Dei We i ‘Hot Olsem Faea’
“!Luk! Dei we i hot olsem faea, i stap kam.”—MALAKAE 4:1.
1. ?Wanem ol kwestin we yumi save askem, we oli joen wetem Malakae 4:1?
LONG ol lasdei ya, ol man we Jeova i jusum blong raetem nem blong olgeta long buk blong hem blong rimemba, oli save glad. ?Be, olsem wanem long olgeta we God i luk se oli no naf blong kasem blesing ya? Nating se oli haeman, no oli man we i no gat nem, ?olsem wanem long olgeta, sipos oli no wantem harem ol man blong talemaot Kingdom blong God mo mesej blong olgeta? Malakae i tokbaot wan dei blong jajmen. Long japta 4, vas 1, yumi ridim se: “‘!Luk! Dei we i hot olsem faea, i stap kam. Mo ol flas man mo olgeta we oli stap mekem ol rabis fasin, oli mas kam olsem gras we i drae finis. Mo dei ya we i stap kam bambae i kakae olgeta,’ Jeova blong ol ami i talem, ‘we bambae i no gat wan rus no branj blong olgeta i stap.’”
2. ?Wanem ol klia tok we Esikel i yusum blong tokbaot jajmen we bambae Jeova i mekem?
2 Sam narafala profet tu, oli yusum bigfala hot blong faea olsem pijatok, blong soem jajmen we bambae Jeova i mekem long ol nesen. !Tok blong Esikel 22:19-22 i stretgud, blong tokbaot jajmen we God bambae i mekem long ol gyaman skul blong Krisendom! Yumi ridim se: “Hemia tok we Hae Masta Jeova i talem, ‘Yufala evriwan i kam olsem bigfala hif blong makas finis. Taswe, bambae mi hivimap yufala i kam wanples . . . Olsem we oli hivimap selva mo kopa mo aean mo led mo tin, blong putum olgeta long wan bigfala faea, ale oli blou long faea blong mekem olgeta oli ronaot olsem wora. Long sem fasin, bambae mi mi hivimap olgeta, mo bambae mi kros, we kros blong mi i hot. Nao bambae mi mi blou, mi mekem yufala i ronaot olsem wora. Mo bambae mi hivimap yufala i kam wanples, nao mi blou long yufala wetem win blong kros blong mi, we i hot olsem faea. Nao bambae yufala i ronaot olsem wora long medel blong hem. Olsem we selva i ronaot long medel blong faea, ale, bambae yufala i ronaot olsem wora long medel blong hem. Nao bambae yufala i save se mi ya, Jeova, mi kafsaedem kros blong mi long yufala.’”
3, 4. (a) ?Ol lida blong skul oli talem wanem, we i soem se oli gat tu fes? (b) ?Ol buk blong histri oli tokbaot wanem nogud fasin blong ol skul?
3 !Tru ya, pijatok ya i rili gat paoa! Ol lida blong skul, we oli no wantem yusum nem blong Jeova, mo oli tok nogud long tabu nem ya tu, oli mas fesem dei ya blong jajmen. Wetem fasin flas, oli talem se olgeta, mo ol man blong politik we oli joen wetem olgeta, bambae oli stanemap Kingdom blong God long wol. Sipos no, bambae oli mekem wol i kam wan gudfala ples, we i naf blong Kingdom i stap long hem.
4 Ol gyaman skul blong Krisendom, oli joen wetem ol politik rula, blong faet long ol faet we oli nogud olgeta. Ol buk blong histri oli tokbaot ol Krused blong Medel Ejes,a Inkwisisin blong Spen we oli fosem plante man blong jenisim skul blong olgeta, Faet blong Tate Yia we i spolem Yurop long ol yia 1600, mo faet we i kamaot bitwin ol man Spen long ol yia 1930, we i blong mekem se Katolik Jyos i stap strong long Spen. Wan taem we moa blad i ron bitim ol narafala taem, hemia long tufala bigfala faet blong wol, long laswan handred yia. Long taem ya, ol Katolik mo ol Protestan oli mekem olbaot, oli kilim i ded eniman, ol memba blong narafala skul wetem ol memba blong skul blong olgeta tu. Kolosap moa long taem blong yumi, i bin gat ol rabis faet, we ol man oli kilkilim olgeta oli ded. Ol faet ya oli kamaot bitwin ol Katolik mo ol Protestan long Aerlan, ol defren grup blong skul long India, mo ol grup blong skul long ples ya we bifo oli kolem Yugoslavia. Ol buk we oli tokbaot histri blong ol skul, oli fulap tu wetem ol store blong plante taosen trufala Wetnes blong Jeova we ol man oli kilim olgeta i ded, from oli holemstrong long God.—Revelesen 6:9, 10.
5. ?Bambae ol gyaman skul oli kasem wanem jajmen?
5 Yumi save luksave se, i stret nomo, we kolosap nao, Jeova i spolem Bigfala Babilon, ogenaesesen blong ol gyaman skul long wol, wetem ol man we oli sapotem hem. Revelesen 18:21, 24 i tokbaot jajmen ya, i se: “Wan strongfala enjel i tekem wan ston we i bigfala tumas, i sakem i go long solwora. Mo i talem se ‘Babilon, yu yu wan bigfala taon. Hemia wan saen blong soemaot fasin we God bambae i mekem long yu. Hem bambae i sakemdaon yu, we bambae man i no save luk yu bakegen samtaem. Yes, oli faenem we blad blong olgeta man we ol man oli kilim olgeta, be i stap long ples ya Babilon.’”
6. (a) ?Hu bambae i kam olsem gras we i drae finis, mo from wanem? (b) ?Ol man we oli fraetgud long Jeova, oli save sua long wanem samting?
6 Biaen, olgeta enemi blong stret fasin, mo ol man we oli folem olgeta, “oli mas kam olsem gras we i drae finis.” Bambae dei blong Jeova i laet long medel blong olgeta, olsem wan bigfala faea. “Bambae hem i no letem wan rus no wan branj blong olgeta i stap.” Long dei ya blong jajmen, bambae Jeova i jajem ol smol pikinini, no ol branj, long fasin we i stret. Bambae Hem i jajem olgeta from ol rus blong olgeta, hemia papa mama blong olgeta, we wok blong olgeta i blong lukaot long ol pikinini ya. Ol papa mama we oli stap mekem ol nogud fasin, bambae oli no moa gat pikinini we oli save mekem ol rabis fasin blong olgeta oli go moa. Be olgeta we oli soem bilif long ol promes blong Kingdom blong God, bambae oli stap stanap strong. From samting ya, Hibrus 12:28, 29 i givim advaes ya se: ‘I gud yumi gohed blong soemaot gladhat. From samting ya, yumi save mekem tabu wosip long [God] long fasin we hem i glad long hem, we yumi ona long hem, mo yumi fraet long hem. From we i tru, God blong yumi i olsem wan bigfala faea we i save bonem evri samting gogo oli lus olgeta.’
?Jeova i Wan God Blong Mekem Man i Harem Nogud?
7. ?Olsem wanem lav blong Jeova i joen wetem jajmen blong hem?
7 ?Samting ya i minim se Jeova i wan God blong mekem man i harem nogud, blong givimbak? !No gat! Long 1 Jon 4:8, aposol ya i talem wan stampa trutok, i se: “God i stampa blong fasin ya blong laekem tumas ol man.” Afta, long vas 16, hem i makem poen ya moa, i se: “God, hem i stampa blong fasin blong laekem tumas ol man. Man we i holem fasin ya oltaem, laef blong hem i stap joen long laef blong God, mo laef blong God i stap joen long laef blong hem.” From we Jeova i gat lav long ol man, hem i gat tingting blong tekemaot ol rabis fasin long wol ya. God blong yumi, we i gat lav mo fasin sore, i talem se: “Olsem we mi mi rili laef i stap, mi mi no haremgud taem nogud man i ded. No gat. Be mi mi haremgud taem wan man nogud i tanem baksaed long rabis rod blong hem mo i kambak, blong hem i save stap laef. Yufala i kambak, yufala i kambak, mo yufala i livim ol rabis rod ya blong yufala. ?From wanem yufala i wantem ded?”—Esikel 33:11.
8. ?Olsem wanem Jon i leftemap lav, be tu hem i soem se hem i wan Pikinini blong Tanda?
8 Jon i tokbaot a·gaʹpe, lav ya we i stanap long stret fasin, plante taem moa, bitim tri narafala man blong raetem ol Gospel. Be yet, Mak 3:17 i kolem Jon se ‘Pikinini blong Tanda.’ Tabu speret blong Jeova nao, i pusum Pikinini ya blong Tanda, blong raetemdaon ol mesej blong bigfala trabol long Revelesen, laswan buk blong Baebol, we i tokbaot Jeova olsem God we i jajem man long stret fasin. Buk ya i fulap long ol tok blong jajmen, olsem ‘bigfala ples blong kros blong God, we man i purumpurumbut long frut blong rop ya, blong mekem wora blong hem i kamaot,’ “ol seven besin ya we oli fulap long kros blong God,” mo ‘kros blong God ya we i gat Olgeta Paoa.’—Revelesen 14:19; 16:1; 19:15.
9. ?Wanem tok blong Jisas i makem ol jajmen blong Jeova, mo olsem wanem ol profet tok blong hem oli kamtru?
9 Masta blong yumi, Jisas Kraes, we i “pija blong God ya we yumi no save luk,” hem i no fraet blong talemaot ol jajmen blong Jeova, taem hem i stap long wol. (Kolosi 1:15) Eksampel, i gat seven trabol long buk blong Matyu japta 23, we hem i talemaot klia, agens long ol man blong skul we oli gat tu fes, long taem blong hem. Blong finisim ol tok blong jajem olgeta ya, hem i talem se: “O, Jerusalem, Jerusalem. Yufala i stap kilim ol profet oli ded. Yufala i stap stonem ol man blong karem tok blong God oli ded. Plante taem, mi mi wantem putum han blong mi i go raon long yufala evriwan, olsem we faol i pulum ol pikinini blong hem oli kam haed aninit long wing blong hem, be yufala i no glad. Oraet, be yufala i luk. God i gowe long yufala finis, ples blong yufala i emti nomo.” Tate seven yia biaen, ol ami blong Rom, we Jenerol Titus i lidim olgeta, oli mekem jajmen i kamtru. Dei ya i rili wan dei blong mekem ol man oli fraet. Hem i saen blong dei we bambae i mekem ol man oli fraet moa, bitim ol narafala dei long histri blong man—hemia dei blong Jeova, we i no longtaem, bambae i faerap.
“San” i Saenaot
10. ?Olsem wanem “san blong stret fasin” i karem glad long ol man blong God?
10 Jeova i talem se i gat sam man we bambae oli pastru long bigfala dei blong hem. Hem i tokbaot olgeta ya long Malakae 4:2, i se: “Yufala we i fraetgud long nem blong mi, bambae san blong stret fasin i saenaot, wetem meresin long wing blong hem.” San ya blong stret fasin, hem i Jisas hem wan. Long saed blong speret, hem i “laet blong ol man long wol.” (Jon 8:12) ?Olsem wanem hem i saenaot? Hem i girap wetem meresin long wing blong hem—fastaem, meresin long saed blong speret, we tede tu, yumi save kasem. Mo, long nyufala wol we bambae i kam, meresin long saed blong bodi, we i blong ol man long olgeta nesen. (Matyu 4:23; Revelesen 22:1, 2) Olsem pijatok blong Malakae i soem, ol man we oli kamgud bakegen, bambae oli “girap, oli skrasem graon wetem leg blong olgeta, olsem ol yangfala buluk we oli fatfatgud,” we man i jes letem olgeta oli gofri long yad blong ol anamol. !Mo tu, tingbaot bigfala glad blong ol dedman we oli girap bakegen, we bambae oli gat hop blong kam stretgud olgeta!
11, 12. (a) ?Wanem fyuja blong ol man nogud? (b) ?Olsem wanem ol man blong God oli “purumbut long ol man nogud”?
11 ?Be, olsem wanem long ol man nogud? Long Malakae 4:3, yumi ridim se: “‘Bambae yufala i purumbut long ol man nogud. From we, long dei ya we mi mi mekem wok blong mi, bambae oli kam olsem ases aninit long leg blong yufala,’ hemia tok blong Jeova blong ol ami.” God blong yumi, we i Man blong Faet, bambae i klinim wol ya, i tekemaot ol enemi we oli wantem rul strong antap long ol narafala, mo bambae i spolemgud olgeta. Long semtaem, bambae hem i lukaotgud long ol man we oli laekem hem. Setan mo ol rabis enjel blong hem, bambae oli no moa gat paoa blong mekem trabol.—Ol Sam 145:20; Revelesen 20:1-3.
12 Ol man blong God oli no joen long wok ya blong spolem ol man nogud. ?Be, olsem wanem bambae oli “purumbut long ol man nogud”? Taem oli joen blong selebretem taem ya we Jeova i win olgeta, i olsem we oli purumbut long ol man nogud. Eksodas 15:1-21 i tokbaot wan selebresen olsem. Oli mekem selebresen ya afta we Fero mo ol ami blong hem, oli lus long Red Si. Folem profet tok blong Aesea 25:3-9, afta we ol man we oli wantem ‘rul strong antap long ol narafala’ oli lus, bambae i gat wan bigfala kakae blong makem se God i win. Kakae ya i joen wetem promes blong God, se: “Bambae hem i finisim ded blong olwe, mo Hae Masta Jeova bambae i ravemaot wora blong ae long fes blong olgeta man. Mo bambae hem i tekemaot sem blong ol man blong hem long olgeta ples long wol. From we Jeova hem wan i talem olsem. Mo long dei ya, bambae man i talem se: ‘!Yu luk! Hemia God blong yumi. . . . Hemia Jeova. Yumi bin putum hop blong yumi long hem. Naoia yumi glad mo haremgud long fasin blong hem blong sevem yumi.’” Ol man ya oli glad, i no from we oli gat fasin blong givimbak, no from we oli glad taem man i ded. Be, oli haremgud tumas, from oli luk we Jeova i mekem nem blong hem i tabu, mo wol i klin. Nao, ol man we oli joengud tugeta, oli save stap long hem long pis.
Wan Bigfala Program Blong Tijim Ol Man
13. ?Wanem wok blong tijim ol man bambae i gohed long “nyufala wol”?
13 Long Malakae 4:4, ol man Jyu oli kasem advaes blong “tingbaot . . . loa blong Moses.” Ale tede, yumi mas folem “loa blong Kraes,” olsem Galesia 6:2 i talem. Yes, ol man we oli pastru long Amageden, bambae oli kasem moa tijing, we i stanap long loa ya. Maet oli raetemdaon ol tijing ya long “ol buk” we Revelesen 20:12 i tokbaot, we bambae oli openem taem ol dedman oli laef bakegen. !Bambae dei ya i gud tumas! !Ol dedman we oli laef bakegen, bambae oli kasem tijing blong folem fasin blong laef we i stret long “nyufala wol”!—Revelesen 21:1.
14, 15. (a) ?Olsem wanem blong luksave Elaeja long taem blong yumi? (b) ?Grup ya we i olsem Elaeja i stap mekem wanem wok?
14 Wok ya blong tijim ol man, bambae i go moa long wok blong tijim ol man we Jeova i tokbaot long Malakae 4:5, se: “!Yufala i luk! Bambae mi sanem long yufala profet ya Elaeja, bifo long bigfala dei blong Jeova we i mekem ol man oli fraet.” ?Hu ya Elaeja long taem blong yumi? Long Matyu 16:27, 28, taem Jisas i stap tokbaot we bambae hem i ‘kam long kingdom blong hem,’ hem i talem se: “Bambae mi, mi Pikinini blong man, mi kam wetem ol enjel blong mi, long bigfala paoa blong Papa blong mi, nao bambae mi mi givim pei long evri man, stret long ol wok we olgeta oli mekem.” Sikis dei biaen, taem hem i stap antap long wan bigfala hil, wetem Pita, Jemes, mo Jon, “bodi blong Jisas i jenis, i kam narafala. Fes blong hem i saen olsem san, mo ol klos blong hem oli kam waet olsem laet blong san.” ?Oli luk hamas man long vison ya? ?Oli luk Jisas nomo? No gat. “Oli luk we Moses mo Elaeja, tufala i kamtru, tufala i stap store wetem Jisas.”—Matyu 17:2, 3.
15 ?Samting ya i minim wanem? Hem i poen i go long Jisas, we ol profet tok oli soem se hem i Bigfala Moses, taem hem i kam blong jajem ol man. (Dutronome 18:18, 19; Ol Wok 3:19-23) Long taem ya, bambae hem i joen wetem Elaeja long taem blong yumi, blong mekem wan impoten wok. Hemia wok blong talemaot gud nyus blong Kingdom long olgeta ples long wol, bifo we bigfala dei blong Jeova, we i mekem ol man oli fraet, i faerap. Blong tokbaot wok blong “Elaeja” ya, Malakae 4:6 i talem se: ‘Hem i mas tanem hat blong ol papa i gobak long pikinini boe blong olgeta. Mo hem i mas tanem hat blong ol pikinini boe oli gobak long papa blong olgeta. Olsem nao, bambae mi mi no kam blong kilim wol ya, blong spolem hem.” Taswe, “Elaeja” i minim grup blong ol tabu Kristin we oli stap long wol ya. Oli olsem slef ya we i stret mo waes, we Masta, Jisas i putumap hem blong lukaot long ol samting blong hem. Wok ya i joen wetem fasin blong givim “kakae” long saed blong speret, we famle blong hem long saed blong bilif, i nidim “long stret taem.”—Matyu 24:45, 46.
16. ?Wok blong grup ya we i olsem Elaeja, i karem wanem frut we i givim glad?
16 Raonabaot long wol tede, yumi save luk nambawan risal blong program ya blong givim kakae long saed blong speret. Naoia oli prentem 16,100,000 kopi blong evri Wajtaoa magasin, long 120 lanwis. Long 97 blong ol lanwis ya, ol magasin oli kamaot long sem taem. Ol magasin ya, oli fulumap wol wetem “gud nyus ya blong kingdom.” (Matyu 24:14, NW) Ol Wetnes blong Jeova, oli yusum ol narafala buk tu long plante defren lanwis, long ol narafala haf blong wok blong olgeta blong tijim ol man mo blong prij. Grup ya we i olsem Elaeja, slef ya we i stret mo waes, oli lukaotgud blong givim plante kakae long olgeta we “oli luksave se oli nidim ol samting long saed blong speret.” (Matyu 5:3, NW) Mo tu, olgeta we oli akseptem hop ya blong Kingdom mo mekem ol samting we oli laenap wetem hop ya, oli kam insaed long wan nambawan fasin blong joengud long olgeta ples long wol. Fasin joengud ya i stap long medel blong wan bigfala hif blong man, we oli kamaot “long olgeta laen, mo long olgeta kantri, mo long olgeta lanwis.” (Revelesen 7:9) Taem wok ya i kasem fulmak we Jeova i wantem, bambae en i kam, long bigfala dei blong hem we i mekem ol man oli fraet.
17. ?Wetaem dei blong Jeova we i mekem ol man oli fraet, bambae i faerap?
17 ?Wetaem bambae dei ya we i mekem ol man oli fraet, i faerap? Aposol Pol i ansa se: “Yufala i savegud finis we dei blong Jeova i stap kam stret olsem we man blong stil i kam long naet. Taem bambae oli talem [maet long wan spesel fasin] se: ‘!Pis mo seftaem!’ long taem ya nao, bambae trabol i kam blong spolem ol man ya olgeta. Bambae trabol ya i kam long olgeta wantaem nomo, olsem woman we i gat bel, taem hem i harem nogud blong bonem pikinini. Mo olgeta bambae oli no save ronwe nating.”—1 Tesalonaeka 5:2, 3, NW.
18, 19. (a) ?Olsem wanem oli singaot “pis mo seftaem”? (b) ?Wetaem bambae ol man blong Jeova oli spel long ol trabol blong olgeta?
18 ?Hu ya “olgeta” long profet tok ya? Hemia ol lida blong politik, we oli talem se oli save mekem wol ya we i seraot from ol faet mo raf fasin, i kamgud. Oli talem se long rod ya, bambae oli wokem wan nyufala fasin long wol ya, we ol man oli joengud. Ol bigfala plan we oli stanemap, olsem Ligofnesen mo Yunaeted Nesen, oli no mekem samting ya i kamtru. Olsem profet blong Jeova i talem, naoia, oli stap talem “se, ‘!I gat pis! !I gat pis!’ be i no gat pis nating.”—Jeremaea 6:14; 8:11; 14:13-16.
19 Long semtaem, ol man blong Jeova oli stanap strong agens long ol hadtaem mo fasin agens we ol man blong rabis wol ya, we oli no ona long God, oli mekem long olgeta. Be i no longtaem, olsem 2 Tesalonaeka 1:7, 8 i talem, bambae oli spel long ol trabol ya. Hemia taem we, “Jisas, Masta blong yumi, bambae i aot long heven, i kamtru long yumi, wetem ol strostrong enjel blong hem, wetem faea we i laet finis. Hem bambae i kam blong givim panis long olgeta we oli no save ona long God, mo long olgeta we oli no save obei long gud nyus blong Jisas, Masta blong yumi.”
20. (a) ?Sefanaea mo Habakuk, tufala i talem wanem profet tok long saed blong dei ya we i ‘hot olsem faea’? (b) ?Wanem advaes mo tok blong leftemap tingting, we ol profet tok ya oli givim?
20 ?Taem blong samting ya i kolosap? Plante long yumi i bin wet longtaem finis. Be long ol taem we i stap pas, plante man wetem tingting daon we bambae oli laef tru long bigfala trabol long fyuja, oli stap ansa long ol tok we i singaot olgeta, olsem Sefanaea 2:2, 3, i talem se: “Lukaot Jeova . . . Lukaot stret fasin, mo lukaot tingting daon. Maet bambae yufala i haed long dei blong kros blong Jeova.” Mo tu, Sefanaea 3:8 i karem woning ya se: “Tok we Jeova i talem i olsem: ‘From samting ya, yufala i wet long mi go kasem dei ya we bambae mi girap blong go tekem pei blong mi. From we disisen blong mi long saed blong jajmen, se mi mas hivimap ol nesen blong mekem ol kingdom oli kam wanples, blong mi kafsaedem ol strong tok blong mi i godaon long olgeta, yes, olgeta strong kros blong mi. From we strong tingting ya blong mi i olsem faea we bambae i kakae olgeta ples long wol.’” !Yes, en i kolosap! Jeova i save stret dei mo haoa blong en ya. Mo bambae hem i no jenisim program blong hem. Taswe, i gud yumi stanap strong, yumi wet. “From we vison ya bambae i kamtru long stret taem blong hem nomo. Bambae hem i hareap blong kasem en blong hem, mo hem i no save gyaman. Nating sipos hem i tektaem, be yu mas rere. From we bambae hem i kamtru. Hem i no save let.” (Habakuk 2:3) Dei blong Jeova we bambae i mekem man i fraet, i stap kam hareap, i kolosap moa bitim bifo. !Rimemba, dei ya i no save let!
[Futnot]
a Ol yia 500 go kasem 1500.
Ol Kwestin Blong Tingtingbak:
◻ ?Long dei blong Jeova we bambae i mekem ol man oli fraet, olsem wanem long ol rula mo ol man we oli no gat nem?
◻ ?Jeova i wanem kaen God?
◻ ?Wanem kaen tijing we ol man blong God bambae oli kasem?
◻ ?Ol profet blong God oli givim wanem advaes long yumi, from we yumi stap kolosap tumas long en?
[Tok blong pija long pej 21]
Long taem blong Inkwisisin blong Spen, oli fosem plante man blong jenisim skul blong olgeta, blong kam Katolik
[Credit Line]
The Complete Encyclopedia of Illustration, J.G Heck