Gilead Skul i Sanemaot Namba 100 Klas Blong Hem

WAJTAOA Baebol Skul blong Gilead i givhan bigwan long wok blong talemaot Kingdom blong God long olgeta ples blong wol tede. Long taem we Gilead Skul i stat blong trenem ol misinari long 1943 kam kasem naoia, ol studen blong hem oli bin go wok long bitim 200 kantri. Long Maj 2, 1996, namba 100 klas i pas.

Ol studen oli stap long skul ya long taem we sno i stap foldaon long eria blong Wajtaoa Edukesen Senta long Pateson, Nyu Yok, mo sno ya i dip olsem tu mita. Oli no sapraes we sno i foldaon long dei we oli kasem stefeket blong olgeta. Nating se i olsem, bigfala haos we oli miting long hem i fulap long ol man, mo sam narafala we oli stap long Pateson, Wolkil, mo Bruklin oli lesin tu​—olgeta evriwan i kasem 2,878 man.

Theodore Jaracz, wan memba blong Tijing Komiti blong Hed Kampani, i jeaman blong miting ya. Afta we hem i welkamem olgeta man we oli kam long plante defren kantri, hem i askem evriwan blong stanap blong singim singsing namba 52. Ol strong voes oli fulumap haos miting ya taem oli presem Jeova long singsing ya, “Nem Blong Papa Blong Yumi,” long buk ya Mekem Singsing Long Jeova. Singsing ya, wetem ol tok blong jeaman long saed blong fasin blong yusum edukesen blong presem Jeova, i statemgud program ya.

Advaes Blong Baebol We Ol Olfala Oli Givim

Fashaf blong program ya i gat ol sotfala tok we sam olfala we oli stap longtaem long wok blong Jeova oli mekem. Richard Abrahamson, we i wok long hedkwota mo i statem fultaem wok blong prij long 1940, i talem long klas ya se: “Gohed Blong Stretem Laef Blong Yufala.” Hem i mekem olgeta oli tingbaot se oli bin stretem plante samting finis long Kristin laef blong olgeta, olsem taem oli stap faef manis long skul ya blong Gilead. Taswe, ?from wanem i nidim blong oli gohed blong stretem laef blong olgeta?

Brata we i givim tok ya i eksplenem tok blong aposol Pol long 2 Korin 13:11 se, “hem i minim wan samting we i gohed oltaem. Gohed blong letem Jeova i trenem mo stretem yu, long ol smosmol samting tu, blong mekem se yu folem olgeta rul blong Hem long fasin we i moagud.” Long ol kantri we ol studen blong klas ya oli go wok long hem, bambae oli kasem sam traem long bilif blong olgeta. Bambae oli mas lanem wan nyufala lanwis, lan long wan defren fasin blong laef mo kastom, mo defren kaen teritori blong prij. Mo tu, long misinari haos mo long nyufala kongregesena blong olgeta, bambae oli joen wetem ol man we prapa fasin blong olgeta wanwan i defdefren. Sipos oli traehad blong folem ol rul blong Baebol, mo oli gat tingting blong wantem stretem olgeta moa bakegen, ale, olsem aposol Pol i raetem, bambae oli save “gohed blong stap glad.”

John Barr, wan long ol faefala memba blong Hed Kampani we oli givim tok long miting ya, i tekem stampa tok blong hem i kamaot long 1 Korin 4:9. Hem i mekem ol man we oli lesin oli tingbaot se, ol Kristin oli stap stanap long fes blong olgeta enjel mo olgeta man blong wol tu. Hem i talem se: “Taem yumi save samting ya, i mekem se rod we wan Kristin i jusum long laef blong hem i impoten tumas, antap moa, sipos hem i luksave se ol samting we hem i talem mo mekem, oli save gat bigfala paoa, i no long ol man nomo we oli stap luk hem, be long ol enjel tu. Mi bilif se, hemia wan samting we yufala, ol brata mo sista blong namba 100 klas blong skul blong Gilead, i mas tingbaot oltaem, taem yufala i go long ol kantri blong wol we oli stap farawe.”

Brata Barr i talem long ol 48 studen ya, se taem oli stap halpem ol man we oli olsem sipsip blong lanem trutok, oli mas rimemba se ‘ol enjel oli glad tumas long wan man we i nogud, be i tanem tingting blong hem from sin blong hem.’ (Luk 15:10) Hem i yusum 1 Korin 11:10 blong soem se tingting we yumi gat long saed blong tiokratik oda i gat paoa long ol brata mo sista blong yumi, be tu, long ol enjel we yumi no save luk olgeta. !Bambae i givhan bigwan long yumi sipos yumi no fogetem samting ya!

Wan narafala memba blong Hed Kampani, Gerrit Lösch, we hem tu i wan studen blong Gilead Skul plante yia bifo, i tokbaot sam vas olsem Ol Sam 125:​1, 2, Sekaraea 2:​4, 5, mo Ol Sam 71:21 blong soem se Jeova i stap ‘raon long ol man blong hem.’ Hem i stap blokemgud olgeta long evri saed. ?Be olsem wanem? ?God bambae i lukaotgud long ol man blong hem long taem blong bigfala trabol long fyuja nomo? Brata we i givim tok ya i ansa se: “No gat. Jeova i stap finis olsem wan ‘wol blong faea’ raon long ol man blong hem, blong lukaotgud long olgeta. Long yia 1919, afta long Faswan Bigfala Faet Blong Wol, smol grup blong ol man Isrel long saed blong speret oli wantem tumas blong talemaot gud nyus blong Kingdom long olgeta ples blong wol, blong givim wetnes long olgeta nesen. Oli wok long nem blong ogenaesesen we Baebol i kolem Jerusalem long heven. Jeova i promes se bambae hem i lukaotgud long ol man ya olsem wan grup, long taem blong en. Taswe, ?hu i save stopem wok blong olgeta? I no gat wan man.” !Samting ya i rili mekem olgeta mo ol man we oli joen wetem olgeta blong mekem wil blong God, oli gat strong tingting!

Ulysses Glass, wan long ol tija we i olfala moa, i leftemap tingting blong ol studen blong ‘gohed blong makemaot wan stret ples blong olgeta insaed long ogenaesesen blong Jeova long wol.’ Wan stret ples blong olgeta, hemia i minim wan wok we i stretgud long fasin blong wan man mo samting we hem i naf blong mekem. Hem i talem se: “Yufala we i kam misinari, yufala i faenem stret ples blong yufala finis insaed long ogenaesesen blong ol Wetnes blong Jeova long wol. Be, nating se samting ya i gud tumas, yufala i jes statem laef blong yufala olsem ol misinari.” Bambae oli nidim blong traehad blong yusumgud ol save mo prapa fasin blong olgeta, mo blong mekem laef blong olgeta i joen wetem spesel wok ya we Jeova mo ogenaesesen blong hem oli givim long olgeta.

Brata Wallace Liverance we i wan tija long skul blong Gilead mo we i mekem wok blong misinari blong 17 yia long Bolivia, i mekem laswan tok long miting ya. Hem i askem ol studen se: “?Bambae yufala i traem God?” ?Wanem stret rod blong mekem samting ya? Nesen blong Isrel i traem God long fasin we i no stret. (Dutronome 6:​16) Brata we i givim tok ya i talem se: “I klia se, taem yumi komplen, toktok smol agens, no soemaot se yumi no bilif fulwan long ol rod we God i yusum, hemia yumi stap traem God long fasin we i rong.” Hem i talem long olgeta se: “Taem yufala i kasem nyufala ples we bambae yufala i wok long hem, faet agensem tingting we i save pulum yu blong mekem ol nogud fasin ya.” Oraet, ?wanem ya stret rod blong traem God? Brata Liverance i eksplenem se: “Hemia taem yumi bilif long olgeta samting we hem i talem, mekem evri samting stret olsem hem i talem, mo livim risal i stap long han blong hem nomo.” Olsem yumi luk long Malakae 3:​10, Jeova i singaotem ol man blong hem se: “Plis, yufala i traem mi.” Hem i promes se sipos oli gohed oltaem blong karem wan hif blong ten hif blong ol samting we oli gat i kam long haos prea, bambae hem i blesem olgeta.” Brata ya i talem se: “Ale, i gud we yufala i gat semkaen tingting long saed blong misinari wok blong yufala. Jeova i wantem se yufala i mekemgud wok ya, taswe yufala i mas traem hem. Holemtaet wok ya we yufala i kasem. Jenisim ol fasin we hem i wantem yufala blong jenisim. Stanap strong longtaem. Bambae yufala i luk we hem i blesem yufala.” !Hemia i nambawan advaes long olgeta evriwan we oli stap mekem wok blong Jeova!

Afta long wan singsing, miting i jenis, i no moa gat ol tok, be oli askem kwestin long ol studen.

Ol Rod We Oli Wokgud Long Wok Blong Prij

Mark Noumair, wan nyufala tija blong Gilead skul, i singaotem ol studen blong talemaot sam ekspiryens we oli gat long wok blong prij taem oli stap long skul ya. Ol tok blong olgeta i soemaot se i impoten blong traem yusum ol defren rod blong prij, mo oli givim advaes we i wokgud, we ol man we oli stap lesin oli save yusum tu long wok blong prij.

Long taem we Gilead skul i gohed, ol studen oli kasem spesel blesing blong joen wetem plante memba blong ol Branj Komiti blong 42 kantri. Olgeta ya tu oli stap long Pateson Edukesen Senta blong kasem sam spesel trening. Plante long olgeta ya, oli studen long skul blong Gilead plante yia bifo. Long program ya, oli askem kwestin long sam man we oli bin stap long klas namba 3, 5, 51, mo 92 blong Gilead skul. Sam long olgeta ya, oli bin stap olsem studen blong Gilead skul taem oli mekem sam klas blong hem long Jemani. !Ol tok we oli talemaot, oli rili givhan long ol nyufala misinari!

Oli tokbaot filing blong ol misinari taem oli luk namba blong ol man we oli presem Jeova i kam antap kasem plante taosen man, long ol kantri we oli go wok long olgeta. Oli tokbaot olsem wanem oli bin joen long wok blong karem gud nyus i go long ol man we oli stap olbaot long ol Bigfala Hil blong Andes, mo long ol velej we oli stap long hed blong bigfala Reva ya Amason. Oli storebaot wok blong prij long ol man we oli no save rid mo raet. Oli tokbaot olsem wanem oli bin traehad blong lanem ol nyufala lanwis, mo oli halpem ol nyufala studen blong luksave hamas taem bambae i tekem, bifo we oli nafgud blong prij mo givim tok long miting long ol lanwis olsem Jaenis. Oli mekem sam pleplei tu, blong soemaot olsem wanem oli prij long lanwis blong Spen mo Jaena. Oli makem se wok blong ol misinari i moagud taem oli traem kasem save long tingting blong ol manples, bitim we oli jes lanem lanwis blong olgeta nomo. Oli tokbaot ol pua kantri we i no isi blong laef long olgeta, se: “Ol misinari oli mas luksave se plante taem ol man oli pua from we ol narafala man oli stap spolem olgeta. Wan misinari i mekem wok we i moagud sipos hem i gat sem filing olsem Jisas​—hem i sore long ol man we oli olsem ol sipsip we i no gat man blong lidim olgeta.”

Afta wan singsing, miting ya i gohed wetem wan tok we A. D. Schroeder, wan memba blong Hed Kampani, i mekem. Hem i gat blesing ya blong kam wan long ol faswan tija blong Gilead Skul, long 1943. Blong mekem wan gudfala lastok long program ya, hem i tokbaot: “Presem Jeova Olsem Haefala Masta.” Tok blong Brata Schroeder i stanap long Ol Sam 24. Tok blong hem i pulum tingting mo i gat paoa long ol man we oli stap lesin, taem hem i tokbaot olsem wanem wok blong presem Jeova olsem Haefala Masta, i rili wan nambawan jans we yumi gat.

Afta we oli givimaot ol stefeket, mo mekem laswan singsing, Karl Klein we i memba blong Hed Kampani, i mekem wan prea we i rili kamaot long hat blong hem. !Program ya i nambawan, i givim ol gudfala advaes we i save wokgud, mo i mekem man i haremgud long saed blong speret!

Long ol dei we oli kam biaen long taem ya, sloslou ol 48 memba blong namba 100 klas ya, oli aot blong go long 17 defren kantri olsem ol misinari. Be, hemia i no fastaem we oli mekem wok ya blong prij. Olgeta ya oli gat gudfala ripot finis long saed blong fultaem Kristin wok blong prij. Taem oli kam long Gilead skul, olgeta evriwan oli gat raonabaot 33 yia, mo oli bin mekem fultaem wok blong prij long 12 yia finis. Sam long olgeta oli memba blong wan Betel famle blong Watch Tower Sosaeti long wan ples long wol. Sam narafala oli bin mekem wok olsem ol elda we oli goraon blong visitim ol kongregesen. Sam studen oli prij finis long ol narafala kantri​—olsem Afrika, Yurop, Saot Amerika, ol aelan olbaot long solwora, mo long ol man we oli toktok narafala lanwis long prapa kantri blong olgeta. Be, naoia oli joen wetem plante narafala misinari we olgeta evriwan ya oli glad blong talem se: ‘Bambae mifala i go wok long eni ples long wol we i gat nid.’ Samting we hat blong olgeta i wantem tumas, hemia blong yusum laef blong olgeta blong presem Jeova.

[Futnot]

[Tok Blong Pija Long Pej 27]

Kaontem Klas Ya

Oli kamaot long hamas kantri: 8

Oli go wok long hamas kantri: 17

Hamas studen: 48

Oli gat hamas yia: 33.75

Hamas yia long trutok: 17.31

Hamas yia finis oli prij fultaem: 12.06

[Tok Blong Pija Long Pej 26]

Klas Namba 100 Blong Wajtaoa Baebol Skul Blong Gilead

Long ol nem aninit, yumi kaontem ol laen i stat long fored i gobak biaen, mo ol nem oli stat long lefsaed i go long raetsaed long wanwan laen.

(1) Shirley, M.; Grundström, M.; Genardini, D.; Giaimo, J.; Shood, W.; Phair, P.; Buchanan, C.; Robinson D. (2) Pine, C.; Kraus, B.; Racicot, T.; Hansen, A.; Beets, T.; Berg, J.; Garcia, N.; Fleming, K. (3) Whinery, L.; Whinery, L.; Harps, C.; Giaimo, C.; Berg, T.; Mann, C.; Berrios, V.; Pfeifer, C. (4) Randall, L.; Genardini, S.; Kraus, H.; Fleming, R.; D’Abadie, S.; Shirley, T.; Stevenson, G.; Buchanan, B. (5) Robinson, T.; Garcia, J.; Harps, P.; Racicot, D.; D’Abadie, F.; Phair, M.; Stevenson, G.; Shood, D. (6) Beets, L.; Pfeifer, A.; Berrios, M.; Pine, J.; Mann, L.; Randall, P.; Grundström J.; Hansen, G.