Trening Blong Gilead Long Tabu Bilif
“OL STUDEN blong mifala oli bin trengud long tabu bilif.” Hemia nao faswan tok long program ya blong klas namba 95 blong Wajtaoa Baebol Skul blong Gilead, we oli holem long Sande, Septemba 12, 1993. Long moning ya, George Gangas i mekem faswan prea blong ol 4,614 brata, sista, mo ol memba blong Betel famle we oli singaot olgeta blong kam hivap long Haos Asembli long Jese Siti. Brata Gangas i wan memba blong Betel famle long 65 yia mo hem i wan memba blong Hed Kampani tu. Taem brata ya i gat 97 yia, hem i olfala i bitim ol narafala memba blong hed kampani.
Albert Schroeder, we i wan memba blong Hed Kampani tu mo jeaman blong program ya, i talem se: “Long faef manis, kos ya blong Gilead i stap stanap long tabu bilif.” ?Be wanem ya “tabu bilif”? Hem i eksplenem se “tabu bilif” ya, we Jud vas 20 i tokbaot, hemia olgeta trutok bilif blong Baebol. Taswe kos blong Gilead skul i stanap long Tok blong Jeova, Baebol, we i stampa buk blong kos ya.
Ol Studen Oli Kasem Moa Tijing
John Stuefloten blong Wajtaoa Fam Komiti i givim faswan tok, we stampa tok blong hem se “Kasem Frut From Fasin Blong Ol Waes Man.” Baebol i talem se olgeta we oli stap ‘wokbaot wetem ol waes man, bambae olgeta tu oli kam waes.’ (Proveb 13:20) Long taem blong Gilead skul, ol studen oli spenem bitim 900 haoa blong stadi long Baebol. Brata Stuefloten i askem ol studen se: “?Olsem wanem fasin blong Jeova i save gat paoa long yufala long fyuja? Bambae yufala i go long 18 kantri we namba blong ol man long olgeta ples ya i kasem 170 milyan. ?Ale olsem wanem bambae yufala i save gat paoa long laef blong olgeta man ya?” Taem ol nyufala misinari ya oli soemaot waes blong Jeova long olgeta fasin blong olgeta, bambae oli save givhan long ol narafala man blong oli kam ol man blong wosip long Jeova, Stampa blong fasin waes we i no gat mak long hem.
Lloyd Barry we i wan memba blong Hed Kampani i givim nekis tok we stampa blong hem se “Yufala i Kam Olgeta Samting Long Olgeta Man.” (1 Korin 9:22, King James Version) Brata Barry i wan studen long namba 11 klas blong Gilead skul 45 yia bifo. Naoia namba 95 klas i gat fasin tangkyu blong kasem gudfala advaes long wan brata we i gat ekspiryens blong plante yia long wan narafala kantri taem hem i wan misinari. Hem i leftemap tingting blong ol studen blong savegud ol kastom mo lanem lanwis blong nyufala ples we oli go long hem blong oli save joen gud wetem ol man long ples ya. Hem i talem se nambawan rod blong mekem samting ya i blong joen mo wok tugeta wetem ol manples mo lanem mo folem ol kastom blong olgeta sipos oli stret.
Biaen, Dean Songer blong Faktri Komiti i tokbaot stampa tok we i pulum intres se “Stap Fri Long Wok.” Afta long bitim 35 yia long fultaem Kristin minista wok, Brata Songer i kasem save long mining blong kasem wan mak long laef, mekem laef i no bisi tumas wetem ol pleplei mo ol wari blong laef we i no gat tumas samting long hem mo tingting dip long wok ya we God i givim, no moa tingbaot tumas long ol samting we bodi i nidim. Mo hemia nao stampa advaes we hem i givim long ol studen. Ol man blong singsing long tempel blong Jeova oli fri long plante wok we ol narafala Livaet oli savegud, blong oli save givim olgeta fulwan blong mekem spesel wok blong olgeta. (1 Kronikel 9:33) Sem mak, ol misinari blong Gilead oli kam fri long ol defren bisnes olsem ol wok blong wol, blong oli save tingting dip wok long spesel wok blong olgeta. Brata Songer i finisim tok ya wetem advaes ya se: “Lukluk oltaem se laef blong yufala i gat mak long hem mo folem wan laef we i no bisi tumas wetem ol pleplei mo ol trabol. Responsabiliti blong yufala olsem olgeta ya we oli bin kam fri long wok, i blong presem Jeova taem yufala i mekem wok blong hem long dei mo long naet.”
Daniel Sydlik we i wan memba blong Hed Kampani i givim nekis tok we stampa blong hem se “Tijim Ol Narafala Olsem Wanem Blong Kasem Nambawan Samting Long Laef.” Hem i leftemap tingting blong ol studen blong “no tijim stampa bilif nomo be blong kam inaf blong soem long ol man wanem oli mas mekem blong jenisim laef blong olgeta blong folem wil blong God.” Ol gudfala tija oli mas pulum man blong tingting mo pusum man blong mekem. Hem i talem se “Yufala i mas tijim ol man blong bildimap ol gudfala Kristin fasin long laef blong olgeta bitim we yufala i tijim ol rul mo ol loa nomo.” hem i gohed blong finisim tok ya se: “Ol gudfala brata, antap olgeta, yufala i mas tijim yufala wanwan mo tijim ol narafala olsem wanem blong laekem tumas ol man, from fasin ya blong laekem tumas ol man, hem i save joenem olgeta samting blong oli kam wan nomo stret.”—1 Korin 13:1-3; Kolosi 3:14.
Afta sam manis we oli kasem trening blong olgeta, lav we ol studen oli gat long tufala brata we oli lidim skul ya i gru moa. Fastaem Jack Redford, wan misinari bifo, i toktok long sabjek ya, “Yu Mekem Stret Disisen.” Long taem blong ol man Jyu, bifo we Pol i kam wan Kristin aposol, hem i bin gat wan haeples, wan gud nem, paoa long man, mo plante mane. Be long Filipae 3:8, Pol i tokbaot ol samting ya “plante rabis,” no “doti nomo” folem translesen blong Phillips. Hat blong hem i stap fulwan long minista wok ya, mo hem i mekem stret disisen. Long defren fasin tede, ol disisen we bighaf blong ol man i mekem long laef blong olgeta i soem se oli tingbaot olting blong olgeta long saed blong bodi olsem we oli sas moa bitim laef blong olwe. Ol misinari blong Gilead oli mekem stret disisen. Jack Redford i finisim wetem tok ya se: “I no gat wan samting we wol blong Devel Setan i save givim long yufala we i sem mak long wok blong misinari. !Lukaotgud long nambawan wok ya, mo letem wol ya i lukaot long ol doti blong hem!”
Long ol 32 yia we oli pas kasem naoia, Brata Ulysses Glass i tij long Gilead skul. Hem i givim sam defren advaes long ol studen wetem stampa tok ya “God Nomo i Save Wokem Wan Tri,” mo tok blong hem i stanap long Ol Sam 1:3. Ol man blong wokem ol nyufala samting tede, oli neva faenem wan rod blong wokem wan tri, we God nao i stampa blong hem. Blong givim wan mining long tok ya, ol trufala Kristin oli olsem ol tri, we Jeova i planem mo i sakem wora long olgeta. Brata Glass i makem se long ol faef manis we oli pas finis, spring wora we i kamaot long Tok blong God i bin sakem oltaem wora we i givim laef long ol studen, olsem ol tri we oli stap long wan garen no paradaes long saed blong speret. Be, olsem ol misinari, oli mas lukaotgud blong no letem wan samting i spolem ol rus long saed blong speret blong olgeta. Hem i givim advaes long olgeta blong ‘gohed blong dring wora ya blong laef we Jeova i givim from we God nomo i save wokem wan tri.’
Carey Barber, wan memba blong Hed Kampani i givim laswan tok. Afta long 70 yia we Brata Barber i spenem long fultaem Kristin minista wok, hem i gat ekspiryens blong givim tok ya “Wosip Long Jeova Nomo.” Bighaf blong ol man raonabaot long wol oli no wosip long Jeova. (Dutronome 5:9) Be, olsem Brata Barber i soemaot, nating we yumi no stretgud olgeta, “yumi save givim yumi fulwan long God.” Hem i gohed se: “I no gat wan man i rili save talem se: ‘Devel Setan nao i pulum mi blong mekem samting ya.’ ” Be Devel Setan i save winim yumi sipos yumi no agensem hem. (Jemes 4:7) Stap bisi long wok blong Jeova i wan nambawan rod blong agensem Setan mo wol blong hem mo blong wosip long Jeova nomo.
Putumap Olsem Ol Misinari
Program blong moning program i finis long taem blong putumap ol 46 studen blong kam olsem ol misinari. Ol 23 hasban mo waef oli kasem ol stefeket, we haf i talem se ol misinari oli “nafgud blong joen long wok blong tij, soem gladhat mo wok blong mekem pis i save stap longtaem mo loa blong oda mo stret fasin we oli save stap longtaem long medel blong ol man.” Bambae klas namba 95 blong Gilead bambae i traehad blong mekem tabu wok ya long ol 18 kantri we oli go wok long olgeta. Ples blong wok blong olgeta i stap long plante kantri long wol, olsem Esia, Afrika, Yurop, Latin Amerika, mo ol aelan blong Karibin.
Long aftenun, afta long wan sot Wajtaoa Stadi we Charles Woody, wan memba blong Sevis Dipatmen Komiti i lidim, ol nyufala misinari blong Gilead oli mekem haf blong olgeta long program ya, wetem stampa tok ya “Gilead i Bin Mekem Rere Yumi Blong Tij Olsem Ol Misinari.” Fulwan program i finis wetem drama ya “Ol Disisen We Oli Stap Fored Long Yumi.”
Afta long program ya we i nambawan tumas, oli rere blong sanem ol misinari ya long ol fo kona blong wol blong serem “tabu bilif wetem ol narafala man.”
[Bokis blong pija long pej 26]
Oli Kaontem Klas
Namba blong ol kantri we oli kamaot long hem: 7
Namba blong ol kantri we bambae oli go wok long olgeta: 18
Namba blong ol studen: 46
Namba blong olgeta we oli mared: 23
Medel namba blong yia we oli gat: 30.06
Medel namba blong ol yia we oli stap long trutok: 12.92
Medel namba blong ol yia we oli stap long fultaem minista wok: 9.4
[Tok blong pija long pej 26]
Olgeta We Oli Kamaot Long Klas Namba 95 Blong Wajtaoa Baebol Skul Blong Gilead
Long ol nem aninit, yumi kaontem ol laen i stat long fored i gobak biaen, mo ol nem oli stat long lef i go long raet long wanwan laen.
(1) Buelow, D.; Donzé, V.; Innes, S.; Fulk, N.; Billingsby, M.; Hoddinott, L.; Nygren, B.; Eriksson, L. (2) Boker, J.; Thomas, M.; Stedman, S.; Billingsby, D.; Waugh, I.; Purves, M.; Luttrell, M. (3) Jacobsen, T.; Boker, J.; Martínez, L.; Nilsson, E.; Purves, P.; Holt, L.; Larsen, M.; Jones, L. (4) Numminen, P.; Numminen, H.; Buelow, M.; Olson, W.; Holt, S.; Donzé, G.; DesJardins, C.; DesJardins, D. (5) Larsen, K.; Martínez, D.; Nygren, P.; Waugh, P.; Jones, D.; Hoddinott, J.; Thomas, G. (6) Innes, B.; Fulk, R.; Eriksson, A.; Nilsson, S.; Stedman, J.; Olson, K.; Jacobsen, F.; Luttrell, J.