Rod Blong Kasem Laef Ya We i No Save Finis
“Mi nao rod ya, mo mi mi stamba blong trutok, mo mi stamba blong laef.”—JON 14:6.
1, 2. ?Jisas i talem se rod blong go kasem laef we i no save finis i sem mak long wanem samting, mo wanem bigfala poen long pijatok blong hem?
LONG Bigfala Toktok blong Jisas antap long Hil, hem i talem se rod blong kasem laef we i no save finis i olsem wan get we man i mas pastru long hem. Jisas i soem se i no isi blong folem rod ya we i blong go kasem laef. Hem i talem se: “Yufala i mas pas long get ya we i smol nomo blong go insaed. From we get ya we i bigwan, mo rod ya we i isi nomo, hemia i blong go lus. Mo plante man oli stap folem rod ya. Be get ya we i smol nomo, mo rod we i strong, hemia i blong go kasem laef [we i no save finis]. Mo smol man nomo oli faenem.”—Matiu 7:13, 14.
2 ?Wanem mining blong pijatok ya? Hem i minim se i gat wan rod nomo blong kasem laef, mo se yumi mas lukaot gud blong no gowe long rod ya. ?Be wanem ya rod blong kasem laef?
Wok Blong Jisas Kraes
3, 4. (a) ?Olsem wanem Baebol i soem se wok we Jisas i mekem blong sevem yumi i impoten tumas? (b) ?Wetaem i faswan taem we God i soemaot se ol man oli save kasem laef ya we i no save finis?
3 I klia se Jisas i gat wan impoten wok we hem i mas mekem blong openem rod blong laef. Aposol Pita i talem se: “I no gat wan narafala man nating we i save sevem yumi, from we olbaot long wol ya, God i no givim nem blong wan narafala man nating long yumi, we hem i stap yusum blong sevem yumi [be hem i givim nem ya blong Jisas nomo].” (Ol Wok 4:12) Long sem fasin, aposol Pol i talem se: “Ol man we oli joen long Jisas Kraes, Masta blong yumi, presen we God i stap givim i go nomo long olgeta, hemia laef ya we i no save finis.” (Rom 6:23) Jisas hem wan i soemaot se hem nao i rod ya blong kasem laef we i no save finis. Hem i talem se: “Mi nao rod ya, mo mi mi stamba blong trutok, mo mi stamba blong laef.”—Jon 14:6.
4 Taswe, i impoten tumas we yumi akseptem samting we Jisas i mekem olsem rod blong kasem laef ya we i no save finis. From samting ya, i gud yumi lukluk moa long wok blong Jisas. Stret afta we Adam i mekem sin, Jeova God i soemaot se bambae man i save kasem laef we i no save finis. I gud yumi luk olsem wanem Baebol i tokbaot fastaem samting we Jisas Kraes i mekem blong sevem ol man.
Promes Laen
5. ?Hu ya snek ya we i giaman long Iv, mo olsem wanem yumi save samting ya?
5 Tru long wan pijatok, Jeova God i soemaot Man ya we hem i promes se bambae i Sevem ol man. Long pijatok ya, Jeova i talemaot panis blong “snek” we i toktok wetem Iv. Snek ya i pulum Iv blong no obei long God, nao hem i kakae frut blong tri ya we God i putum tabu long hem. (Jenesis 3:1-5) Yes, i no wan prapa snek we i toktok wetem Iv. Hem i wan strongfala spirit man we Baebol i kolem hem se ‘snek ya blong bifo we nem blong hem Devel Setan.’ (Revelesen 12:9) Setan i yusum anamol ya blong trikim Iv. Taswe, taem God i talemaot panis blong Setan, Hem i talem se: ‘Yu mo woman ya, bambae yutufala i no laeklaekem yutufala, bambae yutufala i stap agens long yutufala. Laen blong yu mo laen blong hem, bambae oli stap badfren long olgeta. Nao laen blong hem [woman ya] bambae i smasem hed blong yu, mo laen blong yu bambae i kakae leg blong laen blong hem [woman].’—Jenesis 3:15.
6, 7. (a) ?Hu ya woman we i bonem wan “pikinini”? (b) ?Hu ya Laen we God i promes blong sanem i kam, mo laen ya i mekem wanem samting?
6 ?Hu ya “woman” ya we Setan i badfren wetem hem? Revelesen japta 12 i bin soemaot hu nao “snek ya blong bifo.” Long sem fasin, Revelesen japta 12 i soemaot hu nao “woman” ya we Setan i agensem hem. Vas 1 i talem se woman ya “i werem san olsem klos blong hem. Mun i stap aninit long leg blong hem, mo hem i gat hat blong flasem hem, olsem hat blong king we hat ya i gat twelef sta long hem.” Woman ya i minim ogenaesesen blong ol gudfala enjel blong God long heven. Mo ‘pikinini boe’ we woman ya i bonem, hem i minim Kingdom blong God. Jisas Kraes nao bambae i rul olsem King long Kingdom ya.—Revelesen 12:1-5, The Jerusalem Bible.
7 ?Nao, hu ya “laen,” no pikinini, blong woman we Jenesis 3:15 i talem se bambae i smasem “hed” blong Setan, i kilim hem i ded? Hemia man ya we God i sanem i kam long wol ya, i mekem hem i bon long wan vejin gel. Yes, laen ya hem i Jisas. (Matiu 1:18-23; Jon 6:38) Revelesen japta 12 i soem se Laen ya, Jisas Kraes, we i laef bakegen olsem King long heven, bambae i lidim faet ya blong kilim Setan i ded. Mo, Revelesen 12:10 i talem se bambae Laen ya i mekemap ‘kingdom blong God blong yumi mo Mesaea blong hem we i gat paoa long olgeta samting.’
8. (a) ?Wanem niufala samting we God i mekem we i joen wetem faswan stamba tingting blong hem? (b) ?Hu ya i mekemap niufala gavman blong God?
8 Kingdom we Jisas Kraes i rul long hem i wan niufala samting we God i mekem. Bambae God i yusum Kingdom ya blong mekem ol man oli kasem laef ya we i no save finis long wol ya, olsem we hem i wantem fastaem. Afta we Setan i rebel, kwiktaem nomo Jeova i tekem aksin, i mekem rod, tru long niufala gavman ya, blong finisim frut blong sin. Taem Jisas i stap long wol ya, hem i soemaot se i no hem wan nomo we bambae i rul long gavman ya. (Luk 22:28-30) Samfala man long wol ya bambae oli rul wetem hem long heven. Olgeta ya oli olsem seken haf blong laen blong woman. (Galesia 3:16, 29) Ol man ya we bambae oli rul wetem Kraes, oli ol sinman we oli laef long wol ya. Baebol i talem se namba blong olgeta i kasem 144,000.—Revelesen 14:1-3.
9. (a) ?From wanem Jisas i mas kam long wol ya? (b) ?Olsem wanem Jisas i brekemdaon ol wok we Setan i mekem?
9 Be, bifo we rul blong Kingdom ya i stat, i impoten we faswan haf blong laen, hemia Jisas Kraes, i kam long wol ya. ?From wanem? From we Jisas nao i Man ya we Jeova i putumap blong “brekemdaon [no, spolem] ol wok we Setan i mekem.” (1 Jon 3:8) Wan long olgeta wok blong Setan, hemia sin blong Adam, we i mekem se olgeta pikinini blong Adam oli gat sin mo oli stap ded. (Rom 5:12) Jisas i brekemdaon wok ya blong Setan taem Hem i givim laef blong hem olsem wan ransom. Taswe, Jisas i mekem se ol man oli fri long sin mo ded, mo i openem rod long ol man blong kasem laef ya we i no save finis.—Matiu 20:28; Rom 3:24; Efesas 1:7.
Wok Blong Ransom
10. ?Olsem wanem Jisas mo Adam, tufala i sem mak?
10 Blong Jisas i bon olsem wan man, Jeova i tekem laef blong hem long heven, nao i putum long bel blong wan woman long wol ya. From samting ya, Jisas i stret gud olgeta taem hem i bon. Hem i no kam doti wetem sin blong Adam. Hem i save laef blong olwe long wol. Fastaem, Adam i sem mak long Jisas. God i wokem hem we i stret gud olgeta mo hem i gat hop blong haremgud long laef ya we i no save finis. Aposol Pol i stap tingting long samting ya, taem hem i raetem se: “ ‘Fas man ya Adam, God i mekem hem i man we i gat laef long wol ya.’ Be man ya we i olsem las Adam [Jisas Kraes], God i mekem hem i kam spirit we i save givim laef. Fas man ya, God i mekem hem long graon, mo hem i man blong laef long wol ya, be seken man ya, hem i aot long heven i kam.”—1 Korin 15:45, 47.
11. (a) ?Wanem ol defren samting we Adam mo Jisas tufala i mekem se ol man oli kasem? (b) ?Yumi mas tingbaot sakrefaes blong Jisas olsem wanem?
11 Long olgeta man we i bin laef long wol ya, Adam mo Jisas nomo i bin stap olsem man we i stret gud olgeta. Baebol i soem se tufala i sem mak taem i talem se, Jisas ‘i givim wan ransom we i sem mak, blong pemaot olgeta man.’ (1 Timoti 2:6) ?Jisas i sem mak long hu? !Yes, hem i sem mak long Adam, taem Adam i no mekem sin yet! Sin blong fas man ya Adam, i mekem se ded i kasem olgeta man. Be sakrefaes blong “man ya we i olsem las Adam,” i mekem se yumi kam fri long sin mo ded, nao long rod ya, yumi save laef blong olwe. !Sakrefaes blong Jisas i nambawan tumas! Aposol Pita i talem se: “Yufala i save finis wanem samting we God i yusum blong pemaot yufala, blong tekemaot yufala long rabis laef ya we yufala i kasem long ol olfala blong yufala bifo, blong mekem yufala i fri. Hem i no yusum samting we i save kam nogud, olsem silva no gol.” Be Pita i eksplenem se: “Hem i yusum blad blong Kraes. . . . Blad ya i olsem blad blong wan smol sipsip we i no gat wan samting i rong long bodi blong hem. Mo long fes blong God, blad ya blong Kraes i gud tumas.”—1 Pita 1:18, 19.
12. ?Olsem wanem Baebol i tokbaot rod ya blong finisim ded?
12 Baebol i talemaot klia olsem wanem blong winim ded we i kasem olgeta man, se: “Sin ya we wan man nomo [Adam] i mekem, hem i mekem we God i jajem ol man se oli mekem i no stret, oli mas panis. Mo long sem fasin, stret samting we wan man nomo [Jisas we i holemstrong long God go kasem ded] i mekem, hem i mekem we God i talem se ol man oli save go fri, oli save laef. Nao from we wan man nomo i no obei long God, olgeta man oli kam man nogud. Be long sem fasin, from we wan man nomo [Jisas] i obei long God, God i mekem we plante man oli kam stret man long fes blong hem.”—Rom 5:18, 19.
Wan Nambawan Hop
13. ?From wanem plante man oli no wantem laef blong olwe?
13 !Samting ya we God i mekem i mas givim bigfala glad long yumi! ?Olsem wanem long yu? ?Yu yu harem gud from Rod ya we God i mekem blong sevem yumi? Wan taem, sam man blong niuspepa oli mekem wan stadi long ol man long wan bigfala taon blong Amerika. Oli askem long ol man blong taon ya se “?Yufala i glad long hop ya blong laef olwe?” Yumi sapraes se 67.4 pesen blong olgeta, oli ansa we “No, mifala i no wantem hop ya.” ?From wanem oli talem se oli no wantem laef blong olwe? Hemia from we laef long wol naoia i fulap long problem. Wan woman i talem se: “Mi mi no wantem luk olsem wan olfala we i gat 200 yia.”
14. ?From wanem laef blong olwe i wan taem blong harem gud?
14 Be laef blong olwe we Baebol i tokbaot, i defren olgeta. Hem i no sem mak long laef long wol ya we i gat sik, fasin blong kam olfala, mo ol narafala trabol. Yes, bambae Jisas Kraes, we i King blong Kingdom blong God, i finisim olgeta trabol ya we Setan i stamba blong hem. Baebol i talem se, Kingdom blong God bambae i “flatemgud paoa blong ol narafala” gavman long wol ya we oli stap mekem i strong tumas long ol man. (Daniel 2:44) Long taem ya, ansa blong prea we Jisas i bin tijim long ol man blong hem, bambae i kamtru. “Ol samting we God i wantem,” bambae oli “kamaot long wol ya olsem we oli kamaot finis long heven.” (Matiu 6:9, 10, Today’s English Version) Long niufala wol blong God, afta we God i finisim olgeta fasin nogud long wol ya, bambae ol man oli kasem fulwan blesing from sakrefaes blong Jisas. !Yes, olgeta man we oli laef long taem ya, bambae oli gat gud helt!
15, 16. ?Bambae laef i olsem wanem long niufala wol blong God?
15 Olgeta we oli laef long niufala wol blong God, bambae oli luk we tok ya blong Baebol i kamtru, se: ‘Bambae bodi blong olgeta i kam gud bakegen, i save kam strong olsem we i yangfala nomo.’ (Job 33:25) Bambae wan narafala promes blong Baebol i kamtru, se: “Long taem ya, ol blaen man bambae oli save lukluk, mo olgeta we sora blong olgeta i fas, sora blong olgeta bambae i open bakegen. Olgeta we leg blong olgeta i nogud, bambae leg blong olgeta i kam gud bakegen, nao oli jamjam olbaot, oli danis, mo olgeta we oli no save toktok, bambae oli toktok, mo bambae oli glad, oli singsingaot from.”—Aesea 35:5, 6.
16 Traem tingbaot: Long taem ya, nomata we yumi gat 80 yia, 800, no i bitim 800, bambae yumi gat gudfala helt oltaem nomo. Promes ya blong Baebol bambae i kamtru, se: “Bambae i no moa gat man olbaot long kantri ya we i save talem se hem i sik.” Long taem ya, bambae wan narafala promes i kamtru, se: “[God] bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Aesea 33:24; Revelesen 21:3, 4.
17. ?Bambae man i naf blong mekem wanem long niufala wol blong God?
17 Long niufala wol, bambae yumi yusum nambawan bren blong yumi long fasin we God i wantem. Hem i wokem bren blong yumi, we i naf blong kasem save long plante samting. !Traem tingbaot ol nambawan samting we bambae yumi save mekem! Naoia, nomata we ol man oli no stret olgeta, be oli save mekem plante long ol samting we yumi luk raonabaot long yumi—ol telefon we man i save karem wetem hem, maekrofon, hanwaj, kompyuta, plen, mo plante narafala samting bakegen. Olgeta samting ya oli wokem long wol ya nomo. !Yes, yumi gat hop blong kasem laef we i no gat en blong hem long Paradaes we i stap kam! Long taem ya, bambae yumi save wokem fulap niufala samting.—Aesea 65:21-25.
18. ?From wanem bambae yumi neva save les long laef long niufala wol blong God?
18 Bambae yumi no save les long laef. Nating se yumi kakae plante handred taem finis be yumi no les yet blong kakae. Taem yumi kam stret gud, bambae yumi harem gud fulwan long ol nambawan kakae we yumi save testem long Paradaes long wol. (Aesea 25:6) Mo bambae yumi glad tumas long jans ya blong lukaot long ol anamol mo blong lukluk ol naesfala samting olsem kala blong skae taem san i godaon, ol hil, ol reva, mo ol vali. Glad ya i no gat en blong hem. !I tru tumas, long niufala wol blong God, bambae yumi no save les long laef!—Ol Sam 145:16.
Mekem Ol Samting We God i Wantem
19. ?From wanem i stret blong bilif se yumi mas mekem sam samting, sipos yumi wantem kasem laef ya we God i givim olsem presen?
19 Laef ya we i no save finis i wan bigfala presen we God i givim. ?Bambae yu yu mekem wanem blong kasem laef ya? ?Yu ting se i stret we yumi mekem samting we God i wantem yumi blong mekem? Yes, i stret blong mekem olsem. Yumi no mas ting se bambae God i sakem presen ya long yumi olsem nomo, no gat. I tru se hem i givim laef ya olsem presen, be yumi mas traehad blong kasem. Yes, yumi mas wok from. Maet yu yu askem kwestin ya we wan yangfala rijman i bin askem long Jisas, se: “?Mi mi mas mekem wanem gudfala wok blong bambae mi save kasem laef ya we i no save finis?” No maet yu askem kwestin we i sem mak long hemia we wan presina blong Filipae i askem long aposol Pol, se: “?Bambae mi mi mekem olsem wanem blong God i sevem mi?”—Matiu 19:16; Ol Wok 16:30.
20. ?Wanem impoten samting we yumi mas mekem sipos yumi wantem kasem laef ya we i no save finis?
20 Long naet bifo we Jisas i ded, hem i soem stamba samting we God i wantem yumi blong mekem. Hem i prea long Papa blong hem long heven, i se: “Laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” (Jon 17:3) Yes, Jeova i mekem rod blong yumi kasem laef ya we i no save finis mo Jisas Kraes i ded blong sevem yumi. From samting ya, ?yu ting se i stret blong kasem save long tufala? Yes, i stret. Be i no naf we yumi kasem save nomo long tufala, yumi mas mekem sam samting moa.
21. ?Yumi save mekem wanem blong soem bilif blong yumi?
21 Baebol i talem tu se: “Man we i bilif long Pikinini ya blong God, hem i gat laef ya we i no save finis.” Biaen, vas ya i gohed, i se: “Be man we i no save obei long Pikinini ya, hem bambae i no save luk laef ya samtaem. Mo man olsem, God bambae i stap kros long hem olwe nomo.” (Jon 3:36) Blong soem se yu bilif long Pikinini ya blong God, yu mas jenisim laef blong yu mo mekem i laenap wetem samting we God i wantem. Yu mas lego ol rabis fasin we yu bin mekem bifo, mo yu mas tekem aksin blong mekem samting we God i glad long hem. Yu mas mekem olsem we aposol Pita i talem, se: “Yufala i mas tanem tingting blong yufala from ol sin blong yufala, mo yufala i mas luk long God blong hem bambae i tekemaot ol sin blong yufala. Sipos yufala i mekem olsem, Hae God bambae i save givim niufala paoa long laef blong yufala.”—Ol Wok 3:19, 20.
22. ?Wanem ol samting we yumi mas mekem blong biaenem Jisas?
22 Yumi neva mas foget se, sipos yumi wantem kasem laef ya we i no save finis, yumi mas soemaot bilif long Jisas. I no gat wan narafala rod bakegen. (Jon 6:40; 14:6) Yumi soem bilif long Jisas taem yumi “biaen long hem.” (1 Pita 2:21) ?Samting ya i minim wanem? Yes, taem Jisas i prea long God, hem i talem se: “God, mi mi rere blong mekem ol samting ya we yu yu wantem.” (Hibrus 10:7) I impoten tumas we yu folem eksampel blong Jisas. Yu mas rere blong mekem samting we God i wantem mo givim laef blong yu i go long Jeova. Biaen, yu mas baptaes long wota blong soemaot se yu givim laef blong yu finis long God. Jisas tu i baptaes long wota. (Luk 3:21, 22) I waes blong tekem ol step olsem. Aposol Pol i talem se: “Mifala i mekem olsem, from we Kraes i lavem mifala tumas.” (2 Korin 5:14, 15) ?Olsem wanem Jisas i soem lav long yumi? Yes, lav i pusum Jisas blong i givim laef blong hem blong sevem yumi. Samting ya i mas pusum yumi blong soemaot bilif long hem. Yes, lav i mas pusum yumi blong folem nambawan eksampel blong Jisas, hemia blong halpem ol narafala man. Kraes i laef blong mekem ol samting we God i wantem. Yumi tu, yumi mas mekem i sem mak. Yumi laef, i no blong mekem samting blong yumi nomo, be blong mekem ol samting we God i wantem.
23. (a) ?Olgeta we oli wantem kasem laef, oli mas joen long wanem? (b) ?Olgeta we oli haf blong Kristin kongregesen, oli mas mekem wanem?
23 Yumi mas mekem sam samting moa. Baebol i talem se taem ol 3,000 man we oli stap long Pentekos 33 K.T., oli baptaes finis, “oli joen.” ?Oli joen long wanem? Luk i eksplenem se: ‘Oltaem, olgeta oli stap lesin long ol samting we ol aposol oli tijim olgeta long hem, mo oli stap joen tugeta blong serem ol samting wetem narafala.’ (Ol Wok 2:41, 42) Yes, oli mekem miting wanples blong stadi Baebol mo oli joen tugeta wetem Kristin kongregesen.a Ol faswan Kristin oli joen oltaem long ol miting blong kasem ol tijing long saed blong spirit. (Hibrus 10:25) Tede, ol Witnes blong Jeova tu oli mekem olsem, mo oli wantem leftemap tingting blong yu blong kam long ol miting blong olgeta.
24. ?Wanem ya “laef ya we i prapa wan”? ?Olsem wanem mo wetaem bambae laef ya i kamtru?
24 Naoia, plante milyan man oli stap folem smol rod ya we i blong go kasem laef. !I nidim bigfala traehad blong wokbaot oltaem long rod ya! (Matiu 7:13, 14) Pol i soemaot samting ya, taem hem i talem wetem fulhat blong hem, se: “Yu mas traehad blong gohed gud long Kristin laef blong yu, olsem man we i traehad long resis blong i win. Sipos yu traehad olsem, bambae yu save kasem laef ya we i no save finis, we God i singaot yu blong kasem.” Blong gohed long faet ya, yumi mas ‘holemtaet laef ya we i prapa wan.’ (1 Timoti 6:12, 19) Laef ya we i prapa wan i no olsem laef naoia. Tede, yumi stap harem nogud long bodi blong yumi, mo yumi stap safa from sin blong Adam. Be laef ya we i prapa wan, bambae i kamtru i no longtaem long niufala wol blong God. Afta we rabis wol ya i finis, ransom sakrefaes blong Kraes bambae i givim blesing long olgeta we oli lavem Jeova God mo Pikinini blong hem. I gud we yumi evriwan i jusum laef—“laef ya we i prapa wan”—laef we i no save finis long nambawan niufala wol blong God.
[Futnot]
a Wan grup blong man we oli joen wanples blong wosip.
?Bambae Yu Yu Ansa Olsem Wanem?
◻ ?Hu ya snek, woman, mo laen we Jenesis 3:15 i tokbaot?
◻ ?Olsem wanem Jisas i sem mak long Adam, mo ransom i mekem se yumi kasem wanem?
◻ ?Wanem samting we yu wantem tumas blong mekem long niufala wol blong God?
◻ ?Yumi mas mekem wanem sipos yumi wantem laef long niufala wol blong God?
[Tok Blong Pija Long Pej 10]
Long saed blong ol yangfala mo ol olfala, Jisas nomo i rod blong kasem laef ya we i no gat en blong hem
[Tok Blong Pija Long Pej 11]
Long stret taem we God i makemaot finis, ol olfala bambae oli kam yang bakegen