Ripot Long Wok Blong Kingdom

‘Olgeta We Oli Hanggri Long Saed Blong Speret Oli Save Harem Gud’

JISAS i talem se: “Olgeta we oli luksave se oli nidim ol samting long saed blong speret, oli harem gud.” (Matyu 5:3, NW) Ol man olsem oli stap lukaot save we i givim laef, we i stap long Tok blong God, Baebol. Save ya bambae i save lidim ol man blong kasem laef we i no save finis.​—Matyu 4:4; Jon 17:3.

◻ Long Afrika, wan man we i hanggri long saed blong speret i wokbaot fo haoa long kolkol mo long tudak blong kasem buk ya, My Book of Bible Stories. Taem hem i kasem velej we ol Wetnes blong Jeova oli stap prij long hem, hem i faenemaot se buk ya i finis. Oli givimaot evriwan finis. Hem i harem nogud from. Ale hem i stap long velej ya go kasem taem we ol buk ya oli kam bakegen. Hemia tri dei biaen. Nao i harem gud blong kasem buk ya we i fulap long save long saed blong speret.

Ol Wetnes oli stap wan fulmanis long ples ya we i stap longwe lelebet. Mo long manis ya, oli givimaot 55 buk, 365 buklet, mo 145 magasin, mo oli mekem 5 sabskripsen. Olgeta oli harem sore tumas blong livim ples ya taem ol pikinini mo ol bigman oli singaot long olgeta long Kpelle lanwis, se: “!Jeova bambae i stap wetem yufala!” Biaen oli stap traehad blong go bakegen long olgeta we oli intres.

Long sem kantri ya wan woman i hanggri tu long saed blong speret. Hem i stap lukaot long ol mane blong jyos blong hem. Mo tu ol man long eria blong hem oli save gud hem. Taem ol Wetnes oli mitim hem, hem i sore blong talemaot se jyos i no stap mekem ol samting we wan Kristin i mas mekem folem ol rul blong Baebol. Ol Wetnes ya oli yusum Baebol blong hem, mo oli soemaot long hem olsem wanem blong makem trufala skul. Nao, hem i go long tu miting long Haos-Kingdom mo biaen hem i talem se: “Wanem mi luk mo mi harem i pulum mi blong bilif se hemia trutok ya.” Ol miting mo fasin blong ol man we oli stap long ol miting ya i pulum tingting blong hem. Nao hem i luksave se ol Wetnes ya we oli bin toktok long hem, oli stap talemaot samting we i tru. I no wan drim. Stat long taem ya, hem i no moa wantem stap long skul blong hem. Samting ya i mekem wan gudfala wetnes long velej ya.

◻ Wan yangfala man blong Nyukaledoni, we i tija long jyos i hanggri long saed blong speret. Hem i faenem buk ya Trutok Blong Soemaot Rod Blong Itenel Laef long tebel blong mama blong hem, mo i ridim japta 2 mo 3 blong buk ya. Ol vas blong Baebol hemia, Eksodas 20:​4, 5 mo Jon 4:​23, 24 we i stap insaed long buk ya oli tajem hat blong hem. From samting ya hem i go askem pris blong hem from wanem Katolik Jyos i yusum ol pija long wosip. Be pris ya i no wantem givim stret ansa long ol kwestin ya. Yangfala man ya i go long narafala skul, be hem i no kasem gudfala ansa long kwestin blong hem. Ale hem i tingting blong go long miting blong ol Wetnes blong Jeova wetem mama blong hem. Mama blong hem i soemaot intres long trutok finis. Lav we i stap long medel blong ol Wetnes mo Baebol tijing blong olgeta i pulum tingting blong yangfala ya.

From we hem i stap longwe tumas, oltaem hem i stap stopem ol trak blong tekem hem i go long ol miting. I no longtaem biaen, hem i stanap strong from trutok mo i tekem baptaes. Naoia hem i wan man blong givhan. Mama blong hem mo tu narafala sista blong hem oli kam Wetnes blong Jeova. Yangfala man ya i prij long ol man ples blong hem mo hem i statem plante Baebol stadi wetem olgeta. Mo naoia plante oli stap kam long ol miting long eria blong hem​—samting ya i kamaot from wan yang man i luk wan buk long tebel we i eksplenem Baebol, hem i stadi long hem mo i tingting dip long ol samting we hem i lanem.

Jeova i gat wan bigfala program blong givim kakae long saed blong speret tede, mo plante man oli kasem blesing from. Aesea i talemaot profet tok long samting ya, i se: “!Luk! Ol man blong mi bambae oli kakae, be yufala [memba blong ol gyaman skul] bambae yufala i hanggri.” (Aesea 65:13) Yumi save harem gud sipos yumi kasem ol kakae long saed blong speret we Jeova i givim, from we bambae yumi no moa save hanggri long saed blong speret.