hem i prapa nem blong God.—Ol Sam 83:18.