Wan Kwestin
◼ ?Wanem “gudgudfala fasin” we aposol Pol i no save mekem, olsem we hem i talem long Rom 7:19?
Pol i stap tokbaot we hem i no save mekem olgeta gudgudfala fasin we i stap long Loa blong Moses. Pol i no naf blong mekem olsem, mo olgeta narafala man tu olsem yumi, yumi no naf. From we yumi no stret gud olgeta, yumi sinman nomo. Be i no nid blong harem nogud from. Ded blong Kraes i openem wan rod blong God i fogivim yumi mo yumi kam stret man long fes blong God.
Rom 7:19 i talem olsem, se: “Nao oltaem mi no mekem ol gudgudfala fasin ya we mi wantem mekem, be mi stap mekem ol rabis fasin ya, we mi no wantem mekem nating.” Ol narafala vas oli soemaot se Pol i stap tingbaot ol “gudgudfala fasin” we i stap long Loa. Long vas 7 hem i talem se: “?Ale, bambae yumi save tokbaot Loa ya olsem wanem? ?Yumi save talem se hem i samting blong mekem sin? !No gat! Hem nomo i mekem mi mi save wanem fasin i nogud. Sipos i no gat Loa we i talem se ‘Bambae yu no wantem ol samting blong narafala man,’ bambae mi mi no save we i nogud we mi stap wantem ol samting olsem.” Taswe Loa i makem i klia se olgeta man oli sinman, from we oli no save folem olgeta loa ya.
Pol i gohed blong talem se: “Fastaem, taem we Loa i no kamtru long mi yet, mi mi stap laef gud.” ?Wetaem ya? Hemia long taem blong Ebraham, bifo we Jeova i givim Loa. Long taem ya, Pol i no bon yet, i olsem we hem i stap yet long bodi blong Ebraham, bubu blong hem. (Rom 7:9; lukluk Hibrus 7:9, 10.) Ebraham i sinman. Be long taem ya, Loa ya i no kamaot yet wetem olgeta rul blong hem. Taswe sipos hem i no folem sam gudfala rul blong Loa ya, be hem i no save. Nao hem i no save se hem i stap mekem sin. Biaen, taem Loa ya i kamaot, hem i soemaot klia ol sin blong ol man. ?Olsem wanem, i minim se Loa ya i karem nogud frut? No gat. Pol i gohed, i se: “Loa ya, hem i wan tabu samting we God i putum, mo ol tok blong hem i tabu, i stret mo i gud nomo.”—Rom 7:12.
Makem gud se Pol i tokbaot Loa ya se i “tabu” mo i “gud.” Long ol vas we i kamaot biaen, hem i eksplenem se “samting ya we i gud” hemia Loa ya. Be Loa ya i soemaot klia we Pol i wan sinman, mo hem i mas kasem ded from. Taswe Pol i raetem se: “Nao oltaem mi no mekem ol gudgudfala fasin ya we mi wantem mekem, be mi stap mekem ol rabis fasin ya, we mi no wantem mekem nating. Sipos mi stap mekem ol samting we mi no wantem mekem nating, ating i no mi tru, we mi stap mekem ol samting ya. Hemia fasin blong sin ya we i stap oltaem long tingting blong mi, we i stap mekem.”—Rom 7:13-20.
Taswe i klia we long ol vas ya, Pol i no stap tokbaot ol gudgudfala fasin we man i stap mekem long narafala, olsem ol fasin kaen. (Lukluk Ol Wok 9:36; Rom 13:3.) Pol i stap tokbaot ol gudfala fasin we hem i mas mekem blong folem Loa ya blong God—ol fasin we i gud blong mekem mo ol fasin we i nogud blong mekem. Bifo, Pol i stap strong long skul blong ol man Jyu, i bitim ol narafala, from we ‘i no gat man nating we i gat poen long hem.’ Long tingting blong hem, Loa i olsem masta blong hem, be tru, hem i no mekem olgeta samting we i stap long Loa ya. (Filipae 3:4-6) Loa ya i soemaot ol stretfala mak blong God we aposol Pol i no naf blong kasem. Mo Loa ya i soemaot we bodi blong Pol i slef yet long sin mo hem i mas ded from. Taswe Pol i save soemaot tangkyu blong hem from we sakrafaes blong Kraes i mekem se hem i kam wan stret man. Hem i fri from Loa blong sin mo hem i no save kasem ded from.—Rom 7:25.
Ol Kristin tede oli no stap aninit long Loa blong Moses, from we God i nilim finis long pos we Jisas i ded long hem. (Rom 7:4-6; Kokosi 2:14) Nating se i olsem, yumi no mas fogetem Loa ya. From impoten samting se Loa ya i gud. Taswe yumi gat risen blong ridim ol buk blong Loa long Baebol blong save wanem ol man Isrel oli mas mekem blong folem Loa ya. Ol Wetnes blong Jeova raon long wol bambae i no longtaem oli save ridim Loa ya, from we evri wik oli stap ridim wan haf blong Baebol.
Taem yumi ridim Loa ya, yumi mas tingtinggud long ol stampa rul we i stap biaen long olgeta loa ya. Mo tu yumi mas luksave olsem wanem ol man blong God bifo oli kasem blesing taem oli stap traehad blong folem ol gudfala loa ya. Yumi sinman, taswe yumi no save folem evri gudfala fasin we yumi lanem long Tok blong God. Be yumi stap faet agens long loa blong sin. Yumi glad taem yumi stap traehad olsem, blong bambae yumi save sef from sakrafaes blong Jisas.