Evriwan i No Kasem Sem Samting—?God i Wantem Se i Olsem?

I gat wan ansa nomo long kwestin ya se, no. Bambae yumi luk from wanem.

GOD i wantem se olgeta man oli gat sem jans blong haremgud long laef mo blong stap glad. Taem God i wokem man fastaem, Baebol i talem se: “Nao God i tok bakegen, i talem se, ‘I gud yumi mekem man, mo i gud yumi mekem we hem i tekem fasin blong yumi, i olsem yumi. Hem bambae i bos long ol fis, mo long ol pijin, mo long ol anamol blong vilej mo long ol anamol blong bus, i stat long olgeta we oli bigbigfala, i go kasem olgeta we oli smolsmol. Olgeta evriwan bambae oli stap aninit long han blong hem.’ ” Afta long samting ya, taem “[God] i luk olgeta wok ya we hem i mekem, hem i luk we oli gud we i gud tumas.”​—Jenesis 1:​26, 31.

Taem God i luk tede se, sam man oli gat wan gudfala laef mo samfala oli trabol, ?hem i save talem se laef “i gud tumas”? No gat, from we “God i stamba blong fasin ya blong lavem man.” (1 Jon 4:8) Baebol i tokbaot God i se: “Taem we hem i jajem man, hem i no save wok wan saed.” “Fasin blong hem i gud tumas, mo hem i stret olwe nomo, . . . hem i tru. Oltaem, tingting blong hem bambae i stap strong long olgeta. Oltaem hem i stap mekem ol samting we i stret, mo i stap mekem sem mak nomo long olgeta man.” (Dutronome 10:17; 32:4; skelem wetem Job 34:19.) Aposol Pita i talem se: “Naoia mi mi luk we God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.”​—Ol Wok 10:​34, 35.

Sipos God i stamba blong lav, i mekem i sem mak nomo long olgeta man, mo hem i stret, ?yu ting se hem i save wokem ol man blong samfala oli harem gud be narafala i trabol? Sipos God i stamba blong fasin seraot bitwin ol man mo sipos hem nao i putum olgeta long wan wol we laef blong samfala i moagud long narafala, olgeta samting ya oli no laenap wetem ol gudfala fasin blong hem. God i wantem se taem wan man “i bon, hem i fri mo i gat raet blong kasem ol samting we oli sem mak long ol narafala.” Be, tede ol samting oli no kamtru olsem. ?From wanem?

Stamba Blong Fasin Ya We Man i No Kasem Sem Samting

Taem God i wokem ol man blong oli sem mak nomo, samting ya i no minim we hem i wantem se olgeta man oli sem mak long evri samting. Ol man oli gat defren save blong wok, oli intres long defren samting, mo fasin blong olgeta tu i defren. God i mekem tu se, i gat sam man we oli hae moa long narafala mo oli gat raet blong bos antap long narafala. Eksampel, ol man mo ol woman oli no sem mak long evri samting, be God i wokem woman blong kam “wan fren” blong man. (Jenesis 2:​18) Ol papa mama mo ol pikinini oli defren long saed blong posisen. Nomata long samting ya, olgeta man, woman, mo pikinini, oli gat raet blong haremgud long laef from we God i givim presen ya long olgeta man. Olgeta evriwan oli save kasem respek we i sem mak long ol narafala mo wan gud nem long fored blong God.

Long sem fasin, ol spirit pikinini blong God we hem i wokem bifo long ol man, oli kasem ol defren kaen wok. (Jenesis 3:​24; 16:​7-​11; Aesea 6:​6; Jud 9) Nating se i olsem, ol spirit pikinini ya oli mas stap folem ol rul we God i givim, mo olgeta evriwan oli gat jans blong kasem ol gudfala samting we God i givim blong haremgud long laef. Long rod ya, oli soemaot we God i mekem i sem mak long olgeta man long fasin we i nambawan.

Sore tumas, be i gat wan spirit man we hem i no glad long plan blong God. Jeova i givim plante samting finis long enjel ya, be hem i wantem moa. Hem i wantem tumas blong kasem wan hae posisen. From we hem i holemtaet nogud tingting ya, hem i kam enemi blong Jeova, Man Ya We i Wokem olgeta samting mo we i holem hae posisen antap long heven mo wol. Biaen, stronghed spirit pikinini ya blong God, i pulum ol man blong wantem moa samting i bitim wanem we God i givim finis long olgeta. (Jenesis 3:​1-6; skelem wetem Aesea 14:​12-​14.) Long rod ya nao, oli sakemaot plan we Jeova i bin putumap blong oli haremgud long laef. Revelesen 20:2 i givim narafala nem blong stronghed enjel ya se, “Setan,” we hem i statem fasin ya ol man oli no moa kasem samting long fasin we i sem mak.

?Problem Ya Bambae i Jenis Wan Dei?

Yumi save talem wan tok nomo blong ansa long kwestin ya hemia se, !yes!

?Be hu bambae i mekem ol jenis ya oli kamtru? Ol lida blong wol ya oli traehad blong mekem ol jenis ya oli kamtru. Sam long olgeta oli wok strong wetem fulhat blong olgeta blong plante yia. I no oltaem we oli kasem ol gudfala samting we oli wantem. From samting ya, plante man oli gat tingting se i wan drim nomo blong bilif se problem ya we man i no kasem sem samting, bambae i save lus. Be, tingting blong God i stap long Aesea 55:​10, 11: “Tok blong mi i olsem sno mo ren, we i aot long skae, i folfoldaon long graon blong wasem ol ples, blong mekem ol garen oli gru gud, nao i gat plante kakae i stap blong ol man oli kakae, mo blong oli planem garen bakegen. Tok blong mi bambae i wok long sem fasin. Bambae hem i mekem olgeta samting we mi mi mekem plan se i mas mekem, we i no mestem wan long olgeta, bambae hem i mekem evri samting we mi mi sanem hem blong i mekem.”

!Yumi haremgud blong save se Jeova God i talemaot we bambae hem i mekem plan blong hem blong fastaem, i kamtru blong givim long olgeta man sem jans blong haremgud long laef! Jeova, God ya we i no save giaman, i mas mekem ol promes blong hem oli kamtru. Yumi glad se, hem i wantem tumas mo i gat paoa blong mekem ol promes blong hem oli kamtru. ?Olsem wanem bambae hem i mekem samting ya?

Hemia tru long Kingdom we Jisas Kraes i tokbaot long prea ya we hem i tijim long ol man blong hem: “Papa blong mifala we yu stap long heven. . . . Plis, letem kingdom blong yu i kam. Yu mekem ol samting we yu yu wantem oli kamaot long wol, olsem we oli kamaot finis long heven.” (Matiu 6:​9, 10, NW) Yes, Jeova bambae i yusum Kingdom blong hem blong “flatemgud paoa blong ol narafala king, nao bambae hem i rul oltaem gogo i no save finis.”​—Daniel 2:​44.

Aninit long rul blong Kingdom blong God long heven, wan niufala fasin blong laef blong ol man bambae i stat. Long saed ya, aposol Jon i raetem long Revelesen, laswan buk blong Baebol, se: “Mi luk niufala heven wetem niufala wol, tufala i stap. Heven mo wol we tufala i stap fastaem, tufala i lus finis.” (Revelesen 21:1) Bambae i no moa gat sam man we laef blong olgeta i moagud i bitim narafala​—fasin pua, sik, fasin blong no gat gudfala edukesen, fasin blong no laekem man from kala blong skin, kantri no skul, mo plante narafala trabol bakegen bambae oli lus.a

Bitim 100 yia nao, ol Witnes blong Jeova oli pulum tingting blong ol man i go long Kingdom ya. (Matiu 24:14) Tru long ol buk mo help we oli givim long ol man wanwan, ol Witnes oli traehad blong givhan long ol man blong save ol stamba tingting blong God we oli stap long Baebol. Be, bigfala wok ya we oli stap mekem raon long wol, i no jes blong tokbaot hop long saed blong wan gudfala laef we bambae i kamtru long fiuja nomo. Wok ya i stap karem ol blesing naoia tu. Hem i givhan long ol man blong oli lego fasin blong mekem i gud long samfala man mo mekem i nogud long narafala. Bambae yumi luk olsem wanem samting ya i stap hapen.

[Futnot]

[Tok Makem Poen Long Pej 5]

Taem God i wokem man fastaem, hem i wantem se olgeta evriwan oli kasem ol gudfala samting long laef mo stap glad