Wan Nambawan Wok Blong Seremaot Kingdom Nyus
“?FROM Wanem Laef i Fulap Tumas Long Trabol?—?I Save Gat Wan Paradaes We i No Gat Trabol Long Hem?” Hemia nao stampa tok blong Kingdom Nyus N. 34. Smol pepa ya we i gat fo pej long hem mo we i kamaot long 139 lanwis, oli seremaot long olgeta ples blong wol long manis Epril mo Mei las yia. Ol Wetnes long Jamaika oli tokbaot wok blong olgeta blong seremaot pepa ya, oli se: “Hem i rili wan spesel taem blong yia ya.” Ol Wetnes long Beljiom oli tokbaot wok ya se: “Hem i karem bigfala glad long ol brata.” Long Ripablik blong Jek, hemia fastaem we ol Wetnes blong Jeova oli gat jans blong joen long wan wok olsem blong seremaot Kingdom Nyus. Branj ofis long ples ya i mekem ripot ya se: “Wok ya i pulum ol brata mo sista blong wok strong wetem bigfala glad.” Plante ripot long ol narafala kantri tu, oli talemaot ol semkaen filing.
Kingdom Nyus N. 34 i gat wan spesel mesej blong olgeta man we oli harem nogud, mo we oli stap krae from ol bigfala trabol we ol skul oli stampa blong hem. (Esikel 9:4) Hem i leftemap tingting blong olgeta we oli trabol from ‘laef long wol ya we i kam strong tumas,’ mo we oli no naf blong stretem. (2 Timote 3:1) Pepa ya i poen i go long Baebol blong soemaot se bambae ol problem blong laef oli finis i no longtaem. Yumi save sua se wan paradaes we i no moa gat trabol long hem, bambae i kamtru. (Luk 23:43) Plante man we oli ridim Kingdom Nyus oli intres tumas long mesej blong hem. Wan man long Togo i talem long wan Wetnes se: “Olgeta samting we yu talem oli tru nomo, mi no save talem wan tok agens.”
I klia se, wok blong seremaot Kingdom Nyus ya i pulum tingting mo intres blong plante man. Long Denmak, wan Wetnes i livim smol pepa ya wetem wan man long haos blong hem, nao man ya i talem se: “Mi mi jes kambak long Yunaeted Stet. Jes bifo we mi lego longwe, wan man i givim semfala pepa ya long mi. !Naoia mi jes kasem ples ya, mo wantaem nomo, oli givim pepa ya long mi bakegen long lanwis blong Denmak!”
Glad Blong Sapotem Wok Ya
Ol Wetnes blong Jeova raonabaot long wol oli glad blong joen long wok blong seremaot pepa ya. Ostria, El Salvado, Haiti, Hangari, Itali, Nyukaledoni, hemia sam long plante kantri we oli mekem ripot se, long ol manis blong seremaot Kingdom Nyus, namba blong ol pablisa i go antap bitim olgeta taem bifo.
Long Sambia, wan seket elda i trenem smol gel blong hem, Deborah, we i gat tri yia nomo, blong seremaot ol buk long haos blong ol man. Long taem blong seremaot Kingdom Nyus N. 34, Deborah i givim bitim 45 pepa ya long ol man. Mama blong hem i statem sam Baebol stadi wetem samfala we Deborah i bin givim Kingdom Nyus long olgeta.
Long Saot Afrika, wan yangfala i givim pepa ya long fren blong hem long skul we nem blong hem Cashia. Ale, Cashia i ridim mo i talem se: “Samting ya i nambawan tumas—!laef blong olwe long wan paradaes long wol! ?From wanem wan man i no talem samting ya long mi bifo?” Hem i stat blong stadi Baebol. Wan wik biaen, Cashia i kasem wan narafala pepa bakegen we i sem mak long faswan. Wan fren blong hem long Saepras we i wan Katolik, i sanem pepa ya i kam long hem. Fren ya i eksplenem long leta, from wanem ol tijing blong Katolik jyos oli gyaman, mo i talem long Cashia se bambae hem i stadi wetem ol Wetnes blong Jeova. Tru tumas, samting ya i givim strong tingting long Cashia blong gohed wetem stadi blong hem.
Wan smol boe long Swiselan we i gat ten yia, i joen wetem mama blong hem blong seremaot pepa ya. Hem i givim wan pepa long wan yangfala woman mo i leftemap tingting blong hem blong ridimgud. Yangfala woman ya i askem smol boe ya sipos hem i rili bilivim samting we pija i soem long fored blong pepa ya—laef we i no save finis long wol ya. ?Wanem ansa blong boe ya? “O, yes, mi mi sua long samting ya.” Nao woman ya i talemaot se hem i stap traem blong faenem trufala skul, from we skul blong hem i talem tumas samting we oli no laenapgud. Taem oli visitim woman ya bakegen, oli statem wan Baebol stadi wetem hem.
Tekem Aksin Kwiktaem
Samtaem Kingdom Nyus i pusum man we i ridim blong tekem aksin kwiktaem. Wan smol gel long Beljiom we i gat 11 yia, i ridim pepa ya. Nao hem i talemaot long wan Wetnes blong Jeova se hem i bin stilim sam samting long stoa. Mama blong gel ya i wantem traem haedem samting ya. Be tingting blong yangfala gel ya i wok from samting we hem i ridim, mo hem i wantem tumas blong go luk man we i bos long stoa ya. Biaen, mama i agri blong letem gel blong hem i gobak long stoa ya wetem Wetnes we i prij long hem. Bos blong stoa ya i sapraes from samting we smol gel ya i talemaot long hem. Taem hem i faenemaot se Kingdom Nyus nao i pulum smol gel ya blong kam luk hem, hem i karem wan blong hem, blong luk wanem nao mesej ya we i gat bigfala paoa olsem. Naoia smol gel ya i stap gohed gud long Baebol stadi blong hem.
Wan Wetnes long Kamerun i givim wan Kingdom Nyus long wan man. Wetnes ya i talem se: “Taem mifala i kambak bakegen, mifala i luk se man ya i bin putum laen aninit long plante tok long pepa ya, mo hem i wantem askem sam kwestin. Afta we hem i kasem ansa long ol kwestin ya, hem i talem se: ‘I tru tumas se ol skul oli bin givhan bigwan blong mekem ol man oli harem nogud. Pepa ya blong yufala i halpem mi blong kasem save long plante samting, be mi wantem save moa.’” Naoia man ya i stap mekem Baebol stadi evri wik.
Long Urugwae, wan Wetnes we i stap visitim ol haos wanwan, i givim wan pepa long wan man. Wetnes ya i gohed long wok blong prij long ol haos wanwan. Hem i raonem eria ya gogo i kasem haos blong man ya bakegen. Hem i sapraes blong luk se man ya i stap wet long hem, wetem pepa ya long han blong hem. Man ya i ridim finis mo i wantem save moa. Wetnes i statem wan stadi wetem hem wantaem nomo.
Olgeta Man Oli Givhan Blong Seremaot Pepa Ya
Long Japan, wan yangfala Wetnes i kam kolosap long wan man we i gat bitim 50 yia, mo i soem pepa ya long hem. Man ya i askem se: “?Bambae yu yu mekem wanem sipos yu mitim wan man we i blaen?” Wetnes ya i talem stret se hem i no save wanem bambae hem i mekem. Man ya i talem long hem blong wet smoltaem. Hem i gobak insaed long haos blong hem. Hem i kambak wetem wan Kingdom Nyus mo i talem se: “Mi mi kasem wan pepa olsem finis. Mi ting se ol tok blong hem oli gud tumas mo oli impoten tumas. Taswe, mi tanem i go long fasin we ol blaenman oli save ridim wetem han blong olgeta. Plis yusum hemia blong ol man we oli blaen.” Man ya i spenem plante haoa blong tanem Kingdom Nyus i go long fasin we ol blaenman oli save ridim, blong olgeta tu, oli no mestem ol nambawan tok we i stap insaed long hem.
Long Slovakia, wan man i laekem pepa ya tumas, nao hem i mekem 20 kopi blong hem, mo i givimaot olgeta kopi ya we oli blak mo waet nomo, long ol narafala man. Wan pablisa long Swiselan i givim wan Kingdom Nyus long wan famle, mo i gohed blong prij long ol narafala haos antap long store haos we famle ya i stap long hem. Taem hem i kamdaon bakegen, hem i mitim wan yangfala boe we i blong famle ya, yangfala ya i askem 19 moa pepa. Long skul blong boe ya, tija i bin askem ol studen blong raetem wan store long saed blong ol problem, mo ol rod blong traem winim olgeta. Hem i wantem givim wan Kingdom Nyus long evri fren blong hem long skul.
Oli No Mestem Wan Man
Olgeta we oli joen long wok ya oli traehad blong no mestem wan man. Long Nyukaledoni, tu Wetnes i go long wan velej longwe long bus blong seremaot Kingdom Nyus. Taem tufala i stap go, tufala i faenem wan smol rod we i luk olsem se i no gat man i stap yusum oltaem. Ale tufala i folem rod ya blong luk sipos i gat sam man oli stap long en blong hem. Tufala i lego trak blong tufala, mo tufala i wokbaot folem rod ya, krosem sam smosmol reva gogo oli kasem wan haos. Wan man wetem woman blong hem we oli neva mitim ol Wetnes blong Jeova oli stap long haos ya, mo oli karem wan Kingdom Nyus. Biaen, tufala pablisa ya i gobak blong visitim tufala. Tufala pablisa i sapraes blong luk se man mo woman ya i bin wokemgud rod mo sam smol brij, blong mekem se ol Wetnes oli save kam kasem ples blong tufala wetem trak. Oli statem wan Baebol stadi wetem tufala ya.
Long Polan, wan Wetnes i mas pas kolosap long wan ples we sam man oli stap bildim wan haos, blong givim wan Kingdom Nyus long man we i stap long haos long narasaed. Ol wokman oli lukluk Wetnes ya taem hem i kamaot long haos, mo i pas bakegen long fored blong olgeta. Nao, wan wokman i singaot long hem, i talem se hem i no mas fogetem olgeta. Taem Wetnes i kam kolosap long olgeta, oli stopem wok blong olgeta, mo oli lesingud long ol tok we hem i talem long saed blong pepa ya. Oli karem Kingdom Nyus wetem sam magasin tu, mo biaen, taem Wetnes ya i visitim olgeta bakegen, oli karem sam buk.
I gat plante handred milyan Kingdom Nyus N. 34 we oli goaot long ol man long plante lanwis. Mesej blong hem i givhan long plante man finis. Oli lanem se i save gat wan paradaes we i no gat trabol long hem. Yumi prea se ol man we oli gat gudhat bambae oli gohed blong lesin. Mo biaen, oli save stap wetem ol man “we tingting blong olgeta i stap daon,” we bambae oli “tekem graon ya i blong olgeta. Bambae oli haremgud, from we oli stap long pis, mo oli gat plante samting.”—Ol Sam 37:11.
[Bokis blong pija long pej 31]
!Gohed Blong Seremaot Ol Magasin!
Long manis Epril mo Mei 1995, i gat wan nambawan wok i kamaot blong seremaot plante pepa ya Kingdom Nyus N. 34. Long tufala manis ya, oli seremaot bigfala namba blong ol Wajtaoa mo Wekap! tu. Eksampel, wan brata long Ripablik blong Jek, i talem se long manis Epril, hem i seremaot 250 Kingdom Nyus mo 750 Wajtaoa mo Wekap! Long Gwadelup, ol brata oli jusum Sarede, Epril 15, olsem wan spesel dei blong seremaot ol magasin. !Kolosap olgeta pablisa long kantri ya oli joen long wok blong prij long dei ya! Long manis Epril, ol brata long Slovakia oli seremaot wan bigfala namba blong ol Wajtaoa mo Wekap! we i bitim ol taem bifo. Ol semkaen ripot oli kam long plante narafala kantri tu.
Taswe, ?olsem wanem sipos yumi traem mekem wan nambawan wok blong seremaot ol magasin long manis Epril mo Mei blong yia ya 1996? Ol kongregesen oli save makemaot sam spesel dei blong seremaot ol magasin. Sam brata mo sista oli save joen long wok blong haftaem paenia. Long rod ya, mo maet long sam narafala rod bakegen, yumi save leftemap wok ya blong seremaot ol magasin. Mo tu, impoten mesej we i stap long Kingdom Nyus N. 34 bambae i gohed blong kasem olgeta man. Ale, sem mak olsem las yia, Jeova bambae i sua blong blesem hadwok we yumi evriwan i mekem.—2 Timote 4:22.