?Olsem Wanem Blong Winim Filing Ya Blong Taed Tumas Long Pandemik?

?Yu yu wari plante from COVID-19 nao yu kam taed tumas? Sipos yes, i no yu wan nomo. Blong plante manis, ol man long fulwol oli mas lan blong laef wetem wari we i kamaot from pandemik ya. Dr. Hans Kluge we i rijenal daerekta blong World Health Organization long Yurop, i talem se plante “oli mekem ol bigfala jenis long laef blong olgeta blong no spredem COVID-19. Long taem olsem, i isi mo i nomol blong no moa intres long ol samting mo tingting i foldaon, mo blong kam taed.”

Yu no mas letem tingting blong yu i foldaon sipos yu yu kam taed tumas from wari we yu gat long pandemik. Baebol i givhan long plante blong fesem hadtaem ya. Mo i save givhan long yu tu.

?Wanem ya filing blong taed tumas we i kamaot from wari long pandemik?

Hemia i no wan sik, be hem i filing we man i kasem taem samting olsem wan pandemik i jenisim laef blong hem mo i wari tumas from fiuja. Yumi evriwan i defdefren, be hemia sam saen we yumi save gat taem filing ya i kasem yumi:

No wantem mekem wan samting
No kakae gud mo no slip gud
Kam kros kwiktaem
Wari tumas from ol smosmol wok
Had blong tingting gud
Tingting i foldaon

?From wanem i denja?

Filing ya blong taed tumas from pandemik i save spolem yumi mo ol narafala. Sipos yumi no lukaotgud, sloslo yumi save kam slak blong folem ol rul blong blokem COVID. Nao maet yumi no moa tingbaot denja blong vaeras ya we i stap goraon mo i stap kilim ol man i ded. Yumi save kam taed long ol restriksen, mo maet yumi wantem gat moa fridom, be hemia i save putum yumi mo ol narafala long denja.

Long ol hadtaem olsem, plante oli agri wetem wanem we Baebol i talem se: “Sipos tingting blong yu i foldaon long dei we yu harem nogud, bambae yu no gat naf paoa.” (Ol Proveb 24:10) Baebol i givim plante stamba trutok we oli save givhan long yumi blong fesem ol trabol, olsem pandemik ya.

?Wanem ol advaes blong Baebol we oli save givhan long yu?

Stap longwe long narafala man be gohed blong toktok long fon

Samting we Baebol i talem: “Wan tru fren . . . i kamtru long yu long taem blong trabol.”—Ol Proveb 17:17.

I impoten blong save: Ol trufala fren oli givhan long yumi blong kam strong. (1 Tesalonaeka 5:11) Be taem yumi stap yumi wan oltaem, yumi putum helt blong yumi i stap long denja.—Ol Proveb 18:1.

Traem hemia: Gohed blong toktok wetem ol fren blong yu long ol video chat, ol fon kol, o imel mo teks mesej. Yu ring i go long ol fren blong yu long ol dei we yu harem nogud, mo yu jekem tu sipos oli oraet. Yufala i save serem ol samting we i givhan long yufala long taem blong pandemik ya. Yu traem faenem sam rod blong mekem i gud long wan fren, ale bae yu luk se hemia i givhan long yu blong kam glad long wan dei we yu harem nogud.

?Sam man oli talem wanem?

“Mi traem mekem ol plan wetem ol fren, blong mifala i storian tru long video. Samtaem mifala i mekem tutu nomo. Mo sam narafala taem, mifala i glad blong joen olsem wan grup blong plei gem o storian nomo. I tru se i no olsem we yumi joen tugeta wanples, be i givhan bigwan. Pandemik i mekem laef i had, mo yumi evriwan i nidim narafala blong givhan long yumi. Taswe i impoten we yumi ring i go o sanem teks long ol fren blong yumi, mo yumi talemaot long olgeta samting we i rili stap long hat blong yumi.”—Megan, Kanada.

“Mifala i misim ol famle mo fren blong mifala, be mifala i faenem wei blong soemaot long olgeta se mifala i lavem olgeta. Ful famle i joen wanples blong mekem ol kad mo ol smol presen blong ol fren, mo mifala i putum wan vas blong Baebol blong soemaot se mifala i stap tingbaot olgeta. !Hemia i mekem mifala i glad gogo! Taem mifala i spenem taem blong mekem samting blong narafala, hemia i givhan long mifala blong fogetem ol wari.”—Ema wetem hasban blong hem, Natan, mo tufala pikinini, Eli mo Hop, Yunaeted Stet.

Yusum gud taem blong yu

Samting we Baebol i talem: “Yusum gud taem blong yufala.”—Efesas 5:16.

I impoten blong save: Taem yu yusum gud taem blong yu, hemia i save givhan long yu blong stap glad mo no wari tumas.—Luk 12:25.

Traem hemia: Bitim we yu fokas long wanem we yu no moa save mekem, yu traem tingbaot sam samting we yu save mekem naoia. Eksampol, maet yu gat moa taem naoia blong mekem sam wok we yu bin plan from, o gohed long sam samting we yu laekem mekem? ?Yu save spenem moa taem wetem famle blong yu?

?Sam man oli talem wanem?

“Mifala i gat janis blong mekem plante samting raon long haos, olsem planem ol vejtebol mo ol lif we oli smel gud, mekem sam droing, mo flasem haos.”—Evan wetem waef blong hem, Samanta, mo tufala pikinini, Eli mo Adam, Saot Afrika.

“Mitufala wetem waef blong mi i spenem plante moa taem tugeta, i bitim eni narafala taem long ol 30 yia we mitufala i mared. Lav blong mitufala i kam strong moa, taem mitufala i kasemsave moa long ol slak fasin mo ol gudfala fasin blong mitufala. Naoia mitufala i rere gud blong givgivhan long mitufala long ol trabol we bae i kam long fiuja.”—Ivan wetem waef blong hem, Iv, Itali.

Folem gud program

Samting we Baebol i talem: “Olgeta samting oli mas hapen . . . folem plan.”—1 Korin 14:40.

I impoten blong save: Plante man oli harem gud moa taem oli folem wan program evri dei.

Traem hemia: Yu save mekem wan program we i stret long situesen blong yu naoia. Makemaot stret taem blong mekem skulwok, wok blong kasem mane, wok long haos, mo stadi Baebol. I gud yu makemaot taem tu blong mekem ol samting we oli save mekem i gud long yu, olsem, spenem taem wetem famle, wokbaot aotsaed, mo mekem eksasaes. I gud we wanwan taem, yu jekem program blong yu bakegen, mo jenisim sipos i gat nid blong mekem.

?Sam man oli talem wanem?

“Mi gohed blong mekem sam samting we mi stap mekem bifo long pandemik. Mi jenisim sam samting blong mi save mekem eksasaes, mo mi gohed blong wekap long sem taem evri moning. Program ya i givhan long mi blong no fokas long pandemik, be blong tingbaot moa ol famle mo fren blong mi.”—Kgaogelo, Saot Afrika.

“Mi laekem blong girap mo mekem kofi blong mi olsem oltaem. Afta, mi go jenis olsem se bae mi aot long haos. Hemia i givhan long mi blong harem gud mo tingting i wekap gud long fuldei.”—Karmel, Franis.

Mekem ol jenis folem weta

Samting we Baebol i talem: “Man we i tingting gud i luksave we trabol i stap kam, nao i go haed.”—Ol Proveb 22:3.

I impoten blong save: I dipen long ples we yu stap long hem, maet i gat sam sisen we yu no save go afsaed oltaem blong pulum fres win mo stap long san, we i gud long helt blong yu.

Traem hemia: Sipos kolkol taem i klosap, yu traem ajastem siting rum mo ples blong wok blong yu blong i kasem san. Nating se ples i kolkol, yu traem plan from ol samting we yu save mekem aotsaed. Sipos i posibol, yu traem karem sam klos blong kolkol, blong yu save spenem moa taem aotsaed.

Sipos hot taem i klosap, ol man bambae oli spenem moa taem aotsaed, so yu mas lukaot gud. Yu mekem plan blong ol ples we bambae yu go long hem, mo yu jusum ol taem we i no gat tumas man.

?Sam man oli talem wanem?

“Mi laef long wan ples we i stap ren oltaem, so i gud blong gat wan program we mi save jenisim kwik. Taem mi luk se i gat san, kwiktaem nomo mi go aotsaed. Nating se mi wokbaot smoltaem nomo o ron long baskel, be i givhan blong mi harem gud.”—Samena, Franis.

“Long hot taem i isi, from i gat plante samting blong mekem aotsaed, be naoia we kolkol taem i stap kam, mi stap mekem wan lis blong ol samting we mi wantem mekem insaed.”—Tifany, Kanada.

Gohed blong folem ol rul blong blokem COVID

Samting we Baebol i talem: “Man we i stupid, i no kea mo i trastem hem wan bitim mak.”—Ol Proveb 14:16.

I impoten blong save: COVID-19 i kilim man i ded, mo yumi save kasem sipos yumi no moa lukaot gud.

Traem hemia: Wanwan taem i gud yu jekem ol rul we i kamaot long ples blong yu, mo luk sipos yu stap gohed blong folem olgeta. Yu mas tingbaot se, samting we yu mekem i save spolem yu, famle blong yu, mo ol narafala.

?Sam man oli talem wanem?

“Mi mekem wanem we mi naf blong mekem, blong blokem vaeras ya blong i no pas i go long narafala man. Nating se plante narafala oli no folem ol rul we gavman i putum, be mi mi fokas long wanem we mi save mekem blong mi mo famle blong mi mifala i stap sef.”—Daryn, Saot Afrika.

Gohed blong fren gud moa wetem God

Samting we Baebol i talem: “Yufala i mas kam klosap long God, nao hem bambae i kam klosap long yufala.”—Jemes 4:8.

I impoten blong save: God i save halpem yu blong fesem eni kaen trabol.—Aesea 41:13.

Traem hemia: Yu ridim wan haf blong Tok blong God, Baebol, evri dei. Hemia bambae i givhan long yu blong statem wan gudfala program blong ridim Baebol.

Yu save kontaktem ol Witnes blong Jehova blong faenemaot olsem wanem yu save joen long ol miting blong olgeta long taem blong pandemik blong COVID-19. Eksampol, long fulwol oli joen long fon o video blong mekem ol miting blong olgeta, lafet blong tingbaot ded blong Jisas, mo bigfala asembli.

Ol vas blong Baebol we oli save givhan

Aesea 30:15: “Yufala i save kam strong sipos yufala i stap kwaet mo yufala i soemaot se yufala i trastem God.”

Mining: Sipos yumi trastem advaes blong God, tingting blong yumi bambae i stap kwaet long ol hadtaem.

Ol Proveb 15:15: “Man we i stap safa, evri dei long laef blong hem i nogud nomo, be man we hat blong hem i glad, i olsem we hem i stap lafet olwe nomo.”

Mining: Sipos yu fokas long ol positif samting, hemia i save givhan long yu blong stap glad long ol hadtaem.

Ol Proveb 14:15: “Man we i no save samting, i bilif long evri toktok, be man we i tingting gud, hem i skelem gud wanwan step blong hem.”

Mining: Yu folem ol rul blong lukaot gud long helt blong yu, mo yu no mas kwik blong bilivim sam man we oli talem se ol restriksen ya i blong nating nomo.

Aesea 33:24: “Bambae i no gat wan man long ples ya i talem se: ‘Mi mi sik.’”

Mining: God i promes blong endem evri sik.