!Storian Wetem Narafala!
1 Blong folem oda we yumi kasem blong prij mo mekem disaepol, yumi mas givim save long ol narafala. (Mat. 24:14; 28:19, 20) Wetem ol fren blong yumi tu, samtaem i hadwok blong storian. ?Taswe, wanem i save halpem yumi blong yumi naf blong serem gud nius wetem ol man we yumi no save olgeta?
2 Frengud: Traem tingbaot filing blong olgeta we yu mitim long wok blong prij. From ol nogud samting we i stap hapen long wol tede, yumi no sapraes we maet sam man oli wari, no oli fraet taem oli mitim wan strenja. Samting ya i save spolem fasin blong storian gud tugeta. ?Olsem wanem yu save mekem fraet blong olgeta i godaon? Bifo we yumi talem wan tok, yumi save pasem wan mesej long man finis sipos klos mo hea blong yumi we i klin mo i stret. Fasin blong yumi blong putum stret klos mo gat kwaet fasin i save givhan blong mekem man i no fraet.—1 Tim. 2:9, 10.
3 Wan narafala samting we i mekem i moa isi blong storian, hemia blong mekem olsem we yu fren finis wetem man blong haos. Samting ya i givhan long man ya blong no fraet, mo i mekem we hem i rere blong lesin. Blong mekem olsem, yu mas reregud fastaem. Taem yumi save gud wanem we bambae yumi talem, yumi no fraet tumas. Mo from we yumi gat pis long tingting yumi save pulum narafala blong lesin long mesej blong yumi. Wan woman i tokbaot wan Witnes we i visitim hem, i se: “Wanem we mi makem long saed blong fes blong hem we i stap smael, hemia we hem i gat pis long tingting blong hem. From samting ya, mi wantem lesin long hem.” Samting ya nao i openem rod long woman ya blong lesin long gud nius.
4 Ol Fasin We i Pulum Narafala Blong Lesin: Yumi mas soem trufala intres long narafala. (Fil. 2:4) Wan rod blong mekem olsem, hemia blong no toktok tumas. Makem se blong mekem wan storian i minim tu se yu lesin long narafala. Taem yumi askem tingting blong man mo yumi lesin gud long ansa blong olgeta, oli harem se yumi kea long olgeta. Taswe, taem narafala i toktok, yu no mas hareap blong faenem janis blong traem talem bakegen fastok we yu bin rerem. Sipos i stret, soem se yu agri no yu harem samting we oli talem, mo traem mekem toktok blong yu i laenap wetem wanem we oli talem. Sipos oli tokbaot wan samting we oli wari long hem, jenisim tok blong yu blong tokbaot ol wari blong olgeta.
5 Fasin blong no flas mo gat tingting daon i save givhan blong storian gud wetem narafala. (Prov. 11:2; Wok 20:19) Ol man oli wantem kam klosap long Jisas from we hem i ‘wan kwaet man, mo tingting blong hem i stap daon.’ (Mat. 11:29) Defren olgeta, fasin blong tinghae long yumi wan i save mekem man i no wantem lesin long yumi. Taswe, nating se yumi bilif strong se yumi kasem trutok, yumi mas yusum waes fasin mo no toktok long man long wan fasin we i strong tumas.
6 ?Olsem wanem sipos toktok blong man i soemaot we sam bilif blong hem i no laenap wetem ol tijing blong Baebol? ?I min se yumi mas stretem tingting blong hem? Yes, bambae yumi stretem tingting blong hem, be i no min se yumi mas mekem long faswan visit. Plante taem i moa gud blong tokbaot ol bilif blong hem we i laenap wetem bilif blong yumi bifo we yumi serem ol tijing blong Baebol we maet hem i faenem i had blong akseptem. Blong mekem olsem yumi mas gat longfala tingting mo jusum stret tok. Aposol Pol i soem nambawan eksampol long saed ya taem hem i stap prij long ol jaj blong Areopagus.—Wok 17:18, 22-31.
7 Antap long olgeta samting ya, fasin blong soem lav mo blong no tingbaot yumi wan bambae i givhan long yumi blong storian gud wetem ol man. Olsem Jisas, yumi mas sore long ol man we oli “trabol tumas, oli no moa gat paoa, oli olsem ol sipsip we i no gat man blong lukaot long olgeta.” (Mat. 9:36) Samting ya i pusum yumi blong karem gud nius i go long olgeta mo blong givhan long olgeta blong stat wokbaot long rod blong kasem laef. Mesej we yumi karem, hem i wan mesej blong lav, taswe yumi mas talemaot mesej ya long wan fasin we i soem lav. Taem yumi mekem olsem, yumi folem fasin blong Jeova God mo Jisas Kraes, we tufala i gat nambawan fasin blong storian.