?Yu Yu Tingbaot?

?Yu glad blong ridim ol Wajtaoa we oli jes kamaot? Sipos i olsem, bambae yu faenem se i gud tumas blong tingtingbak long ol samting ya:

▫ ?From wanem tufala spae blong Isrel oli jusum blong stap long haos blong woman blong rod ya, Rehab?

Tufala man Isrel we tufala i spae, tufala i folem Loa blong God, taswe tufala i no stap long haos blong Rehab blong mekem rabis fasin. Maet oli stap long haos ya from we i no save gat tumas toktok sipos oli go long haos blong wan woman blong rod. Ples we haos ya i stap long hem antap long stonwol blong taon, maet i isi tu blong tufala i ronwe. Be bigfala samting se Jeova i lidim tufala long wan woman we i mekem sin, we ol ripot long saed blong wok blong God long ol man Isrel i gat paoa long hat blong hem, nao samting ya i pulum woman ya blong tanem tingting blong hem mo jenisim fasin blong hem.​—12/15, pej 24-25.

▫ ?Fasin kros i save mekem wanem long helt blong yumi?

Ol stadi oli soemaot se fasin kros i mekem bodi blong man i wokem ol homona we oli mekem man i harem nogud. Fasin ya blong faerap oltaem long kros i save mekem se gris long blad (kolesterol) we i gud mo gris long blad we i nogud, tufala i no skelgud, ale samting ya i save mekem sik long saed blong hat i kamaot.​—12/15, pej 32.

▫ ?Wanem ol advaes we bambae oli givhan long yumi blong seremaot moa Wajtaoa mo Wekap! magasin?

Rere oltaem blong seremaot Wajtaoa mo Wekap!; yu no mas talem tumas samting; mekemrere sam sotfala toktok, blong yu save jenisim toktok blong yu; yumi wanwan i putum wan mak blong kasem long saed blong namba blong ol magasin we bambae yumi seremaot.​—1/1, pej 24-25.

▫ ?From wanem Moses i wan nambawan eksampel blong yumi long saed blong folem tiokratik fasin?

Moses i bin lukaot Jeova blong i lidim hem long ol samting. Hem i no gat tingting blong kasem samting blong hem wan be hem i tingbaot moa bigfala paoa blong Jeova. Hem i gat strong bilif, mo hem i neva fogetem se Jeova i trufala Man blong rul long nesen blong Isrel.​—1/15, pej 11.

▫ ?Wanem samfala rod we tijing blong God i win long olgeta?

Tijing blong God i win taem hem i gohed blong givim sloslou long olgeta man blong Jeova moa save long trutok. I karem ol man i go long laet long saed blong speret, mo i soemaot long olgeta we oli gat tingting daon olsem wanem blong wosip long God “long speret mo trutok.” (Jon 4:​24, NW) Tijing blong God i winim tu ol traem mo rabis wol ya.​—2/1, pej 10-12.

▫ ?Wanem bigfala samting we i mekem fasin blong givim advaes i karem frut?

Bigfala samting ya i fasin blong soem respek long ol man we yumi givim advaes long olgeta mo raet blong olgeta blong kasem respek long yumi. From samting ya, toktok blong wan Kristin we i givim advaes i mas kaen mo stanap long ol stret rul be i mas givim ona long man we i kasem.​—2/1, pej 28.

▫ ?Olsem wanem Katolik Jyos i akseptem Asamsen blong Meri olsem wan tijing?

Long ol handred yia afta long ded blong Jisas, tingting ya blong Meri i go antap long heven i no stap nating long tingting blong ol Kristin. Be, afta we Triniti i kam wan tijing blong jyos, sloslou Meri i kam moa impoten. Oli no akseptem tingting ya blong Asamsen olsem wan tijing gogo kasem Novemba 1, 1950, nao oli jes akseptem taem Pop Pius 12 i talemaot se: “Mifala i eksplenem Asamsen se hem i wan tijing we God i soemaot.”​—Munificentissimus Deus.​—2/15, pej 26-27.

▫ Long Jeremaea japta 24, ?tufala basket blong ol fig, ol gudfala fig mo olgeta we oli nogud, oli minim wanem?

Ol gudfala fig, hemia ol man Jyu we fastaem oli go kalabus long Babilon, we smol haf blong olgeta oli kambak long Juda biaen. Ol nogud fig, hemia King Sedekaea mo olgeta we oli joen wetem hem we oli agensem King Nebukadnesa nating se oli bin mekem wan promes long nem blong God. Sem mak long taem blong yumi, i gat smol haf blong Isrel long saed blong speret i stap, we oli stap karem ol gudfala frut long laef blong olgeta, mo oli defren olgeta long ol lida blong Krisendom, we oli stap karem ol frut we oli nogud.​—3/1, pej 14-16.

▫ ?Hu ya ol Kwotodesiman, mo from wanem ol Kristin tede oli intres long olgeta?

Afta long taem blong ol aposol, i gat sam man we oli mekem Kakae blong Masta long Naesan 14 evri yia, oli folem rod blong ol aposol. Biaen, ol man oli kolem olgeta “ol man blong tingbaot namba fotin dei,” no ol Kwotodesiman. Hemia samting we yumi intres long hem tede, from we i soemaot se afta we ol aposol oli ded, i gat sam man we oli gohed blong folem stret rod blong tingbaot ded blong Jisas wan taem long wan yia long Naesan 14.​—3/15, pej 4-5.

▫ ?Hu ya William Whiston?

Hem i wan man we i gat fasin blong lanem kwik ol samting, we i stadi long Engglan long ol yia biaen long 17 handred, mo hem i wok wetem Masta Isaac Newton. Whiston i transletem Kristin Grik haf blong Baebol, i strong blong agensem tijing blong Triniti, mo i tijim ol man long saed blong fasin blong stadi long ol sta mo ol matematik. Be ating ol man oli save Whiston from ol hanraet blong man Jyu ya Flavius Josephus, we Whiston i tanem i go long Engglis.​—3/15, pej 26-28.

▫ ?Olsem wanem God i mekem man i olsem pija blong hem? (Jenesis 1:27)

God i mekem man i naf blong soemaot ol nambawan fasin blong hem, hemia lav, stretfasin, waes, mo paoa​—wetem ol narafala fasin tu.​—4/1, pej 25.

[Futnot]