Indeks Blong Fasin Fri

UNDP (Yunaeted Nesen Developmen Program) i mekem wan “Indeks Blong Fasin Fri Blong Olgeta Man” we i soemaot hamas fasin fri we ol man blong 88 defren kaen kantri oli gat. Oli gat raet mo oli fri blong mekem 40 samting we Raet Blong Olgeta Man Long Olgeta Ples Long Wol i tokbaot, indeks ya i givim wan poen long wan kantri from wanwan fasin fri blong hem.

Magasin ya The Courier, we European Komuniti i prentem, i soemaot sam long ol fasin fri we UNDP i makemaot hemia: raet blong hivap mo joen long pis; fri long fasin blong fosem man blong go long skul no bilif blong wan jyos long ol skul blong pikinini; fri long fasin blong tekemaot olting blong narafala man, mo raet blong wanwan man blong folem enikaen skul. ?Olsem wanem, ol kantri oli folem ol samting ya?

Nating se wan kantri i no kasem 40 poen, Swiden mo Denmak tufala i kam kolosap wetem 38 poen, mo Netalan i kam namba tri wetem 37 poen. Daon long lis ya i gat olgeta kantri we oli kasem smol nomo olsem wan no tu poen. Wan kantri long lis ya we i daon olgeta hem i no kasem wan poen nating. Be, yumi mas makemgud se, ripot blong UNDP i talem se, “Indeks ya i stret long 1985” mo se afta long taem ya wol i kasem plante moa fasin fri.

Magasin ya blong Netalan, Internationale Samenwerking i makemgud se “ol pua kantri olsem Kosta Rika (namba 18 ples), Papua Nyu Gini (20), mo Veneswela (22) oli kasem moa long lis bitim ol kantri blong Yurop olsem Aerlan (23) mo Spen (24).”

Lastok blong ripot ya i talem se, kolosap evritaem, fasin fri i joen wetem fasin blong wok blong gat plante samting. Plante kantri we oli fri olgeta oli haremgud long plante samting we oli gat, long semtaem ya ol kantri we oli no fri olgeta oli harem nogud wetem ol smol samting we oli gat. Makemgud ripot blong UNDP se: “Fasin fri i givim paoa long olgeta man blong lukaot ol jans blong gat plante samting blong olgeta mo blong ol grup blong olgeta.”

Tru ya, ol 40 defren kaen fasin fri we UNDP i raetemdaon long lis olsem mak we ol sosaeti blong man oli wantem tumas blong kasem, hem i no kaontem wetem fasin fri long trabol blong sik, fasin blong kam olfala, mo ded. Kingdom blong God nomo long han blong Pikinini blong hem, Jisas Kraes, bambae i givim fasin fri olsem long yumi. Baebol i promes se “naoia i olsem we olgeta samting we God i mekem oli stap panis, from we oli stap rotin nomo. Be long dei ya we God bambae i mekem ol pikinini blong hem oli fri olgeta long sin, panis ya bambae i finis, nao olgeta samting ya we God i mekem bambae oli fri olgeta olsem ol pikinini blong hem.”—Rom 8:21.

[Tok blong pija long pej 31]

Oli makem wan bigfala fasin fri long Is Yurop taem oli brekemaot wol blong Belin