Leftemap Tingting Blong Oli Wantem Kasem Ol Mak Long Saed Blong Speret
1 !Bifo i kam i neva gat plante yangfala we oli joen long wok blong talemaot gud nyus blong Kingdom olsem tede! Plante taosen yangfala oli folem advaes long Eklesiastis 12:1 se: “Yu mas tingbaot Bigfala Man we i wokem yu. Yu mas tingbaot hem taem yu yu yang yet.” ?Wanem samting i pusum ol yangfala blong oli joen oltaem long wok blong prij, mo from wanem plante long olgeta oli mekem paenia?
2 Oli folem nambawan fasin blong yangfala Timote. Mama mo bubu blong hem tufala i givim ol samting long saed blong speret long hem taem hem i yang pikinini yet mo tufala i leftemap tingting blong hem blong i wantem kasem ol mak long saed blong speret. (2 Tim. 3:14, 15) Taswe, taem i gat moa nid long wok, hem i naf mo i rere finis blong tekem jans blong wok.—Wok 16:1-3.
3 ?Olsem wanem blong leftemap tingting blong ol yangfala blong oli wantem kasem ol mak long saed blong speret? ?Oli mas gat wanem kaen faondesen fastaem? ?Olsem wanem ol papa mama oli save mekem se ol pikinini blong olgeta oli gat fasin tangkyu long trutok mo givhan long olgeta blong oli putum ol gudfala mak blong kasem?
4 Putum Faondesen Long Baebol: Ol papa mama oli mas sua se ol samting we oli stap lanem pikinini long hem, i kamaot long Jeova blong mekem se ‘oli waes, i save lidim olgeta long rod ya we God i stap yusum blong sevem ol man.’ (2 Tim. 3:15) Traehad blong tijim olgeta blong oli laekem tumas Baebol, Tok blong God. Blong mekem olsem, oltaem ol papa mama oli mas mekem Baebol stadi we i stret long nid blong ol pikinini, mo tu ol pikinini ya oli mas go oltaem long ol miting. Ol yangfala oli mas gat strong bilif blong mekem se bambae oli wantem kasem ol mak long saed blong speret, taswe oli mas gat prapa plan blong stadi mo olgeta nomo oli mas wokem fasin fren wetem Jeova.—1 Tes. 5:21; Hib. 11:1.
5 Ol yangfala Kristin bambae oli wantem ol samting long saed blong speret sipos papa mama mo ol narafala Kristin bigman long kongregesen oli givim gudfala eksampel mo oli soem “glad blong Jeova” long laef blong olgeta. (Neh. 8:10) Taem yumi stap soemaot fasin glad, yumi evriwan i save givhan long ol yangfala blong oli luksave se ol samting we ol trufala Kristin man oli mas mekem oli no hevi tumas.—1 Jon 5:3.
6 Ol paenia, ol misinari, mo ol elda we oli goraon oli givhan long plante yangfala finis taem oli joen wetem olgeta long wok blong prij no taem oli talem wan tok we i leftemap tingting blong olgeta. Ol papa mama oli save givhan long olgeta sipos oli askem ol paenia blong oli kam long haos blong olgeta blong kakae no long narafala taem we oli save joen wanples olsem Kristin. Jisas Kraes i givim wan nambawan eksampel, hem i skelemgud taem blong hem blong hem i save tingbaot ol yangfala.—Mak 10:13-16.
7 Putum Ol Mak: Taem ol papa mama oli tijimgud ol pikinini blong olgeta, oltaem ol pikinini oli kwik blong putum ol prapa mak long saed blong speret we oli wantem. Nao taem ol yangfala ya oli mekem disisin se wanem mak long saed blong speret oli wantem kasem, maet paenia, no go long ples we i gat bigfala nid, wok long Betel no misinari, mo ol narafala wok olsem, ol papa mama mo ol narafala Kristin we oli bigman long saed blong speret oli save leftemap tingting blong olgeta blong gohed from mak blong olgeta, mo givim advaes long olgeta we i save pusum olgeta i gohed moa.
8 Evri kongregesen wanwan oli olsem wan famle. Taswe yumi evriwan i mas intres blong givhan long ol yangfala blong gohed blong wokbaot long trutok mo blong gohed moa long saed blong speret. Yumi save mekem olsem taem yumi soemaot lav long olgeta mo leftemap tingting blong olgeta blong oli wantem kasem ol mak long saed blong speret.