Evriwan i No Kasem Sem Samting Blokem Trabol Ya
Olgeta man oli wantem tumas blong laef long wan wol we evriwan i kasem samting long fasin we i sem mak nomo. Taswe, i no longtaem, Man Ya We i Wokem yumi, bambae hem i mekem samting ya i kamtru. Be, bifo long taem ya, yumi save tekem aksin blong blokem trabol ya we i kasem yumi wanwan mo ol famle blong yumi. Nelson Mandela, we i presiden blong Saot Afrika bifo, i talem se: “Man i no seraot from save we hem i kasem, be hem i seraot from fasin we hem wan i yusum save ya we hem i kasem.”
HISTRI i soemaot samting ya. Plante man mo woman oli no kasem plante samting taem oli bon. Be biaen, oli yusumgud ol samting we oli gat mo oli winim plante samting long laef blong olgeta. Defren nao, sam narafala man we oli bon long famle we i rij, oli no yusumgud ol samting we oli gat mo from samting ya oli lusum bighaf blong olting ya.
!Yusumgud Ol Samting We Yu Gat!
Ol Witnes blong Jeova oli rili wantem halpem ol man blong stadi Baebol mo kasem save long ol stamba tingting blong God. Be, oli luksave se sipos ol man oli wantem kasem fulwan blesing from ol tok blong Baebol, olgeta ya oli mas save rid. From risen ya, ol Witnes blong Jeova oli tijim plante taosen man blong rid mo raet. Long wan kantri blong Wes Afrika i gat 23,000 man (hemia samtaem afta long 1990) we oli stap folem program ya. Niuspepa ya San Francisco Examiner i tokbaot gudfala wok we ol Witnes blong Jeova oli mekem blong halpem ol man, hem i se: “Yumi save talem se olgeta ya oli gudfala sitisen. Oli rere oltaem blong pem takis blong olgeta, oli halpem ol sikman, mo oli tijim ol man blong rid.”
Antap long samting ya, i gat wan narafala program we i trenem ol Witnes blong Jeova blong toktok long fored blong ol man. Long rod ya, plante taosen man oli lan blong toktok gud, mo oli naf blong mekem ol tok long fored blong plante man. Long olgeta ya, i gat sam man we oli faenem i had blong tok klia. Hemia eksampel blong wan man blong Saot Afrika we i raetem se: “Mi no save toktokgud nating, from samting ya, mi sem blong toktok long narafala man, mo oltaem mi stap letem ol narafala man oli talem samting we i stap long tingting blong mi. . . . Taem mi joen long Tiokratik Skul mo mi mas ridim Baebol long fored blong ol man . . . , fasin blong toktok blong mi i nogud tumas mekem se mi no finisim tok blong mi long stret taem blong hem. Taem miting i finis, [brata we i lukaot long Tiokratik Skul] i givim sam gudfala advaes long mi. Hem i gat kaen fasin mo hem i talem se, taem we mi stap long haos, i gud mi traem blong rid wetem bigfala voes. Hemia nao samting we mi mekem, evri dei mi spenem taem blong ridim Baebol mo Wajtaoa magasin wetem bigfala voes.” Man ya i gohed gud mo tede hem i save givim pablik tok long fored blong plante handred, no taosen man.
Haremgud From We Olgeta Brata Oli Sem Mak
Olgeta Witnes blong Jeova oli defren long saed blong edukesen, helt, ekonomi mo wok. Hemia i kamaot from we oli laef long wan wol we fasin blong laef blong hem i olsem. Be oli defren olgeta long ol narafala skul. Klosap nomo oli winim ol fasin seraot we oli kamaot from defren kala blong skin, posisen long wok, mo ekonomi long medel blong olgeta.
Oli winim ol problem ya from we oli traehad blong mekem olgeta samting we oli lanem long Baebol i wok long laef blong olgeta. Oli akseptem fulwan ol rul we oli stap long Baebol, olsem hemia se: “Fasin blong mi blong lukluk man i no olsem fasin blong man. Man i stap lukluk long bodi blong man nomo, be mi mi stap lukluk long tingting blong hem.” (1 Samuel 16:7) “God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, i nating we hem i wan laen blong Isrel, no i kamaot long wan narafala laen olgeta.” (Ol Wok 10:34, 35) “Sipos wan man i mekem i nogud long yufala, bambae yufala i no givimbak fasin ya long hem. Oltaem yufala i mas traem blong mekem ol fasin we olgeta man oli luk se i stret nomo. Oltaem, long saed blong yufala, yufala i mas traehad blong faenem rod blong yufala i gat pis wetem olgeta man.”—Rom 12:17, 18; lukluk tu 1 Timoti 6:17-19; Jemes 2:5, 9.
Ol Witnes blong Jeova oli obei long ol rul blong Baebol we i mekem se oli joengud tugeta. From samting ya, oli no letem ol fasin we oli seraotem man from defren kala blong skin, posisen long wok, no ekonomi, oli spolem fasin joengud ya. Eksampel, taem oli jusum wan man blong i kasem sam wok insaed long Kristin kongregesen, oli neva letem ol fasin ya oli gat paoa long disisen blong olgeta. Ol impoten wok insaed long kongregesen, olsem wok blong tij mo lidim wok blong prij, oli blong ol man we oli gat ol gudfala fasin long saed blong spirit.—1 Timoti 3:1-13; Taetas 1:5-9.
Ol man we oli bin safa long wol ya we i mekem i moagud long sam man i bitim narawan, naoia oli haremgud blong stap long medel blong ol man we oli brata mo sista mo we oli sem mak long fored blong God. Martina i save pruvum samting ya. Afta we papa blong hem i lego mama blong hem, Martina i gruap long wan famle we i pua from we mama nomo i stap lukaot long olgeta. Plante taem ol man oli mekem hem olsem wan strenja. From samting ya hem i ting nogud long hem wan, mo hem i faenem i had blong joengud wetem ol man raonabaot long hem. Hem i kam wan woman we i no moa kea mo tingbaot filing blong narafala man. Be, taem hem i stat stadi Baebol wetem ol Witnes blong Jeova, mo i kam wan Witnes, fasin blong hem i jenis. Hem i talem se: “Naoia yet, mi mas agensem ol nogud tingting. Be mi naf blong fesem ol problem. Respek we mi gat long mi wan i kam moagud, mo mi no moa fraet blong talem tingting blong mi. Trutok blong Baebol i halpem mi blong mekem disisen. Naoia mi save we Jeova i lavem mi mo we laef i gat mining.”
Defren long ol man blong wol ya, grup ya blong ol Kristin Witnes blong Jeova we oli stap long bitim 230 kantri raon long wol, oli haremgud from we olgeta evriwan oli kasem sem samting long laef. ?I gat wan narafala skul we i naf blong mekem sem samting mo soemaot ol pruf blong hem?
Tru tumas, ol Witnes blong Jeova oli no stretgud olgeta. Oli luksave se oli no naf blong karemaot fulwan, fasin ya we sam man oli gat wan laef we i moagud long narawan. Plante man bifo, oli bin traem blong stretem problem ya long ol handred yia we oli pas—be oli no winim. Be, ol Witnes oli glad from we long medel blong olgeta, oli naf blong blokem ol trabol we oli kamaot from fasin ya. Mo wetem strong bilif long ol promes blong God, oli stap wet blong haremgud long wan niufala wol we stret fasin i stap long hem mo we olgeta man oli save kasem wan laef we i sem mak long narafala.
Yes, ol man we oli stap obei bambae oli laef long wan wol we olgeta man oli “gat raet blong kasem respek mo samting we i sem mak long narafala man.” Hemia promes we fastaem olgeta, God i bin wantem se ol man oli harem gud long hem. !Promes ya i nambawan! !Mo long taem we i kam bambae hem i rili kamtru!
[Tok Blong Pija Long Pej 7]
Ol Witnes blong Jeova oli rere blong tijim plante taosen man we oli no save rid mo raet
[Tok Blong Pija Long Pej 8]
Trutok blong Baebol i halpem ol man blong lego fasin seraot we i kamaot from defren kala blong skin, posisen long wok, mo ekonomi