God i Lavem Yumi Tumas Mo i Soemaot Samting Ya Long Yumi

‘God bambae i givhan long ol man long gladhat blong hem, i mekem we olgeta oli kam stret man long fes blong hem, blong givim laef ya we i no save finis long olgeta.’—ROM 5:21.

1, 2. ?Wanem tufala presen we yumi tokbaot, mo weswan long tufala i hae moa?

WAN tija long Yunivesiti blong Melbourne, Ostrelia, i talem se ol loa we gavman blong Rom i bin stanemap bifo, oli olsem wan presen we i givhan bigwan long olgeta man long wol we oli kamaot biaen. Be Baebol i tijim se God i lavem yumi, nao hem i givim wan presen we praes blong hem i hae moa long ol narafala presen. Presen ya, hemia rod we God i stanemap blong hem i save glad long ol man, hem i save talem se oli stret man long fes blong hem, nao oli gat janis blong God i sevem olgeta mo blong oli kasem laef we i no save finis.

² Taem God i mekem rod blong ol man oli save kasem presen ya, i olsem we hem i stap folem sam loa. Be taem aposol Pol i tokbaot samting ya long Rom japta 5, hem i no tokbaot ol loa. Hem i talem ol nambawan tok ya se: “From we yumi bilif long God, hem i luk yumi se yumi stret man finis long fes blong hem, mo from samting ya, yumi gat pis wetem hem. Masta ya blong yumi Jisas Kraes, hem i putum pis ya long yumi.” Taem ol man oli kasem presen ya blong God, hemia i pulum olgeta blong oli lavem hem. Hemia nao wanem we i hapen long Pol. Hem i raetem se: “[God] i lavem yumi. Tabu Spirit ya we hem i givim finis long yumi, hem i stap mekem yumi save samting ya long hat blong yumi.”—Rom 5:1, 5.

3. ?Wanem kwestin we i stret blong yumi askem?

³ ?From wanem yumi nidim presen ya we God i givim wetem lav? ?God i mekem wanem blong givim presen ya long rod we i stret mo we i givhan long olgeta man? ?Mo ol man wanwan oli mas mekem wanem blong oli naf blong kasem presen ya? Bambae yumi tokbaot ansa blong ol kwestin ya, mo bambae yumi luk olsem wanem ol ansa ya oli soemaot se God i lavem yumi.

Lav Blong God i Winim Sin

4, 5. (a) ?Wanem bigfala samting we Jehova i mekem blong soemaot lav blong hem? (b) ?Blong kasem save long tok blong Rom 5:12, wanem save we yumi mas gat?

⁴ Jehova i lavem ol man tumas, ale hem i mekem wan bigfala samting blong soemaot lav ya. Hem i sanem stret Pikinini blong hem, wan nomo we hem i gat, blong i halpem ol man. Pol i tokbaot samting ya, i se: “God i lavem yumi tumas, mo i soemaot samting ya long yumi long fasin ya we Kraes i ded blong sevem yumi, long taem ya we yumi stap mekem i nogud yet.” (Rom 5:8) Yumi save tingbaot wan impoten save long vas ya we i talem se: ‘Taem yumi stap mekem i nogud yet.’ Olgeta man oli mas save olsem wanem yumi evriwan i mekem i nogud, no yumi kam sinman.

⁵ Pol i gohed blong eksplenem samting ya, i se: “Wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.” (Rom 5:12) Hemia wan samting we yumi naf blong kasem save long hem, from we God i wokem wan buk we i tokbaot olsem wanem laef blong man i stat. Jehova i mekem fas man mo woman, Adam mo Iv. God ya we i Mekem olgeta samting, hem i stret gud olgeta, mo fas bubu man mo bubu woman blong yumi, tufala tu i stret gud olgeta. God i givim wan loa nomo blong tufala i folem, mo hem i talem se sipos tufala i no obei long loa ya, bambae tufala i ded. (Jen. 2:17) Be tufala i jus blong mekem samting we i spolem tufala, tufala i brekem loa blong God. Long fasin ya, tufala i sakemaot God, we i Man blong Givim Loa mo i Hae King blong heven mo wol.—Dut. 32:4, 5.

6. (a) ?From wanem ol pikinini blong Adam oli stap ded? ?Loa blong Moses i jenisim trabol ya? (b) ?Yumi save yusum pijatok blong wan strong sik olsem emofilia, blong soemaot wanem?

⁶ Afta we Adam i kam sinman, hem i jes gat pikinini. Nao hem i pasem sin i go long evri pikinini blong hem, mo olgeta evriwan oli ded from. I tru, olgeta oli no brekem loa blong God olsem Adam, taswe God i no panisim olgeta from sem sin ya we Adam i mekem. Mo long taem ya, God i no stanemap plante loa yet blong ol man oli folem. (Jen 2:17) Nating se i olsem, evri pikinini blong Adam oli bon wetem sin. Taswe, stat long Adam i kam kasem taem we God i givim loa long ol man Isrel, sin mo ded tufala i rul olsem king. Loa ya i soemaot klia long olgeta se oli sinman. (Ridim Rom 5:13, 14.) Blong soemaot wok we sin i mekem long man, yumi save yusum pijatok blong ol strong sik we samtaem sam man oli bon wetem, olsem sik ya anemia we plante man long ol kantri raonabaot long Mediteranian Si oli kasem, mo sik ya emofilia (hemophilia). Maet yu bin harem stori blong boe ya Alexis. Papa blong hem i King blong Rasia, nem blong hem Nicholas 2 mo mama blong hem, nem blong hem Alexandra. Boe ya i bon wetem sik ya emofilia, we i wan rabis sik blong blad. Long ol famle olsem, i gat samfala we maet oli gat sik ya long bodi blong olgeta mo oli save pasem i go long ol pikinini blong olgeta, be sik ya i no spolem olgeta. I no olsem long saed blong sin. Adam i pasem sin i go long evri man. Yumi evriwan i harem nogud long trabol ya. Mo trabol ya i mekem se yumi evriwan i kasem ded. Mo yumi pasem trabol ya i go long evri pikinini blong yumi. ?Olsem wanem? ?I gat rod blong winim trabol ya samtaem?

God i Yusum Jisas Kraes Blong Winim Trabol Ya

7, 8. ?Frut we i kamaot long laef blong tufala man ya we tufala i stret gud olgeta, i defren olsem wanem?

⁷ Jehova i lavem yumi nao hem i stanemap wan rod blong ol man oli winim sin ya we oli bon wetem. Aposol Pol i eksplenem se i gat wan man we i save givhan long yumi blong winim sin ya. Man ya i bon plante yia afta long Adam mo hem tu i stret gud olgeta. Blong talem stret, man ya i olsem nambatu Adam. (1 Kor. 15:45) Nating se tufala man ya tufala i stret gud olgeta, be frut we i kamaot long laef blong tufala i no sem mak. ?Ol frut oli no sem mak olsem wanem?—Ridim Rom 5:15, 16.

⁸ Aposol Pol i raetem se: “Sin ya we Adam i mekem i no olsem presen we God i givim i kam nomo long yumi.” Adam i gat fol from sin ya we hem i mekem, mo hem i kasem stret panis blong hem, hemia ded. Be i no hem wan nomo we i ded. Yumi ridim se: “Sin ya we wan man nomo i mekem, hem i wan bigfala samting, we ol man oli stap ded from.” Folem stret fasin blong God blong jajem man, evri pikinini blong Adam we oli no stret gud olgeta, oli mas kasem sem panis we Adam i kasem, mo hemia i minim yumi tu. Be yumi harem gud from we yumi save se Jisas we i stret gud olgeta, hem i naf blong givim wan samting long ol man we i defren olgeta long samting we Adam i givim. ?Wanem samting i kamaot from? Ansa blong kwestin ya i stap long ol tok we Pol i talem se: “God i talem se ol man oli save go fri, oli save laef.”—Rom 5:18.

9. ?Folem ol tok long Rom 5:16, 18, God i stap mekem wanem taem hem i talem se ol man oli stret man long fes blong hem?

⁹ ?Tok ya long lanwis Grik we oli tanem i kam ‘oli stret man long fes blong hem,’ i minim wanem? Tija long Yunivesiti we yumi tokbaot long stat blong stadi ya, i raetem se: “Tok ya i pulum tingting blong yumi i go long wan samting we i stret folem loa. Tok ya i no soemaot wan jenis we man i mekem, nogat. Be i soemaot se lukluk we God i gat long saed blong man, i jenis. . . . Pijatok ya i soemaot God olsem wan jaj. I olsem se hem i jajem wan man we i pas long kot, nao hem i mekem desisen se man ya i no gat fol. Man ya i kam pas long kot from we hem i mekem i no stret, be God i letem hem i go fri.”

10. ?Wanem samting we Jisas i mekem, blong God i save talem se ol man oli stret man long fes blong hem?

¹⁰ ?Wanem samting i mekem se God ya blong stret fasin we i stap “jajem olgeta man blong wol,” i save talem se wan man we i no stret, i fri long ol rong blong hem? (Jen. 18:25) Fastaem, God i sanem stret Pikinini blong hem, wan nomo we hem i gat, i kamdaon long wol. Jisas i mekem samting we Papa blong hem i wantem, long fasin we i stret gud olgeta. Hem i mekem olsem, nating se plante samting oli kam blong traem hem, ol man oli jikim hem bitim mak, mo oli mekem i nogud long hem. Hem i holemstrong long God gogo kasem we hem i ded long wan pos. (Hib. 2:10) Taem Jisas i givim laef blong hem we i stret gud olgeta olsem wan sakrefaes, hem i pemaot ol pikinini blong Adam, oli kam fri long sin mo ded.—Mat. 20:28; Rom 5:6-8.

11. ?Wanem i mekem se praes blong ransom ya i stret blong pemaot olgeta man?

¹¹ Long wan narafala vas, Pol i tokbaot samting ya se ‘wan ransom we praes blong hem i stret blong pemaot olgeta man.’ (1 Tim. 2:6, NW) ?Praes ya i stret olsem wanem? Adam i karem sin mo ded i kam long plante milian man, we evriwan ya oli kamaot long hem. I tru se Jisas we i stret gud olgeta, i naf blong givim laef long plante milian pikinini we oli stret gud olgeta.a Taswe, fastaem yumi gat tingting ya se, laef blong Jisas wetem laef blong ol stret pikinini blong hem we hem i save gat, oli mekem wan sakrefaes we i sem mak olsem laef blong Adam mo ol pikinini blong hem we oli sinman. Be Baebol i no talem se ol pikinini we Jisas i save gat, oli haf blong ransom ya tu. Rom 5:15-19 i makem poen ya se ded blong “wan man nomo” i mekem se ol man oli save go fri. Yes, laef blong Jisas we i stret olgeta, i stret gud long laef blong Adam. Taswe, tingting blong yumi i mas stap long Jisas Kraes hem wan nomo. ‘Stret samting ya we Jisas i mekem,’ hemia fasin blong hem blong obei mo blong holemstrong long God gogo kasem ded, i openem rod long ol defdefren man blong oli kasem presen ya we God i givim i go nomo long ol man, mo blong oli kasem laef. (2 Kor. 5:14, 15; 1 Pita 3:18) ?Ransom ya i wok olsem wanem?

Ransom i Mekem Man i Kam Fri Long Sin

12, 13. ?From wanem man i nidim sore mo lav blong God, blong hem i save kam stret man long fes blong God?

¹² Jehova God i agri long ransom sakrefaes ya we Pikinini blong hem i givim. (Hib. 9:24; 10:10, 12) Nating se i olsem, ol disaepol blong Jisas long wol ya, wetem ol gudfala aposol blong hem, oli sinman yet. Oli stap mestem yet, nomata se oli traehad blong mekem samting we i stret. ?From wanem? From we oli bon wetem sin. (Rom 7:18-20) Be God i save mekem wan samting blong givhan long olgeta, mo hemia nao wanem we hem i mekem. God i agri long ‘ransom ya we praes blong hem i stret blong pemaot olgeta man,’ mo Hem i glad blong yusum sakrefaes ya blong givhan long olgeta man blong hem.

¹³ Ol aposol mo ol narafala oli mekem ol gudfala wok. Be samting ya i no min se God i mas yusum ransom sakrefaes, blong pemaot sin blong olgeta from we oli mekem ol gudfala wok ya, nogat. God i yusum sakrefaes blong Jisas blong pemaot sin blong olgeta from we hem i sore long olgeta, mo from we hem i lavem olgeta tumas. Hem i mekem ol aposol mo ol narafala man oli fri, nao oli no moa kasem panis from rong blong olgeta. Hem i lukluk olgeta se oli no moa gat rong from sin ya we oli bon wetem, ale oli kam klin long fes blong hem. Pol i mekem poen ya i klia, se: “God i givhan long yufala long gladhat blong hem, i sevem yufala, from we yufala i bilif long Kraes. Be ol samting ya i no kamaot long yufala, mo i no from ol samting we yufala i mekem. Hem i kamaot long God nomo, olsem wan samting we hem i givim i go nomo long yufala.”—Efes. 2:8.

14, 15. ?Wanem blesing we i stap long fored blong olgeta we God i talem se oli stret man long fes blong hem? ?Be olgeta oli mas gohed blong mekem wanem?

¹⁴ God ya we i gat Olgeta Paoa, i fogivim man from sin ya we hem i kasem long papa mama blong hem, wetem ol rong we man ya i mekem long laef blong hem. !Hemia i wan nambawan presen! Yumi no save kaontem hamas sin we ol man wanwan oli mekem bifo we oli kam Kristin, be God i save yusum ransom sakrefaes blong fogivim ol sin ya. Pol i raetem se: “Be biaen long plante sin we ol man oli mekem, God i givim presen ya long ol man long gladhat blong hem nomo, we i talem long olgeta se, ‘Long fes blong mi, yufala i stret nomo, yufala i save go fri.’” (Rom 5:16) Ol aposol mo ol narafala man we oli kasem presen ya we God i givim from lav blong hem (hemia blong God i talem se oli stret man long fes blong hem), oli mas gohed blong wosipim tru God wetem bilif. ?Wanem blesing we bambae oli kasem? “Long Jisas Kraes, God i stap givhan gud long ol man long gladhat blong hem. Hem i givim presen blong hem i go nomo long olgeta, we i talem se, ‘Yufala i stret man long fes blong mi.’ Mo ol man ya bambae oli joen long Kraes long laef blong hem we oli win oltaem [“bambae oli rul olsem ol king,” NW].” Yes, presen ya blong God blong kam stret man long fes blong hem, i karem frut we i defren olgeta long sin blong Adam. Presen ya i mekem se man i kasem laef.—Rom 5:17; ridim Luk 22:28-30.

¹⁵ Ol man we oli kasem presen ya we God i talem se oli stret man long fes blong hem, oli kam ol pikinni blong God. Bambae oli joen long Kraes blong kasem haf blong ol gudgudfala samting we God i putum se bambae oli blong Kraes. From samting ya, oli gat hop blong laef bakegen long heven, olsem ol spirit pikinini blong God, blong “oli rul olsem ol king” wetem Jisas Kraes.—Ridim Rom 8:15-17, 23.

God i Soemaot Lav Blong Hem Long Ol Narafala

16. ?Ol man tede we oli putum tingting blong olgeta long laef we i no save finis long wol, olgeta tu oli save kasem wanem presen?

¹⁶ I no olgeta man evriwan we bambae oli “rul olsem ol king” wetem Kraes long heven, nating se oli bilif mo oli mekem wok blong God. Plante Kristin oli putum tingting blong olgeta i stap long promes ya blong Baebol, long saed blong laef we i no save finis long paradaes long wol. Ol man blong God we oli laef bifo long taem blong Jisas, olgeta tu oli bilif long promes ya. ?Olsem wanem? ?Ol Kristin ya tede, olgeta tu oli save kasem presen blong God, hemia blong God i lukluk olgeta olsem ol stret man long fes blong hem we bambae oli kasem laef long wol? !Folem ol tok we Pol i raetem long buk blong Rom, yumi save se yes!

17, 18. (a) ?From we Ebraham i bilif, God i tingbaot hem olsem wanem? (b) ?Wanem i save mekem se Jehova i luk Ebraham se hem i stret man long fes blong hem?

¹⁷ Pol i tokbaot wan man blong bilif, hemia Ebraham. Ebraham i laef long taem we God i no givim loa yet long ol man Isrel, mo hem i laef plante yia bifo we Jisas i openem rod blong sam man oli save go long heven. (Hib. 10:19, 20) Yumi ridim se: “God i mekem promes long Ebraham, mo long olgeta we oli kamaot biaen long hem, se bambae wol ya i blong hem. Be hem i no mekem promes ya from we Ebraham i stap mekem ol samting we Loa blong Moses i talem, hem i mekem from we Ebraham i bilif long hem, nao hem i luk Ebraham se hem i wan stret man long fes blong hem.” (Rom 4:13; Jem. 2:23, 24) Yes, God i luk Ebraham se hem i wan stret man long fes blong hem.—Ridim Rom 4:20-22.

¹⁸ Hemia i no min se long ol yia we Ebraham i mekem wok blong God, hem i no gat sin. Ebraham i no stret gud olgeta. (Rom 3:10, 23) Be waes blong Jehova i bigwan bitim mak, nao hem i luk strong bilif blong Ebraham, mo ol bigfala wok we bilif blong hem i pulum hem blong mekem. Ebraham i bilif strong long impoten Pikinini ya we Baebol i promes se bambae i kamtru long “laen” blong hem. Impoten Pikinini ya hemia Mesaea, no Kraes. (Jen. 15:6; 22:15-18, NW) Long sem fasin, God ya we i bigfala Jaj blong yumi, hem i save yusum ransom no sakrefaes ya blong Jisas, ‘we i pem rod finis’ blong fogivim olgeta sin we ol man bifo oli bin mekem. Long rod ya, Ebraham mo ol narafala man blong bilif we oli ded bifo we Jisas i kam long wol, oli save laef bakegen.—Ridim Rom 3:24, 25; Sam 32:1, 2.

Yumi Glad From We Tede God i Luk Yumi Se Yumi Stret Man

19. ?From wanem tingting blong God long saed blong Ebraham, i mekem plante man tede oli harem gud?

¹⁹ Save ya se God i luk Ebraham se hem i stret man, i mekem ol tru Kristin tede oli harem gud. Taem Jehova i talem se Ebraham i stret man, hemia i no min se Jehova i lukluk Ebraham se hem i stret man olsem ol Kristin ya we Hem i makemaot olgeta wetem tabu spirit blong oli ‘joen long Kraes, blong kasem haf blong ol gudgudfala samting we God i putum i stap blong Kraes.’ Olgeta ya we God i jusumaot olgeta, oli ‘kam ol tabu man blong hem’ mo God i agri blong oli kam ol “pikinini blong hem.” (Rom 1:7, NW; 8:14, 17, 33) Be long saed blong Ebraham, hem i kam “fren blong God,” mo samting ya i hapen bifo we Jisas i givim laef blong hem blong pemaot sin blong ol man. (Jem. 2:23; Aes. 41:8) Ale, ?olsem wanem nao long ol tru Kristin we oli putum tingting blong olgeta long laef we i no save finis long Paradaes long wol?

20. ?Wanem samting we God i wantem se ol man tede oli mekem, blong hem i luk olgeta se oli stret man, olsem Ebraham?

²⁰ Ol tru Kristin ya oli no kasem ‘presen ya we God i givim fri nomo.’ Presen ya, hemia blong kam ol stret man we bambae oli laef long heven, from sakrefaes blong ‘Jisas Kraes we i pem rod, blong olgeta oli go fri.’ (Rom 3:24; 5:15, 17) Nating se i olsem, oli bilif strong long God mo long ransom sakrefaes, mo oli mekem ol gudfala wok blong soemaot bilif blong olgeta. Wan long ol gudfala wok we oli mekem, hemia blong “talemaot we God i King [“talemaot Kingdom blong God,” NW] . . . mo tijim ol man long gud nius blong Jisas Kraes, Masta blong yumi.” (Wok 28:31) Taswe, Jehova i save luk ol tru Kristin ya se oli stret man long fes blong hem, sem mak olsem we hem i mekem long Ebraham. Presen we olgeta ya oli kasem, hemia blong fren gud wetem God, i defren long presen ‘ya we God i givim fri nomo’ long ol Kristin we tabu spirit i makemaot olgeta. Nating se i olsem, ol man ya blong God oli glad long presen ya, oli talem tangkiu long God from.

21. ?Wanem ol gudfala samting we yumi save kasem from lav blong Jehova mo stret fasin blong hem?

²¹ Ol lida blong gavman oli promes blong mekem plante samting, be i no olgeta we oli givim hop ya blong laef we i no save finis long wol. Janis ya blong gat laef we i no save finis, i stanap long stamba tingting blong God ya we i waes mo i Hae King blong heven mo wol. Jehova i mekem ol samting sloslo, blong stamba tingting ya blong hem i kamtru. Ol samting ya oli laenap wetem stret fasin blong hem. Mo antap long hemia, oli soemaot bigfala lav blong God. Pol i tok tru nomo taem hem i talem se: “God i lavem yumi tumas, mo i soemaot samting ya long yumi long fasin ya we Kraes i ded blong sevem yumi, long taem ya we yumi stap mekem i nogud yet.”—Rom. 5:8.

[Futnot]

?Yu Yu Tingbaot?

• ?Wanem samting we ol pikinini blong Adam oli kasem, mo wanem i kamaot from?

• ?God i mekem wanem blong givim wan ransom we praes blong hem i stret blong pemaot olgeta man? ?Mo praes ya i stret olsem wanem?

• ?Presen ya we God i talem se yu yu stret man long fes blong hem, i givim wanem janis long yu?

[Tok blong pija long pej 17]

Stret man ya Adam, i mekem sin. Stret man ya Jisas i givim ‘wan ransom we praes blong hem i stret blong pemaot olgeta man’

[Tok blong pija long pej 19]

!Jisas i openem rod blong God i save talem se yumi stret man long fes blong hem! !Hemia i wan gud nius ya!