Haremgud From “Laef Ya We i Prapa Wan”

JEOVA GOD i mekem man i gat tingting ya blong wantem laef olwe. (Prija 3:​11) Tingting ya i mekem ol man oli luksave se oli no gat paoa taem oli fesem ded, be tu, tingting ya i pusum olgeta blong traehad blong stap laef.

Tabu Baebol, hemia Tok blong God we tabu spirit i lidim man blong raetem, i givim wan bigfala hop long yumi. (2 Timoti 3:​16) Jeova, we hem i stamba blong lav, i no save wokem man wetem tingting ya blong laef olwe, mo biaen, letem man i laef go kasem 70 no 80 yia nomo. Nogat. Hem i no save mekem man blong oli safa, samting ya i agensem ol gudfala fasin blong hem. God i no wokem yumi ‘olsem anamol we i no gat tingting, we i stap mekem ol samting we i harem nomo blong mekem, mo i stap nomo blong narafala anamol i kam kasem hem, i kilim hem.’​—2 Pita 2:​12.

Taem hem i wokem Adam mo Iv wetem tingting ya blong stap laef olwe, Jeova God i luk we “oli gud we i gud tumas.” Hem i wokem tufala blong tufala i stap laef blong olwe. (Jenesis 1:​31) Be sore tumas, faswan man mo woman tufala i no yusumgud fasin fri blong tufala blong jus. Tufala i no obei long loa ya we God i givim klia nomo long tufala. Ale, tufala i lusum laef ya we i stretgud olgeta. From samting ya, tufala i ded, mo tufala i pasem sin mo ded i go long olgeta pikinini we oli kam biaen long tufala.​—Jenesis 2:​17; 3:​1-​24; Rom 5:​12.

Baebol i no haedem ol save long saed blong mining blong laef mo ded. Hem i talem se long ded “i no gat wok, mo tingting, mo save, mo waes” mo ol dedman “oli no moa save wan samting.” (Prija 9:​5, 10) Hemia i minim se, ol dedman oli ded nomo. Tijing ya se sol i no save ded samtaem, i no stap long Baebol. Taswe, i no gat wan bigfala tokhaed long saed blong ol dedman.​—Jenesis 3:​19; Ol Sam 146:4; Prija 3:​19, 20; Esikel 18:4.a

God i gat wan stamba tingting taem hem i wokem wol ya. “Hem i no mekem blong i ples nating nomo, hem i mekem blong man i save stap long hem.” God i wokem wol ya fastaem, blong ol man we oli stretgud olgeta oli save laef long wan naesfala paradaes, mo long saed ya, God i no jenisim stamba tingting blong hem. (Aesea 45:18; Malakae 3:6) Blong mekem stamba tingting ya i kamtru, hem i sanem prapa Pikinini blong hem i kam long wol. From we Jisas Kraes i holem strong bilif go kasem ded, hem i mekem rod blong pemaot ol man long sin mo ded. Yes, Jisas i talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save ­finis.”​—Jon 3:​16.

Longtaem bifo, God i promes se bambae hem i mas mekem wan “niufala heven mo niufala wol bakegen.” (Aesea 65:17; 2 Pita 3:​13) Blong mekem olsem, hem i jusum wan smol grup blong Kristin we oli strong long bilif, blong olgeta ya oli go laef long heven. Olgeta ya oli joen wetem Jisas Kraes, blong mekemap wan gavman. Baebol i tokbaot gavman ya olsem ‘kingdom blong heven,’ no ‘kingdom blong God,’ we bambae i rul ‘long olgeta man long wol.’ (Matiu 4:​17, NW; 12:​28, NW; Efesas 1:​10; Revelesen 5:​9, 10; 14:​1, 3) Afta we God i klinimgud wol blong yumi mo spolem ol man we oli no wantem obei long hem, bambae hem i stanemap wan fasin blong laef we i stretgud olgeta, hemia “niufala wol.” Ol man we bambae oli stap long “niufala wol” ya, oli ol man we God bambae i protektem olgeta long taem blong bigfala trabol ya we klosap nao bambae i kam blong spolem ol rabis man blong wol. (Matiu 24:​3, 7-​14, 21; Revelesen 7:​9, 13, 14) Folem promes blong God, ol dedman tu, bambae oli laef bakegen blong joen wetem ol man ya we bambae oli laef long niufala wol.​­—Jon 5:​28, 29, NW; Ol Wok 24:15.

“Laef Ya We i Prapa Wan”

Blong soemaot wanem kaen laef bambae i stap long Paradaes long wol long fiuja, God i talem se: “!Yu luk! Mi mi stap mekem olgeta samting oli kam niuwan bakegen.” (Revelesen 21:5) Yumi no naf blong kasem save fulwan olgeta gudfala wok we God bambae i mekem long ol man. Bambae hem i wokem wan paradaes long fulwol, garen ya bambae i sem mak olsem garen blong Iden. (Luk 23:43) Olsem long Iden, bambae i gat plante gudfala mo naesfala kala, noes, mo tes blong kakae. Bambae i no moa gat puaman mo man we i sot long kakae, from we Baebol i talem se: “Ol samting ya blong bifo oli lus olgeta.” (Revelesen 21:​4; Ol Sam 72:16) Bambae i no moa gat man i talem se “hem i sik,” from we ol sik bambae oli lus blong olwe. (Aesea 33:24) Yes, olgeta stamba samting we oli mekem yumi safa, olsem ded we i enemi blong ol man, bambae oli lus olgeta. (1 Korin 15:26) Long wan nambawan vison blong “niufala wol,” hemia niufala kampani blong man we bambae oli stap ­aninit long rul blong Kraes, aposol Jon i harem wan voes we i talem se: “[God] bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem.” ?I gat wan samting we i moagud i bitim ol promes ya blong God we oli leftemap tingting blong man mo karem bigfala glad? Nogat.

Taem Baebol i tokbaot laef long fiuja, hem i soemaot se ol man bambae oli haremgud long saed blong tingting mo spirit. Gudfala laef we ol man oli traehad blong kasem longtaem finis i kam, bambae oli kamtru fulwan long paradaes. (Matiu 6:​10) Wan long ol samting ya we man i wantem tumas blong kasem, hemia fasin blong mekem i stret long olgeta man. Samting ya i neva kamtru from we, plante taem, ol man we oli gat paoa oli mekem nogud long olgeta we oli stap aninit long olgeta. (Prija 8:9) Long wan profet tok, man blong raetem ol Sam i tokbaot ol blesing we bambae oli ­kamaot aninit long rul blong Kraes. Hem i se: “Long taem blong hem, stret fasin bambae i kam bigwan mo pis i stap oltaem.”​—Ol Sam 72:​7, The New Jerusalem Bible.

Plante man oli traehad blong mekem se olgeta man long wol ya oli kasem sem samting long laef. Long “niufala wol,” God bambae i tekemaot fasin blong daonem mo spolem narafala. (Matiu 19:28) Olgeta man bambae oli kasem respek we i sem mak long narafala. Rod we God bambae i yusum blong mekem samting ya i no sem mak long strong fasin we sam gavman oli mekem tede. Defren olgeta, God bambae i tekemaot stamba blong ol nogud fasin ya. Fasin griri mo flas tingting we i stap lidim ol man blong rul antap long narafala man no blong kasem ol sas samting, bambae oli finis. Aesea i talemaot profet tok ya se: “Man we i wokem haos blong hem, hem bambae i save stap gud long hem. Bambae i no moa gat narafala man i save kam tekemaot haos ya. Man we i planem plantesin blong grep, hem bambae i dring waen blong ol grep ya. Bambae i no moa gat narafala man i save kam stilim ol waen blong hem.”​—Aesea 65:​21, 22.

!Man i safa tumas from ol faet bitwin ol man mo ol kantri! Samting ya i stat wetem ded blong Ebel i kam kasem ol bigfala faet long taem blong yumi. Blong longtaem finis ol man oli hop mo oli wet blong i gat pis. Long Paradaes ya we bambae i kam, ol man bambae oli stap kwaet mo oli laef long pis; “bambae oli harem gud, from we oli stap gud, mo oli gat plante samting.”​—Ol Sam 37:11.

Aesea 11:9 i talem se: “Kantri ya bambae i fulap gud long ol man we oli savegud Hae God, olsem we solwota i fulap gud long ples blong hem.” From we yumi no stretgud olgeta, mo from sam narafala risen bakegen, yumi no naf blong kasem fulwan mining blong tok ya tede. Stretfala save blong God bambae i tijim yumi olsem wanem blong joengud wetem hem mo kasem bigfala glad from. Be from we Tok blong God i eksplenem long yumi se Jeova i wan nambawan God we i gat bigfala paoa, fasin waes, stret fasin mo lav, yumi sua se bambae hem i harem olgeta prea we ol man blong “niufala wol” oli talem.

!Tekem Jans Blong Kasem “Laef Ya We i Prapa Wan”!

Long tingting blong plante man, laef blong olwe long wan wol we i moagud i olsem wan drim nomo. Be, olgeta we oli bilif long ol promes blong God oli luk hop ya olsem wan samting we i rili tru, i olsem wan angka we i holem laef blong olgeta. (Hibrus 6:​19) Wan angka i holem sip blong i stap stret mo blong solwota i no sakem hem i go olbaot. Long sem fasin, hop ya blong kasem laef we i no save finis, i mekem man i stanap strong mo i sua long saed blong fiuja. Hop ya i halpem olgeta blong fesem mo winim ol bigfala problem blong laef.

Yumi save sua se God bambae i mekem ol promes blong hem oli kamtru. Plante taem hem i soemaot long ol man se oli save trastem hem, from we ol promes we hem i mekem oli no giaman. Aposol Pol i raetem se: “Nao God i mekem promes finis, mo hem i wantem mekem olgeta ya we bambae oli save kasem ol samting we hem i promes, oli savegud we bambae tingting blong hem i no save jenis samtaem. Taswe hem i talem nem blong hem blong mekem promes ya blong hem i kam strong moa. I gat tufala tok blong God i stap, tok ya blong promes blong hem, wetem tok ya blong mekem promes ya i strong. Tufala tok ya i no save jenis, mo long tufala tok ya God i no save giaman. . . . Tufala tok ya i stap mekem tingting blong yumi i kam strong moa. Nao yumi save holemtaet fasin ya we God i givim finis long yumi, we yumi putum tingting blong yumi i stap strong long promes blong hem.” (Hibrus 6:​17, 18) “Tufala tok ya” we God i neva save jenisim, hemia promes blong hem mo tok blong hem we i tru. Bilif blong yumi i stanap long tufala samting ya.

Bilif long ol promes blong God i mekem man i haremgud tumas mo i gat paoa long saed blong spirit. Josua, wan lida blong ol man Isrel, i bin soemaot strong bilif olsemia. Taem Josua i givim laswan tok blong hem long ol man Isrel, hem i olfala finis mo hem i save se i no longtaem bambae hem i ded. Nating se i olsem, hem i soemaot se hem i gat paoa mo i no gat samting i naf blong spolem fasin blong hem blong stap tru long God. Fasin ya i kamaot from we hem i trastem ol promes blong God. Afta we hem i talem se “bambae i no longtaem, mi mi ded,” Josua i gohed se: “Yufala evriwan i savegud long tingting blong yufala we Hae God ya i givim ol gudgudfala samting ya long yumi, stret olsem we hem i promes bifo finis. Olgeta promes ya blong hem, hem i mekem oli kamtru evriwan, i no gat wan promes nating i stap we i no kamtru.” Yes, Josua i talem tok ya tri taem se, oltaem God i mekem olgeta promes blong hem oli kamtru.​—Josua 23:14.

Yumi tu yumi save bilif long promes blong God se bambae hem i mekem wan niufala wol i no longtaem. Sipos yumi traehad blong stadi gud long Baebol, bambae yumi kasem save hu ya Jeova mo from wanem yumi save trastem hem. (Revelesen 4:​11) Ebraham, Sera, Aesak, Jekob, mo sam narafala man blong bifo oli bin soemaot bilif we i strong. Bilif blong olgeta i stanap long gudfala save mo fasin fren we oli gat long saed blong trufala God, Jeova. Oli stanap strong long bilif blong olgeta, nating se “oli no kasem ol samting ya yet we God i promes finis blong givim long olgeta.” Be, “oli stap luk ol samting ya olsem we ol samting ya oli stap longwe yet long olgeta, be oli glad tumas blong luk.”​—Hibrus 11:13.

Taem yumi kasem save ol profet tok blong Baebol, yumi luk se “bigfala Dei blong God ya we i gat olgeta paoa” i stap kam klosap. Long dei ya God bambae i karemaot ol nogud man long wol ya. (Revelesen 16:​14, 16) Olsem ol man blong bilif blong bifo, yumi mas trastem se olgeta samting we God i promes finis blong mekem, bambae oli kamtru. Yumi mas gat bilif mo lav long God mo “laef ya we i prapa wan.” Taem yumi tingbaot se niufala wol i klosap nao, samting ya i save halpem yumi we yumi gat bilif mo lav long God, blong yumi stanap strong. Blong mekem se Jeova i laekem mo i protektem yumi long bigfala dei blong hem, yumi mas lukaotgud long bilif mo lav blong yumi.​—Sefanaea 2:3; 2 Tesalonaeka 1:3; Hibrus 10:​37-​39.

?Olsem wanem? ?Yu yu laekem laef? ?Yu yu wantem tumas blong kasem “laef ya we i prapa wan”? ?Yu wantem kasem laef ya we i blong ol man we Jeova i agri long olgeta, mo we oli gat hop blong haremgud long laef long fiuja, gogo i no save finis? Sipos hemia samting we yufala i wantem faenem, folem advaes blong aposol Pol, we i raetem se yumi no mas ‘putum tingting blong yumi long ol mane blong yumi,’ be ‘yumi mas putum tingting blong yumi i stap long God nomo.’ Pol i gohed se: “Yu mas talem long olgeta se oli mas mekem . . . ol gudfala wok, mo oli mas kam rij long fasin ya.” Ol wok ya oli onagud long God, mo oli mekem se “oli save kasem laef ya we i prapa wan.”​—1 Timoti 6:​17-​19.

Sipos yu agri blong stadi Baebol wetem ol Witnes blong Jeova, bambae yu kasem wan spesel save we i save givim ‘laef ya we i no save finis’ long yu. (Jon 17:3) God i singaot olgeta man olsem wan papa we i gat lav, se: “Pikinini blong mi. Yu no mas fogetem ol samting ya we mi mi stap tijim yu long hem. Oltaem yu mas tingbaot ol tok blong mi. Sipos yu mekem olsem, bambae yu no save sot long wan samting long laef blong yu, mo bambae yu gat longfala laef.”​—Ol Proveb 3:​1, 2.

[Futnot]