Mi Faenem Samting We i Sas Tumas
OLSEM FLORENCE WIDDOWSON I TALEM
Taem naet i stap kam, mitufala i mekem disisen blong go slip kolosap long wan lagun. I no wan stret ples blong tu woman i go slip long hem, be mitufala i ting se wan naet i oraet nomo. Taem mi mi stap bisi blong putumap tenet, Marjorie i stap mekem rere kakae blong mitufala blong sapa.
MI JES finis blong kilim laswan pin blong tenet taem mi luk wan samting i muf kolosap long stampa blong wan blak tri. Mi singaot i go long Marjorie. “?Yu luk stampa blong tri ya i muf?”
Hem i ansa wetem tingting we i hafhaf se, “No.”
Mi singaot i go se, “Si, hem i muf ya. !Givim ketel long mi!”
Mi tekem ketel ya, mi go from lagun wetem akis long solda blong mi. !Taem mi stap stret long saed blong stampa blong tri ya, wan man i kamaot biaen long hem!
Kwiktaem nomo mi askem se, “?I oraet blong dring wora long lagun ya?”
Hem i ansa wetem fasin we i no kaen, i se, “No, i no oraet, be sipos yu wantem wora blong dring, bambae mi givim sam long yu.”
Kwiktaem nomo mi blokem samting we hem i wantem givim, mo mi harem gud we, hem i tanraon mo i wokbaot i go. Mi stap seksek yet, mi hareap i gobak mo mi talemaot long Marjorie samting ya we i bin hapen. Kwiktaem nomo mitufala i tekemaot tenet, fulumap olting, mo mitufala i aot. Biaen oli talemaot long mitufala se man ya i jes kamaot long kalabus.
Nating se long 1937 ol man blong stadi long ol ples blong gol long Ostrelya oli go slip plante taem long ol ples blong gol long bus, mitufala i man blong stadi long ol ples long wan defren fasin. Mitufala i stap lukaot ol man we oli sas long ae blong God.
Laef Long Famle Blong Mi
Wan handred yia bifo, papa blong mi i wan man blong salem sus blong hos long smol velej blong Porepunka long stet blong Viktoria. Mi mi bon long ples ya long 1895, mo mi gruap wetem fo bigfala brata blong mi kolosap long Ovens Reva, long stampa blong Hil ya Bafalo. Oltaem papa mo mama blong mi tufala i go long Yunion Jyos, mo mi go long Sande skul, we papa blong mi i stap lidim.
Long 1909, Mama i kasem hat atak long taem blong wan strong win mo hem i ded long han blong papa blong mi. Ale, long stat blong 1914, wan long ol brata blong mi i livim haos, mo sam haoa nomo biaen, oli karem hem i kambak long mifala—i ded finis. Hem i kilim hem wan i ded. Tijing ya blong jyos se, hem i mas go long hel, from fasin we man i kilim hem wan i ded i wan sin we God i no save fogivim, i mekem mifala i harem nogud moa.
Samtaem biaen long yia ya Faswan Bigfala Faet Blong Wol i stat, mo oli putum nem blong tufala brata blong mi blong go wok long narafala kantri. Nyus long saed blong rabis fasin blong kilim man mo blong mekem man i harem nogud i mekem se sikis long mifala ol yangfala gel, wetem papa blong mi, mifala i stat stadi long buk blong Jon long Baebol.
Faenem Trufala Sas Samting
Ellen Hudson i gat wan kopi blong buk ya The Time Is at Hand, we Charles Taze Russell i raetem. Fasin blong Ellen blong laekem tumas buk ya i pulum mifala evriwan long grup ya. Taem hem i kasem save se buk ya i wan haf nomo long ol sikis volyum we nem blong olgeta Studies in the Scriptures, hem i sanem wan leta long ‘International Bible Students Association’ long Melbon mo i askem ol narafala haf. Grup blong mifala i agri blong yusum faswan volyum ya, The Divine Plan of the Ages, long stadi blong mifala evri wik.
Tingbaot glad we papa mo mi, mitufala i gat taem mitufala i faenemaot se i no gat helfaea. Mi no moa fraet se brata blong mi i go long helfaea. Mifala i lanem trutok ya se ol dedman oli no save wan samting nating, i olsem we oli slip nomo, mo oli no stap harem nogud samples. (Eklesiastis 9:5, 10; Jon 11:11-14) Samfala long Baebol stadi blong mifala oli mekem disisen blong go long ol man raonabaot long mifala blong talemaot ol trutok we mifala i stap lanem. Mifala i wokbaot i go long ol haos we oli stap kolosap, be mifala i yusum baskel mo wan kat we i gat tu wil we hos i pulum blong kasem ol man afsaed long taon.
Long Amistik Dei, long Novemba 11, 1918, mi kasem faswan traem long wok blong prij long ol haos wanwan. Mifala tri long grup stadi blong mifala i wokbaot 80 kilomita blong seremaot traket ya Peoples Pulpit long taon blong Wangarata. Sam yia biaen, taem oli sanem mi blong go prij long ol ples long bus, mi kasem ekspiryens ya we mi tokbaot long stat.
Long 1919, mi go long wan asembli blong ol Baebol Studen long Melbon. Long ples ya, long Epril 22, 1919, mi soemaot se mi givim laef blong mi long Jeova taem mi tekem baptaes long wora. Lafet ya long saed blong speret i mekem se mi gat moa fasin tangkyu long ol sas samting long saed blong Kingdom blong heven mo ogenaesesen blong Jeova long wol ya.—Matyu 13:44.
Mi no gobak long haos afta long asembli ya be mi agri taem oli askem mi blong prij wan manis wetem Jane Nicholson, wan woman we i wok fultaem long wok blong prij. Mitufala i mas prij long ol grup blong man we oli stap mekem garen mo oli stap fidim buluk long saed blong King Reva. Sam yia nomo bifo, ples ya we i gat plante hil i kam ples we oli yusum blong wokem film ya The Man From Snowy River.
Long yia 1921 mifala i kasem The Harp of God, wan nambawan tul we i mekem i moa isi long mifala blong stadi Baebol. Taem Papa i stat blong yusum buk ya long Sande skul, plante papa mo mama oli no glad mo oli askem hem blong risaen. Ale kwiktaem nomo hem i risaen. Biaen mifala i kasem buklet ya Hell, wetem ol nambawan kwestin long skin blong hem, se “?Wanem ya Hel? ?Hu i Stap Long Ples ya? ?Oli Save Kamaot?” Papa i glad tumas from ol klia pruf blong Baebol long poen ya we i mekem se i no longtaem hem i stat blong seremaot buklet ya long ol haos wanwan. Hem i seremaot plante handred buklet ya long velej blong mifala mo ol ples we oli no stap longwe tumas long mifala.
Ol Trep We Mi Prij Wetem Papa
Biaen, Papa i pem wan trak blong karem mesej blong Kingdom i go long ol man long ol narafala ples. Olsem wan man blong salem sus blong hos, hem i laekem moa blong ron long ol hos, from samting ya mi mi kam woman blong draevem trak. Long stat, mitufala i slip long ol hotel. I no longtaem mitufala i luk se samting ya i sas tumas, mo mitufala i stat blong slip long haos tapolen.
Papa i wokem jea blong fored blong trak long wan fasin we i save lei i go flat blong mi save slip long trak. Mo mitufala i stanemap wan smol tenet blong Papa i save slip insaed. Afta we mitufala i mekem olsem blong sam wik, mitufala i gobak long Porepunka, blong Papa i save openem stoa blong hem blong salem sus blong hos bakegen. Oltaem i gat plante man we oli kam blong pem sus blong hos blong mekem se i gat i naf mane blong nekis trep blong mitufala blong prij.
Plante man we oli agri long ol samting we mitufala i stap talem oli akseptem visit blong mitufala mo biaen oli akseptem Baebol stadi long haos blong olgeta. Naoia i gat seven kongregesen wetem prapa Haos Kingdom blong olgeta long ples we bifo smol grup blong mifala long Porepunka i prij long hem. Yes, ?hu man i save daonem “dei blong ol smosmol samting”?—Sekaraea 4:10.
Long yia 1931, Papa wetem mi, mitufala i ron long trak kolosap 300 kilomita long ol rod we oli nogud blong go long wan spesel miting, we long taem ya mifala i kasem nyufala nem ya, “Ol Wetnes blong Jeova.” Mitufala i glad tumas long spesel nem ya we i stanap long Baebol. (Aesea 43:10-12) Hem i makemaot mifala i klia moa bitim nem ya “Intenasnal Baebol Studen,” we mifala i bin holem kam kasem taem ya.
Wan dei taem mi stap prij long taon blong Betanga, mi mitim wan minista blong Anglikan Jyos long ples ya. Hem i kros mo i stat blong askem olgeta man blong givim ol buk we mifala i bin givim long olgeta long hem. Biaen hem i bonem ol buk ya long medel blong taon. Frut we i kamaot from rabis wok blong hem i defren olgeta long wanem we hem i stap tingbaot.
Afta we mi talemaot samting ya long branj ofis blong Sosaeti, oli prentem leta we pablik i save ridim we i tok agensem samting we lida ya blong jyos i mekem. Mo tu, oli mekem plan blong sanem plante Wetnes i go long trak blong seremaot leta ya long olgeta ples long distrik ya. Taem Papa wetem mi mitufala i visitim taon ya bakegen, mitufala i seremaot moa buk bitim bifo. !Ol man blong taon ya oli wantem tumas blong save long ol samting we oli stap insaed long buk ya we oli putum “tabu” long olgeta!
Faswan man we i akseptem trutok blong Baebol long not-is Viktoria olsem frut blong wok blong prij blong mitufala hem i Milton Gibb. Bitwin ol visit blong mitufala, hem i stadi gud long olgeta buk blong Sosaeti we mitufala i givim long hem. Wan taem we mitufala i visitim hem bakegen, mitufala i sapraes taem hem i talem se: “Naoia mi mi wan disaepol blong yutufala.”
Nating se mitufala i glad long disisen blong hem, mi eksplenem se: “No, Milton. Yu no save kam wan disaepol blong mi.”
“Sipos i olsem, mi mi wan long ol disaepol blong Rutherford [presiden blong Watch Tower Society long taem ya].”
Bakegen mi talem se: “No, i no wan long ol disaepol blong Rutherford, be mi hop se wan long ol disaepol blong Kraes.”
Milton Gibb i jes wan long plante nambawan sas samting we mi bin spenem plante yia wetem hem. Hem mo tu boe blong hem trifala i Kristin elda, mo ol narafala memba long famle blong hem oli strong long kongregesen.
Mi Kasem Ol Defren Traem
Nating se oli putum tabu long wok blong ol Wetnes blong Jeova long Ostrelya long Janewari 1941, mitufala i gohed blong prij, mitufala yusum Baebol nomo. Ale mi stop long fultaem Kristin minista wok taem oli askem mi blong kambak long haos blong lukaot long papa blong mi we i sik tumas. Biaen, mi tu mi sik mo oli mas katem mi from sik ya. I tekem taem blong mi kam gud bakegen, be mi save trutok ya long promes blong God se: “Bambae mi mi no save livim yu yu stap yu wan. Bambae mi mi no save lego yu samtaem.” (Hibrus 13:5) Wan Kristin sista i leftemap tingting blong mi se: “Florence, tingbaot, neva yu yu stap yu wan. Mo oltaem yu mo Jeova yutufala i mekem wan bigfala namba.”
Ale sik blong gudfala papa blong mi we i stap 13 wik i kasem en blong hem. Long Julae 26, 1946, hem i ded. Hem i bin gat gud taem long ful laef blong hem, mo hem i gat hop blong go long heven. (Filipae 3:14) Kolosap olgeta yia blong yangtaem blong mi, mi bin stap nomo wetem papa, ale taem mi gat 51 yia, mi stap mi wan nomo. Biaen mi faenem fyuja hasban blong mi. Mitufala i mared long yia 1947 mo mitufala i stat blong mekem wok blong paenia tugeta. Be hapi taem ya i no stap longtaem, from we hasban blong mi i kasem trabol long hat blong hem long yia 1953 mo hem i no moa naf blong lukaot long hem wan.
Fasin blong toktok blong hasban blong mi i kam nogud olgeta, mo mekem se kolosap mi no moa save storeyan wetem hem. Hemia wan samting we i mekem i had wok moa blong lukaot long hem. I strong tumas blong kasem save long wanem we hem i stap traehad blong talem. Nating se mitufala i stap long wan ples long bus we i no gat wan kongregesen kolosap, Jeova i no lego mitufala long ol yia ya we mitufala i kasem traem. Oltaem mi kasem ol laswan plan blong ogenaesesen, mo ol kakae long saed blong speret we i stap kamaot oltaem long Wajtaoa mo Wekap! magasin. Long Desemba 29, 1957, gudfala hasban blong mi i ded.
Minista Wok Long Adeled
Mi mi stap mi wan bakegen. ?Bambae mi mekem wanem? ?Bambae oli save akseptem mi bakegen olsem wan fultaem paenia afta we mi bin stop blong kolosap faef yia? Yes oli akseptem, ale mi salem haos blong mi mo mi statem wok blong paenia bakegen long Adeled, bigfala taon blong Saot Ostrelya. Long taem ya oli nidim paenia long ples ya, mo oli sanem mi blong go wok long Prospek Kongregesen.
From we mi fraet blong draev long ol rod long taon, mi salem trak blong mi mo mi stat blong yusum baskel bakegen. Mi yusum baskel gogo kasem taem we mi gat 86 yia. Ol man long ples ya oli stap kolem mi se “smol woman long blu baskel.” Long taem ya mi fraet moa blong ron long rod; i luk olsem se wil long fored blong baskel blong mi i seksek. Samting we i mekem se mi stop blong ron long baskel i kamaot long wan aftenun taem mi foldaon i go long wan fenis. Mi talem long mi wan se, ‘Hemia laswan taem ya,’ ale mi stat bakegen blong wokbaot nomo.
Sam yia bifo, taem mi stap go long wan distrik asembli, tufala leg blong mi i no moa wok gud, mo biaen oli katem joen blong tufala leg blong mi. Mi stap wok gud afta we oli katem leg blong mi gogo kasem taem we wan bigfala dog i kakae mi. Samting ya i mekem se oli mas tekem moa taem blong lukaot long mi, mo stat long taem ya mi mas yusum wan stik blong givhan long mi blong wokbaot. Tingting blong mi i strong lelebet yet. Olsem wan fren i talem se: “I luk olsem se bodi blong yu we i stap soa i no save stap wetem yangfala tingting blong yu.”
Long ol yia we oli pas, mi bin luk ol kongregesen long Adeled oli stap gru, oli joenem olgeta, mo oli seraotem. Biaen, long yia 1983, taem mi gat 88 yia, mi aot long Adeled blong go stap wetem wan famle long Kyabram long stet blong Viktoria, long ples ya we mi bin spenem ten hapi yia long hem. Mi gat jans yet blong go aot long wok blong prij; ol fren long kongregesen oli karem mi long trak blong olgeta blong go visitim ol man we oltaem mi stap givim magasin long olgeta. Wetem kaen fasin, ol man ya oli kam long trak blong mi save toktok wetem olgeta.
Tingtingbak long bitim 98 yia blong mi, mi tingbaot plante brata sista we oli stanap strong mo wok strong wetem mi blong presem Jeova, antap moa gudfala papa blong mi. Mi mi stap plante moa yia bitim ol fren blong mi we oli wok strong wetem mi long wok blong paenia. !Be mi stap wet blong harem gud blong joen wetem olgeta we oli gat hop blong kasem praes blong laef long Kingdom blong God long heven, i rili wan sas samting we praes blong hem i antap tumas!
[Tok blong pija long pej 28]
Mi mi baptaes long Epril 22, 1919
[Tok blong pija long pej 31]
Mi glad yet blong mekem wok blong Jeova taem kolosap mi kasem 100 yia