Yu save rere naoia blong laef long wan niufala wol we i stap kam
!Paradaes i Klosap!
God i krietem wol ya blong ol stret man oli save stap long hem olwe. (Ol Sam 37:29) Hem i putum faswan kapol ya Adam mo Iv, long naesfala garen ya Iden, mo i givim wok ya long tufala mo long olgeta we oli kamaot biaen long tufala blong oli mekem wol ya i kam wan paradaes, mo lukaot gud long hem.—Jenesis 1:28; 2:15.
Tede wol i no kam wan Paradaes olsem we God i wantem. Be nating se i olsem, plan blong God i no jenis. ?Olsem wanem plan ya blong hem bambae i kamtru? Olsem atikol bifo i soem, God bambae i no distroem wol ya, be bambae hem i letem ol gudfala man oli laef long hem. Taem promes blong God i kamtru, ?wol ya bambae i olsem wanem?
Wan gavman nomo long fulwol
I no longtaem, taem gavman blong God long heven i rul antap long olgeta man, wol bambae i kam wan hapi ples we ol man oli glad blong laef wanples, mo oli mekem ol gudfala wok mo oli harem gud from. God i putumap Jisas Kraes blong i rul long fulwol. Tede plante rula oli no rili kea long ol man, be Jisas i defren from we oltaem bambae hem i mekem i gud long olgeta man. Rul blong hem bambae i stanap long lav, mo bambae hem i kaen, i gat sore, mo i mekem i sem mak long olgeta man.—Aesea 11:4.
Olgeta man long wol oli joen gud
Long niufala wol, olgeta man bambae oli no seraot from kantri o bakgraon blong olgeta. Be evriwan bambae oli joen gud. (Revelesen 7:9, 10) Olgeta man we oli laef long wol, bambae oli lavem God mo neba blong olgeta, mo bambae oli wok tugeta long pis blong lukaot gud long wol ya olsem we God i bin wantem fastaem.—Ol Sam 115:16.
Wan gudfala envaeronmen
Taem Kingdom blong God i rul, God bambae i kontrolem weta. (Ol Sam 24:1, 2) Taem Jisas i stap long wol, God i givim paoa long hem blong i save kwaetem wan bigfala win. (Mak 4:39, 41) Aninit long rul blong Kraes, bambae i no gat wan man i save fraet long ol naturol disasta. Taem Kingdom blong God i rul, bambae i gat pis bitwin ol man mo ol animol, mo bambae oli no moa spolem envaeronmen.—Hosea 2:18.
Gudfala helt mo plante kakae
Evri man bambae oli gat gudfala helt. Bambae i no gat wan we i sik, i kam olfala o i ded. (Aesea 35:5, 6) Ol man bambae oli harem gud long wan klin envaeronmen olsem long garen blong Iden bifo. Long niufala wol bambae graon i givim plante kakae, mo olbaot long wol i gat fulap kakae blong evri man. (Jenesis 2:9) Olsem nesen blong Isrel bifo, long Paradaes bambae evriwan oli “kakae bred gogo [oli] fulap gud.”—Levitikas 26:4, 5.
Tru pis mo seftaem
Taem Kingdom blong God i rulum fulwol, olgeta man bambae oli stap long pis, oli kaen, mo oli mekem i sem mak long olgeta man. Bambae i no gat ol faet, man i no mekem i strong long narafala, mo evriwan bambae oli gat samting we oli nidim. Baebol i promes se: “Bambae olgeta wanwan oli sidaon aninit long figtri mo rop blong grep blong olgeta, mo bambae i no gat man i save mekem olgeta oli fraet.”—Maeka 4:3, 4.
Prapa haos mo wok
Evri famle bambae oli gat prapa haos blong olgeta we oli no fraet blong lusum. Mo evri wok we oli mekem, bambae i gat frut blong hem. Olsem Baebol i talem, olgeta we oli laef long niufala wol “bambae oli no taetem bun blong nating,” o wok had blong nating.—Aesea 65:21-23.
Beswan edukesen
Baebol i promes se: “Bambae wol ya i mas fulap gud long save blong Jehova.” (Aesea 11:9) Ol man we oli laef aninit long Kingdom blong God bambae oli lanem plante samting long kriesen mo long Krieta blong olgeta Jehova we i gat bigfala waes. Bambae oli no yusum save blong olgeta blong wokem ol tul blong faet o blong spolem ol narafala man. (Aesea 2:4) Be bambae oli lanem olsem wanem blong laef wanples long pis mo blong lukaot gud long wol ya.—Ol Sam 37:11.
Laef olwe
God i tekem taem blong mekemrere gud wol ya blong yumi save harem gud long laef evri dei. Hem i wantem se ol man oli laef olwe long wol. (Ol Sam 37:29; Aesea 45:18) Blong mekem samting ya i kamtru, God bambae i “solemdaon ded blong olwe.” (Aesea 25:8) Baebol i promes se: “Bambae i no moa gat man i ded, mo bambae man i no moa sore, mo bambae i no moa gat man i krae, mo bambae man i no moa harem nogud long bodi blong hem.” (Revelesen 21:4) God bambae i mekem se ol man we oli laef tru long taem we hem i spolem ol rabis man, mo plante milian dedman we bambae oli laef bakegen long niufala wol, oli gat janis blong laef olwe.—Jon 5:28, 29; Ol Wok 24:15.
Naoia plante milian man oli stap lanem blong laef aninit long Kingdom blong God we i klosap. Nating se oli sinman, be oli stap traehad finis blong kam ol gudfala man we God i wantem se oli laef long niufala wol. ?Olsem wanem oli mekem? Hemia taem oli lanem moa long saed blong Jehova God mo wan we hem i sanem i kam, hemia Jisas Kraes.—Jon 17:3.
Faenemaot moa olsem wanem yu save stap laef tru long en blong wol, mo laef long wan niufala wol we i klosap. Askem wan Witnes blong Jehova blong i mekem wan fri Baebol kos wetem yu long buk ya !Enjoem Laef Olwe!