?Yu Yu Rimemba?

?Yu faenem se ol Wajtaoa we oli jes kamaot i no longtaem oli bin givhan long yu? Ale, traem luk sipos yu save rimemba ansa long ol kwestin ya:

◻ ?Yumi save lanem wanem long store blong ol man Amon we oli lus? (Sefanaea 2:​9, 10)

Jeova i no glad nating taem ol man oli agensem hem afta we hem i soemaot kaen fasin long olgeta. Mo long stret taem blong hem, bambae hem i tekem aksin, olsem we hem i bin mekem bifo. (Skelem wetem Ol Sam 2:​6-​12.)​—12/15, pej 10.

◻ ?Long wanem rod ol Kristin oli gat pis?

Fastaem, oli gat ‘pis wetem God tru long Masta blong olgeta Jisas Kraes.’ (Rom 5:1) Seken samting, oli gat pis wetem ol brata blong olgeta taem oli kasem “waes long heven,” we hem i ‘klingud, mo i karem pis.’ (Jemes 3:​17)​—1/1, pej 11.

◻ ?Tok blong God i sem mak long wanem samting, mo olsem wanem samting ya i save halpem yumi?

Tok blong God i sem mak long melek we i givim ol gudfala samting long bodi, strongfala kakae, wora we i klinim man mo mekem hem i haremgud, wan glas blong lukluk fes, mo wan naef blong faet we i sap. Taem wan man blong talemaot gud nyus i luksave mining blong ol pijatok ya, samting ya bambae i givhan long hem blong yusumgud Baebol.​—1/1, pej 29.

◻ ?Wan edukesen we i skelgud i save halpem yumi blong mekem wanem?

Blong ridgud, raetgud, yusum tingting blong yumi, kasem ol gudfala fasin, mo kasem ol trening we yumi nidim blong mekem ol samting long laef blong yumi evri dei, mo blong mekemgud ol tabu wok blong God.​—2/1, pej 10.

◻ ?Wanem impoten poen long saed blong edukesen we yumi lanem long eksampel blong Jisas?

Yumi no yusum edukesen blong leftemap yumi, be blong presem nambawan Tija ya, Jeova God. (Jon 7:​18)​—2/1, pej 10.

◻ ?Wanem ya Kingdom blong God?

Kingdom i wan gavman we God i putumap long heven. Gavman ya bambae i mekem ol samting we God i wantem oli kamtru, olsem finisim olgeta trabol we oli kamaot from sin mo ded, mo putum stret fasin i stap bakegen long wol ya. (Daniel 2:​44; Revelesen 11:15; 12:10)​—2/1, pej 16.

◻ ?Olsem wanem Baebol i givim edukesen we man i nidim blong finisim raf fasin blong olwe?

Tru long Tok blong Hem, Baebol, Jeova i stap tijim ol man blong laekem pis mo stret fasin. (Aesea 48:17, 18) Tok blong God i gat paoa blong go insaed long man mo kasem hat blong hem, mo jenisim tingting mo fasin blong hem. (Hibrus 4:​12)​—2/15, pej 6.

◻ ?Olsem wanem profet tok blong Aesea japta 35 i save kamtru tri taem?

Profet tok blong Aesea i kamaot fastaem long 537 B.K.T., taem ol man Jyu oli aot long kalabus long Babilon. Hem i stap kamtru long saed blong speret tede, stat long taem we Isrel long saed blong speret i kam fri long Bigfala Babilon. Mo namba tri taem, hemia taem ol tok blong Baebol long saed blong wan prapa paradaes long wol, bambae oli kamtru. (Ol Sam 37:10, 11; Revelesen 21:​4, 5)​—2/15, pej 17.

◻ ?Olsem wanem ol merikel blong Pikinini blong God, Jisas, oli soemaot se God i intres long ol man wanwan?

Jisas ‘i no save mekem wan samting nating long tingting blong hem nomo, be i stap mekem ol samting ya nomo we hem i luk Papa blong hem i stap mekem.’ Taswe, fasin sore blong hem i soemaot klia se Jeova i kaengud mo i sore long ol wanwan man blong hem. (Jon 5:​19)​—3/1, pej 5.

◻ ?Wanem mining blong tok ya blong Jisas, “memori gref,” we hem i yusum long Jon 5:​28, 29 (NW)?

Grik wod ya mne·mei’on (memori gref) we hem i yusum long ples ya, i soemaot se Jeova i rimemba olgeta samting long saed blong wan man we i ded. Hem i rimemba ol samting long laef blong man ya wetem prapa fasin blong hem mo ol tingting blong hem. !Samting ya i pruvumgud se God i kea long olgeta man wanwan!​—3/1, pej 6.

◻ ?Wanem woning long profet tok blong Sefanaea, we i save halpem yumi?

Tede i no taem blong letem bilif we i hafhaf i gru long hat blong yumi. Mo yumi no mas gat tingting ya se dei blong Jeova i longwe yet. Mo tu, yumi mas lukaotgud se fasin ya we yumi no kea long wan samting i no kasem yumi mo daonem yumi. (Sefanaea 1:​12, 13; 3:8)​—3/1, pej 17.

◻ ?From wanem fasin ya blong holemstrong long God i wan traem?

From we fasin ya blong holemstrong long God oltaem i agensem fasin blong tingbaot yumi wan nomo we yumi bin kasem long papa mama blong yumi. (Jenesis 8:​21; Rom 7:​19) Samting we i moa impoten, Setan mo ol rabis enjel blong hem, oli gat strong tingting blong brekem fasin blong yumi blong holemstrong long God. (Efesas 6:​12; 1 Pita 5:8)​—3/15, pej 10.

◻ ?Long wanem fofala rod yumi mas winim ol traem blong holemstrong long God, mo wanem samting i save givhan long yumi blong winim ol traem ya?

Fo rod, hemia blong holemstrong long Jeova, long ogenaesesen blong hem, long kongregesen, mo long hasban no waef blong yumi. Wan samting we i save givhan long yumi blong winim ol traem ya, hemia taem yumi luksave se fasin blong holemstrong long Jeova i joen wetem wok blong leftemap hae rul blong Hem.​—3/15, pej 20.

◻ ?Yumi save lanem wanem long store blong Deved taem hem i traem karem bokis blong kontrak i go long Jerusalem? (2 Samuel 6:​2-7)

Deved i no folem ol oda we Jeova i bin givim long saed blong fasin blong karem Bokis ya, mo from samting ya trabol i kamaot. Yumi lanem se yumi no mas talem se Jeova nao i stampa blong ol problem we yumi kasem taem yumi nomo i no folem ol klia rul blong hem. (Proveb 19:3)​—4/1, pej 28, 29.